1. Ka mini lubéi buidu lan wóuserun? (2 Timotéu 4:5).

 GAYARAATI louchawagún úaragua wamá lun Heowá luma tun lóundarun dan le wagagibudagun luma óuchawaguni. Kaba íderaguawa lun wagagibudagun luma katei le? Lau buidu lan wóuserun, agagudúañu wagía ani “deregüdagu lidan wafiñen” (aliiha huméi 2 Timotéu 4:5). Ka lunbei wadügüni lun buidu lan wóuserun? Mosu darangilu wamá, wasaminarun buidu ani áfaagua wagíame lun warihini katei kei larihini Heowá. Anhein wadüga, meferidirun wabéi wachügü.

2. Kaba wariha lidan aturiahani le?

² Lidan aturiahani le lubaragiñebei le, ayanuhatiwa luagu ǘrüwa sügǘ hénrenguti le gayaraabei lasuseredun bóugudi luéi damuriguaü. Lidan aturiahani le, warihiba ǘrüwa sügǘ hénrenguti le gayaraabei lasuseredun lidan damuriguaü ani le gayaraabei giñe lóuchaguni úaragua wamá lun Heowá: dan le wasaminarun óusera láadiwa lan aban íbiri wuriba, dan le lererehóun woun luma dan le hénrengu lan woun wánharun lun asansiruni le tadügübei lóundarun Heowá. Anhein asusereda aban katei ítarati woun, ka lunbei wadügüni lun buidu lan wóuserun luma lun úaraguameme wamá lun Heowá luma tun lóundarun?

3. Ka gayaraabei lasuseredun ánhawa asaminara óusera láadiwa lan aban íbiri wuriba?

³ Saminañahaadün san óusera laadün lan aban íbiri wuriba, ani gániti íbiri ligía buligasion lidan damuriguaü? Chóuruti mabusenrun lan yebe íbiri ligía ladügün wuribani hun (Rom. 3:23; Sant. 3:2). Lau sun lira, gáriti hun le ladügübei. Háfuga féridi humuti hidabagu asaminara luagun le asuseredubei ani álügüdaguatün hungua: “Anhein gayara lubéi ladügün aban íbiri aban katei ítarati,  lóundarun funa san Bungiu to?”. Anihán le labusenrubei Satanási lun hasaminarun (2 Ko. 2:11). Gayaraati ladisedagügüdüniwa saminaü mabuidunti le luéi Heowá luma tuéi lóundarun. Ligíati, anhein samina hubéi óusera laadün lan aban íbiri wuriba, ka gayaraabei hadügüni lun buidu lan hóuserun ani lun masaminarun humá wuriba?

4. a) Ka ladügübei Hosé lun lóuserun lau lichú aau dan le hóuserunbalin wuriba? (Agumesehani 50:19-21). b) Ka wafurendeirubei lídangiñe le asuseredubei lun Hosé?

⁴ Mareidahan wamá igarihabu. Dan meha le aweirideina lubéi Hosé, aba meha hóuseruni líbugañanu wuriba. Iyereeguti meha houn, darí lun busén hamá meha fiu hádangiñe háfaruni hilagubei (Agu. 37:4, 18-22). Aba meha haluguruni idamunime. Lárigiñe lira, gagibuguati meha Hosé luma saragu lénrengunga luagu 13 irumu. Gayaraati hamuga meha lebelurun machouruni lun luagu línsiñehabu Heowá ani gayaraati hamuga giñe lálügüdagun lungua anhein ígira laali lubéi Heowá lidan dan le hénrengutimabei. Gama lumoun, magañidunti. Lubaragiñe lira, óuserati lau lichú aau ani kipu lumuti darangilaü. Ani dan le gachansin lubéi lun lafayeiragüdüniña líbirigu luagu wuribati le hadügübei lun, madügün lumuti, feruduna lumutiña ani arufudati ínsiñeni houn (Agu. 45:4, 5). Ka uagu lóusera ítara? Ladüga samina lan buidu. Lubaragiñe letenirun lun liturobulin, ariha lumuti katei lidan amu igaburi, ani aba lasaminarun luagun lisuuni Heowá (aliiha huméi Agumesehani 50:19-21). Ka wafurendeirubei? Anhein óusera laadün lubéi somu gürigia wuriba, mírudagua humá asaminara wuriba luagu Heowá masaminarun huguyame bulíei laadün lan. Lubaragiñe hasaminarun ítara, ráramagua humá asaminara ida liña lan líderagunün awandei sügǘ ligía. Aranseñu humá giñe lun feruduna humaniña ha achararubaña hun haritagua humeime luagu “darugua lan ínsiñeni lau saragu figóu” (1 Fe. 4:8).

5. Ida liña lóuserun Mikeasi lau lichú aau dan le lasandirunbei mouserúniwa lan buidu?

⁵ Ariha waméi le asuseredubei lun aban wéiyaali lidan afiñeni gíriti Mikeasi le awinwandubei Suedi Meriga. b Luagu aban dan, sanditi wuriba lan hóuseruni fiu wéiyaaña lidan afiñeni. Ariñagati: “Mawinwandunñahagidina aban katei libe le. Nidiheritina meha saragu. Siñati meha narumugun ani wéiriti meha nayahun ladüga ibidiñe lan nun kaba lan nadüga”. Lau sun lira, óuserati Mikeasi lau lichú aau ani áfaaguati lun lárügüdagun lungua. Furíeiti saragu lun lamuriahan sífiri sandu luma Heowá luma erei lun lawandun. Ani áluahati meha giñe ariñahani tidan wani agumeiraguagüdüni. Ka wafurendeirubei? Anhein samina hubéi óusera taadün lan o óusera laadün lan aban íbiri wuriba, kipu humá darangilaü ani áfaagua humá lun hárügüdagun hungua danme le liabin saminaü wuribati hichüguagun. Másiñati anihein lan sügǘ le ibidiñeti hun, le adügübei lun lóuserun odi lun layanuhan aban gürigia ítara. Ligíati, abahüdaha huméi sun katei lun Heowá ani amuriaha humá luma lun líderagunün arihei katei kei larihini íbiri ligía. Líderagubadün katei le lun gunfuranda humani mabusenrun lan yebe híbiri ladügün wuribani hun, líderagubadün giñe lun feruduna humani lichara (Ari. 19:11). Haritagua humá aríagu liña lan Heowá lun sun le asuseredubei hun ani líchuguba lan erei hun lun hawandun (2 Kro. 16:9; Apur. 5:8).

6. Ka uagu súdini lubéi harihini larufuduñein lan Heowá línsiñehabu hun dan le heresibirun ererehóuni lúmagiñe? (Ebüréu 12:5, 6, 11).

⁶ Dan le lererehóun woun gayaraati gari lan woun. Gama lumoun, ánhawa etenira lúnrügü igarigu le wasandirubei, gayaraabei meberesen wamá lau lererehóun woun o wasaminarun maricha lan ani hanarimeya lan ererehóuni ligía.  Gayaraati giñe ladügün lun marihin wamani ladüga lan wínsiñe lun Heowá lererehanbei woun (aliiha huméi Ebüréu 12:5, 6, 11). Ánhawa ígiraguagüda woungua lun le wasandirubei wíchuguña chansi lun Satanási. Busenti lun wamahadun lun ererehóuni ani lun wadisedun luéi Heowá luma luéi damuriguaü. Anhein ererehóuali lubéi hun, kaba íderaguaün lun hóuserun lau lichú aau?

7. a) Ítara kei warihini lidan dibuhu, ka dasi líchugubei Heowá lun Féduru lárigiñebei lánharun lun ererehóuni? b) Ka wafurendeirubei lúmagiñe Féduru?

⁷ Anha humá lun ererehóuni ani adüga huméi asansiruni le mégeiwabei. Ererehati Hesusu lun Féduru hagibugiñe ha híbiri apostolugu lóugiñe aban wéiyaasu (Mar. 8:33; Luk. 22:31-34). Ma funa lueirin busiganu le lasandirubei Féduru! Ani úaraguamemeti Féduru lun Hesusu, ánhati lun ererehóuni ani furendeiti lídangiñe lichara. Ladüga lánharun Féduru lun ererehóuni, biní lumuti Heowá ani ruti saragu dasi lun lidan damuriguaü (Huan 21:15-17; Adü. 10:24-33; 1 Fe. 1:1). Ka wafurendeirubei? Metenira wamá lun busiganu le wásügürübei, ánhara wamá lun ererehóuni ani adüga waméi asansiruni le wemegeirubei. Anhein hadüga ítara, huutimabadün lun Heowá luma houn íbirigu.

8, 9. Ida liña san lasandiragun Bernardo lungua furumiñe dan le lererehóunbei lun ani ka íderagubalin lun lasansiruni ligaburi lisaminan?

⁸ Teni wamá lun le asuseredubei lun Bernardo, aban íbiri le awinwandubei Mosanbíke. Leseriwiduña meha kei wéiyaali lidan afiñeni, ani aba leferidiruni dasi ligía. Ida liña san lasandiragun lungua furumiñe? Ariñagati: “Wéiriti meha igarihabu nuagu ladüga mínsiñeti meha nun ida liña lan hererehan nun”. Nidiheriti meha luagu le gayaraabei hasaminaruni íbirigu luagu. Ariñagati: “Sügütina saragu hati lubá narihini katei lidan aban igaburi buiti luma lun nafiñerun luagu Heowá luma tuagu lóundarun”. Ka íderagubalin?

⁹ Aba lasansiruni Bernardo ligaburi lisaminan. Ariñagati: “Dan le meha neseriwidunbei kei wéiyaali lidan afiñeni, yusu numuti meha Ebüréu 12:7 lun níderaguniña íbirigu arihei ererehóuni lúmagiñeti Heowá lidan aban igaburi buiti. Ábati nálügüdagun nungua: ‘Ka lúnbaña hafalaruni adundehani le lídanbei bérusu le?’. Sun lubúeingu Heowá, íbini au”. Adügati giñe Bernardo amu katei lun lederebudagüdüni lafiñen luagu Heowá luma tuagu lóundarun. Ábatima letenirun lun laliihanu Bíbülia luma lun lararamagun asaminara hulili luagun le laliihabei. Ani íbini nidiherigili  lan meha luagu le hasaminarubei íbirigu luagu, furiti meha apurichiha hama ani ru ligía óunabagülei lidan adamuridaguni. Lau lásügürün dan, ábaya leseriwidun kei wéiyaali lidan afiñeni. Anhein ererehóuali lubéi hun, ítara kei ladügüni Bernardo, áfaagua humá lun masandirun humá busiganu luagu le asuseredubei hun, ánhara humá lun adundehani ani adüga huméi asansiruni le emegeirúbei (Ari. 8:33; 22:4). c Anhein hadüga sun katei le, gayaraati hachoururuni líchuguba lan Heowá hafayeiruaha ladüga madisedun humá luéi ni tuéi lóundarun.

10. Ka asansiruni tidan lóundarun Heowá adügübei lun múaragun hamá fiu ísüraelina?

¹⁰ Dan le anihein lan asansiruni tidan lóundarun Heowá, gayaraati ladügün katei le lun lóuchawagun úaragua wamá. Ánhawa móunigi, gayaraati íbini wadisedun luéi Heowá. Samina humá luagu asansiruni le tadügübei lóundarun Heowá dan le lebelurunbei lilurudun Moisesi lau asansiruni houn fiu ísüraelina. Lubaragiñe dan ligía, ha meha íchügüdinaü hadan iduheñu hagía meha fádirigubaña hábiñe; adügatiña meha latarü ani adüga hagía sákürifisiu luagu hafulesein haduheñu (Agu. 8:20, 21; 12:7; 26:25; 35:1, 6, 7; Hobu 1:5). Gama lumoun, lau lachülürün Lúrudu, mámaaña meha hachügüdina iduheñu adügei dasi ligía. Aba líridun Heowá fádirigu hádangiñe liduheñu Aarón lun hadügüni adagaragüdüni. Lúmagiñe dan ligía, anhein meha adüga aban hachügüdina iduheñu adagaragüdüni ani mama hádangiñeti liduheñu Aarón, gayaraati meha lounwen (Fad. 17:3-6, 8, 9). d Anihán funa san lébunabei lagarabaagun Koré, Datán luma Abirán, hama 250 ábutigu luagun Moisesi luma Aarón? (1 Lur. 16:1-3). Siñati wachoururuni ítara liña lan. Meberesenga ka lan asuseredubei, múaragunti meha Koré hama wügüriña ha afalarubalin lun Heowá. Ka gayaraabei hadügüni anhein adüga aban asansiruni tidan lóundarun Heowá lun lóuchawagun úaragua humá?

11. Ka wafurendeirubei hámagiñe lewitagu ha keatüna?

¹¹ Ídeha humá tau sun hanigi lidan asansiruni le tadügübei lóundarun Heowá. Dan le meha haweiyasuhan ísüraelina lídangiñe fulasu mageirawati, adügatiña meha lewitagu ha hádangiñebaña liduheñu Keatü aban wadagimanu espechaliti. Sagü meha háguyun ísüraelina, barǘ hamutu meha lánigu Keatü külán lubagüsina daradu hagibugiñe sun lumutuniña Heowá (1 Lur. 3:29, 31; 10:33; Hos. 3:2-4). Ma lubuidun chansi! Gama lumoun, dan le hebelurunbei ísüraelina lidoun Fulasu Füramasewati, aba lasansirun sun katei. Memegeirun waali meha hasansihani tubara lubagüsina daradu. Ligíati, dan le larúeihanbei Salomón, fiu hádangiñe liduheñu Keatü seriwitiña kei eremuhatiña, híbiri seriwitiña kei óunigirutiña bena hati híbiri óunigirei tirisin ténpulu (1 Kro. 6:31-33; 26:1, 24). Mariñaguntu Bíbülia aba lan hekeharun keatüna o amuriaha hamá wadagimanu le buídutimati, lau sun ibiha hamá meha dasi le espechaliti lidan dan le sügühalibei. Ka wafurendeirubei? Ídeha humá tau sun hanigi lidan asansiruni le tadügübei lóundarun Heowá, íbini lasansirun hidasin. Gunda humá lau furumiñeguarügü wadagimanu le ichugúbei hun. Haritagua huméi mama lan dasi le hibihibei tidan lóundarun Heowá adügübei lun gebegi humá kei gürigia. Lun Heowá, súdinitimati gaganbadi humá sügǘ lau furumiñeguarügü dasi (1 Sam. 15:22).

12. Ida liña meha tasandiragun Zaira tungua dan le táfuridunbei Betelirugugiñe?

¹² Ariha waméi tikesin Zaira, aban íbiri to awinwanduboun Oriente Medio. Wéiriti meha  lebegi eseriwiduni Betelirugu tun, ñein lubéi teseriwida lóugiñe 23 irumu. Ábati tounahóun eseriwida kei prekursora espechalitu. Abahüdaguatu: “Gáriti meha asansiruni ligía nun. Saminatina meha meseriwín nan lun ni kata ani aba meha nálügüdagun nungua ka lan katei wuribati nadügübei”. Híruti adüga hamá fiu íbirigu dandu würiña kei wügüriña ha lílana damuriguaü lúntima tasandiragun tungua wuriba ladüga hariñagun tun: “Lun hamuga buídutima lan badügüni sun katei, mígiruntu hamuga lóundarun Heowá lun bidin”. Adügati meha katei le lun wuribatima lan tasandiragun Zaira tungua ani sagü meha guñoun tayahun. Gama lumoun, ariñagatu: “Masandiruntina meha ni murusun machouruni tuagu lóundarun Heowá ni luagu hínsiñe nan lun”. Ka íderagubarun lun tóuserun lau lichú aau?

13. Ka tadügübei Zaira lun tiñuragun lídangiñe luriban saminaü?

¹³ Lun tasandiragun Zaira tungua buidu, aliihatu ariñahani tídangiñe wani agumeiraguagüdüni le ayanuhabei luagu le tásügürübei. Aban lídangiñe katei le íderagubarun saragu dariwati tidan La Atalaya to lánina 1 lidan bián-hati 2001, le gíribei “Gayaraati hagagibudagun luma maguraasuni”. Lidan aturiahani le akutihóuati sügǘ luáguti Márükosu, le abürühabei aban tídangiñe líburu to tídanboun Bíbülia, háfuga sandigua lan lungua ítara kei tasandiragun Zaira tungua dan le lasansirunbei tidasin tidan lóundarun Heowá. Ariñagatu Zaira: “Lani Márükosu hénpulu ligíatima íderagubalina lun mábürühan lan narüna”. Ragütu hawagu tumadagu, madisedun tun hawéi íbirigu ani masigirun tuguya asaminara luagun íruni le tasandirubei. Gunfuranda tumuti Heowá lan adundehabarun lóundarun lau lani sífiri sandu ani samina hamá íbirigu ha anügübalin ubaraü tuagu. Ani rutu giñe fe le lan súdinitimabei tun lóundarun Heowá lun ladügüniwa dasi le líchugubei Heowá.

14. Ka asansiruni le tadügübei lóundarun Heowá unbei lánhara Vlado, ani ka íderagubalin lun libihini?

¹⁴ Ayanuha wamá luagu aban wéiyaali lidan afiñeni le 73 irumu lau gíriti Vlado, lídanñein aban damuriguaü íbiri le Eslovenia ani hénrenguti meha lun lun lánharun lun le asuseredubei lun damuriguaü le ñein lubéi, aba lóundarawagun damuriguaü ligía luma amu damuriguaü ani aba tadourun Luban Adamuridaguni to meha ñein lubéi ladamuridagua. Ariñagati: “Úati meha gunfuranda nani ka lan uagu tadaura aban Luban Adamuridaguni buitu. Gáriti meha katei le nun ladüga sun liña meha waranserunu. Sarafangei  au ani adügatina fiu lídangiñe katei le ñeinbei. Ani barüti giñe asansiruni ligía lénrengunga woun, wagía ha derebuguhañabaña”. Ka íderagubalin lun lídehan lidan asansiruni ligía? Abahüdahati: “Wánharun lun asansiruni le tadügübei lóundarun Heowá súnwandan lanügün buiti woun. Aranse lumutiwa lubá wagagibudagun luma asansiruni le wéinamutimati ámuñegü”. Hagagibudaguña san luma asansiruni le lanügübei lóundarawagun bián damuriguaü o ibihaadün aban iseri dasi lidan damuriguaü? Madiherida humá, gunfuranda lumuti Heowá ida liña lan hasandiragun hungua. Ánhaadün ídeha lidan asansiruni le tadügübei lóundarun Heowá ani sigí huguya lau úaraguni lun luma tun óundaruni to layusuruboun, hibihiba saragu abinirúni (Sal. 18:25).

15. Ka gayaraabei wadügüni lun wóuserun lau lichú aau dan le ñein lan sügǘ hénrenguti lidan damuriguaü?

¹⁵ Eibu ayarafadeina lan lagumuchagüle ubóu le, maweiriduntu wanigi luagu lasuseredun sügǘ hénrenguti lidan damuriguaü le gayaraati lóuchaguni úaragu wamá lun Heowá. Ligía mégeiwa lubéi lun wóuserun lau lichú aau. Anhein samina wabéi óusera láadiwa lan aban íbiri wuriba, magañida wamá. Anhein ererehóua woun, metenira wamá saragu lun busiganu le wasandirubei luagu le asuseredubei, anha wamá lun adundehani le wibihibei ani adüga waméi asansiruni le megei wabéi. Ani danme le tadügün lóundarun Heowá asansiruni le hénrenguti woun, ídeha wamá tau sun wanigi ani falá waméi adundehani le ichugúti woun.

16. Ka gayaraabei hadügüni lun hasigirun afiñera luagu Heowá luma tuagu lóundarun?

¹⁶ Gayaraati hasigirun afiñera luagu Heowá luma tuagu lóundarun dan le lóuchawagun úaraguni le harufudubei. Gama lumoun, lun hibihini mégeitün hóuserun lau lichú aau, lidan amu dimurei, mégeitün hakipurun darangilaü, hasaminarun buidu luma lun harihini katei kei larihini Heowá. Áfaagua humá lun haturiahani habagari gürigia ha awinwandubaña lidan tidaani Bíbülia ha awinwandubaña sügǘ le genegeguati luma le hásügürübei ani ráramagua humá asaminara luagu hani hénpulu. Amuriaha humá luma Heowá lun líderagunün ani maweiyasun humá adiseda hawéi íbirigu ha lídanbaña damuriguaü. Ítarati, meberesenga le asusereduti, madügünbei Satanási lun hadisedun luéi Heowá ni tuéi lóundarun (Sant. 4:7).