ABAHÜDAGUNI LUÁGUTI IBAGARI
“Busentina meha nawadigimaridun lun Heowá”
SUN LIÑA meha wayouragun hawéi fiu gürigia ha meha wabisidahabaña yarafa lun aüdü Granbori, lurageirugu dabíara Surinam. Aba wagiribudun tidan aban guríara luéigiñe duna Tapanahoni. Murusun dan lárigiñe, le lanarime loufun woudin ladüga ébeeni, aba labuguchun máhina luagu dübü. Lau lóufudagun aba labuluchun tígiri guríara ábati wadibiragun. Aba tádühan nanigi. Íbini óunigiruti lan sirkuitu au ani barühadina saragu irumu áfayaha dúnarugu máfulitina.
Lubaragiñe nabahüdaha hun ida liña lan lagumuchun sügǘ le, nabahüdaha hun ka lan adügübei lun neseriwidun lun Heowá lidan dan dayarüti.
Lidan irumu 1942, nágurahoua lidan lubuidunmeraü ubouhu Curazao. Ánheinti núguchi Surinamu laguarahóun ani aba meha lidin awadigimarida Curazao. Fiu irumu lubaragiñe nagüriahóuniwa, aba labadiseirun. Aban meha hádangiñe furumiñetiña gefentiña núguchi, Curazao. a Sagü meha dimaasu laturiahanu Bíbülia hama sun lisaanigu, seingüñadiwa meha, mama meha súnwandan busén wamá waturiahan. Dan meha le 14 lubéi irumu nau, aba wáguyun lun Surinam lun lóunigirunu núguchi lúguchu, ladüga derebuguharu meha.
ÍDARAGUA HAMUTINA UMADAGU BUÍTIÑA
Adügatina meha umadagu Surinam hama nibureintiña ha eseriwidubaña lun Heowá lau ubebeni. Weiyaraühaña meha nuéi murusunraü ani prekursorugu meha hagía ha adügübaña 70 oura. Dan meha le hayanuhan luagu ida liña lan lidin houn lidan apurichihani, arihúati meha gunda hamá saragu. Lárigiñe meha adamuridaguni, hínsiñeti meha woun wayanuhan luagu tema tídangiñeti Bíbülia; anihein burí dan wadügüni guñoun ani aríagu waña burí houn saragu waruguma. Seremei burí umadaü hibe ha, aba níchugun fe ka lan nabusenrubei nadügün lau nibagari: nawadigimaridun lun Heowá. Aba nabadiseirun dan meha le disisi lubéi irumu nau, dan le nanügünbei 18 irumu aba nagumeserun eseriwida kei prekursoru.
ABA NAFURENDEIRUN KATEI LE HUUTI
Dan meha le prekursoru nubéi Paramaribo.
Dan le neseriwidunbei kei prekursoru, furendeitina saragu katei le seriwihalibei nun lidan sun dan le naubei eseriwida lidan dan dayarüti. Aban lídangiñe katei le nafurendeirubei súdini lan lun larufudahóun houn íbirigu. Dan le nagumeserúnbei eseriwida kei prekursoru, aba letenirun aban íbiri misionéru le gíribei Willem van Seijl nun lun larufudahan nun. b Furendeitina saragu lúmagiñe luáguti ida liña lan letenirun lun dasi le lídanbei damuriguaü. Dan meha ligía masaminarungubeitina lahuuduba lan arufudahani ligía nun saragu. Irumu lárigiñe, aba níridun kei prekursoru espechaliti ani lárigiñe mosu meha auba lan ariha luagu aban sétanu le dísebei, le lurageirugubei dabíara Surinam. Ma meha lueirin gebegi lan harufudahan íbirigu hagía nun! Lúmagiñe dan ligía áfaaguaadina lun nafalaruni hani hénpulu lau nasagarun dan lun narufudahan houn amu.
Le libiaman katei le nafurendeirubei buidu lan lun mibe lan lúmati gürigia, murusun le lúmabei lun layusuruni lau lubudubu. Lidan lagumeseha hati, au luma le aban prekursoru aba wadügün aransehani lun wibihini le wemegeirubei lubá burí dimaasu le lunbei liabin. Ligíati aba ladügüni aban wádangiñe limigifen wéiyaasu lun lidin agañeihei le wemegeirubei uburugu Paramaribo. Ligía mosu lubéi meha wahamaruhani seinsu le weresibirubei luma lun wamurusuhani weigin lun gayaraabei lan ladurarun woun sun hati. Anhein agumucha le wámabei dabíararugu, hénrenguraüti híderagubadiwa lan amu. Furendeihadina lúmagiñe nibureingidina dan le lan mibe lan lúmati gürigia lidan libagari ani óuseralei murusun le lúmabei lau lubudubu adügati katei le lúntima netenirun lun neseriwidun lun Heowá.
Lǘrüwan katei le nafurendeirubei buidu lan larufudahóuniwa inarüni houn gürigia lidan hañeñe guánarügü. Furendeitina ayanuha holandesi, inglesi, papiamento luma surinamés, (le subudiwabei kei sranan), iñeñein le kamanitimaabei Surinam. Gama lumoun aba níchugun fe dabíararugu aganbatima hamani gürigia uganu buiti dan le wapurichiha houn lidan iñeñein le ayanuhóubei lidan fulasu le ñein habéi. Hénrenguti meha nun nayanuhani fiu lídangiñe iñeñein burí le, kei burí saramakano le ayanuhóubei lau umalali héreti o hámaruti. Gama lumoun, buiti meha áfaaguni le meha nadügübei. Lau nadügüni le, adügati lun níderagun saragu gürigia lun hasubudiruni inarüni.
Kei lagurabúniwa lúmagiñe aban afurendeiruti aban iseri iñeñein, saragu wéiyaasu nabulieidagun ani sanditina giñe busiganu. Luagu aban dan, busentina meha nálügüdünu aban aturiahatu Bíbülia to ayanuhaboun saramakano ida liña lan tasandiragun tungua, lugundun gari lan turageirugu. Le linarün katei álügüdahani le nadügübei anhein dageinañoun tubéi. Mínsiñeti álügüdahani le nadügübei tun. Íbini adüga lan charati kei le, súnwandan náfaagun nayanuhani hererun gürigia houn.
NÁNHARUN LUN LANWOUN NIDASIN
Lidan irumu 1970 aba niridúniwa kei óunigiruti sirkuitu. Irumu ligía tokati nun narufudun lidan saragu sétanu le dísebei lurageirugu dabíara yanu lau nayusurun iyawaü lun níchuguni yanu le gíribei “Tabisidahóun Beteli to hani gefentiña luagu Heowá Meriga to arihiboun lau hawadigimari gefentiña luagu Heowá lidan sun ubóu”. Lun wadügüni burí bisida le, au hama amu íbirigu áfayahatiwa tidan guríara. Barütiwa máhina lun elektrisidad, barǘ wagía gasolina, lanpu le lauti gasi, sun le mégeiwabei lun gayaraabei lan warufudunu iyawaü burí. Dan le wachülürün lidan fulasu le ñein lubéi wachülüra, aba wanügüni sun ílagu le eibu dagá le ñeinba lubéi warufudei programa. Létima naritagubei luagu wéiyaasu ligía narihini seremei hamaniwa gürigia luagu ariñahani burí le. Gúndaatina ladüga gayara lan níderaguniña asubudirei Heowá luma asubudirei fánreinti le yaabei ubouagu le tani lóundarun. Furumiñeguarügü katei le ladügübei gürigia ni kata lumoun abiniruni le líchugubei Heowá lun dan le lawadigimaridun gürigia lun.
GÚRUDU LE ǗRÜWAGUATI
Aba namarieidun tuma Ethel lidan nefu-hati irumu 1971.
Subudi numuti buidu lan lerederun gürigia lábuguarügü dan le leseriwidun lidan sirkuitu, íbini ítara busentina meha aban nupaaná lidan sun nibagari. Ábati nagumeserun amuriaha luma Heowá lun líderagunina adarira aban würi to gayaraati teseriwidun úara numa dabíararugu luma lun gunda tan lidan dasi hénrenguti le. Kei burí aban irumu lárigiñe aba nasubudirunu Ethel, aba prekursora espechalitu to eseriwiduboun lau saragu ubebeni lun Heowá. Lúmagiñe óundaharaügiru, aba tabusenrun Ethel tasigiruni lani apostolu Pábulu hénpulu ani busentu meha tawadigimaridun saragu lidan ministeriu kei ligía. Aba wamarieidun lidan nefu-hati irumu 1971, ábati wasigirun eseriwida úara lidan sirkuitu.
Míbeti meha hámati tagübürigu Ethel, ligía ménrengun lubéi lun téchudun lidan sirkuitu dabíararugu. Kei burí, dan le waranserun lun wabisidahani damuriguaü le lurageirugu dabíara le dísetimabei, manügüntiwa saragu ílagu. Dúnaha meha wágounwa ani ñein meha giñe wachibagua. Aba wéchudun eigei le híchugubei íbirigu woun, wayamaga lan yebe, úduraü lan yebe o furumiñeguarügü animaalu le hagaliruhan o ha hadigin. Dan meha le ua lan asiedu, hóutiwa meha lidan tubana baruru o bímina. Dan le ua lan fígiedu o guliyeru, lau meha wáhabu weiga. Saminatina au tuma Ethel lau lan wadügüni sákürifisiu le úara lun Heowá íderagua lumutiwa lun gúrudu wamá le ǘrüwaguati (Apur. 4:12). Masansi wabéi sügǘ burí le luagu ni kata!
Sügǘ buga le nabahüdahabei furumiñe susereti dan le wagiribudunbei lídangiñe aban lídangiñe aüdü le dísetimabei. Dan le tagumeserunbei guríara éibaagua, aba tabuluchun, lau lóufudagun aba táfayarun. Seremei barǘ wamanu sálufu to hadaürüboun gürigia luéi hañaradagun ligía méiguadun wabéi tídangiñe guríara. Gama lumoun buin tiña guríara lau duna. Ábati wasagaraguni ageidinaü le ñein lubéi burí wanügei éigini, lun gayaraabei lan wamaharunu ugunei ñeinmeme dúnarugu.
Keiti le úaali lubéi meha ni kata wama lun weigin, aba wálugun wóuchaha sun awanha lan aweiyasuha. Gama lumoun madigitiwa ni kata. Ligía aba lubéi wafurieidun lun Heowá aba wamuriaha luma
lun líchuguni éigini le wemegeirubei weyu ligía woun. Lárigiñebei wafurieidun, aban lachüürünün aban hádangiñe íbirigu lugunwein aba ladigin aban úduraü le eseriwidubei woun lun watun bachati wagía séingügubei ani gimuletiwa.ÚGUCHILI, ANI ÓUNIGIRUTI SIRKUITU
Barühadiwa meha seingü irumu kei óunigiruti sirkuitu dan le neresibirubei au tuma Ethel aban abiniruni magurabunti: luagu gasaanibadiwa lan. Ma meha nugundan luagu ñunsu le, ibidiñeti meha nun kaba lan ladüga asansiruni ligía nun lidan wabagari. Au tuma Ethel ayumahatiwa tídangiñe sun wanigi wasigirun eseriwida kei óunigiruti sirkuitu anhein meha gayara. Lidan irumu 1976 ligía lagüriahóun Ethniël, ani bián irumu sisi hati lárigiñe ligía lagüriahóun Giovanni.
Lidan irumu 1983, lidan aban badisei lidan duna Tapanahoni, yarafa lun Godo Holo, luéigiñe oubaü le ñéingiñe lubéi laboucha weyu Surinam.
Ladüga meha mégeiwa hamá óunigirutiña sirkuitu Surinam, aba tamuriahan sukursáli wama lun wasigirun lidan dasi le. Dan meha le ñǘbürigiña lubéi wasaanigu, abisidahatiwa sirkuitu le ñein lubéi lougua lan damuriguaü. Liibe-agei dan, adügati katei le lun neseriwidun lidan sirkuitu bián dimaasu lidan hati ani le aban bián dimaasu aba neseriwidun kei prekursoru espechaliti lidan damuriguaü le ñein wabéi. Dan nabisidahani damuriguaü le yarafabei tun waban ñǘdüntu meha Ethel úara numa hau bián wasaanigu. Dan le latokarun nun nabisidahan dabíararugu luma dan le ñein lan adamurini, aba burí nidin nábugua.
Dan meha le óunigiruti lubéi sirkuitu au, aweiyasuhatiwa tidan aban guríara lun wabisidahani damuriguaü le dísetimabei.
Lun gayara lan netenirun lun sun le lunbei nadügüni mosu meha naransehan buidu. Súnwandan meha náfaagun lun naturiahan tuma nani weiriou luma hama wasaanigu sagü dimaasu. Dan meha le noudin abisidaha dabíararugu, Ethel meha aturiahaboun hama wasaanigu. Áfaaguatiwa meha giñe wadügün ítaga katei úara keisi iduheñu sagü gayara lan. Adügatiwa giñe aransehani lun wásügürün dan hama wasaanigu, kei burí áhurera o wáfuridun asariñaha lidan burí fulasu buíduburiti le yarafabei lun le ñein lubéi wawinwanda. Súnwandan darú lan narumugun lugundun naransehan lubá nadügüni nidasin kei wéiyaali lidan afiñeni. Ítara liña tigaburi Ethel kei würi to iriduwaboun lidan Ariñawagúni 31:15. Saragiheitu lun gayara lan waliihani bérusu lánina sagü weyu luma lun watu bachati úara hama wasaanigu lubaragiñe houdin leskuela. Wéiriti neteingiruni Bungiu lau líchugun aban tubuidun würi nun to íderagubadina etenira lun nidasin keisi aban eseriwiduti lun Bungiu.
Áfaaguatina au tuma Ethel lun warufudahan houn wasaanigu lun hínsiñe lan Heowá houn luma lun línsiñedun ministeriu kristiánu houn. Busentiwa meha lun hanúadiruni wasaanigu heseriwidun lun Heowá lidan dan dayarüti mama ladüga wagíaba lan ariñagei houn, le wabusenrubei lun hagía lan anúadirei houngua. Súnwandan wayanuhan luagu
ugundani le lanügübei leseriwidúniwa lun Heowá lidan dan dayarüti. Íbini ayanuha wamá luagu lénrengunga, súnwandan wariñaguni ida liña lan líderaguniwa Heowá ani biní lumutiwa lan keisi iduheñu. Lanwoun lira, áfaaguatiwa lun hásügürün wasaanigu dan hama íbirigu ha íchugubalin Heowá lidan furumiñeti lúgaaru lidan habagari.Seremei lun Heowá úati meha ni kata wemegeirun. Le linarün katei, súnwandan meha náfaagun lun nadügüni le yuubei nun keisi úguchili. Furendeitina meha saragu lídangiñe le nawinwandubei dabíararugu dan meha mamarieidungidina ani dan meha le neseriwidunbei keisi prekursoru lun naranserun lubá furumiñeguarügü katei le ñǘbuinti luma lun gayusuradina nan lun seinsu. Anihein meha dan ka lan yebe luweiribei wáfaagun siñá wamuti meha le wemegeirubei agañeiha. Lidan burí sügǘ libe le chouru wamuti íderagua laaniwa Heowá. Kéiburi lidan irumu 1986 darí 1992 anihein meha aban wuribu hadan gürigia Surinam. Anihein meha dan hénrengutima lan wibihini katei le mégeiwatimabei. Gama lumoun. súnwandan lóunigiruniwa Heowá (Mat. 6:32).
DAN LE NASAMINARUN LUAGU LE WINWAN NÁALIBEI
Lúmagiñe wabaünan lumoun wóunwenren: Au tuma Ethel to nani weiriou.
Ethniël, wasaani le íbugañaü, tuma Natalie to lani weiriou.
Giovanni, wasaani le amuleni, tuma Christal to lani weiriou.
Ru hali Heowá aban ibagari buin lau ugundani woun, mígirun lágidiwa. Aba abiniruni wasaanigu woun, lau warufudahan houn lun hínsiñe lan Heowá houn ariha wamuti keisi aban lubuidun chansi. Lau warihini hederegeruni wasaanigu habagari lun Heowá lidan dan dayarüti adügati lun gunda wamá. Ethniël luma Giovanni eresibihatiña tídangiñe Leskuela to tíchuguboun lóundarun Heowá ani guentó heseriwiduña tidan sukursáli to Surinamuboun úara hamá hánigu weiriou.
Au tuma Ethel derebuguhadiwa, gama lumoun, awanhagua awadigimarida lun Heowá keisi prekursorugu espechalitiña. Dagá lumoun dan le beresegu waña darí lun madanigidina lan lun nafurendeirun áfuliha. Úati kaba lan uagu nasakürihan. Dan le nadigiragun ariha nárigoun, gayaraati nariñagun lau sun ninarün buidu lan le nanúadirubei lidan nibagari dan meha le nibureingidina: nawadigimaridun lidan dan dayarüti lun Heowá.
a Ariha humóun Anuario de los testigos de Jehová 2002, páhina 70.
b Fuati luáguti libagari Willem van Seijl, le gíribei “La realidad ha superado mis expectativas”, Tidan garüdia ¡Despertad! to lánina 8 lidan diisi-hati irumu 1999.