ATURIAHANI 47
Ua lan ni kata adügüti lun hafanreinragun luéi Heowá
“Au Nabureme, buagu nemenigida” (SAL. 31:14).
UREMU 122 Derebugubá darí lagumuhóun!
LE LUNBEI WATURIAHANI a
1. Ida liña wasubudiruni busén lan Heowá yarafa lan woun?
AGUNBIRAHA lumutiwa Heowá lun werederun yarafa lun (Sant. 4:8). Busenti lun Wáguchi lan, Wabungiutebei lan, luma lun wamada lan. Óunaba lumuti wafurieidun ani íderagua lumutiwa dan le gaturobulin wamá. Lanwoun lira yusu lumutu lóundarun lun lóunigiruniwa luma lun larufudahan woun. Ligíati, ka lunbei wadügüni lun wayarafadun lun?
2. Ida luba gayara lan wayarafadun lun Heowá?
2 Gayaraati wayarafadun lun Heowá dan le wafurieidun lun, dan le waliihanu Lererun luma dan le wararamagun asaminara luagu le waliihabei. Ladügüba katei le lun wasandirun ínsiñeni luma eteingiruni luagu. Ladügüba giñe lun busén wamá lun gaganbadi wamá lun, luma lun wíchuguni alawahani le yuubei lun (Aruf. 4:11). Éibutimaame wasubudiruni, éibutimaame wafiñerun luagu luma tuagu óundaruni to líchuguboun lun tóunigiruniwa.
3. a) Ida liña louchun Mafia ladisedagüdüniwa luéi Heowá? b) Ka wemegeirubei lun maweiyasun wamá ígirei Wabungiute ni lóundarun? (Sálumu 31:13, 14).
3 Áfaaguati Mafia ladisedagüdüniwa luéi Heowá dántima le larihin gaturobulin wamá. Ida liña ladügüni? Áfaaguati ledebilidagüdüni wafiñen luagu Heowá luma tuagu lóundarun. Gayaraati mábürühan wamá tidoun lisadaran. Anhein derebugu lubéi wafiñen ani chouru wagía luagu Heowá buidu buidu, mígirun wabéi Heowá ni lóundarun (aliiha huméi Sálumu 31:13, 14).
4. Kaba uagu wayanuhan lidan aturiahani le?
4 Lidan aturiahani le, wayanuhaba luagu ǘrüwa katei le asuseredubei bóugudin luéi damuriguaü ani le gayaraabei lagadeiruni wafiñen luagu Heowá luma tuagu lóundarun. Ida liña ladisedagüdüniwa katei burí le luéi Wabungiute? Ani, ka gayaraabei wadügüni lun wararamuni áfaaguni le ladügübei Satanási?
DAN LE GATUROBULIN WAMÁ
5. Ida liña ladüga turobuli lun lagadeirun wafiñen luagu Heowá luma tuagu lóundarun?
5 Anihein dan mosu lan wagagibudagun luma turobuli hámagiñe waduheñu o dan le weferidiruni wawadigimari. Ida liña ladügün turobuli le lun lagadeiruni wafiñen luagu Heowá luma tuagu lóundarun luma lun wadisedun luéi? Dan le lálüdün aban turobuli saragu dan, másiñati wasaminarun máraninaali lan wawaguti ábameti lábürühan warüna. Yusu lumuti Satanási turobuli burí le lun wasaminarun mínsiñe wamá lun Heowá. Busenti lun wagumeserun álügüdagua woungua anhein Heowá lubéi gadurunbei tuma lóundarun luagu le ásügürübei woun. Susereti aban katei libe le houn meha ísüraelina ha meha Ehiptubaña. Furumiñe afiñetiña meha ísüraelina anuadirúa lan Moisesi luma Aarón lun lesefuruniña luéi amudirawaguni Ehiptu (Afu. 4:29-31). Dántima le ladügün faraón lun hénrengu lan habagari, ábatima híchuguni duru luagu Moisesi luma Aarón, ábati hariñagun: “Ladüga hídangiñeti luribanbei lóuseruniwa urúei hau sun lánigu. Huguya guánarügü íchugubei lúgaaru houn lun háfaraguniwa hilagubei” (Afu. 5:19-21). Ma lirun aba lan híchuguni duru hawagu lubúeingu Bungiu úaraguati ha! Anhein barühadün lubéi saragu dan awanda lénrengunga, ka gayaraabei hadügüni lun hasigirun afiñera sunsuinagubei luagu Heowá luma tuagu lóundarun?
6. Ka wafurendeirubei lídangiñe lani Abakúku hénpulu? (Abak. 3:17-19).
6 Dará humoun hanigi sunsuinagubei lun Heowá ani ragǘ humá luagu. Sügüti profeta Abakúku lídangiñe saragu lénrengunga. Genegeti anihein lan dan aban lan lasaminarun meberesen lan Heowá lau. Ábati labahüdaguni lun ida liña lan lasandiragun lungua. Ariñagati lun: “Bungiu Baba, ídaba san lásura nagúarahan amuriahei bídehan, móunabungabana? [...] Ka san uagu barihagüdana saragu idiheri luma wuribani?” (Abak. 1:2, 3). Óunaba lumuti Heowá lafurieidun wügüri úaraguati le (Abak. 2:2, 3). Lárigiñe lararamagun Abakúku asaminara luagu ida liña lan lesefuruniña Heowá lumutuniña, ábaya lagundaarun. Aba lachoururuni berese lan Heowá lau ani aba líderaguni Heowá awanda furumiñeguarügü óuchawaguni (aliiha huméi Abakúku 3:17-19). Ka larufudahabei sügǘ le woun? Danme lan le gaturobulin humá, furíei humá lun Heowá, abahüdaha huméi lun ida liña lan hasandiragun hungua ani ragǘ humá luagu. Gayaraati hachoururuni líchugubei lan erei le hemegeirubei hun lun hawandun. Danme le harihin ida liña lan lágüdahanün ábatimaame lederebugudun hafiñen.
7. Ka labusenrunbei aban tiduhe Shirley lun tadügün, ani ka íderagubarun lun tasigirun afiñera luagu Heowá?
7 Teni humá lun katei le ayarafagüdübadün lun Heowá. Anihán le íderagubarun aban íbiri gíritu Shirley to awinwanduboun Papúa Nuewa Ginéa dan le meha gaturobulin tubéi. b Gudemetiña meha tiduheñu, anihein meha dan hénrengu lan lun hibihin éigini nófuti. Adügati yebe aba tiduhe lun ledebilidun tafiñen luagu Heowá lau lariñagun tun: “Ariñagatibu líderaguñadibu lan lani Bungiu sífiri sandu. Hageiti ídemuei ligía? Gudemegidün. Ani beferidiruñein bidaani apurichiha”. Anihein dan tálügüdagun Shirley tungua anhein aritagua lubéi Heowá tuagu luma hawagu tiduheñu. Ariñagayatu: “Lau lóufudagun aba nafurieidun lun Heowá ani aba nadararunu nanigi lun. Sigitina aliihoun Bíbülia tuma wani agumeiraguagüdüni ani mígirun numuti napurichihan luma nabasihan adamuridagua”. Aba tíchugun Shirley fe luagu lóunigiruñanu lan Heowá tiduheñu ani ladüga meredetiña méiginga ani gúndaatiña. Ani sigitu ariñaga: “Ariha numuti lóunabuni Heowá nafurieidun” (1 Tim. 6:6-8). Ánhaadün etenira lun katei le ayarafagüdübadün lun Heowá, madügünbei ni turobuli ni machouruni lun hadisedun luéi Heowá.
DAN LE WURIBA LAN HOUSERÚN ÍBIRIGU HA ANÜGÜBALIN UBARAÜ
8. Ka gayaraabei lasuseredun houn íbirigu ha anügübalin ubaraü tidan lóundarun Heowá?
8 Yusu hamuti wáganiñu radiu, bigibigitu, Interneti lun haburuchaguagüdün iyeeni wawagu o ariñahani le móustarunti hawagu wábirigu ha anügübalin ubaraü tidan lóundarun Heowá (Sal. 31:13). Añahein hádangiñe wábirigu ragüwatiña ani rúwati hadurun luagu adügaaña lan wuribani. Susereti aban katei libe le lidan furumiñeti sígulu. Rútiña meha lidurun apostolu Pábulu ani ragǘ hamuti madurunga. Ka hadügübei kristiánugu ha lánina dan ligía?
9. Ka hadügübei fiu kristiánugu dan le ladaürǘnbei apostolu Pábulu?
9 Dan le ladaürǘnbei apostolu Pábulu uburugu Roma, añahein hádangiñe kristiánugu aba hígiruni lábugua (2 Tim. 1:8, 15). Hígirunbalin san ladüga funa san sandí hamá busiganu luagu, ladüga lanügǘn kei aban wügüri wuribati? (2 Tim. 2:8, 9). O hanufude luéi heibaahóun? Ka lan yebe lébunabei hígiruni, adügati katei le lun wuriba lan lasandiragun Pábulu lungua. Awandaali meha saragu darí lun líchuguni libagari lidan denchaü hawagu (Adü. 20:18-21; 2 Ko. 1:8). Mítaran wamá kei kristiánugu ha ígirubalin Pábulu lábugua dan meha le megei lubalin hídeha. Ka lunbei waritaguni dan le héibaahoun íbirigu ha anügübalin ubaraü tidan lóundarun Heowá?
10. Ka lunbei waritaguni dan le heibaahóun íbirigu ha anügübalin ubaraü, ani ka uagu?
10 Haritagua wamá ka lan uagu wéibaahoua ani ka lan lanagangiñebei sun katei le. Aliihatiwa lidan 2 Timotéu 3:12: “Héibaahouba lan sun ha busenbaña habagaridun deregeguañu houngua lun Hesukrístu”. Ligíati siñá lubéi taweiridun wanigi luagu léibaahabaña lan Mafia íbirigu ha anügübalin ubaraü. Le labusenrunbei libihin lun hígiruni íbirigu ha úaragua hamá lun Heowá lúmati lun wanufudedun (1 Fe. 5:8).
Lau sun furisunruguñein lan meha Pábulu arufudati Onesíforu ganigi ani íderagua lumuti wügüri le Pábulu. Uguñe weyu íderagua hamutiña kristiánugu hábirigu ha adaürǘbaña kei larihin tidan iyawaü. (Ariha huméi párafu 11 luma 12).
11. Ka wafurendeirubei lídangiñe lani Onesíforu hénpulu? (2 Timotéu 1:16-18).
11 Sigí humá lau úaraguni íderaguaña íbirigu ha anügübalin ubaraü (aliiha huméi 2 Timotéu 1:16-18). Lidan furumiñeti, sígulu anihein meha aban kristiánu le óuserubei buidu dan meha le ladaürǘnbei apostolu Pábulu. Onesíforu meha líribei. Ariñagati Pábulu luagu: Úati “nibusigari lan lau nadaürǘña lan”. Lanwoun lira, adüga lumuti Onesíforu sun liyaraati lun ladariruni apostolu Pábulu ani dan le ladariruni aba líchuguni ídemuei le lemegeirubei lun. Ru lumuti Onesíforu libagari lidan denchaü luagu! Ka larufudahabei sügǘ le woun? Mígira humá lun ladügün anufudei lun míderagun humaniña íbirigu ha awandubaña éibaahouni. Adüga huméi sun hiyaraati hayanuhan haweigiñe luma lun híderaguniña. (Ari. 17:17). Megei hamuti wínsiñehabu luma wídehan.
12. Ka wafurendeirubei hawagu wábirigu ha Rúsiabaña?
12 Samina wamá luagu le hadügübei wábirigu Rusia dandu wügüriña kei würiña dan le hadaürün kristiánugu ha hábirigu. Dan le houdin hádangiñe íbirigu ha agusera, saragu hádangiñe íbirigu ñǘdüntiña aganbei aguseruni lun harufuduni houn íbirigu mámañanu lan hábugua. Ka wafurendeirubei lídangiñe sügǘ le? Anhein ayanuhóua iyeeni hawagu wábirigu, ragüwa hagía ani éibaahoua hagía íbirigu ha anügübalin ubaraü manufudeda humá. Furíei humá hawagu, góunigi humaaña haduheñu ani áluga humá ida luba lan híderaguniña (Adü. 12:5; 2 Ko. 1:10, 11).
DAN LE LADÜGǗN BULA WAU
13. Ida luba lagadeiruni bula wafiñen luagu Heowá luma tuagu lóundarun?
13 Gayaraati hadügün hádangiñe waduheñu ha mama gefentiña bula wau, wánigu paaná lidan wadagimanu o leskuelarugu ladüga wapurichihan o ladüga inebe lan liñun lilurudun Heowá woun le luáguti laruman ibagari (1 Fe. 4:4). Másiñati hariñagun woun: “Hínsiñetibu woun, gama lumoun deregüdati tilurudun bani relihión ani binaduharu”. Háfuga hayanuhan fiu gürigia wuriba wawagu ladüga ligaburi wóuseruniña ha bugawaañabaña lídangiñe damuriguaü ani ariñaga hagía woun: “Ida luba bariñagun hínsiñe hamá gürigia bun?” Dimurei libe burí le gayaraati ladügün lun wasaminarun luma lun wálügüdagun woungua: “Agurabati san Heowá saragu númagiñe? Hanarimeti san deregüda lan lúrudu le tídanbei lóundarun?”. Anhein hásügürüña lubéi lídangiñe lénrengunga kei le, ka gayaraabei hadügüni lun madisedun humá luéi Heowá luma tuéi lóundarun?
Mafiñerunti meha Hobu lun hayeeni lumadagu ha meha adügübaña bula lau. Aranseñu liña meha lun úaragu lan lun Heowá. (Ariha huméi párafu 14).
14. Ka lunbei wadügüni ánhaña adüga bula wau ladüga inebe lan lilurudun Heowá woun? (Sálumu 119:50-52).
14 Sigí humá adügei le lariñagubei Heowá buidu lan. Aban meha wügüri le gaganbadibei lun lilurudun Heowá Hobu íbini meha hadügün amu bula lau. Hóuchati aban hádangiñe hagübüri lumadagu ladügün lun lafiñerun Hobu meberesen lan Bungiu anhein inebe lubéi lilurudun lun o mineben lan (Hob. 4:17, 18; 22:3). Gama lumoun mafiñenti Hobu lun iyeeni burí le. Subudi lumuti lúrudu lan le líchugubei Heowá luagu le buídubei lumoun le wuribabei richá lan ani anúadirati gaganbadibei lan lun burí lúrudu burí ligía. Mígirunti lun hadügün amu lun múaragunbei lan lun Heowá (Hob. 27:5, 6). Ka larufudahabei sügǘ le woun? Mígira humá lun ladügün bula lun machourun humá luagu lilurudun Heowá. Samina humá ida liña lan lidin hun lidan hibagari lau gaganbadi humá lun burí lúrudu le. Ma ariha humaali saragu wéiyaasu ida liña lan lidin hun lau gaganbadi humá lun? Ídeha humá tuma óundaruni to asigiruboun agunfulira lau lúrudu burí le. Meberesenga bula le hadügübei gürigia, maweiyasunbaña adisedagüdaawa luéi Heowá (aliiha huméi Sálumu 119:50-52).
15. Ida liña tawanduni Brizit habulan tiduheñu?
15 Ariha waméi le asuseredubei tun Brizit, aban íbiri to awinwanduboun India. Ladüga meha gefentu lan luagu Heowá mosu meha tawanduni habulan tiduheñu. Badiseitu lidan irumu 1997 murusun dan lárigiñe aba leferidiruni tani weiriei luadigimari mama meha gefenti wügüri ligía. Ábati lanúadirun láguyun tau sun lani weiriou hau lisaanigu lidoun amu uburugu le ñein habéi lagübürigu. Gama lumoun, mama ñein lébeda turobuli le úmabei tagagibudagua Brizit. Kei madarimemegili lubéi tani Brizit weiriei wadagimanu, mosu meha tawadigimaridun dan dayarüti lun tamainiruniña tílana tuban. Lanwoun lira, damuriguaü létima yarafabei tun 350 kilometuru (220 maili) lidise. Ma lirun ru hamá liduheñu tani weiriei lidere dan tun ladüga gefentu lan luagu Heowá. Hanarimeti luriban léibugun katei darí lun mósuya lan táguyun Brizit lau tani weiriei habu tisaanigu lidoun amu fulasu. Sódini aba lasuseredun aban katei le magurabunti aba lounwen tani weiriei. Lárigiñe aba tounwen aban tisaani láfarun kánserü ani duusu irumu tau. Lau sun lamiselu le asuseredubei aba hariñagun tiduheñu tidurun lan sun le asuseredubei. Aba hariñagun tun lun hamuga lan mádügagun tan tungua gefentume luagu Heowá masuseredunbei lan yebe le tun. Gama lumoun aba tasigirun afiñera luagu Heowá ani aba terederun yarafa tun lóundarun.
16. Ka abiniruni teresibirubei Brizit ladüga úaragua tan lun Heowá luma tun lóundarun?
16 Kei dise lubéi luéi damuriguaü teredera Brizit aba lariñagun aban óunigiruti sirkuitu tun lun tapurichihan lidan fulasu le ñein lubéi tawinwanda luma lun tadügüni adamuridaguni túbiñe. Furumiñe saminatu yebe wéiriya lan dasi le tun. Gama lumoun, aba tadügüni dasi le líchugubei óunigiruti sirkuitu tun, aba tagumeserun apurichiha, adügatéi adamuridaguni túbiñe ani adügatéi áhuduraguni hadan iduheñu hama tisaanigu. Ida liña lidin tun? Gumesetu Brizit íchiga aturiahani houn saragu gürigia, saragu hádangiñe gürigia hagía badiseitiña. Ani lidan irumu 2005 aba prekursora tan. Adügati tafiñerun luagu Heowá luma tuagu lóundarun lun tibihini tafayeiruaha. Guentó heseriwiduña tisaanigu lun Heowá ani anihein bián damuriguaü lidan fulasu ligía. Chouru tumuti Brizit Heowá lan íchugubei erei tun lun tawanduni óuchawaguni luma bula le hadügübei tiduheñu tun.
ÚARAGUA WAMÁ LUN HEOWÁ LUMA TUN LÓUNDARUN
17. Ka lunbei wadügüni?
17 Busenti Satanási lun wasaminarun dan le lan wuriba lan lidin woun lachagarubadiwa lan Heowá ani lau lan wídeha tidan lóundarun deretimabei lan wabagari. Busenti giñe lun wanufudedun dan le layanuhóun wuriba hawagu wábirigu o dan le heibaahóun ha anügübalin ubaraü tidan lóundarun. Lanwoun lira, yusu lumuti bula lun lagadeiruni wafiñen luagu lilurudun Heowá luma tuagu lóundarun. Subudi wamaaru lisadaran Mafia buidu buidu ani mígirunbadiwa lun leyeeduniwa (2 Ko. 2:11). Ligíati mánhara wamá lun liyeeni ani úaraguameme wamá lun Heowá luma tun lóundarun súnwandan. Ani haritagua waméi maweiyasunbei lan Heowá ígirawa (Sal. 28:7). Ligía lubeiti, mígira wamá lun lafanreiraguagüdüniwa ni kata luéi Heowá! (Rom. 8:35-39).
18. Kaba wariha lidan leweñegua aturiahani?
18 Lidan aturiahani le ayanuhaadiwa luagu sügǘ le asuseredubei bóugudin luéi damuriguaü ani le adügübei lun lóuchawagun wafiñen luagu Heowá luma tuagu lóundarun. Ani lidan damuriguaü gayaraati giñe lasuseredun ámuya sügǘ hénrenguti. Ida luba wagagibudagua luma? Warihibei lidan leweñegua aturiahani.
UREMU 118 “Ruba lanwoun wafiñen”
a Anhein busén wabéi wawandun luma lun úaragua wamá lidan lagumuhóun weyu burí le, lunti wasigirun afiñera luagu Heowá luma tuagu lóundarun. Busenti Mafia lagünrinchaguni afiñeni le wawagubei. Lidan aturiahani le wayanuhaba luagu ǘrüwa katei le layusurubei Mafia lun ladisedagüdüniwa luéi Heowá, lúmati le gayara wabéi adüga lun siñá lan ladügüni.
b Sánsiwaali fiu iri.