1. Ka uganu lásügüragüdübei profeta Isaíasi houn ísüraelina?

 WATI profeta Isaíasi lun Heowá “Bungiu lánina inarüni”. Dimurei le ayusurubei lidan ebüréu kei “inarüni” létima mini lubéi “ítarala” (Isa. 65:16; abürüdǘni). Mini lan dimurei ítarala “chouru lan lagunfuliruba lan”. Yúsuati dimurei ítarala saragu wéiyaasu tidan Bíbülia lun lachoururagüdüniwa le lan lariñagubei dandu Heowá kei Hesusu luma le hadügübei inarüni lan. Ligíati, furanguti uganu le labusenrubei Isaíasi lásügüragüdün houn ísüraelina: le lan lariñagubei Heowá súnwandan lan lagunfulirun. Arufuda laali Heowá ítara liña lan katei le lau lagunfuliruni sun le füramase lubéi.

2. Ka uagu gayara lubéi wafiñerun luagu le füramase lubéi Heowá lubá ámuñegü? Kaba álügüdahani ounabúa lidan aturiahani le?

² Anti wagía? Gayaraati san wafiñerun luagu le füramase lubéi Heowá lubá ámuñegü? Kei burí widü-san irumu lárigiñe lidaani profeta Isaíasi, afuranguagüdati apostolu Pábulu ka lan uagu gayara lubéi wachoururuni lagunfulirubei lan Heowá le füramase lubéi. Ariñagati: “Siñá lan leyeehan Bungiu” (Ebü. 6:18). Ma inarüni siñá lan láfuridun duna bímeti luma duna básuati lídangiñe ábanmeme lísensen duna? Ítarameme, siñati leyeehan Heowá, Bungiu lánina inarüni. Ligíati, gayara lubéi wafiñerun sunsuinagubei luagu sun le lariñagubei Heowá, íbini luagu füramasei le ladügübei lubá ámuñegü. Lóunabubei aturiahani le álügüdahani burí le: ka füramase lubéi Heowá lubá ámuñegü? ani ida liña lachoururuni luagu lagunfulirubei lan le füramase lubéi?

3. a) Ka füramasei espechalibei woun? (Arufudúni 21:​3, 4). b) Ka hariñagubei fiu gürigia dan le haliihani füramasei le houn?

³ Füramasei le lunbei wayanuha lan luagu espechaliti houn sun lubúeingu Bungiu lidan sun ubóu (aliiha huméi Arufudúni 21:​3, 4). Füramaseti Heowá “úaalime [lan] óunweni ni ayahuni ni íruni ni igarigu”. Yusu wamuti bérusu burí le lidan apurichihani lun wíchugun gurasu houn gürigia luma burí lun wariñagun houn ida luba lan ibagari lídanme Paraísu. Ka hariñagunbei fiu gürigia dan le haganbuni füramasei le? “Weiri lan lubuidun katei le lun inarünibei lan”.

4. a) Ka bián katei lasubudirubei Heowá? b) Lárigiñe lariñaguni Heowá le füramase lubéi, ka amu katei ladügübei?

⁴ Dan le ladügünbei Heowá lun labürüdüni apostolu Huan füramasei luáguti Paraísu, subudi lumuti meha luagu wayusurubei lan lidan apurichihani uguñe weyu. Subudi lumuti meha giñe, hénrengubei lan houn saragu gürigia hafiñerun luagu “iseri burí katei” le füramase lubéi (Isa. 42:9; 60:2; 2 Ko. 4:​3, 4). Ligíati, ida luba gayara lan wíderaguniña amu lun hachoururuni lagunfuliruba lan abiniruni le iridúbei lidan Arufudúni 21:​3, 4? Ani ida luba gayara lan wederebudagüdüni wafiñen luagu Heowá luma luagu le füramase lubéi? Mama ayanuharügüti Heowá luagu füramasei le, ruti giñe resun woun lun gayaraabei lan wafiñerun luagu füramasei le. Káteiti resun burí ligía?

5. Lidan ka burí bérusu wadarira lébuna wafiñerun luagu le füramase lubéi Heowá, ani ka lariñagunbei bérusu burí le?

⁵ Lidan burí bérusu le asigirubei wadariruba resun lun wafiñerun luagu le füramase lubéi Heowá luagu Paraísu. Aliihatiwa ñein: “Ábati lariñagun Bungiu: ‘Arihabá, adüga numuti sun katei iserime’. Ariñagati giñe: ‘Babürüha, ladüga inarüniti dimurei burí le, ani gayaraati lafiñerúniwa luagu’. Lárigiñe, aba lariñagun nun: ‘Sunha nadügüni sun katei le. Au Álüfabei luma Omega, lagumeseha luma lagumuchagüle sun katei’” (Aruf. 21:​5, 6a).

6. Ka uagu ru lubéi dimurei le lídanbei Arufudúni 21:​5, 6 iderebugu lun wafiñen luagu le füramase lubéi Heowá?

⁶ Ka uagu líchiga dimurei burí le iderebugu lun wafiñen luagu le füramase lubéi Heowá? Afuranguagüda tumuti líburu Apocalipsis b katei le luagu bérusu burí le: “Ítara liña lan le ladügübei Heowá kamá hamuga láfiñuruña lan aban dugumedu to achoururagüdübalin houn lubúeingu lagunfulirubei lan le füramase lubéi”. Lidan Arufudúni 21:​3, 4 aliihatiwa luagu le füramase lubéi Heowá, ani lárigiñe, lidan bérusu 5 luma 6, darí wamuti lachoururagüdüni Heowá lagunfulirubei lan füramasei le. Guentó akutiha waméi buidu buidu dimurei le layusurubei Heowá lun lachoururagüdüni woun lagunfulirubei lan le füramase lubéi.

7. Ka agumeserubei ayanuha lidan bérusu 5, ani ka uagu espechali lubéi le lariñagubei?

⁷ Ichouruni le líchugubei Bungiu woun gumeseti lau dimurei le: “Ábati lariñagun Bungiu” (Aruf. 21:5a). Espechaliti dimurei le, lugundun seriwi lan kei ebelaagülei lidan aban lídangiñe ǘrüwa wéiyaasu le ñein lubéi layanuha Heowá furangu lidan arufudúni le larihibei Huan. Ligíati ichouruni le, Heowá guánarügü íchugubalin, mama aban ánheli gabafuti ni Hesusu. Adügati le lúntima wafiñerun luagu dimurei le lariñagubei Heowá lárigiñe, ladüga ligía aban “Bungiu, le meyeehanbei” (Titu 1:2). Ligíati, gayaraati wafiñerun lau ichouruni luagu dimurei le adarirubei lidan Arufudúni 21:​5, 6.

8. Ka lariñagubei Heowá lun lachoururuni lagunfulirubei lan le füramase lubéi? (Isaíasi 46:10).

⁸ Guentó, teni wamá lun dimurei “Arihabá” (Aruf. 21:5). Dimurei güriegu le ásügürawagüdübei “Arihabá” fuati saragu wéiyaasu tidan líburu to gíriboun Arufudúni. Ariñagatu aban líburu luagu dimurei le, yusua lan “lun hetenirun aliihatiña lun le lunbei liabin lárigiñe le haliihabei”. Ka lunbei haliihani lárigiñe dimurei le? Ariñagati Bungiu: “Adüga numuti sun katei iserime”. Íbini layanuhaña lan Heowá luagu asansiruni le lunbei ladügüni ámuñegü. Chouru lumuti lagunfulirubei lan füramasei le, darí lun mini lan dimurei le ayusurubei lidan güriegu kamá hamuga adüga laali asansiruni le (aliiha huméi Isaíasi 46:10).

9. a) Ka ñǘbuinbei wachüguagu dan le haganbuni dimurei “adüga numuti sun katei iserime”? b) Kaba asusereda lun “sielu” luma lun “ubóu” le uguñebei weyu?

⁹ Teni wamá guentó lun ámuya katei le tídanbei líburu Arufudúni 21:​5, le ariñagubei: “Adüga numuti sun katei iserime”. Lidan kapítulu le tidan Bíbülia, adügati dimurei le lun wasaminarun luagu bián ligaburi ladügüni Heowá katei: adügati lun geweñegua lan katei o laransehani. Furumiñe ayanuha wamá luagu le lunbei geweñegua lan. Ariñagati Arufudúni 21:1: “Gumugua buga furumiñeti sielu luma furumiñeti ubóu”. “Furumiñeti sielu” mini lan urúeigu ha lábugiñebaña lubafu Mafia hama lánigu (Mat. 4:​8, 9; 1 Huan 5:19). Tidan Bíbülia dimurei “ubóu” anihein dan yusua lan lun layanuhóun hawagu gürigia ha ubouagubaña (Agu. 11:1; Sal. 96:1). Ligíati, “furumiñeti ubóu” le uágubei layanuhóua lidan bérusu le mini lan gürigia wuribatiña ha uguñebaña weyu. Le labusenrunbei bérusu le lafuranguagüdün mama lan aranserügü lubéi Heowá “sielu” luma “ubóu”, le lunbei ladügüni lagünrinchaguni sunsuinagubei ábame líchugun “aban iseri sielu luma aban iseri ubóu”, lidan amu dimurei, iseri arúeihani hama iseri hawuyeri gürigia.

10. Lidan ka amu igaburi ladügübei lan Heowá “sun katei iserime”?

¹⁰ Lidan ka amu igaburi ladügübei lan Heowá “sun katei iserime”? (Aruf. 21:5). Laransehabei Heowá ubóu le luma hagaburi gürigia darime lun mafigounhaña lanme. Ítara kei lariñaguni Bungiu liyumulugugiñe profeta Isaíasi, sun ubóu ábanbei paraísu, kei meha fuluri-agei Edén. Ladügüba lun iserideina wamá kada aban wádangiñe sunsuinagubei laume labuiduragüdüni wátuadi. Lareidaguagüdübaña Heowá danimatiña, marihintiña, maganbuntiña ani láguyuguagüdübei giñe habagari íbini gürigia ha hilaguaañabaña (Isa. 25:8; 35:​1-7).   

11. Ka lariñagubei Heowá lun Huan, ani ka uagu?

¹¹ Ka ámuya ichouruni líchugubei Bungiu woun lun gayaraabei lan wafiñerun luagu le füramase lubéi? Aba lariñagun Heowá lun Huan: “Babürüha, ladüga inarüniti dimurei burí le, ani gayaraati lafiñerúniwa luagu” (Aruf. 21:5). Amu luéi le lamuriahabei Heowá luma Huan lun labürüdüni aban líchugun Heowá ámuya resun lun, lun ladügüni. Lariñaga lun: “Ladüga inarüniti dimurei burí le, ani gayaraati lafiñerúniwa luagu”, mini lan le, gayara lan lafiñerúniwa luagu lererun Heowá ani chóuruti lagunfulirubei lan. Ma lubuidun gaganbadi lan Huan lun lugumadin Heowá ani bürǘ lumuti! Seremei katei le, gayara lubéi waliihani le füramase lubéi Bungiu luáguti aban Paraísu luma lun wararamagun asaminara luagu lubuidun abiniruni le lunbei wibihini ámuñegü.

12. Ka uagu gayara lubéi lariñagun Heowá “Sunha nadügüni sun katei le”?

¹² Ka amu katei lariñagubei Heowá? “Sunha nadügüni sun katei le” (Aruf. 21:6). Aba layanuhan Heowá kamá hamuga adüga laali sun le  füramase lubéi luagu Paraísu. Ani ítara liña, lugundun úati ni aban lun ladügün lun magunfulirun lani le füramase lubéi ladügün. Ka lariñagubei Heowá lun gayara lan líchugun ichouruni luagu le ariñaga laalibei?

13. Ka uagu lariñaga Heowá “Au Álüfabei luma Omega”?

¹³ Kei buga wariñaguni, ayanuhati Heowá ǘrüwa wéiyaasu lidan arufudúni le larihibei Huan (Aruf. 1:8; 21:​5, 6; 22:13). Lidan súngubei, ariñagati Heowá: “Au Álüfabei luma Omega”. Álüfa ligía furumiñe létüra le lídanbei alfabetu güriegu, ani omega, ligía lagumuhóun. Lau laguarún lun Heowá “Álüfa luma Omega”, lafuranguagüdüña Heowá, dan le lan lagumeserun aban katei gumú lumuti.

14. a) Ru humá aban hénpulu luáguti ídabuga lan lariñaga Heowá “Álüfa” ani ídaame lan lariñaga “Omega”. b) Ka lachoururagüdübei Heowá woun lidan Agumesehani 2:​1-3?

¹⁴ Lárigiñe ladügüni Heowá Adán tuma Ewa, aba lariñagun houn ka lan labusenrubei houn gürigia luma lun Ubóu. Ariñagatu Bíbülia: “Aba labiniruniña lau dimurei le: ‘Garahüñügua humá saragu, buíngüda huméi ubóu hau hirahüñü ani gumadi huméi’” (Agu. 1:28). Lau lariñaguni Heowá le labusenrubei ladügün ítara liña kamá hamuga lariñaguña “Álüfa”. Lachülürüba weyu lun hawinwandun ladügawagun Adán tuma Ewa ha gaganbadibaña ani mafigounhañame, lun habuinchagüdüni ubóu ani adüga hameime ábanme paraísu. Wéyume ligía, ítara luba kamá hamuga lariñaguña Heowá “Omega”. Dan le lagumuchunbalin Heowá ladügüni “sielu luma ubóu, luma sun burí katei le lídanbei”, aba lachoururagüdüni le labusenrunbei ladügün. Ida? Lau líchuguni lisedün weyu kei aban weyu sagüráuti (aliiha huméi Agumesehani 2:​1-3). Ka mini lubéi le? Mini lan, aba lan ladireiruni Heowá lisedün weyu lun ladügün lun lagunfulirun le labusenrunbei houn gürigia luma lun Ubóu. Lídanme  lagumuchun lisedün weyu le, adügüwaliime le labusenrunbei Heowá sunsuinagubei.

15. Ka uagu genege lubéi meha siñabei lan lagunfuliruni Heowá le labusenrubei ladügün?

¹⁵ Lárigiñe lebedaagun Adán tuma Ewa aba gafigoun hama ani aba hásügüragüdüni dandu figóu kei óunweni hawagu hadügawagun (Rom. 5:12). Ladügüba meha san katei le lun magunfulirun lani Bungiu le labusenrubei ladügün lun Ubóu luma houn gürigia gaganbaditiña ani ha mafigountiña? Libihuba funa meha san Satanási lun maweiyasun lan Heowá ariñaga “Omega”? Genegeti meha libihubei lan. Másiñati samina lan Mafia, siñabei lan lagunfuliruni Heowá le füramase lubéi. Kei hénpulu, aban katei ménrengunti lun hamuga ladügüni Heowá lagumuchun lau Adán tuma Ewa, ani aba hamuga meha ladügün amu gürigia ha mafigountiña ha lúnbaña hadügün lun lagunfuliruni le labusenrubei ladügün houn sun gürigia. Gama lumoun, lun hamuga ladügüni Heowá lira, aba hamuga lariñagun Mafia luagu yee lan Heowá. Ka uagu? Ladüga, kei lariñaguni Agumesehani 1:​28, ariñagaali meha Heowá lun Adán tuma Ewa labuinchagüdübei lan Ubóu hau hadügawagun.

16. Ka uagu másiña lubéi samina lan Mafia siñaguabei lan Heowá lungua?

¹⁶ Ka ámuya katei ñǘbuinbei lichügüwagun Mafia? Másiñati samina lan Mafia lígirubaña lan Heowá Adán tuma Ewa lun gasaanigu hama, gama lumoun, gafigounbaña lan lun gumugua dan (Apur. 7:20; Rom. 3:23). Lun hamuga susere lan ítara, chóuruti lariñaguña lan hamuga Mafia luagu Heowá, siñagua lan lungua. Ka uagu? Ladüga siñabei hamuga lagunfulirun le labusenrubei Bungiu; lun labuinchagüdüni ubóu hau gürigia ha mafigountiña.

17. Ka ladügübei Heowá lun lagumuchun lau lebedaagun Satanási luma hebedaagun furumiñetiña gürigia, ani ida luba lagumuchun sun le? (Ariha huméi giñe dibuhu).

¹⁷ Ligaburi laransehani Heowá lebedaagun Satanási luma hebedaagun furumiñetiña gürigia, chóuruti adüga lan lira lun lerederun Satanási wagañu (Sal. 92:5). Lau lígirun Heowá lun gasaanigu lan Adán tuma Ewa, arufuda lumuti meyeehan lan, súnwandan lan lagunfuliruni le lariñagubei. Ani arufuda lumuti giñe ua lan siñagua lan lungua. Ida liña larufuduni? Adügati Heowá lun ñein lan aban ‘adügawaguni’ le lunbei meha lesefuruniña gürigia ha gaganbadibaña ha ladügawagun Adán tuma Ewa, ítara lubá meha gayara lan lasigiruni Heowá le labusenrubei ladügün (Agu. 3:15; 22:18). Miabingubeiti lichügüwagun Satanási gayara lan lesefuruniña Heowá gürigia lau lebegi lani Hesusu sákürifisiu.  Ka uagu? Lugundun, ebegi le, ligía aban katei le arufudubalin lueirin wínsiñe lun Heowá (Mat. 20:28; Huan 3:16). Kei gahü tubéi lanigi Mafia, ligía siñá lubéi lasandirun aban ínsiñeni libe le. Ligíati, kaba ibihúa seremei lebegi esefuruni? Lárigiñe milu irumu, sun ladügawagun Adán tuma Ewa ha gaganbadibaña ani mafigounhañame hawinwanduba ubouagu lidan aban paraísu, ítara kei meha labusenruni Heowá lúmagiñe furumiñeti dan. Lídanmeti dan ligía, gayaraahalime lariñagun Heowá “Omega”.   

18. Ka ǘrüwa ébunaü líchugubei Heowá woun lun gayaraabei lan wafiñerun luagu le füramase lubéi? (Ariha huméi giñe rekuáduru le gíribei “ Ǘrüwa ébunaü lun lafiñerúniwa luagu le füramase lubéi Heowá”).

¹⁸ Lidan aturiahani le arihaadiwa gébuna lan lun wafiñerun ábanbei lan paraísu Ubóu. Kaba wariñaga houn amu lun wachoururagüdüni houn lagunfulirubei lan Bungiu le füramase lubéi? Lidan furumiñeti lúgaaru, Heowá guánarügü adügübalin füramasei le. Ariñagatu líburu Arufudúni: “Ábati lariñagun Bungiu: ‘Arihabá, adüga numuti sun katei iserime’”. Busenti Bungiu lagunfuliruni le füramase lubéi ani gabafuti lun ladügüni, chu ligía lau. Lidan libiaman lúgaaru, chouru lumuti Heowá lagunfulirubei lan le füramase lubéi darí lun layanuhan luagu kamá hamuga le adüga laali. Ligía lariñagunbei luagu lererun: “Inarüniti dimurei burí le, ani gayaraati lafiñerúniwa luagu”. Ani ariñagayati: “Sunha nadügüni sun katei le”. Lǘrüwan, dan le lagumeserun Heowá aban katei, gumú lumuti. Chóurugüda lumuti woun lau dimurei “Au Álüfabei luma Omega”. Arufuda laali Heowá yee lan Satanási ani siñagua ligía lungua.

19. Ka gayaraabei hadügüni anhein gürewei lubéi houn gürigia hafiñerun luagu ábanbei lan paraísu Ubóu?

¹⁹ Aritagua huméi sagü lan hayanuhan luma aban gürigia lidan apurichihani luagu ichouruni le wawagubei luma luagu le füramase lubéi Heowá, lederebudagüdübei wafiñen luáguti füramasei le. Ligíati, lárigiñe haliihani lubuidun füramasei le tídanbei líburu Arufudúni 21:4 houn gürigia, ani aba hariñagun hun “Weiri lan lubuidun katei le lun inarünibei lan”, kaba hamuga hariñaga houn? Aban katei buiti le gayaraabei hadügüni, lun haliihani bérusu 5 luma 6 houn ani afuranguagüda humeime houn. Arufuda huméi giñe houn gürigia chóurugüda lani Heowá lagunfulirubei lan le füramase lubéi, ítara liña katei le kamá hamuga laseiniruñein Heowá füramasei le (Isa. 65:16).