Lidan irumu 1948 nagurahóua lidan aban liraüraü aüdü Niheria. Lidoun burí dan ligía aba ladügagun Moustapha le niyaurite, le lamulen núguchi lungua gefentime luagu Heowá, Wahabi giñe sun, le níbugaña. Dan le meha nefu lubéi irumu nau aba lounwen núguchi. Wéiriti ligari lounwen núguchi ye. Ábati lariñagun Wahabi ye warihin yaabei lan wáguchi danme le láguyugun túteme. Lau nasaminarun luagu lubuidun emenigini le aba ladügün lun naturiahanu Bíbülia. Aba nabadiseirun lidan irumu 1963, ani aba giñe hadügagun ǘrüwa níbirigu houngua gefentiñame luagu Heowá.

Aba náguyun Lagos lidan irumu 1965, le ñein lubéi meha lawinwanduña lan Wilson, aban hádangiñe níbugañanu. Buiti meha wásügürüni ñein úara hama fiu prekursorugu ha lídanbaña damuriguaü Igbobi. Ariha numuti gunda hamá luma giñe ubebeni le hawagubei, ábati nanúadirun lun prekursoru nan lúmagiñe eneru irumu 1968.

Ábati ladügün aban íbiri le eseriwidubei Betelirugu, le gíribei Albert Olugbebi aban adamuridaguni espechaliti hau nibureintiña lun labahüdahani houn mégeiwa hamá prekursorugu espechalitiña nórute libiti Niheria. Haritagua nágili dimurei le lariñagubei íbiri Olugbebi buin lau ubebeni: “Nibureingidün, gayaraati hayusuruni hidaani luma here lun heseriwidun lun Heowá. Anihein saragu wadagimanu lun ladügǘn ñein”. Busentina meha ítara nan kei profeta Isaíasi, nidin le ñeinhin lubéi  lóunahana Heowá, ítara liñati ábati nabuinchagüdün gárada (Is. 6:8).

Ligíati, lidan seingü-hati irumu 1968, aba nounahóun eseriwida kei prekursoru espechaliti uburugu Kano, nórute libiti Niheria. Dan ligía anihein meha wuribu Biafra, le adurarubei lúmagiñe irumu 1967 darí irumu 1970. Adügaali meha wuribu damichi lidan fulasu ligía, lárigiñe aba ñein lan wuribu lidan le aban oubaü lun ageiraü. Ariñagati aban íbiri ye lau aban lubuidun aritaguni lun midin nan Kano. Aba nóunabuni: “Seremei. Subudi numuti nidiheri ban nuagu. Anhein Heowá lubéi busenbei lun nidin ñeinhin, chouru numuti ñeinbei lan numa”.

Ma meha luriban le narihibei dan le nachülürünbei Kano. Adügaali meha wuribu le hádanbei gürigia saragu günringuaü lidan uburugu ligía. Dan le wapurichihanbei burí, anihein dan warihin gürigia hilaaña ha burí áfarawagubaña lidan lidaani wuribu. Íbini anihein lan meha saragu damuriguaü uburugu Kano, hiibe-agei íbirigu anurahaaña meha ñéingiñe. Ha meha erederubaña ñein móustaruntiña ni 15, buin haña meha giñe lau anufudei ani ábürühaali meha harüna. Ma lueirin ugundani le hasandirubei dan meha le wachülürünbei sísigubei prekursorugu espechalitiña uburugun! Dǘgüdaguaü le wíchugubei houn adügati saragu buiti houn. Íderagua wamutiña lun hadügün aransehani lunya hadamuridagun, lun hapurichiha luma lun hóunahani tidoun sukursáli ariñahani le hadügübei lidan apurichihani lúmati lun hamuriahan agumeiraguagüdüni.

Sun meha prekursorugu espechalitiña aba wagumeserun aturiaha lidan iñeñein hausa. Aganba hamutiwa meha saragu gürigia ha awinwandubaña ñein ladüga lidan lan hererun wapurichiha. Lau sun lira, mínsiñeti meha houn fiu tílana relihión tótima súdiniboun ñein lun wapurichiha. Ligíati, mosu meha wóunigiragun woungua saragu. Aban weyu, au luma lani paaná aba leibaahaniwa aban wügüri tau gusiñu lúhaburugu. Seremei furesetima lan wéibaagun luéi ligía wesefurubei. Íbini laganagua denchaü, kei lubeibei lariñagun Sálumu 4:​8, adügati Heowá lun wawinwandun chóuruñu, ani murusun murusun aba aganwoundeinatima hamá íbirigu. Uguñe weyu anihein 11 damuriguaü uburugu Kano hámati hóugiñe 500 íbirigu.

Lidan widü-hati, irumu 1968, fiúrügügili hati lúmagiñe wachülürün uburugun Kano, aba hóunahoun bián prekursorugu espechalitiña nau sun uburugu Niameyn, uburugu le súdinibei lidan Republika Níherü, Áfürika.  Lau lóufudagun aba warihini woungua Níherü lan ligía lan aban lídangiñe ageiraü harougatimati ubouagu. Lanwoun wéchudun luagu lárouga, mosu meha giñe wafurendeirun ayanuha faransu, lugundun ligía ayanuhóubei ñein. Íbini laganagua sun lénrengunga ligía, afiñetiwa luagu Heowá aba wagumeserun apurichiha Niamey hama fiu íbirigu ha awinwandubaña ñein. Lidan murusun dan, kei burí saragu hádangiñe gürigia ha awinwandubaña Niamey ha galiiradibaña anuhounharu meha líburu to wayusuruboun lun wíchugun aturiahani tídangiñeti Bíbülia hama, líburu to gíriboun: La verdad que lleva a vida eterna. Anihein dan ñǘbuintiña meha gürigia áluahawa lun hamuriahan aban wama.

Málüti aba wíchugun fe mínsiñe hamá gefentiña luagu Heowá houn gumadimatiña. Lidan sedü-hati, irumu 1969 aba ladügǘn furumiñeti adamurini sirkuitu lidan ageiraü, ani chülütiña kei burí 20 gürigia. Ma meha wagundan ladüga habadiseira lan bián aturiahatiña Bíbülia. Gama lumoun, lidan furumiñeti weyu lani adamurini aba hachülaagun polisía ani aba hadüraaguni programa. Aba hanügüni óunigiruti sirkuitu hau sun prekursorugu espechalitiña tidoun hani polisía áfisi. Ñein aba hálügüdaguniwa ani lárigiñe aban híchugun gumadi woun lun wagiribudun larugan. Kei furangu lubéi larihin gaturobulin báadiwa lan hama gumadimatiña, aba wadügün aransehani lun lichugún yanu lánina badisei tidan aban muna lárigiñe aba hanügǘn ha lúnbaña habadiseirun lidoun aban duna sin wadügün lun hasubudiruni amu gürigia.

Lidan fiu dimaasu, aba labúgunina hau sun seingü prekursorugu espechalitiña Minisi le Arihibei hau ha Achülürübaña lidoun Ageiraü, Níherügiñe. Aba híchugun 48 oura woun lun wáfuridun ñéingiñe ani wagía guánarügü lunbei meha wadügün aransehani lun wáfuridun lídangiñe ageiraü. Adügatiwa gasu ani aba woudin sügülügü tidoun sukursáli to Niheriaboun. Ñéingiñe wounahóua lidoun amu burí fulasu.

Aba nounahóun lidoun aban aüdü Niheria le gíribei Orisunbare. Apurichihatina hama lílana liraüraü sétanu le ñeinbei ani rútina fiu aturiahani tídangiñe Bíbülia. Sisi hati lárigiñe, aba tagunbirahanina sukursáli lun nagiribudun Níherün, ani guentó nábuguarügü. Furumiñe wéirigüda lumutu agunbirahani le nanigi ani nidiherigüda lumutina giñe. Le linarün katei busenhadina meha narihiniña íbirigu ha Níherünbaña.

Aba nagiribudun Niamey. Aban weyu lárigiñe nachülürün, aba líchugun aban wügüri lánina bísinisi niheriana fe luagu gefenti lan luagu Heowá au, ábati lagumeserun adüga saragu álügüdahani luáguti ariñahani tídangiñeti Bíbülia ye. Aba nagumeserun íchiga aturiahani tídangiñeti Bíbülia lun, lárigiñe lígiruni agumulahani ani ígiralei átuni aba labadiseirun. Lárigiñe, ibiha numuti lubuidun chansi lun napurichihan lidan ámuñegueinarügü fulasu lidan ageiraü luma lun narihini ahanreina hamá gürigia lun inarüni murusun murusun. Dan le nachülürünbei Níherü, añahein meha 31 Gefentiña ñein; dan le nídinbei ñéingiñe añaheinhaña meha 69.

Lidan duusu-hati, irumu 1977, aba nagiribudun Niherióun lun larufudahóun ye luagu 3 dimaasu. Dan le lagumuchubei larufudahóun ye aba liabin íbiri le arihibei lau hadasin lílana Sétanu ha Arihibaña tau Sukursáli, íbiri Malcolm Vigo, aba líchugun aban gárada ye to leresibirunboun  túmagiñe sukursáli to Siera Leonaboun. Háluahaña meha íbirigu aban prekursoru mamarieidungili, le buiti látuadi ani le gariñagaditi inglesi luma faransu lun ligía lan óunigiruti sirkuitu Ginéa-Konakri. Aba lafuranguagüdüni íbiri Vigo ye ligía lan nagunbirahoubei lun neresibiruni kursu ligía. Ani ariñaga lumuti ye furangu luagu hénrengubei lan dasi le, ani ariñagayati: “Saminabei buidu lubaragiñe bánharun lun dasi le”. Gama lumoun, sin nasaminaruni bián wéiyaasu, aba nóunabuni: “Kei Heowá lubéi óunahabalina, nídiba”.

Aba naweiyasuhan tidan awión lun Siera Leonoun, aba nóundaragun hama íbirigu ha tídanbaña sukursáli. Aba lariñagun aban hádangiñe íbirigu ha lídanbaña Sétanu le Arihibei tau Sukursáli ye: “Ibidiñeti woun buidu ida liña lan léibugun apurichihani Ginéa”. Íbini sukursáli lan to arihiboun luagu apurichihani Ginéa, siñati meha tibihin ñunsu hawagu íbirigu ha ñéinbaña lugundun hanarime lan meha katei lánina polítika lidan ageiraü ligía. Áfaaguatiña saragu wéiyaasu lun tóunahan lóundarun Heowá aban íbiri arihei ida liña lan léibugun katei ñein, gama lumoun, siñati. Ligíati aba hamuriahan numa lun naweiyasuhan Konakri, uburugu le súdinibei lidan ageiraü Ginéa luma lun nouchun nibihin gárada lun nerederun lidan ageiraü.

Dan le nachülürünbei Konakriun, aba nidin tidoun enbajada lani Niheria aba nayanuhan luma kónsul le ñeinbei. Aba nafuranguagüdüni lun busén nan napurichihan Ginéa, aba lariñagun ye lun lan madügün nani, gayara lan nadaürün o lasuseredun aban katei le hanarimetimati ye ñein. Aba lariñagun ye: “Giribubá Niherióun, ani ábame bapurichiha ñein”. Aba nóunabuni: “Aranseñu niña lun nerederun”. Aba lóunahan kónsul le aban gárada lun Minisi le Arihibei hau ha Achülürübaña lidoun Ageiraü lun lamuriahan luma lun líderagunina, ani ítara liña ladügüni.

Murusun dan lárigiñe aban nagiribudun tidoun sukursáli to Siera Leonaboun ani aba nabahüdahani houn íbirigu le lanúadirubei minisi. Aba hachubahan íbirigu lau ugundani dan le híchugubei fe seremei lan lun Heowá rúhali lan Urúei üma ye lun nerederun Ginéa.

Labadinagua irumu 1978 darí irumu 1989 seriwitina kei óunigiruti sirkuitu Ginéa luma Siera Leona, ani seriwitina giñe kei óunigiruti sirkuitu Liberia dan le siñá lan lidin le arihibei luagu ítaga sirkuitu abisidahei somu damuriguaü. Dan meha le nagumeserúnbei eseriwida ñein wéiriti meha nasandirun, anihein dan, dántima le nabisidahani damuriguaü le díseti. Gama lumoun, adüga hamuti íbirigu sun hayaraati lun hanügünina háspitalirugun.

Luagu aban dan, aba nasandirun darí nakomaradun ladüga ladagarun malaria hama héweraü nuagu. Dan le nareídagubei, aba níchugun fe hayanuhaña lan íbirigu libügürü halíaba lan hábunana. Íbini sügǘ nan lídangiñe sügǘ le íchugubalin nibagari lidan denchaü, masaminarungubeitina nígiruni neseriwidun lun Heowá. Anahagua lau ichouruni Heowarügüñein lan gayara lakipuruniwa séfuñu, íbini wóunwegun ligíarügüñein gayara lagiribudagüdüni wabagari woun.

Lidan irumu 1988, ligía nasubudirunu Dorcas, aban prekursora ǘnabugutu ani wéiriti gamadagua tan tungua luma Bungiu. Aba wamarieidun ani sigitiwa eseriwida úara lidan sirkuitu. Rúharu Dorcas saragu ídemuei ye luma saragu ínsiñeni ani súnwandan aranseñutiña lan lun tadügün saragu sákürifisiu luagu Heowá. Lun burí woudin abisidaha amu damuriguaü,  anihein dan mosu lan wéibugun 25 kilometuru (15 maili), ani súnwandan wanügüni wálagu. Lun gayara lan wachülürün lidoun damuriguaü le dísetimabei, meferidiruntiwa meha chansi, ragütiwa meha furumiñeguarügü ugunei to wadarirun. Aweiyasuhatiwa luéigiñe üma le buinbei lau huyu luma baribarabu.

Ganigitu meha Dorcas. Anihein meha dan mosu lan wánhiñuragun duna buin hau agare. Luagu aban dan, lidan aban wéiyaasu le adurarubei seingü weyu, mosu meha wánhiñuragun aban duna tidan guríara lugundun günringuañu tiña lan burichi to lauboun fulansu. Dan le tararamunbei Dorcas lun táfuridun tídangiñe guríara, aba téiguadun dúnarugun ani aba tabuluchun. Máfuliti ni aban wádangiñe, ani añahein meha agare lidan duna ligía. Ligíati, aba hachubarun fiu nibureintiña ha ñéinbaña dúnarugun ani aba hesefurunu. Luagu fiu dan, biángubei wagía gawenedun wamuti sügǘ wuribati le lau saragu dan, lau sun lira sigitiwa wabaruaguóun lidan wadasin.

Lidan lagumeseha irumu 1992, aba lasuseredun aban katei le magurabun wamuti: Aba meha tadageinadun Dorcas! Mosu meha san wígiruni weseriwidun lidan dan dayarüti? Aba wariñagun: “Le linarün katei, irahü le aban idewesei lúmagiñeti Heowá”. Ligíati, wanúadirubei wíchugun Jahgift tuagu wasaani (le mini lubéi iri le “idewesei lúmagiñe Ha”). Gádürü irumu lárigiñe aba lagüriahoun wasaani le gíribei Eric. Biángubei hagía aban lubuidun idewesei lúmagiñe Heowá. Ídehatu Jahgift luagu aban dan tidan Áfisi to ñein lubéi Lásügürawagüdüwa lidoun amu Iñeñein to Konakriboun, ánheinti Eric leseriwiduña kei ídehati lidan damuriguaü.

Íbini lau lan lásügürün dan mosu meha tígiruni Dorcas teseriwidun kei prekursora espechalitu, gama lumoun, sigitu eseriwida kei prekursora, íbini dan le ñǘbürigiña wasaanigu. Lau lídehan Heowá, gayaraagili meha nasigirun lidan eseriwiduni espechaliti le lánina dan dayarüti. Dan le haweinamudunbei wasaanigu, ábaya teseriwidun Dorcas kei prekursora espechalitu, ani guentó biángubei wagía weseriwiduña kei misionéru Konakri.

Súnwandan nidin le ñeinhin lubéi lanügana Heowá. Ariha wamaali saragu wéiyaasu au tuma nani weiriou ida liña lan labiniruniwa Heowá luma lóunigiruniwa. Lau wafiñerun luagu Heowá ani mama luagu umegeguni, adügaali katei le lun wadireirun luéi saragu turobuli luma lun madiheridun wamá saragu. Dandu Dorcas kei au ariha wamaali woungua Heowarügüñein lan wesefuragüle ani ligíarügüñein gayara lakipuruniwa séfuñu (1 Kro. 16:35). Chouru numuti Heowarügüñein lan ágüdahei habagari ha afiñebaña luagu (1 Sam. 25:29).