Ibiha tumuti Hulda létima tabusenrubei
LUN hamuga meha aweiyasuha huma lidoun aban liraüraü ubouhu Sangir Besar (Indonésia) fiu irumu guentó, másiñati hadunraguña lan hamuga hama ǘrüwa wábirigu béyabu. Íbini subudiwa hama meha lidan ubouhu ligía lau híderaguniña gürigia gunfurandei le ariñahani le tídanbei Bíbülia, mama meha apurichihani hafisiutebei béyabu. Kati hadügübei?
Ubouhu Sangir Besar (luagu nórute lani Indonésia)
Furumiñe, aba hadaburun baranahoun áluaha dübü, aban burí liseisin kéiburi lueirin aban bali le lánina fútbol, ani aba hanügüni larun beya. Lárigiñe, aba hañuurun luagu aban haláü fulansu, lau aban marüdiyu háhaburugu aba háfarahani dübü ligía darí hasagarun dübü ñǘbüriti sügǘ lau tueirin aban gañé. Lárigiñe, aba híchaaguni lirahüñü burí dübü ligía lidoun aban búngidu plastiku, aba hanügüni hábiñoun amudeireina hagía luéigiñe aban esütépu. Areidaheina haméi lirahüñü burí dübü ligía tidan aban sagü wéiritu. Lárigiñe, aba tachülürün aban durugu abudoun sagü burí tuguya, ani yúsuati dübü ligía lun ladügǘn üma.
Hulda, abudaha dübü béyabu
Aban hádangiñe íbirigu hagía Hulda tíribei. Gayaraati meha tásügürün saragu dan awadigimarida béyabu sügǘ hau ha híbiri. Seinsu meha le afayeirubei tun luagu dübü ligía yusu tumuti meha lun tíderaguniña tiduheñu lau le hagastarubei burí múnada. Ani guentó, busentu tayusuruni seinsu le lun tibihin ámuya katei: aban tablet lun gayaraabei lan tebelurun lidoun JW Library®. Subudi tumuti Hulda gayara lan líderagunu bidéu burí luma ariñahani le lídanbei páhina le lúntima gapurichihadi tan luma lun gunfurandatimatanu Bíbülia.
Lidan aban hati dimí, nadagimeintu Hulda bián oura sagü binaafin. Lau dübü le tasagahabei ibihatu tabuinchagüdün aban fánreinti le tanagangiñebei aban tiraüraü durugu. Chülüdüga buga dan lun tóundaruni seinsu le tabusenrubei lun tagañeihan aban tablet.
Hulda tau tani tablet
Abahüdahatu Hulda: “Inarüni dan le lan lagumuchun weyu buchá lan nuagu ani gárigati sun nura lárigiñe nasagahan dübü. Gama lumoun, dan le anuheinharu tablet núhaburugu ani aba narihini gayara lan nayusurunu lun napurichiha buidu luma lun furesetima lan naranserun luba adamuridaguni, ábati nabulieidagun luéi gáriti”. Ariñagatu giñe, íderaguatanu tablet lidan lidaani sandi COVID-19, dan le ladügünbei sun katei le lánina adamuridaguni luéigiñe Internet. Ma wagundan ibiha tani Hulda létima tabusenrubei!
