1, 2. Ka uagu gayara lubéi hamuga wasaminarun móunabun lani Heowá wafurieidun?

 “GUNDAABÁ le tímatimaati lidan Aburemei, ábame lagunfuliruni tayumahan banigi” (Sal. 37:4). Ma lubuidun füramasei! Mini lan san le líchugubei lan Heowá lau lóufudagun sun le wamuriahabei luma? Buiti lun wálügüdagun woungua. Ka uagu? Samina humá luagu sügǘ burí le. Aba tamuriahan aban íbiri luma Heowá to mamarieidungiru busén tan tidin tidan Leskuela houn Apurichihatiña Larúeihan Bungiu, gama lumoun, aba lásügürün saragu burí irumu magunbirahouatu. Aba lamuriahan aban íbiri nibureinti le sándibei lidan furíei luma Heowá lun lareidaguagüdüni lídangiñe lisandi lun gayara lan lídehatima lidan damuriguaü; lau sun lira mareidagunti. Aba hafurieidun biángubei agübürigu luma Heowá lun lasigirun hasaani lidan inarüni, gama lumoun, aba lanúadirun hasaani lígiruni inarüni.

² Másiñati amuriahadün lan somu katei luma Heowá lidan furíei ani meresibirun humagili lóunabagüle. Háfuga ladügün katei le lun hasaminarun óunaba lani Heowá hafurieidun amu anhein lan hafurieidun móunabun lani, o samina humá míchugun lubalin lan le hamuriahabei luma ladüga adügaadün lan somu katei wuribati. Ítara liña meha tasandiragun aban íbiri gíritu Laura tungua. b Busentu meha úara luma tani weiri lun heseriwidun Betelirugu, ábati tafurieidun libügürü katei le lun Heowá. Ariñagatu Laura: “Chouru numuti yebe furesebei lan haguaragüdün wawagu”. Gama lumoun, sügüti hati burí luma burí irumu, magunbirahountiña. Abahüdahatu: “Hírutina meha ani ibidiñeti meha nun kaba lan nadüga. Ani aba meha nálügüdagun nungua anhein charaadina lubéi lun Heowá. Furanguti meha nariñaguni lun Heowá lidan nafurieidun ka lan nabusenrubei, úati meha gunfuranda nani ka lan uagu móunabun lubadina”.

3. Kaba wakutiha lidan aturiahani le?

 ³ Másiñati aniheinbei lan dan wálügüdagun woungua anhein aganba lubalin Heowá wafurieidun. Añahein meha hádangiñe lubúeingu Bungiu ha úaraguabaña ha lánina binadu dan adüga hamuti meha ligiaméme álügüdahani (Hob. 30:20; Sal. 22:2; Abak. 1:2). Ka gayaraabei lachoururagüdüni hun óunaba lani Heowá hafurieidun? (Sal. 65:2). Lun wóunabuni álügüdahani le, wakutihaali furumiñe, saminaü burí le: 1) ka gayaraabei wagurabuni lúmagiñe Heowá, 2) ka lagurabubei Heowá wámagiñe ani 3) ka uagu buidu lubéi wasansirun fiu lídangiñe katei le wamuriahabei.

4. Según Heremíasi 29:​12, ka füramase lubéi Heowá woun?

⁴ Füramaseti Heowá laganbubei lan wafurieidun (aliiha huméi Heremíasi 29:12). Hínsiñetiña lubúeingu Wabungiute lun ani maweiyasunbei abulieidagua luéi hafurieidun (Sal. 10:17; 37:28). Úati mini lan le líchugubei lan sun le wamuriahabei woun. Másiñati mosu lanme wagurabahani iseri ubóu lun líchuguni Heowá lídangiñe le wamuriahabei luma woun.

5. Ka gabaroun lubéi Heowá dan le laganbuni wafurieidun?

⁵ Gabaroun lumuti Heowá le labusenrunbei ladügün lidan lóurate lóunabuni wafurieidun (Isa. 55:​8, 9). Fiu lídangiñe le labusenrunbei ladügün lun Ubóu labuinchun hau wügüriña hama würiña ha ánhatiña lun larúeihan ani seriwi hagíame lun lidan aban ani lau ugundani. Gama lumoun, ariñagati Satanási buídubei lan lidin woun ánhawa arúeigua woungua (Agu. 3:​1-5). Lun larufuduni Heowá ye lan Mafia ígiraali lun hagumadiragun gürigia houngua, ani adügaali katei le lun gaturobulin wamá saragu uguñe weyu (Apur. 8:9). Subudi wamuti maranseha lubéi lan Heowá sun turobuli le guentó. Lun hamuga ladügüni, hasaminaruña hamuga gürigia gayara lan hagumadiragun houngua buidu ani gayara lan haransehani turobuli le ubouagubei.

6. Ka uagu súdini lubéi lun wachoururuni súnwandan lan ladügüni Heowá katei lau ínsiñeni luma irichaü?

⁶ Gayaraati lóunabuni Heowá furíei le wadügübei lun lidan ámuñegueinarügü igaburi. Kéiburi, dan le lasandirunbei urúei Esekíasi darí lun lakomaradun, aba lafurieidun lun Heowá lun lareidaguagüdüni, ani adüga lumuti Heowá (2 Uru. 20:​1-6). Ánheinti dan le layumuragunbei apostolu Pábulu lun Heowá lun lagidaruni ‘aban hiiyu le charuñubei’ luagu —háfuga aban lan turobuli lánina átuadi—, mareidaguagüdün lumuti Heowá (2 Ko. 12:​7-9). Haritagua waméi le asuseredubei lun apostolu Santiagu luma lun apostolu Féduru. Busenti meha urúei Erodesi láfaraguniña biángubei. Íbini furíei hamá lílana damuriguaü luagu Féduru ani chóuruti furíei hamá giñe luagu Santiagu, afarúati Santiagu hilagubei ánheinti Féduru séfuti seremei aban milaguru lúmagiñeti Heowá (Adü. 12:​1-11). Háfuga álügüdagua wamá woungua ka lan uagu lesefurei Heowá Féduru ani ígira Santiagu. Íbini mafuranguagüdün tani Bíbülia gayaraati wachoururuni ‘úati lan marichaü lidan’ Heowá ani hínsiñe lan dandu Féduru kei Santiagu lun (2 Lur. 32:4; Aruf. 21:14). c Gayaraati aniheinbei lan dan meresibirun wabéi lan lóunabagüle furíei le wadügübei. Lau sun lira, mekeharun gubeitiwa luagu móunabun lani Heowá wafurieidun lugundun chouru wamuti súnwandan lan ladügüni katei lau ínsiñeni luma irichaü (Hob. 33:13).

7. Ka katei moun lubéi lun wadügüni, ani ka uagu?

⁷ Áfaagua wamá lun magoubaguagüdün wamani le gádanbaliwa lumoun le gádanbaliña  amu. Kei hénpulu, másiñati aba lan wamuriahan aban katei létima wabusenrubei luma Heowá ani míchugun lumuti woun. Ani lárigiñe, aba wíchugun fe anihein lan giñe somu íbiri amuriahei ligiaméme luma Heowá ani genegeti óunaba lani Heowá lafurieidun íbiri ligía. Ligía asuseredubei tun aban íbiri gíritu Anna. Aba ladagarun kánserü luagu Matthew le tani weiriei, ani furíeitu lun Heowá lun gayara lan lareidagun tani weiriei. Lidoun burí dan ligía dagati giñe kánserü hawagu bián íbirigu derebuguhaña, furíeitu Anna saragu hawagu ǘrüwagubei. Areidaguátiña bián íbirigu hagía, ánheinti Matthew hilati. Furumiñe álügüdaguatu Anna tungua anhein ídeha lubéi Heowá lidan hareidagun bián íbirigu hagía, anhein ítara liña lubéi, ka uagu mareidagun lubéi tani weiriei. Ibidiñeti woun anhein Heowá lubéi adügübei lun hareidagun íbirigu hagía, gama lumoun anihein aban katei le wasubudirubei: lagidarubei lan Heowá lun súnwandan sun le adügübei lun wasufurirun ani ayumahati láguyuguagüdüniña lubúeingu ha hínsiñebaña lun (Hob. 14:15).   

8. a) Según Isaíasi 43:​2, ka ladügübei Heowá lun líderaguniwa? b) Ida liña líderaguniwa furíei dan le wásügürün lídangiñe óuchawaguni hénrenguti? (Ariha huméi bidéu Íderagua lumutiwa furíei lun wabaruaguóun wamá).

⁸ Súnwandan líderagubadiwa lan Heowá. Hínsiñetiwa lun Wáguchi Bungiu Heowá, ani mínsiñeti lun larihiniwa asufurira (Isa. 63:9). Gama lumoun, mesefurun lumutiwa luéi sun turobuli le tagoubaguagüdübei Bíbülia kei duna o watu gemeti (aliiha huméi Isaíasi 43:2). Le füramase lubéi woun líderagubadiwa lan lun ‘wánhiñuragun’ lídangiñe furumiñeguarügü óuchawaguni ani mígirunbei lun ladügǘn furumiñeguarügü wuribani woun le aduraruti lun súnwandan. Lanwoun lira, rúrügü lumuti Heowá lani sífiri woun lun líderaguniwa awanda (Luk. 11:13; Fili. 4:13). Ligíati, gayara lubéi wachoururuni wibihibei lan le wemegeirubei súnwandan lun wawandun luma lun wakipuragun woungua úaraguñu. d

9. Ida liña larufuduni Santiagu 1:​6, 7 súdini lan wafiñerun líderagubadiwa lan Heowá?

⁹ Agurabati Heowá lun wafiñerun luagu (Ebü. 11:6). Anihein dan másiña lan genege lan woun hanarime lan óuchawaguni le úmabei wagagibudagua darí lun lebelurun machouruni woun anhein líderagubadiwa lubéi Heowá. Lau sun lira chóurugüda tumuti Bíbülia woun lau lan lubafu Bungiu gayara lan wamudeirun aban baríeiru (Sal. 18:29). Ligíati mígiraguagüda wamá woungua lun machouruni. Le lunbei wadügüni, furíei wamá lun Heowá tídangiñe sun wanigi lau afiñeni ani lau ichouruni lóunabubei lan wafurieidun (aliiha huméi Santiagu 1:​6, 7).

10. Ru humá aban hénpulu le lunbei larufuduni ida luba lan wíchugun luéigiñe wóubadina lárigiñe wafurieidun.

¹⁰ Agurabati Heowá lárigiñe lan wafurieidun lun lunti lan wadügüni le yuubei woun. Samina wamá luagu aban íbiri le busenbei lidin lidan aban adamurini wéiriti ani aba lamuriahan luma Heowá lun líderaguni lun gayara lan líchugun lábuti üma lun. Ka gayaraabei ladügüni Heowá lun lóunabuni furíei le? Másiñati líchuguba lan Heowá erei lun, lun layanuhan luma lábuti. Lau sun lira mosu líchugun íbiri le luéigiñe lóubadina lau lidin ayanuha luma lábuti, háfuga mosu lan ladügüni saragu wéiyaasu. Gayaraati giñe lariñagun lun lábuti anhein gayara lubéi lidin somu lani paaná ayabuha leweñegua aba lanme giñe lidin ayabuha weyu le latokarun lun lani paaná midin lan. Anhein giñe gayara, gayaraati lariñagun lun lábuti mama lan mosu lafayeiruni weyu le mídinbei lubéi awadigimarida.

11. Ka uagu lunti lubéi wafurieidun súnwandan?

 ¹¹ Agurabati Heowá lun wafurieidun súnwandan luagu katei le adiheridagüdübaliwa (1 Tesa. 5:17). Afuranguagüdati Hesusu ñeinbei lan lídangiñe furíei le burí wadügüni meresibirunbadiwa lan lóunabagüle lau lóufudagun (Luk. 11:9). Ligíati, mábürüha lan warüna! Furíei wamá súnwandan ani lau ubebeni (Luk. 18:​1-7). Dan le gabügürügua lan wafurieidun lun Heowá luagu somu katei, warufuduñein lun luagu súdini lan woun le wamuriahabei lúmati afiñe wamá gayara lan líderaguniwa.

12. a) Ka gayaraabei wálügüdagun woungua, ani ka uagu? b) Ka lunbei gabaroun wamani lun wafurieidun lau inebesei? (Ariha huméi rekuáduru “ Arufudati san le namuriahabei inebe lan Heowá nun?”).

¹² Anhein mounabungili lubéi furíei le wadügübei lun Heowá gayaraati wadügün ǘrüwa álügüdahani. Le furumiñeti “Le san lúgubu mégeinani le namuriahabei lidan furíei?”. Liibe-agei dan, subudi wamuti ka lan katei buídutimabei woun. Lau sun lira, gayaraati le lan wamuriahabei mámaba lan ligía buídutimabei woun túteme. Háfuga wafurieiduña lun laranserun ítaga turobuli lidan ítaga igaburi, lau sun lira másiñati anihein lan aban igaburi buídutimati lun laranserun turobuli ligía. Ani gayaraati lídangiñe lan katei le wamuriahabei lidan furíei múaran lan luma lugundan Heowá (1 Huan 5:14). Samina wamá hawagu agübürigu ha iridúbaña lidan párafu 1. Amuriahatiña luma Heowá lun ladügün lun lasigirun hasaani lidan inarüni. Genegeti mariban lan le hamuriahabei agübürigu ha. Le linarün katei, mafosuti Heowá ni aban lun heseriwidun lun. Le labusenrunbei, lun sun lan wagía íbini wasaanigu, lun háhuduragun lun ladüga ligía lan wanúadirubei (2 Lur. 10:​12, 13; 30:​19, 20). Ligíati, ka lunbei hamuga hamuriahani agübürigu ha luma Heowá? Le  lunbei hamuriahani lun líderaguniña lun hachülürün tidoun lanigi hasaani lun línsiñedun Heowá lun luma lun busén lan hasaani gamadagua lan luma (Ari. 22:6; Efe. 6:4).

13. Según Ebüréu 4:​16, ka dan líderaguawa Heowá?

¹³ Libiaman álügüdahani “Anihán san dan lun lóunabuni Heowá nafurieidun?”. Háfuga wasaminarun megei wamá lun lóunabuniwa wafurieidun lau lóufudagun. Le linarün katei, subuditima lumuti Heowá ka lan dan buídutimabei lun líderaguniwa (aliiha huméi Ebüréu 4:16). Anhein míchugun lan Heowá woun lau lóufudagun le wamuriahabei luma, másiñati wasaminarun, “Móunabun lubadiwa lan”. Háfuga “Mámaba lan guentó” lóunabawa. Giribu wamá lidoun likesin nibureinti le afurieidunibei lun lareidagun. Lun hamuga lareidaguagüdüni Heowá nibureinti le lau aban milaguru, lariñaguña hamuga Satanási luagu anihagua lubéi nibureinti le eseriwida lun Heowá ladüga lan lareidaguagüdüni (Hob. 1:​9-11; 2:4). Luagu le aban oubaü, direi hali Heowá aban weyu lun lagumuchun lau sun sandi (Isa. 33:24; Aruf. 21:​3, 4). Ligíati, magurabahan wamá lun ladügün Heowá aban milaguru lun lareidaguagüdüniña gürigia. Kaba hamugati lamuriahan nibureinti le luma Heowá? Le lunbei lamuriahani lun líchugun Heowá erei luma aban saminaü darangilati lun, lun lasigirun eseriwida lau úaraguni íbini sándiñein lan (Sal. 29:11).

14. Ka larufudahabei tani Laura hénpulu hun?

¹⁴ Haritagua humagiru íbiri Laura, íbiri to afurieiduboun lun Heowá lun teseriwidun Betelirugu? Sügüti seingü irumu lun gunfuranda tani le ladügübei Heowá lun lóunabuni tafurieidun. Ariñagatu: “Lidan dan ligía, arufudahati Heowá nun ani íderagua lana abuiduragüdei nigaburi. Kei hénpulu, mégeitina meha naganwoundagüdüni nafiñerun luagu, nabuiduragüdüni ligaburi naturiahan luma lun nafurendeirun agundaara súnwandan meberesenga  le gádanbalina”. Lau lásügürün dan, aba tagunbirahoun Laura luma tani weiriei lun heseriwidun keisi óunigirutiña sirkuitu. Ariñagatu: “Le linarün katei, óunaba lumuti Heowá nafurieidun mama kei le aubei nagurabei. Sügüti saragu dan lun narihini lubuidun lóunabagüle lun nafurieidun. Seremei numuti Heowá saragu luagu líchuguni chansi le nun lun nasandiruni línsiñehabu luma lareini”.

15. Ka uagu anihein lubéi burí dan buidu lan lun míbetima lan wamuriaha lidan wafurieidun? (Ariha humóun giñe iyawaü).

¹⁵ Le lǘrüwan álügüdahani “Lunti san nafurieidun luagu amu katei?”. Anihein dan buídubei lun mamuriahan wamani sun le wabusenrubei lun gayara lan warihini ka lan labusenrunbei Heowá woun. Samina wamá tuagu íbiri to mamarieidungiruboun to afurieiduboun lun gayara lan tidin tidan Leskuela houn Apurichihatiña Larúeihan Bungiu. Busén tubéi tidin tidan leskuela to lun gayara lan teseriwidun lidan aban fulasu le ñein lubéi mégeiwa lan ídemuei. Íbini furíei tan luagu katei le, ka amu katei gayaraabei tamuriahani luma Heowá? Gayaraati tamuriaha luma lun líderagunu adarira amu igaburi lun taganwoundagüdüni teseriwidun lun (Adü. 16:​9, 10). Lárigiñe tafurieidun gayaraati tíchugun luéigiñe tóubadina lau tálügüdüni óunigiruti sirkuitu anhein mégeiwa habéi prekursorugu lidan somu damuriguaü le yarafati. Gayaraati giñe tabürühan tidoun somu sukursáli lun tasubudiruni halía lan mégeiwatima hamá apurichihatiña. e

16. Ka gayaraabei wachoururuni?

¹⁶ Kei le aubei wafurendeira, gayaraati wachoururuni óunaba lani Heowá wafurieidun lau ínsiñeni ani lidan aban igaburi le richati (Sal. 4:3; Isa. 30:18). Gayaraati anihein lan dan óunabagülei lan le líchugubei mama lan ligía le wagurabubei, gama lumoun maweiyasunbei abulieidei le wamuriahabei luma. Hínsiñetiwa lun Heowá saragu ani maweiyasunbei águrawa (Sal. 9:10). Ligíati sigí wama afiñera luagu Heowá “súnwandan” ani dará wamoun wanigi lun lidan furíei (Sal. 62:8).