Hínsiñeti hamuga san hun lun hasagarun saragu buiti lídangiñe haturiahan hábuguarügü? Gayaraati líderagunün adundehani le lúntima hetenirun lun haturiahan.

• Áluaha humá aban fulasu le darangilati. Anhein gayara, áluaha humá aban fulasu le harumati lúmati lun ñein lan lanpu nófuti lun gayaraabei lan haliiha buidu. Gayaraati hañuurun luagu dábula o háluaha aban fulasu bóugudi le buiti lun gayara lan haturiaha ñein.

• Áluaha humá aban fulasu le ñein lubéi gayara lan hábuguarügü humá. Aba lidin Hesusu afurieida “bóugudin luéi uburugu lidoun aban fulasu le mageirawati” “lubá larugan, dan le búrigagili” (Mar. 1:​35, LBID). Anhein siñá lubéi lun hábuguarügü humá dan le haturiahan, ariñaga humá houn hiduheñu o houn ha awinwandubaña ñein hubéi, busén humá haturiaha ani amuriaha humá hama lun meberesehan hamanün.

• Madireira huméi hisaminan luéi aturiahani. Anhein hayusura higagamurun o hani tablet lun haturiahan seti humóun lun maganbún lan danme laguarún hun o danme lounahóun somu mensahitu hun, lun meberesehan lanün danme le haturiahan. Ánheinti ñübuin hichügüwagun dan le aünha lan aturiaha lun hadügün somu katei, bürǘ huméi lun hetenirun lun lárigiñe haturiahan. Anhein hénrengu lubéi hun lun hetenirun lun haturiahan, ráramagua humá murusun lun hachawaragun o lun héibugun.