1, 2. Ka marichaü gayaraabei lasuseredun woun?

 ABAHÜDAHATI Hesusu tuagu aban würi hilaali tani weiriei to ñǘdünboun saragu wéiyaasu amuriaha luma aban aguseragüdüti lun líchuguni tiricha tun. Chóuruti rugua hamá disipulugu houngua lidan tilugaarun würi tuguya ladüga lidan dan lügüra adügǘwati meha marichaü houn saragu gürigia (Luk. 18:​1-5). Uguñe weyu, gayaraati gunfuranda wamani ida liña lan meha tasandiragun würi to tungua, lugundun anihein dan ouserúatiwa lau marichaü.

² Maweiriduntu wanigi lau hóuseruniwa lau marichaü, ladüga ligía hagaburibei gürigia lidan ubóu le (Apur. 5:8). Másiñati le lan aweiridagüdübarun wanigi hóuseruniwa wábirigu wuriba. Inarüni mebedaagun hamá lun inarüni le tídanbei Bíbülia. Gama lumoun, kei chará habéi, anihein dan hóuseruniwa wuriba. Gayaraati wafurendeirun saragu lídangiñe ligaburi lóuserun Hesusu dan le meha hadügün salufuritiña marichaü lun. Anhein gaguraasun wabéi habá wáganigu dan le hadügün marichaü woun, lúntima gaguraasun wamá habá wábirigu dan le hóuseruniwa wuriba. Ligíati, ida liña lasandiragun Heowá lungua dan le wouserún wuriba, wábirigu lan yebe o amu lan gürigia? Aríagu liña san Heowá lun le asuseredubei?

3. Ida liña wasubudiruni mínsiñe lan lun Heowá wouserún wuriba?

³ Busenti Heowá lun wouserún buidu ani aríagu liña dan le wouserúniwa wuriba. “Ladüga hínsiñeti irichaü lun Aburemei” Heowá (Sal. 37:28). Ariñagati Hesusu luagu líchugubei lan Bungiu haricha lubúeingu “houn ani madarasahanbei” lan (Luk. 18:​7, 8). Yarafa madise, lagidarubei sun asufuriruni ani mígirunhaalime lun ñein lan marichaü (Sal. 72:​1, 2).

4. Ida liña líderaguniwa Heowá?

⁴ Larufudahaña Heowá woun ida luba lan wagagibudagun luma marichaü sun awanhán lan agurabahei lagidaruni (2 Fe.  3:13). Larufudahaña Heowá woun ka lan lunbei wadügüni lun maweiridaguagüdün wamani turobuli. Óunaha lumuti giñe Heowá Lisaani ubouagu lun larufudahan woun ida luba lan waransehani turobuli. Ruti giñe adundehani woun le tídangiñeti Bíbülia le gayaraabei wayusuruni dan le wouserún lau marichaü.

GÓUNIGI WAMÉI LIGABURI WÓUSERUN DAN LE LADÜGǗN MARICHAÜ WOUN

5. Ka uagu mosu lubéi wóunigiruni ligaburi wóunabun dan le wouserún lau marichaü?

⁵ Másiñati gari lan woun o aba lan lagibedagun wasaminan dan le wouserún lau marichaü (Apur. 7:7). Ítara liña meha giñe hasandiragun lubúeingu Heowá houngua, kei burí Hobu luma Abakúku (Hob. 6:​2, 3; Abak. 1:​1-3). Íbini kamani lan hasandiragun gürigia houngua ítara, mosu wóunigiruni ligaburi wóuserun lun maweiridaguagüdün wamani turobuli.

6. Ka larufudahabei le ladügübei Abüsalón woun? (Ariha huméi giñe dibuhu).

⁶ Dan le ladügǘn marichaü woun o warihin ladügǘn marichaü houn amu, másiñati liabin wachügüwagun, wafayeiragüdüniña ha adügübalin marichaü ligía. Gama lumoun, gayaraati ladügün katei le lun laweiridagun turobuli. Samina wamá luagu le ladügübei Abüsalón, aban hádangiñe lirahüñü urúei Dawidi. Aba lagañidun saragu dan le líchugunbei fe águragua laaru lan Amünón le líbugaña Tamarü to litu. Según lilurudun Moisesi mosu hamuga meha lafarún Amünón hilagubei ladüga katei wuribati le ladügübei (Fad. 20:17). Maribanti lagañidun Abüsalón ladüga marichaü le, gama lumoun marichati Abüsalón lafayeiragüdüni Amünón luagu wuribani le (2 Sam. 13: 20-23, 28, 29).

7. Ida liña lóuserun aban lubúein Bungiu dan le larihin houserún amu lau marichaü?

⁷ Dan le warihin madügǘn lan ni kata houn ha adügübaña wuribani, másiñati liabin saminaü wachügüwagun anhein buidu lubéi wasigirun adügei le richabei. Samina wamá luagu aban lubúein Bungiu le arihibalin hóuseraguniña gürigia salufuritiña gürigia buítiña, ani genegeti buidu lan lidin houn salufuritiña hagía. Aba lariñagun wügüri ligía: “Ariha humaña wuribatiña ha! Gánwounguagüda hamuti harisin lau darangilaü” (Sal. 73:12). Wéiriti meha luriban lasandiragun wügüri ligía lungua ladüga marichaü le meha larihibei darí lun marihin lani buiti le lanügübei leseriwidúniwa lun Heowá. Ariñagati giñe: “Hóuchatina  yebe gunfuranda nani katei le, gama lumoun hénrenguti nun” (Sal. 73:​14, 16). Lanwoun lira, ariñagati: “Ánheinti au murusunrügaali yebe lun néiguadun; ítagaraü yebe liriraagun nugudi” (Sal. 73:2). Aban katei ítarati asuseredubei lun aban íbiri gíriti Alberto. a

8. Ka igaburi larufudubei aban íbiri dan le ladügǘnbei marichaü lun?

⁸ Iridahóuati aban íbiri gíriti Alberto luagu íweruha lani liseinsuna damuriguaü, íbini míweruha lan ni kata. Adügati turobuli le lun leferidiruni lubara keisi wéiyaali lidan afiñeni luma inebesei le hasandirubei lílana damuriguaü ha asubudirubalin turobuli le. Ariñagati: “Adügati katei le lun wuriba lan nasandiragun nungua luma lun nagañidun”. Aba lígiraguagüdün Alberto lungua lun lañawarihani le asuseredubei lun darí lun ladisedun luéi Heowá, aba madamuridagun hali lan mapurichihan ligía luagu seingü irumu. Arufudati sügǘ le ka lan gayaraabei lasuseredun woun ánhawa márügüdagun woungua dan le ladügǘn somu marichaü woun.

ÁYEIHA WAMÉI HESUSU

9. Ka marichaü úmabei lagagibudagua Hesusu? (Ariha huméi giñe dibuhu).

⁹ Arufuda lumuti Hesusu woun ida luba lan wóuserun. Lau sun madügün lan Hesusu ni kata wuribati, rútiña meha gürigia lidurun.  Kéiburi, mafiñentiña meha hádangiñe liduheñu Mesíasi lan, ani ariñagatiña luagu lǘlühali lan lau. Ariñagatiña tábutigu hani huríu relihión máfianu lan íderagubalin lidan milaguru le ladügübei. Adügatiña súdaragu rómana bula lau, óuseragua haméi, anaba haméi ani áfara haméi hilagubei (Mar. 3:​21, 22; 14:55; 15:​16-20, 35-37). Awanda lumuti Hesusu sun le ani magiribudagüdünti wuribani luagu wuribani ni ka un. Ka wafurendeirubei lídangiñe ligaburi lóuserun Hesusu?

10. Ida liña lóunabun Hesusu lun sun marichaü le adügǘbei lun? (1 Féduru 2:​21-23).

¹⁰ (Aliiha huméi 1 Féduru 2:​21-23). b Arufuda lumuti meha Hesusu ida luba lan wóuserun dan le ladügǘn marichaü woun. Subuditi meha lun kaba lan dan layanuha luma kaba lan dan lámanicha (Mat. 26:​62-64). Kéiburi, dan meha le hayanuhan iyeeni luagu, anihein meha dan móunabunti (Mat. 11:19). Ani dan le lóunabun manabagun lumutiña láganigu ani masíadirun lumutiña giñe. Deregeguarügüti Hesusu lungua “lun Bungiu le aguseragüdübei lau ísuruni”. Subuditi meha lun luagu aríagu liña lan Heowá le Lúguchi lun sun marichaü le adügǘbei lun ani afiñeti meha laransehabei lan Heowá turobuli lidan dan le buídutimabei lun.

11. Ida luba wárügüdagun woungua lun mariñagun wamá dimurei mabuidunti? (Ariha humóun giñe iyawaü).

¹¹ Gayaraati wáyeihani Hesusu lau móunabun wamá wuriba dan le wouserún lau marichaü. Anhein manarime lubéi luriban le adügǘbei woun gayaraati wásügüragüdüni, o werederun maniñu luéi waweiridaguagüdüni turobuli (Apur. 3:7; Sant. 1:​19, 20). Luagu le aban oubaü, másiñati wariñagun somu katei  ánhawa ariha louserúña lan o touserúña lan somu gürigia lau marichaü ani gayaraati giñe merederun wamá maniñu dan le layanuhóun wuriba luagu inarüni (Adü. 6:​1, 2). Ani lunti wasubudiruni, mosu lan wadügüni sun wayaraati lun wayanuhan lau inebesei ani lau darangilaü (1 Fe. 3:15). c

12. Ida luba wíchaagun woungua lúhaburugun “Bungiu le aguseragüdübei lau ísuruni”?

¹² Gayaraati giñe wáyeihani Hesusu lau wígiruni turobuli lúhaburugu “Bungiu le aguseragüdübei lau ísuruni”. Ida? Anhein chará lubéi lisaminan aban gürigia wawagu o lóuseruniwa wuriba, chouru wamuti subudi lani Heowá ka lan inarünibei. Íderagua lumutiwa ichouruni le awandei marichaü, lugundun subudi wamuti laransehabei lan Heowá turobuli burí le lidan lidaani. Dan le wígirun lun Heowá lan aransehei katei mígiraguagüdüntiwa woungua lun igañi ni lun igarihabu. Gayaraati ladügün igarihabu lun wóuserun wuriba, gidaléime wagundan ani gádeileime wamadagua luma Heowá (Sal. 37:8).

13. Ka gayaraabei líderaguniwa awandei marichaü?

¹³ Inarüni siñá lan wáyeihani ligaburi Hesusu sunsuinagubei. Lugundun anihein dan ariñagatiwa o adügatiwa katei le adügübei lun wasakürihan lárigiñe (Sant. 3:2). Anihein marichaü le ígiruti lárigirugu wawagu, ani sun anihagua lanme ubóu le ñeinbei wama. Anhein ligía lubéi asuseredubei hun, subudi huméi aríagu liña lan Heowá lun sun le hásügürübei. Kei giñe sügǘ lubéi Hesusu lídangiñe saragu marichaü, gunfuranda lumuti le wasandirubei (Ebü. 4:​15, 16). Mámarügüñein lani Hesusu hénpulu líchiga Heowá woun, ruti giñe adundehani tídangiñeti Lererun le huuti ani le lunbei líderaguniwa agagibudagua luma marichaü. Guentó akutiha wamá bián bérusu tídangiñe gárada to labürüdüboun Pábulu houn Rómana.

“ÍGIRA HUMÉI LUN BUNGIU LAN AFAYEIGÜDA LUAGU”

14. Ida luba wafalaruni adundehani le lariñagubei Pábulu le lídanbei Rómana 12:19?

¹⁴ (Aliiha huméi Rómana 12:19). Falá wamuti adundehani le lariñagubei apostolu Pábulu dan le wígiruni sun katei lúhaburugu Heowá ladüga lau lan irichaü laguseragüda ani adüga lumuti lidan dan luma igaburi le buídutimabei lun. Ligía ladügübei John dan le lóuserunbalin aban íbiri lau marichaü. Ariñagati: “Ragüguarügütina nungua lun maranseha nani katei lau nigaburi. Íderagua lumutina Rómana 12:19 lun gaguraasun nan luma lun nafiñerun luagu Heowá”.

15. Ka uagu buídutima lubéi lun wagurabahan lun Heowá lan aransehei turobuli?

¹⁵ Buídutimati lun wagurabaha lun Heowá lan aransehei katei. Ánhawa gagurabaguadi, mabouchagun wabéi wachügü ariha ida luba lan waransehani turobuli. Ladüga aranseñu liña Heowá lun líderaguniwa. Kamá hamuga lariñaguña: “Ígirabei sun katei núhaburugu, naransehabei”. Füramaseti Heowá laransehabei lan waturobulin ani buídutimabei laransehani wawéi. Anhein afiñe wabéi luagu füramasei le, furesetimabei lásügürün wagañi. Ariñagati John, íbiri le úagubei wayanuha lidan párafu le lubaragiñebei le: “Anhein nígira niturobulin lúhaburugu Heowá buídutimabei laransehani katei sügǘ nau”. Anihán saminaü le íderagubalin.

“GÁÑEIBEI WURIBANI LAU BUITI”

16, 17. Ida liña líderaguniwa furíei agañeirei wuribani lau buiti? (Rómana 12:21).

¹⁶ (Aliiha huméi Rómana 12:21). Ariñagati Pábulu: “Gáñeibei wuribani lau buiti”.  Ariñagati Hesusu lidan yanu le líchugubei wǘbüwagugiñe: ‘Hínsiñe hamá háganiñu hun, furíei huguyame lun Bungiu hawagu ha anabagubalün, ha wuribabei hóuserunün’ (Mat. 5:44). Ligía meha ladügübei Hesusu. Másiñati saminaadiwa lan luagu gáriti le lawandubei Hesusu dan meha le hádaragunbalin súdaragu rómana luagu wagabu. Óuseragua hamuti giñe ani agayuaha hagía luagu. Hénrenguti gunfuranda wamani lanarime lasufurirun Hesusu. Ma lanarime marichaü!

¹⁷ Mígirunti Hesusu lun ladügün sun marichaü ligía lun tagahüdün lanigi. Mamuriahanti luma Heowá lun lafayeiragüdüniña luagu marichaü ligía. Ariñagarügüti lun: “Núguchi, ferudunabaña ladüga ibidiñeti houn ka lan hadügübei” (Luk. 23:34). Adügati wafurieidun hawagu ha óuserubaliwa wuriba lun warihiniña lidan amu igaburi luma lun lagalumarun wagañi luma lun lagidarun wagarihabu.

18. Ida liña líderaguni furíei Alberto luma John?

¹⁸ Íderagua lumutiña furíei bián íbirigu ha uágubaña layanuhóua lidan aturiahani le iñuragua lídangiñe marichaü le adügǘbei houn. Ariñagati Alberto: “Furíeitina hawagu íbirigu ha óuserubadina wuriba, amuriahatina luma Heowá saragu wéiyaasu lun nabulieiduni le hadügübei nun”. Ma lubuidun giribuya lan Alberto eseriwida lun Heowá! Ariñagati giñe John: “Amuriahatina luma Heowá saragu wéiyaasu luagu íbiri le adügübei wuribani nun. Íderagua lumutina furíei lun masaminarun nan wuriba luagu íbiri le luma lun feruduna nani. Ruti giñe furíei darangilaü nun”.

19. Sun anihagua lan ubóu le, ka lunbei wadügüni? (1 Féduru 3:​8, 9).

¹⁹ Lubaragiñe lagumuchun ubóu wuribati le, ibidiñeti woun kaba lan marichaü uma wagagibudagua. Meberesenga le asusereduti mararamagua lan wamuriahan ídemuei luma Heowá. Áfaagua wamá wáyeihani igaburi le larufudubei Hesusu dan le ladügǘnbei marichaü lun ani ítarameme wamá afalarei adundehani le tídanbei Lererun Bungiu. Anhein wadüga, chouru waméi labinirubadiwa lan Heowá (aliiha huméi 1 Féduru 3:​8, 9).