Paul: Ma meha lanarime wagundan waweiyasuhaña lan luagu furumiñe wéiyaasu lidan unsu-hati irumu 1985 lidoun ageiraü le ñeinba lubéi weseriwida kei misionéru: Áfürika, ageiraü Liberia. Ráramaguatu awión Senegáli. Ariñagatu Anne: “Lubaragiñe wanügün aban oura huáriñurugu Liberiañadiwame”. Lárigiñe tariñaguni Anne dimurei le, aba waganbun aban awisahani: “Gürigia ha lúnbaña houdin Liberioun mosu hararirun tídangiñe awión. Sagawa lurúeite Liberia, siñati tadagarun ugunei ñein”. Ábati werederun 10 weyu hama fiu misionérugu Senegáli. Aganbahóuati tidan ñunsu luagu Liberia, hafarawagúña lan gürigia ñein ani mígirun lan urúei lun háfuridun gürigia hábiñegiñe dan le laguñeedun, háfaraguñanu lan gürigia ha hadarirun ǘmada.

Anne: Méchuntiwa aweiyasuha lidan fulasu le ibidiñeti woun. Lúmagiñe ñǘraügidina subudiwatina kei “Anne to hanufudeboun”. Adadagaratina íbini lun nánhiñuraguni üma. Lau sun lira, aranseñu waña lun wachülürün lidoun fulasu le ñeinba lubéi weseriwida.

Paul: Au tuma Anne Inglaterana wagía, lílanameme aban fulasu 8 kilometuru (5 maili) lidise wawinwandun. Ínchaha hamutina nagübürigu lun neseriwidun kei prekursoru. Ani ínchaha tumutu giñe túguchu Anne lun giñe tadügüni ligiaméme, ligíati wagumeserunbei eseriwida kei prekursoru dan le lagumuchunbei waturiahan. Íderagua hamutiwa lun weseriwidun lun Heowá. Dan le nagunfulirunbei 19 irumu, aba nagunbirahóun lun neseriwidun Betelirugu. Gumesetu Anne eseriwida Betelirugu dan le wamarieidunbei lidan irumu 1982.

Anne: Hínsiñeti meha woun weseriwidun Betelirugu. Lau sun lira súnwandan meha busén wamá weseriwidun lidan aban fulasu le ñein lubéi mégeiwa hamá apurichihatiña. Adügati wawadigimaridun Betelirugu hama binadu misionérugu lun laganwoundun ayumahani ligía. Furíeitiwa lun Heowá libügürü katei le luagu ǘrüwa irumu sagü guñoun. Ligíati, ma wagundan dan le wagunbirahóun tidoun Leskuela Galaadü külase 79 lidan irumu 1985 ani aba wounahóun Áfürikoun lidoun aban ageiraü le gíribei Liberia.

Paul: Chülüdüga buga dan lun wachülürün Liberioun tidan furumiñetu awión to unboun lichugúa üma lun tadagarun ñeinhin. Buin haña meha gürigia lau anufudei, siñá ligía háfuridun hábiñegiñe lidan ítaga oura. Wéiriti meha hanufude gürigia íbinirügü dan le tadürügüdün aban karü aba héibaagun agúaraheina. Lun láfarun idiheri wawéi, sagü guñoun aba meha waliihan fánreinti tídangiñe líburu Sálumu. Lau sun lira, wéiriti meha línsiñe wadasin woun. Sagü meha weyu tidin Anne apurichiha, ánheinti au rédeitina awadigimarida Betelirugu  úara luma John Charuk. a Furendeitina meha saragu lúmagiñe, lugundun barühali meha saragu dan awinwanda Liberia subudiléi le gádanbaliña íbirigu.

Anne: Adügati lubuidun hagaburi íbirigu lun weiri lan línsiñe Liberia woun. Hínsiñehabutiña, úaraguatiña ani gariñagaditiña. Lau lóufudagun aba gamadagua wamá hama darí lun aba lan wanügüniña keisi waduheñu. Rútiña lubuidun adundehani le íchugubei gurasu woun ani buiti apurichihani ñein. Ábaha hagañidun gürigia dan le ñǘdüngiñe wamá hábiñegiñe dan le wapurichihan houn. Ménrengunti meha layanuhóun hama gürigia íbini ǘmadarugu. Le meha waturobulinbei gibe hamá aturiahatiña wama, darí lun madaani wamá lun wíchugun aturiahani houn súngubei. Aban meha turobuli buiti le!

Paul: Gádürüñein irumu lau darangilaü. Lidan irumu 1989, aba lasansiragun sun katei, aba ñein lan aban wuribu. Weyu 2 lidan sedü-hati, irumu 1990, aba hárügüdüni háganiñu ha arúeihabaña fulasu burí le yarafabei tun Beteli. Luagu ǘrüwa hati, siñati wagúarun ni wabürühan houn ni aban, ni houn waduheñu ni tidoun Beteli to Merigaboun. Ani anihein meha anarimeni, chagaguaü, lóuguati éigini lidan ageiraü ani kamaniti waganbun hágurawagun würiña. Katorusuñein irumu lau turobuli le lidan sun ageiraü.

Anne: Anihein meha áfarahani hadan ámuñegueinarügü türibu. Añahein meha súdaragu lidan sun fulasu, anuhein meha ámuñegueinarügü áruma hama ani ámuti ligaburi hadaüragun, aba meha hebelurun hábiñoun gürigia anaahei sun le habusenrubei ñéingiñe. Añahein hádangiñe ayanuhatiña luagu áfarahani le hadügübei kamá hamuga “animaalugu” háfaragubaña. Ragǘ hamuti meha ha ebedaagubaña üma ani liibe-agei dan aba háfaraguniña ha busenbaña hásügürün. Fuiñu haña meha hilaaña múarugu yarafa tun sukursáli. Añahein hádangiñe wábirigu áfarawaguatiña hilagubei, ñéiñanu bián misionérugu hadan ha áfarawagubaña.

Saragu hádangiñe wábirigu áhurera hamuti habagari lun haramuduniña íbirigu ha lílana türibu le éibaahoubei. Añahein hádangiñe misionérugu hama Betelitagu adüga hamuti ligiaméme aba haramuduniña wábirigu. Rédeitiña fiu íbirigu ha anurahabaña Betelirugu tábugiñe muna ani ha híbiri arumugutiña wama iñu. Lidan rumu le ñein nubéi luma Paul rédeitiña sedü íbirigu wama.

Paul: Sagü weyu háfaagun súdaragu ha ebedaagubaña lun hebelurun Betelirugun arihei anhein añahein lubéi somu gürigia waramudun ñein. Ságüha lasuseredun katei le, ábaha houdin biama luagu gedi ayanuha hama, ábati herederun biama wábirigu aríaaha luéigiñe aban funedera. Lun meha gayara lan wóunigiruniña íbirigu ha  aramudagubaña wama, ábaha wadügün aban katei: anhein híchiga íbirigu ha luágubaña gedi háhabu hagibugiñoun, mini lan lira buidu lan léibugun sun katei mebelubaña lan wuribatiña ha Betelirugun. Ánheinti híchiga háhabu hanagangiñoun mini lan furunde hamá wügüriña ha. Ligíati ha aríaahabaña luéigiñe funedera mosu meha houdin furesegueina aramudaña wábirigu.

Anne: Lárigiñe saragu dimaasu, siñaali hararamuniña íbirigu gürigia wuribatiña ha lun mebelurun hamá Betelirugun. Aba nidin aramudagua tuma aban íbiri kumurugu le ñein lubéi aban aramudaguagülei lidan aban armariu. Ábanti tebelurun íbiri lidoun aramudaguagülei ligía kei auti tiyara. Múdeitiña eyeriñu wuribatiña ha nárigi tau arabugusu háhaburugu. Lau anarimeni, aba hagumeserun ádahei tubenari kumú, ábati lariñagun Paul houn: “Aguraba humá san, anuhein nani weiriou ñein”. Dan le nadouruni lubenari aramudaguagülei le lídanbei armariu, ábati laganbún násouha dan le naranseruni sun ílagu lárigoun ani barütina dan. Ábati nagumeserun adadagara saragu darí lun siñá lan nadaaruni tubenari kumú lugundun ánhana hamuga hariha adadagara ítara, hasubudiruñein hamuga naramuduña lan somu gürigia. Ligía lubeiti aba nadügün aban furíei lun Heowá maniñu ayumuraguatina lun Heowá lun líderagunina. Lárigiñe aba nadaaruni bena ibidiñounga nun ida liña lan nadüga aba nabusurun houn lau darangilaü. Aba ladiñurunina aban hádangiñe lau irofuni ligibugiñegiñe aba lidin sügülügü luagun armariu, aba ladaaruni aba lachagaraguni sun ílagu le ñeinbei. Keiti madari lan ni kata lidan armariu, ábati lidin hau lánigu áluaha anhein añahein lubéi somu gürigia aramudaguñu tidan amu burí rumu luma lidan amu burí fulasu ñein Betelirugu. Gama lumoun, madaritiña ni kata.

Paul: Luagu saragu hati lóuguati meha éigini wama. Liibe-agei dan, áhuduraguni le meha wadügübei sagü binaafin waniñebei “bachati”. Sun meha wagía subuditi wamuti líchuguba lan waliihanu luma waturiahanu Bíbülia erei woun.

Lun hamuga furí wamá áluaha éigini luma duna, siñabei hamuga meha wóunigiruniña íbirigu ha aramudagubaña Betelirugu ani háfarawaguña hamuga hilagubei. Anihein dan adügati Heowá lun lachülürün éigini woun dántima le wemegeiruni lidan aban igaburi le magurabun wamuti. Ru lumuti sun le wemegeirubei woun íderagualawa lun maweirin lan wanufude.

Eibu eherengudeinatima lan katei lidan ageiraü, éibutima hemenigi wamá luagu Heowá. Mosu meha hanurahan íbirigu saragu wéiyaasu lun hesefuruni habagari, lau sun lira meferidirun hamuti hafiñen ani gálumañu haña meha laganagua sun turobuli le. Añahein hádangiñe ariñagatiña “laranseruñanu lan wuribu ligía lubá óunwenbu asufuriruni”. Lidan damuriguaü, añahein meha saragu wéiyaaña lidan afiñeni hama amu íbirigu hátima nibureingiña, adüga hamuti sun hayaraati lun híderaguniña hábirigu lau ganigi. Íderaguatiña meha íbirigu ha anurahabaña lidoun amu fulasu hámagua, apurichiha hagía lidan fulasu ligía, yusu hamuti meha sun le hadarirubei áraabu lun hadügün “Luban Adamuridaguni” ani damuriguatiña ñein. Ruti meha apurichihani luma adamuridaguni emenigini houn íbirigu ani íderagua lumutiña meha katei le lun hárügüdün gurasu. Dan le wafanreinhan éigini, daüguaü o katei líbeina lira, hingí lumutu wanigi warihini añahein lan íbirigu amuriahatiña maletín lun hapurichihan lubaragiñe hamuga hamuriahan daüguaü.  Kei meha le hiru habéi gürigia ladüga harihini lanarime lamiselu le lanügübei wuribu, busentiña meha haganbuni uganu buiti. Wéirigüda lumutu hanigi harihini ugundani luma lubuidun igaburi le hádanbei gefentiña luagu Heowá. Ítara haña meha íbirigu kei aban leiti laganagua luburiga (Mat. 5:​14-16). Seremei ubebeni le harufudubei íbirigu, ánhatiña fiu hádangiñe gürigia wuribatiña ha lun inarüni.

Paul: Mosu meha wígiruni Liberia luagu saragu wéiyaasu: ǘrüwañein wéiyaasu wígiruni luagu murusun dan ani le aban bián wéiyaasu aban irumu kada aban. Ariñaga tumuti aban misionéra le wasandirubei lidan murusun dimurei: “Arufudahóuati woun tidan Galaadü lunti lan wederegeragun woungua tau sun wanigi lidan weseriwidun lun Heowá ani ítara liña wadügüni. Ligía gari lubéi woun tídangiñe sun wanigi wígiruniña wábirigu lidan añahán lan ásügürei sügǘ le”. Ma meha wagundan gayara lan wíderaguniña wábirigu ha Liberiabaña lídangiñe fulasu le ñein wabéi.

Anne: Lidan seingü-hati irumu 1996, aba woudin gádürü wádangiñe tidan tikarün Beteli ani barütiwa saragu gárada lau ariñahani súdiniti luáguti léibugun apurichihani Liberia. Mosu meha waweiyasuhan 16 kilometuru (10 maili) tau gárada lidoun amu fulasu chóuruti uburugu. Sódini, aba hábürühan gürigia wuribatiña luagu fulasu le ñéingiñe lubéi wásügüra. Aba haduurun iñun, aba hararamagüdünu ugunei, aba hasagarun ǘrüwa wádangiñe tídangiñe ugunei ani aba hanügüni Paul tau ugunei. Ábati werederun ñein ibidiñounga woun kaba lan wadüga. Sódini aba lachülaagun Paul haganagua gürigia lau hitaü édedeheina luéigiñe lerebe. Saminatiwa dúhaña lan luagu, lárigiñe aba wíchugun fe mítaran lan ladüga buleseirügüti dan le ládarunbalin aban hádangiñe gürigia wuribatiña ha tídangiñe ugunei.

Aba warihin ñein yarafa aban durugu hani milidaru buin hau gürigia ha láubaña anufudei, aba yebe wálugun wamudeirun ñein, keiti marihin wabéi halíagiñeba lan wárügüda aba wadawaragun tuagu. Ítagaraü yebe wéiguadun ladüga tadürügüdün ugunei lau lóufudagun. Aba wagúaragun lun abugahati lun lararamunu ugunei, keiti le láfaraali lan anufudei maganbungubei lumutiwa. Lau sun téibaaguña lan ugunei, ragüñu waña tuagu. Dan le wachülürünbei, buchá wawagu ani gáriga wáhabu lárigiñe wayabin dibiñu tuagu ugunei ani wadadagaruña lau anufudei.

Paul: Ábati warihin wawouguoun, wíyeeru lan wadaüragun ani chéiriguaaru, ábati taweiridun wanigi lau warihin ida liña lan wesefurun. Ábati warumugun turugabu aban elikópteru to buinboun lau huyu lárigiñe balu le haduuragunbei tuagun ani larugan aba tanügüniwa Siera Leona. Seremei wamuti Heowá wínwangidiwa lan, gama lumoun nidiheritiwa meha saragu hawagu wábirigu.

Anne: Chülütiwa tidoun Beteli to Freetownboun, Siera Leona, aban fulasu chóuruti le ñein lubéi wounigirúa buidu buidu. Gama lumoun, ábati nagumeserun asaminara luagu katei burí wuribati le wásügürübei Liberia. Sagü weyu, láuñadina anufudei ladüga sandí nan kamá hamuga lasusereda somu katei wuribati ani siñati nasaminarun buidu. Áriebu, siñati narumugun ábaha nagagudún chun lau lárouga adadagareina ladüga nasaminarun lasusereda lan somu katei wuribati. Ábaha lachatirun nawaragun. Ábametiha lóuburunina Paul ani aba lafurieidun numa. Aba weremuhan lun Heowá darí lun lagidarun adadagaruni nuéi. Saminatina yebe lálülüdüña lan nau ani siñá lanme nasigirun eseriwida kei misionéra.

Mabulieidun nubéi le ásügürübei lárigiñe. Lídanmeme dimaasu ligía, aba wibihin bián garüdia. Aban tídangiñe, ¡Despertad! to lánina 8 lidan sisi-hati, irumu 1996. Anihein meha aban ariñahani ñein le gíribei “Qué hacer ante los ataques de pánico”, ábati níchugun fe ka lan gádanbalina. To aban garüdia La Atalaya to lánina 15 lidan seingü-hati irumu 1996, le ñein lubéi aban ariñahani le gíribei “¿De dónde proviene su fuerza?”, le ñein lubéi láfuacha tiyawa aban warigabaga cheriguñu tarüna, le ñein lubéi lafuranguagüdawa ítara lan kei gayara lan táhamahan warigabaga ani hou tuguya íbini héiriguaali lan tarüna, ítarameme anhein débili lubéi wasandiragun woungua ladüga katei wuribati le ásügürübei woun, gayaraabei líderaguniwa Heowá lau lani sífiri lun wasigirun íderagua amu gürigia. Chülüti ariñahani lúmagiñeti Heowá le lidan dan ani ru lumuti erei le nemegeirubei nun (Mat. 24:45). Aban katei le giñe íderagubalina, nakutihan libügürü ariñahani le, ábati nóundaraguni sun ariñahani le lidan aban. Lau lásügürün dan, miábinhali le násügürübei nichügüwagun kéiñaha.

Paul: Wéiriti meha wagundan sagü wagiribudun Liberioun, kamá hamuga meha wábiñoun wagiribuda. Lidan lagumuchagüle irumu 2004, barühadiwa meha kei burí 20 irumu lidan weseriwidun. Gumuha meha wuribu, ani ladügǘña aransehani lun taransehóuniwa sukursáli.  Ani sódini aba lamuriahóuniwa wama lun woudin eseriwida lidan amu ageiraü.

Ma meha lénrengun woun wánharun lun dasi le. Hínsiñetiña meha wábirigu ha Liberiabaña woun ani ítara haña woun kei waduheñu. Mabusenrúntiwa yebe wafanreinragun hawéi. Ígira wamaña meha waduheñu lun gayaraabei lan woudin tidoun Leskuela Galaadü, ani ariha wamaali meha woungua ida liña lan labiniruniwa Heowá lau wíchaagun woungua lúhaburugu. Ítara liña lubeiti, aba wánharun lun asansiruni le, aba wáguyun Ganoun.

Anne: Ayahuatiwa meha saragu dan le wóudinbei Liberiagiñe. Wéirigüda lumutu wanigi le lariñagubei aban íbiri derebuguhali ani chuti lau le gíribei Frank. Aba lariñagun woun: “Mosu habulieiduniwa”. Ani ábaya lariñagun: “Subudi wamuti mabulieidun hubadiwa lan. Lau sun lira, mosu hetenirun lun iseri hidasin. Lugundun lúmagiñe Heowá liabin iseri dasi le, ligía lubeiti teni humá houn íbirigu ha ñéinbaña”. Ruti dimurei burí le erei woun lunya wagumeserun eseriwida lidan aban fulasu le ñein lubéi ibidiñewa wamá ani mamadagutiwa ñein.

Paul: Le linarün katei, lau lóufudagun, aba wárügüdün ínsiñeni hawagu wábirigu ha Gánabaña. Gíbetiña gefentiña luagu Heowá lidan ageiraü le. Furendeitiwa saragu hámagiñe íbirigu ha ñéinbaña ladüga úaragua hamá ani derebugu ligía hafiñen. Gama lumoun, lárigiñe 13 irumu wau Gana, ábaya weresibirun ámuya dasi. Aba lamuriahóun wama lun wáguyun Kenioun, tidoun sukursáli to ñeinboun. Íbini áluga wamá hawagu íbirigu ha Liberiabaña hama ha Gánabaña, lau lóufudagun aba gamadagua wamá giñe hama ha Keniabaña. Awanhagua eseriwida ya ani aniheingua saragu lun ladügǘniwa lidan apurichihani ya.

Anne: Lidan sun nibagari wínwanhadina dan hénrenguti ani lau saragu anufudei. Dan le wawinwandun lidan fulasu denchati ani sügütiwa lídangiñe lénrengunga, gayaraati ladügün katei le lun wasandirun luma lun wanufudedun. Subudi wamuti móunigirun lubadiwa lan Heowá lau aban milaguru lun masuseredun lan katei le woun. Sagü naganbun aduuraguni, aba wuriba lan nasandiragun nungua ani aba nadiheridun. Furendeihadina arabacha luagu Heowá ani saragu dan yusu lumutiña íbirigu lun líchuguni erei le nemegeirubei nun. Chouru wamuti giñe ánhawa lan akipura aban buiti umadaguaü luma Heowá, líderagubadiwa lun wakipuragun woungua eseriwida lun.

Paul: Anihein dan aba hálügüdaguniwa íbirigu: “Hínsiñeti san fulasu le ñein lubéi heseriwida hun?”. Gayaraati buidu lan ageiraü, lau sun lira, gayaraati dencha lan ani sánsigua ligía katei ñein. Ligíati, kátima hínsiñetimabei woun? Wábirigu, ha ítarabaña woun keisi iduheñu. Inarüni ámuñegueinarügü lan ligaburi wagüriarúniwa luma wechun, gama lumoun, sun wagía ligiaméme ligaburi wasaminan luma le wasandirubei luagu Heowá. Saminatiwa yebe wagíaba lan yebe íchiga dǘgüdaguaü houn wábirigu o ederebudagüdei hafiñen, gama lumoun hagía ederebudagüdübalin wafiñen.

Sagü wáguyun lidoun amu ageiraü, aba warihin aban milaguru le asuseredubei uguñe weyu: wábirigu ha ítarabaña woun kei iduheñu. Dan lílana wamá aban damuriguaü, gaduheñubadiwa le ñein lumuti wachülüra gábanbadiwa giñe ani buídubei weresibirúniwa. Chouru wamuti ánhawa lan asigira arabacha luagu Heowá, líchugubei lan erei le wemegeirubei woun (Fili. 4:13).