1. Ka lasandirubei apostolu Pábulu hawagu ídehatiña lidan damuriguaü?

 SÚDINITI dasi le hadügübei ídehatiña lidan damuriguaü. Ligíati gebegi habéi wügüriña úaraguatiña ha lun apostolu Pábulu. Ligía dan meha le labürühanbei houn kristiánugu ha Filipubaña, óunahati mábuigaü houn ídehatiña lidan damuriguaü úara hama wéiyaaña lidan afiñeni (Fili. 1 :1).

2. Ka lasaminarubei Luis luagu lidasin keisi ídehati lidan damuriguaü?

² Gúndaatiña saragu íbirigu wügüriña badiseihaña lau dasi le hadügübei keisi ídehatiña lidan damuriguaü, nibureingiña lan yebe o derebuguhaña lan. Kei hénpulu, 18 meha irumu lau Devan dan meha le liridúnbei keisi ídehati lidan damuriguaü. Ánheinti Luis, lóugiñe meha 50 irumu lau. Ariñaga lumuti íbiri le lidan murusun dimurei ida liña lan hasandiragun saragu íbirigu wügüriña houngua: “Wéiriti nugundan aban nan ídehati lidan damuriguaü, dántima le nasaminarun luagu óunwenbu ínsiñeni le harufudubei lílana damuriguaü nun”.

3. Kaba álügüdahani ounabúa lidan aturiahani le?

³ Anhein aban lubéi íbiri wügüri badiseihali huguya ani meseriwidungidün kei ídehati lidan damuriguaü, gayaraati hamuga san háfaagun lun aban humá ídehati lidan damuriguaü? Kaba ínchahaün lun hadügüni? Ani ka adundehani tídangiñeti Bíbülia lunbei hagunfulirun lau? Lidan aturiahani le, lounabúba álügüdahani le. Gama lumoun, lubaragiñe, wakutihaali ka lan hadasinbei ídehatiña lidan damuriguaü.

KA LIDASINBEI ABAN ÍDEHATI LIDAN DAMURIGUAÜ?

4. Ka lidasinbei aban ídehati lidan damuriguaü? (Ariha humóun giñe iyawaü).

⁴ Ha eseriwidubaña kei ídehatiña lidan damuriguaü wügüriña  badiseihaña, ha iridúbaña lau lubafu sífiri sandu lun gayara lan híderaguniña wéiyaaña lidan afiñeni etenira lun ámuñegueinarügü dasi lidan damuriguaü. Añahein hádangiñe, hagía arihibaña lau fulasu le ñeinba lubéi hapurichihan íbirigu tuma giñe tau agumeiraguagüdüni to lunboun teseriwidun lun apurichihani. Ha híbiri, ídehatiña lidan tarumadahóun luma taransehóun Luban Adamuridaguni. Ténitiña giñe lun híchugun buiti achülürüni houn ha ñǘdünbaña adamuridagua, hagía giñe arihubaña lau amuri luma bidéu burí le ichugúbei lidan adamuridaguni. Íbini gúnfuli hamá lau sun burí dasi le, létima súdinibei houn hamadagua luma Heowá. Lugundun hínsiñeti Heowá houn ani hóuchatiña hafalaruni lilurudun lidan habagari. Lanwoun lira, wéiriti ínsiñeni le hasandirubei hawagu hábirigu (Mat. 22:​37-39). Ka lunbei ladügüni aban wügüri badiseihali lun aban lan ídehati lidan damuriguaü?

5. Ka lunbei hadügüni lun aban humá ídehati lidan damuriguaü?

⁵ Ariñaga tumuti Bíbülia le lunbei ladügüni aban íbiri badiseihali lun liridún kei ídehati lidan damuriguaü (1 Tim. 3:​8-10, 12, 13). Ka lunbei hadügüni lun hibihini eseriwiduni le? Lunti hasubudiruni ka lan tariñagubei Bíbülia luagu le emegeirúbei lun aban humá ídehati ani áfaagua hugíame lun hagunfulirun lau le tariñagubei Bíbülia. Furumiñe, lunti hakutihani ka lan uagu busén hubéi lun heseriwidun kei ídehati.

KA UAGU BUSÉN HUBÉI ABAN HUMÁ ÍDEHATI LIDAN DAMURIGUAÜ?

6. Kaba lébuna habusenrun heseriwidun houn íbirigu lau ǘnabuguni? (Matéu 20:28; ariha huméi dibuhu).

⁶ Samina humá luagu Hesukrístu, le íchugubalin hénpulu le buídutimabei libügürü leseriwidúniwa houn amu; ínsiñeni ínchahabalin lun ladügüni katei le: ínsiñeni luagu Lúguchi luma ínsiñeni hawagu gürigia. Ínchaha lumuti ínsiñeni le lun láfaagun lun ladügün dasi le harihibei amu kei ni kata (aliiha huméi Matéu 20:28; Huan 13:​5, 14, 15). Anhaün giñe línchahan ínsiñeni, labinirubadün Heowá ani líderagubadün lun aban humá ídehati lidan damuriguaü (1 Ko. 16:14; 1 Fe. 5:5).

7. Ka uagu moun lumuti lubéi layumahan aban íbiri lun ídehati lan lidan damuriguaü lun hanügüni amu kei gürigia wéiriguti?

⁷ Lidan ubóu le arihúatiña gürigia ha arufudagubaña houngua kei gürigia wéirigutiña kei gürigia garíawasetiña. Gama lumoun, mítaranti tidan lóundarun Heowá. Anhein ínsiñeni lubéi  ínchahabalin aban íbiri kei línchahani Hesusu, mayumahanbei ubafu, ni liñun ubaraü ni lun ligíaba lan agumadiha. Anhein iridúa aban gürigia le busenti larihín kei le súdinitimabei, mabusenrunbei ladügün dasi le arihúbei kei ni kata, le emegeirúbei lun hounigirún lubúeingu Heowá ha gebegibaña lun. Gayaraabei lasaminarun luagu lǘnabudagüdüñein lan dasi le (Huan 10:12). Mabinirun lubéi Heowá áfaaguni le hadügübei gürigia ha barüguabaña houngua ni ha pántabaña (1 Ko. 10:​24, 33; 13:​4, 5).

8. Ka lariñagubei Hesusu houn lani apostolugu?

⁸ Anihein dan chará lan lébuna áfaaguni le hadügübei lani Hesusu disipulugu lun hibihin ítaga dasi. Ligía asuseredubei houn bián lani Hesusu apostolugu: Santiagu luma Huan. Aba hamuriahan luma Hesusu lun líchugun ubaraü súdiniti houn lidan Larúeihan. Lubaragiñe lariñagun houn bián wügüriña ha buiti lan le hamuriahabei, aba lariñagun houn duusu lani apostolugu: “Le abusenruti lun wéirigu lan hidan, lunti leseriwiduniña híbiri. Furumiñeguarügü hídangiñe le abusenruti lun ligíaba lan furumiñeti, lunti idamuni lan houn híbiri” (Mar. 10:​35-37, 43, 44). Íbirigu ha áfaagubaña lun hibihin somu dasi lidan damuriguaü ladüga busén hamá heseriwidun houn amu, ábanbaña abiniruni lun damuriguaü (1 Tesa. 2:8).

KABA ÍDERAGUAÜN LUN BUSÉN HUMÁ HESERIWIDUN HOUN AMU?

9. Kaba íderaguaün lun busén humá heseriwidun houn amu?

⁹ Furanguti hínsiñe lan Heowá hun, ligía busén hubéi heseriwidun houn híbirigu. Íbini ítara, másiñati ua lan tidan hanigi hadügüni dasi le hadügübei ídehatiña lidan damuriguaü. Kaba íderaguaün lúntima busén humá heseriwidun lidan damuriguaü? Buídubei lun hasaminarun luagu ugundani le lanügübei leseriwidúniwa houn íbirigu, kei lariñaguni Hesusu lidan Adügaü 20:35 (LBID): ‘Gúndaatimati le íchugubei sügǘ lau le eresibirubei’. Kei rugua lubéi Hesusu lungua lun adundehani le ligía gúndaatima lubéi lidan leseriwidun houn amu. Ligiamémeba asusereda hun anhaün íchaagua hungua lun heseriwidun houn amu.

10. Ida liña meha larufuduni Hesusu gunda lan lau leseriwidun houn amu? (Márükosu 6:​31-34).

¹⁰ Haritagua huméi le: gúndaati meha Hesusu lau leseriwidun houn amu (aliiha huméi Márükosu 6:​31-34). Aban weyu, dan le buchá lubéi luagu Hesusu hama lani apostolugu, aba lidin lidan aban fulasu díseti lun gayaraabei lan hemeraagun. Gama lumoun, aba houdin saragu gürigia lubá lidoun fulasu ligía ladüga busén hamá haganbuni larufudahan. Gayaraati hamuga maha lan larufudahan houn oura ligía lugundun “madaani lan Hesusu hama lani disipulugu ni lun heigin”. Gayaraati hamuga meha larufudahan fiu katei houn, lárigiñe aba lóunahaniña hábiñoun. Kei le ínsiñeni lubéi ínchahabalin “aba lagumeserun arufudaha saragu katei houn”. Aba lasigirun arufudaha houn darí ladarüdün (Mar. 6:35). Adüga lumuti ladüga “hagudemedagun” gürigia lun, mama ladüga mosu lan ladügüni. Busenti meha larufudahan houn ladüga hínsiñe hamá lun. Ruti meha ugundani lun Hesusu leseriwidun houn amu.

11. Ida liña líderaguniña Hesusu ha aganbubalin? (Ariha humóun giñe iyawaü luma dibuhu).

¹¹ Lidan meha lani Hesusu ministeriu, mámarügüñein meha lun arufudahani letenira. Téniti meha giñe lun le hemegeirubei gürigia. Adügati lun ñein lan saragu éigini lau aban milaguru, ñéingiñe aba líchuguni houn lani disipulugu lun hafanreinhani (Mar. 6:41). Ítara liña larufudahan houn luáguti leseriwidúniwa houn amu. Arufudahati giñe houn súdini lan hídehan lidan ámuñegeinarügü igaburi, kei hadügüni ídehatiña lidan damuriguaü. Samina humá luagu ugundani le hasandirubei apostolugu lau hídehan luma Hesusu afanreinhei éigini ligía darí lun hakimuledun gürigia hagía (Mar. 6:42). Anihán aban lídangiñe sügǘ le ñein lubéi larufudei Hesusu teni lan lun le hemegeirubei amu lubaragiñe  letenirun lúniwagua. Rúguati lungua lidan sun libagari lun leseriwidun houn amu (Mat. 4:23; 8:16). Buiti meha lasandiragun Hesusu lungua dan le larufudahan luma dan le letenirun lun le hemegeirubei amu. Gayaraati giñe lasuseredun ligiaméme lidan hikesin: gúndaabadün anhaün aranse hubéi lun híchaagun hungua lun híderaguniña amu keisi ídehatiña lidan damuriguaü.

12. Ka uagu moun lumuti lubéi wasaminarun luagu ua lan ni aban iyaraani wawagu lun weseriwidun lidan damuriguaü?

¹² Ánheinti samina hubéi ua lan ni aban iyaraani huagu? Mábürüha lan harüna. Chóuruti anihein lan igaburi huagu le gayaraabei lahuudun lidan damuriguaü. Aban katei le lunbei líderagunün hafurieidun, lárigiñemeti gayaraabei haliihani 1 Korintuna 12:​12-30. Afuranguagüdati apostolu Pábulu lidan bérusu le luagu gebegi humá ani gabara huguya kei furumiñeguarügü lubúein Heowá lidan damuriguaü. Mábürüha lan harüna anhein mégeigidün lubéi hawadigimaridun huougua lun aban humá ídehati lidan damuriguaü. Teni humá lun le gayaraabei hadügüni luagu Heowá luma hawagu híbirigu. Gabaroun habéi wéiyaaña lidan afiñeni le hiyaraabei adüga lubaragiñe híchugun furumiñeguarügü dasi hun (Rom. 12:​4-8).

13. Ka lunbei gabaroun lani aban wügüri badiseihali lun liridún kei ídehati lidan damuriguaü?

¹³ Samina humá giñe luagu le: liibe-agei igaburi le lunbei gagaburi lani aban wügüri badiseihali lun aban lan ídehati lidan damuriguaü, ligiaméme igaburi le lunbei gagaburi hamani sun kristiánugu. Sun kristiánugu lunti hayarafadun lun Heowá, gunda lan hasandiragun houngua lau híderaguniña amu, lúmati lun hawinwandun según lilurudun Heowá. Másiñati gagaburi humaali lan liibe-agei igaburi burí le, le hemegeirubei lun aban humá ídehati lidan damuriguaü. Ka amu katei lunbei letenirun aban wügüri badiseihali lun, lun laganwoundagüdüni lidasin lidan damuriguaü?

ADUNDEHANI TÍDANGIÑETI BÍBÜLIA LUN ABAN HUMÁ ÍDEHATI LIDAN DAMURIGUAÜ

14. Ka mini lubéi dimurei “lunti wügüriña hamá ha inebewatiña”? (1 Timotéu 3:​8-10, 12).

¹⁴ Ariha wamá fiu adundehani le adarirúbei lidan 1 Timotéu 3:​8-10, 12 (aliiha huméi). “Lunti wügüriña hamá ha inebewatiña” ídehatiña lidan damuriguaü. Úati mini lan le méherehanbaña lan o másügürünbaña lan isebáhari hama amu (Apur. 3:​1, 4). Lunti lagunfulirun lau lidasin luma lun lasubudiruniwa keisi gürigia gafiñerúaditi luagu. Ítara luba inebe lan houn sun lílana damuriguaü.

15. Ka mini lubéi moun lumuti lan “línsiñedun marasun wíyeti houn” ha eseriwidubaña kei ídehati lidan damuriguaü luma lun ‘lunti lan hagunfulirun lau hererun’?

 ¹⁵ “Lunti hagunfulirun lau hererun”. Mini lan lira ua lan biangua lan hagibu, haruma lan hagaburi ani gafiñerúaditi hawagu. Lunti wügüriña hamá ha meyeehantiña ani ha gúnfulibaña lau hererun (Ari. 3:32). Moun lumuti giñe “línsiñedun marasun wíyeti houn”. Lunti haruma lan hóuserun lidan katei lánina bísinisi luma lidan lahandilihóun budagia le lani damuriguaü. Moun lumuti giñe hayusuruniña íbirigu ha lílana damuriguaü lun hagañeirun seinsu haweigiñe.

16. a) Ka mini lubéi dimurei “moun lumuti habacharuadun”? b) Ka lílabei lun giñe “haruma tan hanigi”?

¹⁶ “Moun lumuti habacharuadun”. Lidan amu dimurei, moun lumuti gátadi hamá. Lanwoun lira, lunti giñe “haruma tan hanigi” lugundun hawinwanduña según lilurudun Heowá. Inarüni chará hamá, lau sun lira, gayaraati hasandiruni darangilaü le lanügübei aban lubuidun umadaguaü luma Bungiu.

17. Ida liña hóuchawaguniwa íbirigu wügüriña ha lúnbaña heseriwidun kei ídehatiña lidan damuriguaü? (1 Timotéu 3:10; ariha humóun giñe iyawaü).

¹⁷ “Lunti houchún”. Mini lan lira arufuda hamaali lan gafiñerúadi lan hawagu lau hagunfulirun lau dasi le ichugúbei houn. Ligíati, dan le híchugun wéiyaaña lidan afiñeni dasi houn, lunti háfaagun lun hafalaruni adundehani le híchugubei wéiyaaña lidan afiñeni houn luma le tíchugubei lóundarun Heowá. Lunti furangu lan houn kaba lan hadüga luma ídaba lan hagumuchei dasi le ichugúbei houn. Ánhaña áfaagua lun hadügüni hadasin buidu, harihibei lílana damuriguaü hawanseruña lan. Íbirigu wéiyaaña lidan afiñeni, teni humá lun hawanserun wügüriña badiseihaña lun harufudahan houn (aliiha huméi 1 Timotéu 3:10). Kéiburi, añahein san íbirigu badiseihaña lidan damuriguaü le ñein hubéi ha aweirideina haña lúmagiñe diisi irumu lun lubaruaguóun? Héchutiña san aturiahoun Bíbülia? Héchutiña san íchiga óunabagülei lidan adamuridaguni luma apurichiha? Lidan kesi le, gayaraati híchugun dasi houn le úarati luma harumudiri luma le gádanbaliña. Ítara luba hóuchaguniña nibureintiña ha. Ítarati danme le wügüriñamémeña másiñati gúnfulihaña lanme lau le emegeirúbei lun aban hamá ídehatiña lidan damuriguaü.

18. Ka mini lubéi dan le tariñagun Lererun Bungiu lunti lan úa lan “mégeiti luagu lubuidun hagaburi” ídehatiña lidan damuriguaü?

¹⁸ Lunti giñe ua lan “mégeiti luagu lubuidun hagaburi” ídehatiña lidan damuriguaü. Lidan amu dimurei, moun lumuti giñe híchugun lúgaaru lun hiridahóun luagu figóu wéiriti. Inarüni,  anihein lan dan iridahóuatiña kristiánugu luagu duru le mama hadüga. Susereti giñe lun Hesusu ani ariñagati luagu lasusereduba lan giñe houn ha afalarubalin (Huan 15:20). Lau sun lira, anhein haruma lubéi hagaburi kei ligaburi Hesusu, buídubei hayanuhan lílana damuriguaü hawagu (Mat. 11:19).

19. Ka mini lubéi dan le tariñagun Bíbülia “lunti túmari lan ábanrügü würi” aban wügüri?

¹⁹ Ha busenbaña lun aban hamá ídehati lidan damuriguaü ani maríeitiña “lunti túmari lan ábanrügü würi”. Dan le ladügünbalin Heowá maríei, adüga lumuti lun lamarieidun aban wügüri tuma aban würi ani aban würi luma aban wügüri. Ligía lunbei hafalaruni sun kristiánugu (Mat. 19:​3-9). Ligíati, moun lumuti lubéi liridahóuniwa aban kristiánu luagu magíaguni (Ebü. 13:4). Mini lan le lunti lan úaragua lan tun lani weiriou. Moun lumuti ladarihan amu würi (Hob. 31:1).

20. Ida liña lalidihaniña aban wügüri maríeiti tílana luban buidu?

²⁰ Agurabúati giñe lun lagumadiruniña aban ídehati lidan damuriguaü “lirahüñü buidu hau sun tílana luban”. Ídehatiña lidan damuriguaü ha gánibaña weiriou ani gasaanigu hagía lunti hagunfulirun lau hadasin keisi hachügüdina iduheñu. Hadundehabei áhuduraguni keisi iduheñu sagü dimaasu. Háfuriduba apurichiha hama sun tílana haban súnwandan. Híderagubaña hasaanigu lun gamadagua hamá luma Heowá (Efe. 6:4). Wügüriña ha óunigirubaliña tílana haban buidu, arufuda hamuti giñe gayara lan hóunigiruniña lílana damuriguaü buidu (ariha huméi giñe 1 Timotéu 3:5).

21. Ka gayaraabei hadügüni lun aban humá ídehati lidan damuriguaü?

²¹ Anhein mámagidün lubéi aban ídehati lidan damuriguaü, ínchaha wamutün lun hafurieidun lun Heowá luma lun haturiahani ariñahani le lídanbei aturiahani le. Akutiha huméi le emegeirúbei lun aban humá ídehati lidan damuriguaü ani áfaagua humá lun hagunfuliruni. Samina humá luagu ínsiñeni le hasandirubei luagu Heowá luma hawagu híbirigu. Derebugüda huméi ayumahani le hasandirubei tidan hanigi lun heseriwidun lun Heowá (1 Fe. 4:​8, 10). Ítara luba hasandiruni ugundani le lanügübei heseriwidun houn lubúeingu Heowá ha lídanbaña sun ubóu ha ítarabaña woun kei iduheñu. Binilei Heowá áfaaguni le hadügübei lun aban humá ídehati lidan damuriguaü! (Fili. 2:13).