1, 2. a) Ka uagu basaminara aban lan katei sériuti badisei? b) Ka katei lunbei bachoururuni lubaragiñe babadiseirun?

NIBUREINGIDIBU san ani busenhadibu babadiseirun? Badisei chansi wéiritimati le gayarabei wibihini. Kei warihini lidan arütíkulu le lubaragiñebei le, sériuti badisei. Dan le babadiseirun, arufuda bumuti houn amu derege baali lan bibagari lun Heowá. Lidan amu dimurei, arufuda bumuti houn füramase háadibu lan lun Bungiu beseriwiduba lan lun lun súnwandan ani ligíaba lan súdinitima lidan bibagari. Kei seriu lubéi katei le, lubaragiñe babadiseirun mosu bachoururuni luagu gayara lan desidírü ban buidu, ani busén ban badügüni lugundan Bungiu. Mosu giñe bachoururuni gunfuranda bani le mini lubéi ederegeraguni unguaü lun Bungiu.

² Afiñetibu san aransedibu lan lun babadiseirun? Háfuga genege lan bun maranserungidibu lan. O gayarati basandirun aranseedibu lan, gama lumoun aba hariñagun bagübürigu lun lan bagurabahan baweiridun murusun. Gama lumoun, moun lumuti  beferidiruni buguraasun. Áfaaguaba lun buídutima lan badügüni katei lun furese lan baranserun lun babadiseirun. Líderagubadibu arütíkulu le lun báfaagun lun buídutima lan badügün ǘrüwa katei. Furumiñe, katei burí le bafiñerubei. Libiaman, katei le badügübei. Ani lǘrüwan, le basandirubei luagu Heowá.

3, 4. Ka gayarabei hafurendeiruni nibureintiña lúmagiñe Timotéu?

³ Álügüdaguaba bungua: “Ka san uagu nafiñera anihein lan Bungiu? Ka uagu chouru nubalin lúmagiñe lan Bungiu tiabin Bíbülia? Ka uagu gaganbadi nubéi lun lilurudun Bungiu lubaragiñe gaganbadi nan lun lilurudun ubóu le?”. Líderagubadibu badügüni álügüdahani burí le búniwagua lun bafalaruni ladundehan apostolu Pábulu le: “Sansi huméi ligaburi hisaminan [...] lun hasubudiruni le lugundanbei Bungiu hun, le buídubei, le úaraguabei” (Rómana 12:2). Mini lan dimurei le mosu lan bachoururuni bungua ladügǘn lan lugundan Bungiu buídutimabei bun. Ka uagu mosu lubéi bachoururuni bungua?

⁴ Saminabá luagun lani Timotéu hénpulu. Subudi lumuti meha arufudahani le tídanbei Lererun Bungiu buidu ladüga arufudaha tani lagütü tuma lúguchu lun. Gama lumoun, ariñagati Pábulu lun: “Ítaramemeba deregüdagu lidan le furendei báalibei, le uágubei afiñeedibu lan” (2 Timotéu 3:14, 15). Ariñagati apostolu Pábulu afiñe lan Timotéu luagu le lafurendeirubei ladüga chouru lani ligía lan inarünibei. Kati uagu lanarimebei lachoururuni? Ladügarügü san tariñagun lúguchu lun tuma lagütü luagu ligía lan inarünibei? Uá. Chouru lumuti ladüga hóuchagua lani lungua luagu ligía lan inarünibei (aliihabéi 1 Tesalónikana 5:21). Chóuruti gayara lan hafurendeirun nibureintiña saragu lúmagiñe Timotéu.

5, 6. Ka uagu mosu lubéi bafurendeirun ayusurei bisaminan buidu lúmagiñe guentó?

⁵ Háfuga furendei bani giñe arufudahani le tídanbei Bíbülia fiú dan lubaragiñe le. Anhein ítara liña lubéi, adügabá kei Timotéu ani desidirübá basaminarun ka lan uagu bafiñerei le bafiñerubei. Danme le chouru baali inarüni lan le bafiñerubei, héretimabei bafiñen. Ani mígirunbadibu lun hadügün bánigu paaná, ni ubóu le ni le basandirubei lun badireirun.

⁶ Súdiniti lun bafurendeirun lau lóufudagun ayusurei bisaminan lun desidírü ban buidu. Ka uagu? Ladüga ítara luba gayara lan bóunabuni álügüdahani burí le lunbei hadügüni bánigu paaná bun, kéiburi: “Ka uagu chouru bubalin anihein lan Bungiu? Anhein ínsiñeni lubéi Bungiu, ka uagu lígira lun lasuseredun katei wuribati? Anhein Bungiu lubéi adügübalin sun katei, ka adügübalin Bungiu?”. Danme le bafurendeirun ayusurei bisaminan buidu, madügünbei álügüdahani burí le lun lebelurun machouruni bun. Adügarügübei lun busentima ban baturiahanu Bíbülia.

7-9. Afuranguagüdabei ida liña lan gayara lan líderagunibu adundehani ¿Qué enseña realmente la Biblia? le lídanbei jw.org lun héretima lan bafiñen.

⁷ Anhoun baturiaha Bíbülia buidu, gayarabei bóunabun álügüdahani houn amu,  badarirun óunabagülei lun álügüdahani le badügübei búniwagua ani gayarabei giñe bachoururuni ka lan uagu bafiñera somu katei (Adügaü 17:11). Anuhein saragu agumeiraguagüdüni wama to gayarabei tíderagunibu adügei katei le. Houn saragu nibureintiña húuharu garüdia El origen de la vida tuma líburu ¿Existe un Creador que se interese por nosotros? Houn amu seriwihali giñe seksión jw.org “¿Qué enseña realmente la Biblia?” le lábugiñebei fánreinti ENSEÑANZAS BÍBLICAS > JÓVENES. Lidan fánreinti ligía anihein adundehani le lunti líderagunibu lun buídutima lan gunfuranda bani arufudahani le tídanbei Bíbülia.

⁸ Kei le aturiaha baaru lubéi Bíbülia, háfuga subudi baali lan lóunabagüle fiú lídangiñe álügüdahani burí le ñeinbei. Gama lumoun, chouru bumuti san buidu lan óunabagülei burí le ñeinbei? Íderagua lumutibu adundehani burí le ñeinbei lun basaminarun lau duari luagun bérusu burí tídangiñeti Bíbülia ani ínchaha lumutibu lun babürüdüni bisaminan. Íderagua lumutibu giñe lun basaminarun ida luba lan bafuranguagüdüni houn amu. Anhein gayara bebelurun lidoun fánrenti le, yúsubei lun baturiahan luma lun béredagüdüni bafiñen luagu le furendei báalibei tidan Bíbülia.

⁹ Buiti lun bachoururuni bungua luagu inarüni lan le furendei báalibei tidan Bíbülia. Líderagubadibu katei le lun baranserun lubá babadiseirun. Ariñagatu aban Gefentu nibureingiru: “Lubaragiñe desidírü nan nabadiseirun, aba naturiahanu Bíbülia saragu darí lun nachoururuni luagu anihán lan relihión le inarünibei”. Ani ariñagatu eibu lan lásügürün dan ábatima lan tachoururuni ítara liña lan.

10. Ka uagu lunti lubéi wagurabahan lun larufuduni aban Gefenti le badiseihali lafiñen lau katei le ladügübei?

¹⁰ Ariñagatu Bíbülia: “Afiñeni lábuguarügü, ítara liña kei aban katei hilaali” (Santiagu 2:17). Ligíati, anhein afiñe bubéi ani chouru bumuti le bafiñerubei, agurabúati lun barufuduni bafiñen lau katei burí le badügübei.  Ítara luba ‘babagaridun harumañu, deregeguañu bungua lun Bungiu sunsuinagubei’ kei tariñaguni Bíbülia (aliihabéi 2 Féduru 3:11).

11. Ka mini lubéi aban ‘ibagari harumati’?

¹¹ Ka mini lubéi aban ‘ibagari harumati’? Mini lan wóuserun lau arumani lidan sun katei. Saminabá san luagun katei burí le badügübei lidan lagumuhóun sisi hati. Dan le bagagibudagunbei luma somu óuchawaguni, gabafutibu meha san lun basubudiruni le buídubei lumoun le wuribabei? (Ebüréu 5:14). Haritaguatibu san awanda ban dan le hínchahanibu amu nibureintiña lun badügün somu katei le mabuidunti o dan le ligibugiñe ban somu óuchawaguni? Rútibu san aban hénpulu buiti leskuelarugu? Adüga bumuti san le lariñagubei Heowá, o aba badügüni le hariñagubei bánigu paaná ladüga mabusenrun ban hadügün bula bau? (1 Féduru 4:3, 4). Inarüni súngubei lan wagía charatiwa. Íbini ha barühañabaña saragu irumu eseriwida lun Bungiu anihein dan gayarati nibusigari hamá hariñaguni gefentiña lan luagu Heowá. Gama lumoun, ha derege hamaalibei habagari lun Heowá siñati habusigaridun luagu aban hamá Gefenti ani mosu harufuduni lau hawinwandun aban ibagari harumati.

12. a) Ida luba san ‘deregeguañu ban bungua lun Bungiu sunsuinagubei’? b) Ida liña lunti lan barihini katei burí le badügübei lidan damuriguaü?

¹² Ida luba san ‘deregeguañu ban bungua lun Bungiu sunsuinagubei’? Lau katei burí le badügübei lidan damuriguaü, kéiburi bidin adamuridagua luma apurichiha. Gama lumoun, mosu giñe badügün katei bábuguarügü, kéiburi bafurieidun lun Heowá luma baturiahanu Bíbülia. Le ederegeruti libagari lun Heowá gúndaati lau ladügüni katei burí le ani marihin lumuti kei aban ihürügu. Sandiguati lungua kei urúei Dawidi le ariñagubei: “Nubungiute, hínsiñeti nun lun nadügüni bugundan, barǘ numuti barufudahan tidan nanigi!” (Sálumu 40:8).

13, 14. a) Ka gayarabei líderagunibu lun badügün katei burí le hínsiñeti lun Bungiu? b) Ida liña líderaguniña rekuáduru le fiú nibureintiña?

¹³ Ka gayarabei líderagunibu lun badügün katei burí le hínsiñeti lun Bungiu? Gayarati bayusuruni rekuáduru le tídanbei líburu Los jóvenes preguntan, volumen 2, páhina 308 luma 309. Ñein gayarati bóunabun álügüdahani kéiburi: “Ariñaga bumuti san lun Heowá furangu ka lan basandirubei o ka lan bemegeirubei? Arihúati san luagu le bariñagubei hínsiñe lan Heowá bun?”, Ka burí ariñahani bakutihabei dan le baturiahanu Bíbülia bábuguarügü?” ani “Furitibu san apurichiha íbini dan le máfuridun hamá bagübürigu?”. Lidan páhina burí le gayarati giñe babürüdüni ka lan basaminarubei badügün lun babuiduragüdüni ligaburi bafurieidun, baturiahanu Bíbülia luma ligaburi bapurichihan.

¹⁴ Gíbetiña nibureintiña ha busentiña habadiseirun ariñagutiña íderagua laaña lan ariñahani le saragu. Ariñagatu aban Gefentu nibureingiru gíritu Tilda íderagua lanu álügüdahani burí le lun táfaagun lun tawanserun. Ariñagatu: “Murusun murusun ibiheina nani katei le uágubei náfaagua ani lidan aban irumu aranseedina meha lun nabadiseirun”. Ariñagati giñe aban Gefenti nibureingili gíriti Patrick aban katei libe le. Ariñagati: “Subudi naali meha kaba lan nadüga, gama lumoun dan le nabürüdünbalin íderagua lumutina lúntima náfaagun lun nagunfuliruni”.

15. Ka uagu wariñaga kada lan gürigia lun desidírü lan lederegeragun lungua lun Heowá?

¹⁵ Anihán ábanya lídangiñe álügüdahani le lunbei barihini tidan líburu Los jóvenes preguntan: “Lun hamuga hígiruni bagübürigu  hama bumadagu inarüni, basigiruña hamuga san eseriwida lun Heowá?”. Haritaguabei buguya lan lun desidírü ban bederegeragun bungua lun Bungiu. Danme le bederegeruni bibagari lun Heowá ani badisei buguyame, mósume badügüni bumadagua luma ani mósume bíchugun fe lun luagu sun le badügübei. Ligíati, le lunbei badügüni luagu Heowá siñati badügüni ladüga ligía lan hadügübei bagübürigu o amu gürigia. Ánhabu adüga katei ouralé lun bagundaaragüdüni Bungiu, barufudubei chouru bani anihán lan inarünibei ani busén ban barufudun inebesei luagu lilurudun Bungiu. Ani málühadibume aransera lun gayara lan babadiseirun.

16, 17. a) Ka resun buídubei lun labadiseirun aban gürigia ani lun kristiánu lan? b) Kaba íderaguabu lun gebegitima lan lebegi asalbaruni bun? Ruba aban hénpulu.

¹⁶ Luagu aban weyu, aba liabin aban wügüri le subudihabuti lun lilurudun Moisesi álügüdei Hesusu ka lan gumadi súdinitimabei. Aba lariñagun Hesusu lun: “Hínsiñela Babureme le Bubungiute bun tau sun banigi, tau sun buani luma lau sun bisaminan” (Matéu 22:35-37). Kei aubei warihei, anhein busén lubéi aban gürigia labadiseirun ani lun aban lan kristiánu, mosu ladügüni ladüga hínsiñe lan Heowá lun. Ida luba san béredagüdünitima ínsiñeni  le basandirubei luagu Heowá? Gayarati badügüni lau basaminarun luagun lebegi asalbaruni le lafayeirubei Hesusu (aliihabéi 2 Korintuna 5:14, 15 luma 1 Huan 4:9, 19). Ánhabu ígira dan lun basaminarun luagun lubuidun idewesei le ladügübei Bungiu bun, wéiritimabei lebegi bun ani busenbadibu beteingiruni luagu.

¹⁷ Saminabá lun hamuga bañaradaguña lan ani aba lesefurunibu somu gürigia. Kaba hamuga badüga? Bídiña hamuga san búbiñoun asansiragua sin bíchugun seremei lun gürigia le esefurubalin bibagari? Uá. Chóuruti beteingiruñein lan hamuga lun súnwandan. Ítarameme, ladüga figóu luma óunweni ítara liña kamá hamuga wañaradaguña sun wagía. Gama lumoun, sefu lumutiwa Heowá luma Hesusu ladüga weiri lan wínsiñe houn. Sefu hamaali wabagari! Seremei hagía gayara lubéi wemenigidun luagu aban ibagari lun súnwandan lidan paraísu ubouagu. Ma lunti weteingiruniña saragu?

18, 19. a) Ka uagu moun lumuti lubéi banufudedun bederegeruni bibagari lun Heowá? b) Ka uagu buídutimabei lubéi bibagari ánhabu desidírü beseriwidun lun Bungiu?

¹⁸ Teinki bumuti san Heowá luagu le ladügübei buagu? Anhein ítara liña lubéi, bederegeruni bibagari lun ani badisei buguya ligía katei buítimati le gayarabei badügüni. Kei basubudiruni, dan le bederegeragun bungua lun Bungiu mini lan füramase háadibu lan lun badügübei lan lugundan súnwandan. Ani moun lumuti banufudedun lun badügüni füramasei ligía lun. Ka uagu? Ladüga busén lumuti Heowá le buídutimabei bun, ani füramase haali labiniruniña ha gaganbadibaña lun (Ebüréu 11:6). Danme le bederegeruni bibagari lun Heowá ani badisei buguya, buídutimabei bibagari. Ariñagati aban Gefenti 24 irumu lau le abadiseirubei dan le ñǘraügili: “Lun hamuga meha agurabahatina fiú irumu, chóuruti gunfuranda numuti lan hamuga meha ka lan nadügübei. Gama lumoun, íderagua lumutina badisei lun méiguadun nan tidoun lisadaran ubóu”.

¹⁹ Kei aubei wariñagei, busén lumuti Heowá le buídutimabei bun. Ánheinti Satanási meberesegunti bau, ladüga luouguounrügüñein lasaminara. Anhein badüga le labusenrubei, míchubei ni kata buiti bun. Ani siñati ladügüni ladüga úati ni kata buiti luma lun líchuguni. Úati ñunsu buiti luma houn gürigia ni emenigini. Siñati líchugun ni kata buiti bun ámuñegü, ladüga ni lungua úati luma (Arufudúni 20:10).

20. Ka gayarabei badügüni lun baranserun lubá bederegeragun bungua lun Bungiu luma lun babadiseirun? (Arihabéi giñe rekuáduru “Ídemuei lun babuiduragüdüni bumadagua luma Bungiu”).

²⁰ Bederegeruni bibagari lun Heowá ligía katei buítimati le gayarabei badügüni. Aranseedibu san lun badügüni? Anhein ítara liña lubéi, manufudedabá. Gama lumoun, anhein genege lubéi bun maranserungidibu lan, adügabéi le ariñawagúbei lidan arütíkulu le lun bawanserun. Ariñagati Pábulu houn lílana damuriguaü le Filipubei lun lan mararamagun lan hawanserun (Filipuna 3:16). Anhein bafalara adundehani le, málübadibu aransera lun bederegeruni bibagari lun Heowá luma lun babadiseirun.