1, 2. a) Ida liña layanuhan Heowá hama gürigia? b) Kaba wariha lidan arütíkulu le?

HÍNSIÑETI lun Heowá lun layanuhan wama. Adüga lumuti lun wasubudiruni ligaburi lisaminan luma ligaburi ladügüni katei. Lidan dan le sügühalibei, yusu lumutiña profetagu, ánheligu luma Kristu Hesusu le Liráü lun lasubudiragüdüni lisaminan woun (Amos. 3:7; Gal. 3:19; Aruf. 1:1). Uguñe weyu, adimurehati Heowá wama tídangiñe Bíbülia to Lererun.

² Ani dan le ya lubéi Hesusu Ubouagu, adimurehati Heowá ǘrüwa wéiyaasu luma siélugiñe. Ariha waméi ka lan lariñagubei, ka lan wafurendeirubei lídangiñe dimurei le lariñagubei luma le lunbei wadügüni lun wasagarun buiti lídangiñe dimurei burí le.

3. Según Márükosu 1:9-11, ka lariñagubei Heowá dan le labadiseirunbei Hesusu ani ka lachoururagüdübei dimurei le?

³ (Aliiha huméi Márükosu 1:9-11). Anihán furumiñeti wéiyaasu layanuhan Heowá siélugiñe. Ariñagati: “Buguya niráü le hínsiñebei nun; le aubei óunwenbu lan nugundan”. Ma funa lugundan Hesusu laganbuni Lúguchi ariñaga hínsiñe lan lun ani afiñe lan luagu. Akutiha waméi ǘrüwa katei súdiniti le, le lachoururagüdübei Heowá: Hesusu lan Liraübei, hínsiñe lan lun ani gunda lan lau.

4. Dan le labadiseirunbei Hesusu, ka iseri umadaguaü ladügübei luma Heowá?

⁴ ‘Buguya Niraübei’. Arufudati Heowá lau dimurei burí le, gánihali lan aban iseri lubuidun umadaguaü luma Hesusu, Liráü  le hínsiñebei lun. Sun dan le laubei Hesusu sielu kei sífiri, ligía meha aban hádangiñe lirahüñü Bungiu. Gama lumoun, dan le labadiseirunbei, aba lanuadirún lau sífiri sandu. Oura ligía, aba larufuduni Heowá Hesusu lan Liraübei le lanúadirubei ani hemenigihali lan Hesusu lun lagiribudun lárigoun sielu lun Urúei lan luma lun Fádiri lan le Íñutimabei le líridubei Bungiu (Luk. 1:31-33; Ebü. 1:8, 9; 2:17). Ítarati, dan le labadiseirunbei Hesusu, gébunati lariñagun Lúguchi: “Buguya Niraübei” (Luk. 3:22).

5. Ida luba wáyeihani Heowá lau warufudun ínsiñeni luma lau wíchugun gurasu?

⁵ “Buguya [...] le hínsiñebei nun”. Ítara kei larufuduni Heowá línsiñehabu lun Hesusu ani ru ligía gurasu lun, lunti giñe wáluahan chansi lun wadügüni ligiaméme houn amu (Huan 5:20). Dan le larufuduni somu gürigia le hínsiñeti woun hínsiñe wamá lun ani ariñaga ligía buidu lan wadüga dan le wadügün somu katei le buiti, buiti wasandiragun woungua. Mégeitiña giñe lílana damuriguaü hama waduheñu lun warufudun ínsiñeni houn luma lun wíchugun gurasu houn. Ánhawa adügei, wíderagubaña lun hederebudagüdüni hafiñen luma lun úaragua hamá lun Heowá. Wéiriti lisudinin híchugun agübürigu gurasu houn hasaanigu tídangiñe sun hanigi luma lun harufudun ínsiñeni houn. Ítara luba híderaguniña íchigei le buídutimabei hámagiñe lun Heowá.

6. Ka uagu gayara lubéi wafiñerun luagu Hesukrístu?

⁶ “Le aubei óunwenbu lan nugundan”. Lau lariñaguni Heowá dimurei le, arufudati chouru lani ladügübei lan meha Hesusu lugundan. Anhein afiñe lubéi saragu luagu Liráü, gayaraati giñe wafiñerun ladügübei lan sun le füramasei lubéi Lúguchi (2 Ko. 1:20). Dan le wasaminarun luagu úaraguni le larufudubei Hesusu, ábatima busén wamá wafurendeirun luagu luma  lun wáyeihani. Ani afiñeti giñe Heowá hasigiruba lan lubúeingu afurendeira luagu Liráü (1 Fe. 2:21).

7. Según Matéu 17:1-5, ka amu dan layanuha Heowá siélugiñe ani ka lariñagubei?

⁷ (Aliiha huméi Matéu 17:1-5). Le libiaman wéiyaasu layanuhan Heowá siélugiñe dan le lámuñedagunbei larihín Hesusu. Amuriahaali meha Hesusu luma Féduru, Santiagu, Huan lun houdin úara luma luagu aban wübü íñuti. Ñein hariha aban lanarime arufudúni. Aba lámiridun ligibu Hesusu, aba táharudun ladaüragun kei larugounga. Aba hagumeserun bián wügüriña ayanuha luma Hesusu libügürü lounwe luma láguyugun, genegeti meha houn ǘrüwa apostolugu ha Moisesi lan luma Elíasi wügüriña hagía. Íbini ‘lueirin lidabu hagu’ apostolugu, aba harihini lanarime arufudúni ligía dan le hagagudunbei sunsuinagubei (Luk. 9:29-32). Lárigiñe, aba tadouragun aban dúeri hau ani aba láfuridun lumalali Bungiu ñéingiñe. Ítara kei meha ladügüni dan le labadiseirunbei Hesusu, arufuda lumuti Heowá hínsiñe lan Liráü lun ani gunda lan lau dan le lariñagubei: “Anihán niráü le hínsiñebei nun, le aubei óunwenbu lan nugundan”. Ani guentó ariñagati: “Adüga huméi le lubeibei [o aganba huméi]”.

8. Ka lánibei arufudúni le luagu Hesusu luma hawagu lani disipulugu?

⁸ Arufudúni ligía, aban meha iyawadinaü luagu luéirigun luma lubafu Hesusu le meha lunbei libihini danme urúeihali lan lidan Larúeihan Bungiu. Chóuruti aba lan líchugun katei le gurasu luma iderebugu lun Kristu lubá le meha lunbei lasufurirun luma luriban ligaburi lounwen. Ani aba lederebudagüdüni hafiñen disipulugu ani ruti burí erei houn lubá lóuchawagun hafiñen luma lubá saragu dasi le lunbei meha hadügüni. Ayanuhati apostolu Féduru luagu arufudúni le kéiburi darandi irumu lárigiñe, le arufudubalin kamá le wurinouga lan lasusereda (2 Fe. 1:16-18).

9. Ka adundehani buiti líchugubei Hesusu houn lani disipulugu?

⁹ “Adüga huméi le lubeibei”. Afuranguagüda lumuti Heowá busén lan lun waganbuni Liráü ani gaganbadi wagíame lun le lariñagubei woun. Dan meha le ya lubéi Hesusu Ubouagu, ariñagati saragu katei ani buiti lun wíchugun arigei lun. Arufudahati houn ha afalarubalin lun hapurichihani uganu buiti luáguti Larúeihan Bungiu ani súnwandan meha laritaguagüdüniña lun agagudúañu hamá (Mat. 24:42; 28:19, 20). Ariñagati giñe houn lun háfaagun lun hadügüni lugundan Bungiu luma lun mábürühan lan harüna (Luk. 13:24). Ani ariñagati houn mégeiwa lan lun hínsiñegu hamá hámagua, lun lidan hamá aban luma lun gaganbadi hamá lun lugumadin (Huan 15:10, 12, 13). Chóuruti hu lan adundehani le líchugubei houn ani humemegili lidan wadaani.

10, 11. Ida liña warufuduni aganba wamani Hesusu?

¹⁰ Ariñagati meha Hesusu: “Sun ha gaganbadibaña lun inarüni, aganba hamuti le nariñagubei” (Huan 18:37). Arufuda wamuti aganba wamani lumalali Hesusu dan le waganbuni adundehani le: “Gaguraasun humá hubaruagua, ferudunagua huguyame húmawagua” (Kol. 3:13; Luk. 17:3, 4). Arufuda wamuti giñe dan le wapurichihani uganu lau ubebeni lidan dan buiti luma lidan dan hénrenguti (2 Tim. 4:2).

¹¹ Ariñagati giñe Hesusu luougua aganba hamani lilügüniña mudún lumalali (Huan 10:27). Arufuda wamuti aganba wamani mámarügü lau gaganbadi wamá lun lererun, arufuda wamuti giñe lau wadügüni le lariñagubei. Mígiraguagüdüntiwa woungua lun burí “idiheri luagu burí katei lánina ibagari le” (Luk. 21:34). Ru wamuti waganbadi lun lugumadin Hesusu lidan furumiñeti lúgaaru, íbini dan le wagagibudagun  luma lénrengunga. Saragu hádangiñe wíbirigu hagagibudaguña luma turobuli wéinamuti kei burí hagayuahan wáganiñu hawagun, lanarime gudemei luma burí chagaguaü le lanügübei liñawan dan. Íbini ítara, úaraguamemegiña lun Heowá meberesenga kaba lan asusereda. Chóurugüda lumuti Hesusu houn sun lánigu: “Ha subudihabútiña lun nugumadin ani úaragua hagía luma, arufuda hamuti luagu hínsiñe nan houn le tímatimaati. Ani hínsiñehabubei Núguchi houn” (Huan 14:21).

12. Ka amu igaburi ídanbei gayara lan warufuduni gaganbadi wamá lun Hesusu?

¹² Wídehan hama ha líridubaña Hesusu lun hadundehaniwa ligía ábanya igaburi lun warufuduni aganba wamani (Ebü. 13:7, 17). Lidan lagumuhóun burí irumu le, adügaaru lóundarun Heowá saragu asansiruni. Rúharu iseri igaburi lun lapurichihóun luma iseri ídemuei lun apurichihani. Sánsihali giñe ligaburi ladügǘn adamuridaguni le adügǘbei labadinagua dimaasu luma ligaburi tábunawagun, taransehóun luma letenirún tun Luban Adamuridaguni. Ma rútiwa seremei luagu wadundehóun lau ínsiñehabuni ani lidan aban igaburi le saminawati buidu luagu? Gayaraati wachoururuni luagu labinirubei lan Heowá wáfaagun lau gaganbadi wamá lun adundehani le tíchugubei lóundarun lidan dan.

13. Ida liña lahuudun woun waganbuni Hesusu?

¹³ Lahuuduba woun waganbuni sun le larufudahabei Hesusu. Ida? Kéiburi dan le füramase lan houn lani disipulugu líchuguba lan larufudahan ñuruguaü houn. Ariñagati: “Ábame hadarirun emeraaguni tun huani. Ménrengunti lun heseriwidun nun, huáliti giñe anügüni le níchugubei hun lun hanügüni” (Mat. 11:28-30). Rutu Lererun Bungiu erei woun —íbini gádürü abahüdaguni luáguti libagari Hesusu luma lani ministeriu le tídanbei— ídehatu lunya lederebugudun wamadagua luma Heowá luma lun lachuudun wau (Sal. 19:7; 23:3). Ariñagati Hesusu: “Fuleseiwatimatiña ha aganbubalin ani adüga haméi le lubeibei Bungiu!” (Luk. 11:28).

14, 15. a) Según Huan 12:27, 28, ka amu dan layanuha Heowá siélugiñe luagu lǘrüwan wéiyaasu? b) Ka uagu líchiga gurasu lun Hesusu luma derebugu dimurei le lariñagubei Heowá lun?

¹⁴ (Aliiha huméi Huan 12:27, 28 *). Abahüdaguati lani Huan Ewanhéliu luagu lǘrüwan  wéiyaasu le layanuhanbei Heowá siélugiñe. Herusalénñein meha Hesusu fiu weyu lubaragiñe lounwen lun lefeduhani Luéyuri esefuruni lagumuhóun wéiyaasu. Lárigiñe lariñagun nidiheri lan, aba lamuriahan luma Bungiu lidan aban furíei, lariñaga: “Núguchi, ruba uéiriguni lun biri”. Ábati lóunabuni Heowá siélugiñe, ariñageina: “Rúhadina uéiriguni lun niri ani níchigayaba uéiriguni lun niri”.

¹⁵ Nidiheriti meha Hesusu saragu luagu lanarime buligasion le lanügübei úaragua lan lun Heowá. Subudi lumuti meha luagu labeichúba lan ani afarúa ligíame hilagubei (Mat. 26:38). Ani le meha súdinitimabei lun líchugun uéiriguni lun liri Lúguchi. Nidiheriti meha luagu gayara lan lawiyeduni lounwen liri Bungiu lugundun ariñagatiña meha láganigu anabagua laali lan Bungiu. Gama lumoun, chóuruti ru lan dimurei le lariñagubei Lúguchi ichouruni lun luagu líchuguba lan uéiriguni lun liri. Chóuruti ru lan dimurei burí le darangilaü luma erei lun Hesusu lun lawanduni le lunbei meha lasufuriruni. Másiñati ligíarügüñein lan gunfurandei le lariñagubei Heowá oura ligía, íbini ítara, adügati Heowá lun labürüdǘn dimurei burí le lun gayara lan wasagarun buiti lídangiñe (Huan 12:29, 30).

16. Ka uagu gayara lubéi burí ladiheridagüdüniwa lawiyedúniwa liri Heowá?

¹⁶ Ítara kei meha Hesusu, gayaraati wadiheridun luéi lawiyedúniwa liri Heowá. Másiñati súfuri wamá marichaü, ítara kei le asuseredubei lun Hesusu. Háfuga wuriba lan wasandiragun woungua ladüga iyeeni le haburuchaguagüdübei  wáganiñu wawagu. Gayaraati wasaminarun adüga lan katei le lun lawiyedúniwa liri Heowá luma tiri lóundarun. Moun lumuti ladügün katei le lun wadiheridun saragu. Lidan sügǘ burí le, gayaraati ladügün dimurei le lariñagubei Heowá lun Hesusu lun darangilu wamá. Súnwandan líchugun Heowá uéiriguni lun liri. Layusurubei Heowá Larúeihan lun laransehan furumiñeguarügü wuribani le ladügübei Satanási luma ubóu le houn lubúeingu Bungiu ha úaraguabaña (Sal. 94:22, 23; Isa. 65:17). Chouru wamuti luagu lagunfuliruba lan dimurei le: “Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan, ladüga lídanñadün aban luma Kristu Hesusu” (Fili. 4:6, 7).

17. Según Isaíasi 30:21, ida liña layanuha Heowá wama uguñe weyu?

¹⁷ Aniheingua Heowá ayanuha wama uguñe weyu (aliiha huméi Isaíasi 30:21). Inarüni maganbun wamaali lan lumalali Heowá siélugiñe. Gama lumoun, ruti adundehani woun tídangiñe Bíbülia to Lererun. Ani ínchaha lumuti sífiri sandu “óunigiruti gúnfuliti” lun lasigirun íchiga ariñahani lúmagiñeti Bungiu woun, le ítarabei kei éigini, kéiburi agumeiraguagüdüni to imprimíruarügütu, to lídanboun wani páhina lidan Internet, to lídanboun bidéu luma ariñahani le aganbahóuarügüti (Luk. 12:42). Ma resibitiwa saragu ariñahani le ítarabei kei éigini?

18. Ka uagu ladüga le lariñagubei Heowá tidan Lererun lun ganigi wamá luma lun laganwoundun wafiñen?

¹⁸ Maweiyasun wamá abulieidei dimurei le lariñagubei Heowá dan meha le ya lubéi Liráü Ubouagu. Adüga láamuga le lariñagubei Heowá tidan Bíbülia, lun wachoururuni lúhaburuguñein lan sun katei ani laransehabei lan furumiñeguarügü wuribani le ladügübei Satanási luma ubóu le lábugiñebei lubafu woun. Aranse wamá lun waganbuni Heowá. Ánhawa adügei, wawanduba furumiñeguarügü lénrengunga guentó o le lunbei liabin ámuñegü. Haritaguagüda tumutiwa Bíbülia luagu dimurei le: “Mégeitün awanduni, lun lárigiñe lanme hadügüni lugundan Bungiu, gayara láamuga heresibiruni le füramase láalibei hun” (Ebü. 10:36, TNM).