1. Kei aubei larufudei 1 Féduru 3:8, ka uagu wasandiragua woungua buidu harugabu ha beresebaña lau le wasandirubei luma le gádanbaliwa?

SUN wagía buiti wasandiragun woungua harugabu gürigia ha beresebaña lau ida liña lan wasandiragun woungua luma le gádanbaliwa. Áfaaguatiña gürigia ha lun gunfuranda hamani le wasaminarubei luma le wasandirubei. Ariha hamuti le wemegeirubei ani rútiña ídemuei woun, anihein dan lubaragiñe wamuriahani hama. Hínsiñetiña ha ‘gudemehabuña’ * ani ha arufudubaña berese hamá hau gürigia woun kei lariñaguni 1 Féduru 3:8 (aliiha huméi).

2. Ka uagu hénrengu lubéi woun warufudun berese wamá hau amu?

² Sun kristiánugu busentiwa warufudun berese wamá hau amu. Gama lumoun, lunti wasubudiruni anihein lan dan hénrengu lan lun wadügüni. Ka uagu? Aban lídangiñe ladüga gafigoun wamá ani lunti wáfaagun lun mámarügü lan wawouguoun wasaminara (Rom. 3:23). Añahein wádangiñe másiñati hénrengu lan woun ladüga ligaburi wagüriarún luma le winwan wamaalibei. Ani gayaraati giñe gani lan wawagu hagaburi gürigia ha geyegubaña wau, lugundun lidan lagumuhóun dan le, meberesegúntiña saragu gürigia lau le hasandirubei amu ladüga hóunguarügüñein habusenra buiti (2 Tim. 3:1, 2). Ka gayaraabei líderaguniwa lun ménrengun lan woun lun warufudun berese wamá hau amu?

3. a) Kaba íderaguawa lúntima warufudun berese wamá hau gürigia? b) Kaba wariha lidan arütíkulu le?

³ Gayaraati líderaguniwa wáyeihani Heowá luma wáyeihani Hesukrístu  le Liráü lúntima warufudun berese wamá lau le hasandirubei amu. Aban Bungiu hínsiñehabuti Heowá ani ligía íchugubei aban hénpulu buiti woun (1 Huan 4:8). Arufuda lumuti meha Hesusu buidu buidu ligaburi Lúguchi (Huan 14:9). Dan meha le ya lubéi Ubouagu, arufuda lumuti gayara lan harufudun gürigia berese hamá hau amu. Lidan arütíkulu le, wakutihaba ida liña lan larufudun Heowá luma Hesusu berese hamá lau le hasandirubei amu, lárigiñe ábame warihini ida luba lan wáyeihani hagaburi.

4. Ida liña larufuduni Sakaríasi 2:8 berese lan Heowá lau le hasandirubei lubúeingu?

⁴ Ariñagatu Bíbülia berese lan Heowá lau le hasandirubei ha eseriwidubaña lun. Ariha waméi ida liña lan lasandiragun lungua dan le hagagibudagunbei ísüraelina luma lénrengunga. Ariñagatu Lererun Bungiu: “Lidan sun hadiheri nidiheriti meha giñe” (Isa. 63:7-9, TNM). Dan lárigiñe, aba lariñagun Heowá liyumulugugiñe profeta Sakaríasi, dan le lan hóuserawagun lumutuniña ítara liña kamá ligía óuserawagunbei. Aba lariñagun Heowá houn lubúeingu: “Furumiñeguarügü le aguuruti hawagu numutuniña, laguuruñein lila nagu” (aliiha huméi Sakaríasi 2:8). Ma lanarime ligaburi larufuduni Heowá berese lan hau lumutuniña!

5. Abahüdaha humá aban sügǘ luagu le adüga laalibei Heowá lun líderaguniña lubúeingu dan le hasufurirun.

⁵ Dan le hasufurirun lubúeingu Heowá, mámarügü sandirügüti gudemehabu hawagu, adügati giñe somu katei lun líderaguniña. Ariha waméi hakesin ísüraelina. Sun meha dan le haubei ísüraelina kei idamuni Ehiptu, gáriti meha lun Heowá larihiniña asufurira, anihán katei le adügübei lun lesefuruniña. Aba lariñagun lun Moisesi: “Ariha naali hasufurirun numutuniña [...]. Aganba naali hagúarahan amuriaha ídemuei [...], ani subudi numuti hasufurirun buidu buidu. Ligía niábinbei lun nesefuruniña lídangiñe habafu Ehiptuna” (Afu. 3:7, 8). Kei gudeme hamá lun Heowá, aba lesefuruniña lídangiñe amudirawaguni. Saragu sígulu lárigiñe, dan meha le lídanñanu lubéi Fulasu Füramasewati, aba háburuhan áganiñu hawagun, ha lílana amu ageiraü. Ka ladügübei Bungiu? Ariñagatu Bíbülia ‘gudeme hamá lun’ hadüga ha amudiragubaliña ani óusera hamaña wuriba. Ábanya hagudemedagun lun Heowá, aba líderaguniña ani aba lóunahan alidihatiña lun hesefuruniña hawéi háganiñu (Ali. 2:16, 18).

6. Abahüdaha humá aban sügǘ le ídanbei larihíniwa berese lan Heowá lau le lasandirubei aban gürigia le abulieidagubei.

 ⁶ Súnwandan gabaroun lani Heowá le hasandirubei lubúeingu, íbini dan le habulieidagun. Ariha waméi le asuseredubei lun profeta Honasi. Aba lóunahani Bungiu Níniwe lun lapurichihani uganu lánina asiadirúni houn lílana uburugu ligía. Gama lumoun, kei aba lubéi hasakürihan, aba feruduna lániña Bungiu. Magundanti Honasi luagu katei ligía, darí lun “lagañidun saragu” ladüga magunfulirun lan le buga lariñagubei. Gaguraasunti Heowá lubá Honasi ani aba líderaguni lun lasansirun ligaburi larihini katei (Hon. 3:10–4:11). Lau lásügürün dan, aba gunfuranda lani Honasi le asuseredubei ani aba ladügün Bungiu lun labürüdüni Honasi sügǘ le lun lahuudun woun (Rom. 15:4). *

7. Ka ichouruni líchugubei woun le adüga laalibei Heowá hawagu lubúeingu?

⁷ Ruti ichouruni woun le ladügübei Heowá lidan kesi le luma lidan amu luagu berese lan hau lubúeingu. Subudi lumuti ligarigu luma lasufurirun kada aban wádangiñe. Subudi lumuti buidu buidu “ka lan tídanbei hanigi” gürigia (2 Kro. 6:30). Gufuranda lumuti le wasaminarubei luma le wasandirubei, ítara kei le wayaarabei adüga luma le wasiñarubei adüga. Ani füramaseti woun mígirun lubadiwa lan lun wouchawagún lóugiñe le siñá wabéi awanda (1 Ko. 10:13). Ma ruti wasubudiruni katei le ñuruguaü tun wanigi?

8-10. Ka katei ídehabei lun lebereserun Hesusu hau amu?

⁸ Dan le ya lubéi Hesusu Ubouagu, arufudati meha berese lan hau amu. Ǘrüwañein lébuna ladügüni. Furumiñe, kei le aubei warihei, arufuda lumuti ligaburi Lúguchi buidu buidu. Ítara kei Heowá, hínsiñetiña gürigia lun Hesusu. Lau sun meha gunda lan lau sun le ídanbei líderaguei Lúguchi adüga, sanditimati meha aban lueirin ínsiñeni hawagu gürigia (Ari. 8:31, TNM). Ínchaha lumuti ínsiñeni lun lebereserun lau le hasandirubei gürigia.

⁹ Libiaman, ítara kei Heowá, gabafuti Hesusu lun lasubudiruni le tídanbei hanigi gürigia, mini lan le, gayara lan lasubudiruni lébuna hadügüni gürigia katei luma le hasandirubei (Mat. 9:4; Huan 13:10, 11). Ligíati, dan meha le líchugun fe luagu hanarime lan hirun gürigia, adügati meha gudemehabu lun líchugun gurasu houn (Isa. 61:1, 2; Luk. 4:17-21).

¹⁰ Lǘrüwan, winwan lumuti giñe Hesusu fiu lídangiñe turobuli le meha úmabei hagagibudagua gürigia ha geyegubaña lau. Kéiburi, genegeti gudeme hamá meha liduheñu. Kei meha nadagimein lubéi luma Hosé, wügüri le agüriarubalin, furendeiti awadigimarida wadagimanu le mégeiti saragu erei (Mat. 13:55; Mar. 6:3). Chóuruti sandí lani igarigu le lanügübei leferidirún somu iduhei lidan óunweni, lugundun genegeti hilá lan Hosé lubaragiñe lagumeseruni Hesusu lani ministeriu. Ani subudi lumuti meha giñe ida liña lan lasandirún gaduheñu lan gürigia ha ámubei hafiñen luéi (Huan 7:5). Adügati katei le lúmaya amu katei lun gunfuranda lani haturóbulin gürigia luma le hasandirubei.

11. Lidan burí ka sügǘ larufudatima Hesusu berese lan lau le hasandirubei gürigia? (Ariha huméi dibuhu le luágubei tidáü garüdia to).

¹¹ Arihúati berese lan Hesusu hau gürigia lidan burí milaguru le ladügübei. Mafosurúnti lun ladügüni, ladügünbalin ladüga gudeme hamá meha ha asufurirubaña lun (Mat. 20:29-34; Mar. 1:40-42). Samina wamá luagu le lasandirubei dan le ladireirubei lau aban wügüri maganbunti lun lareidaguagüdüni o dan le láguyuguagüdünbalin  tiráü aban würi hilaali tani weiriei (Mar. 7:32-35; Luk. 7:12-15). Rúguati Hesusu lungua lidoun halugaarun gürigia ha, ábati busén lan líderaguniña.

12. Según Huan 11:32-35, ida liña larufudun Hesusu berese lan lau le tasandirubei Marta tuma María?

¹² Dan le lóunwenbei Lásaru, arufuda lumuti Hesusu berese lan tau Marta tuma María, ha lítunu Lásaru. Dan le larihinbalin hagarigu, “aba layahun” (aliiha huméi Huan 11:32-35). Mama meha ladüga siñá hali lan lásügürün dan luma lumada layahunbei. Subudi lumuti lásaragüdübei lan meha. Layahunbei ladüga gari lan lun larihiniña lítunu Lásaru ayahuaha.

13. Ka uagu gunda wabéi wafurendeirun luagu ligaburi larufudun Hesusu gudemehabu?

¹³ Mítarantiwa kei Hesusu lugundun gafigountiwa. Gama lumoun, sagatiwa buiti lídangiñe wafurendeirun luagu larufudun berese lan hau gürigia. Ani hínsiñeti woun ladüga ligaburi lóuseruniña gürigia (1 Fe. 1:8). Ruti ugundani woun wasubudiruni Urúeihali lan lidan Larúeihan Bungiu ani yarafa madise lagidarubei sun asufuriruni. Kei meha winwan lubéi Ubouagu kei gürigia, ligía gürigia le buídutimabei lun lagidaruni sun turobuli le lanügübei larúeihan Satanási Ubouagun. Ma wagundan luagu garúeite wamá aban Urúei le gayaraabei “gudemehabu lan [...] woun luagu wadebilin” (Ebü. 2:17, 18; 4:15, 16).

14. Según le lariñagubei Éfesuna 5:1, 2, ka wabusenrubei wadügün?

¹⁴ Dan le wakutihani lani Heowá hénpulu luma lani Hesusu, ábatima línchahaniwa lun warufudun berese wamá hau gürigia (aliiha huméi Éfesuna 5:1, 2). Inarüni siñá lan wasubudiruni le tídanbei hanigi gürigia, gama lumoun, gayaraati wáfaagun lun gunfuranda wamani le hasandirubei luma le hemegeirubei (2 Ko. 11:29). Mítarantiwa kei lílana ubóu le, ha hawouguounrügüñein hasaminara, áfaaguatiwa lun wadügüni le lariñagubei Pábulu, le ariñagubei ítara: “Mámarügüla katei le buídubei hun háluaha, áluaha huméi giñe le buídubei houn amu” (Fili. 2:4).

15. Kátima lúnbaña harufudun gunfuranda hamaniña amu?

¹⁵ Lúntimati harufudun wéiyaaña lidan afiñeni berese hamá hau amu. Subudi hamuti laguseragüdübaña lan Heowá luagu ligaburi hóuseruniña gürigia ha ichugúbaña lábugiñe haríaahan (Ebü. 13:17). Lun gayara lan híderaguniña hábirigu lunti gunfuranda hamaniña. Ida liña harufuduni gunfuranda hamaniña?

16. Ka hadügübei wéiyaaña lidan afiñeni ha arufudubaña gunfuranda hamaniña amu ani ka uagu súdini lubéi igaburi le?

¹⁶ Wéiyaaña lidan afiñeni ha arufudubaña gunfuranda hamaniña amu, díreitiña dan lun haganbuniña hábirigu. Adügatiña álügüdahani houn ani aganba hamutiña lau gaguraasuni. Ani súdiniti katei le dántima busén lan aban hádangiñe lubúeingu Heowá ladaarunu lanigi ani madariti dimurei lun le labuserunbei lariñagun (Ari. 20:5). Dan le aranseñu haña lan wéiyaaña lidan afiñeni lun hásügürün dan hama íbirigu, ábatima ñein lan ichouruni, umadaguaü luma ínsiñeni haganagua (Adü. 20:37).

17. Ka hínsiñebei houn saragu íbirigu hawagu wéiyaaña lidan afiñeni? Abahüdaha humá aban sügǘ.

¹⁷ Ariñagatiña saragu íbirigu le lan hínsiñetimabei houn hawagu wéiyaaña lidan afiñeni berese hamá lau le hasandirubei amu. Ka uagu? Ariñagatu Adelaide: “Ménrenguntimati lun gürigia ladimurehan hama, ladüga subudi bumuti gunfuranda hamanibu”. Ariñagayatu: “Ariha bumuti luagu rugua hamá houngua lidan bilugaarun lau ligaburi hóunabun dan le bayanuhan hama”. Ariñagati aban íbiri: “Dan meha le anahán lubéi abahüdahei nituróbulin lun aban wéiyaali lidan afiñeni, aba labuinchun lagu lau águiraü. Mabulieidun nubéi katei ligía” (Rom. 12:15).

18. Ida luba warufudun berese wamá hau amu?

 ¹⁸ Inarüni, sun lan wagía gayaraati warufudun berese wamá hau amu, mámarügü wéiyaaña lidan afiñeni. Ida luba warufudun berese wamá hau íbirigu? Áfaagua wamá lun gunfuranda wamani turobuli le úmabei hagagibudagua waduheñu hama wábirigu. Arufuda waméi berese wamá hau nibureintiña, sanditiña, íbirigu derebuguhaña hama ha eferidirubaña haduheñu lidan óunweni. Álügüda wamaña ida haña lan ani aganba wamaña dan le hóunabuniwa. Adüga wamá lun hasandiragun houngua gunfuranda wamani le hásügürübei. Ani ariñaga wamá houn gayara lan wíderaguniña lidan le wayaraati. Dan le wadügüni katei le, arufudatiwa ínsiñeni le inarüniti (1 Huan 3:18).

19. Ka uagu lunti lubéi wáfaagun lun gunfuranda wamaniña amu dan le wáfaaguña lan lun wíderaguniña?

¹⁹ Dan le wáfaagun lun wíderaguniña amu, lunti gunfuranda wamaniña, lugundun mama sun gürigia lun ábanbei lan hóunabun lun turobuli. Añahein gürigia ménrengunti houn lun hayanuhan luagu haturóbulin, añahein amu hénrenguti houn lun habahüdaguni. Ligíati, íbini busén wamá wíderaguniña, madügünbadiwa álügüdahani houn le adügübei lun wuriba lan hasandiragun houngua (1 Tesa. 4:11). Íbini dan le labahüdahani somu gürigia le lasandirubei woun, gayaraati magundan wamá lau le lariñagubei. Gama lumoun, lunti gunfuranda wamani ítara liña lan lasandiragun lungua. Ligíati, lunti aranseñu wamá lun waganbuniña amu, hámaru wagíame lun wadimurehan (Mat. 7:1; Sant. 1:19).

20. Kaba wariha lidan leweñegua arütíkulu?

²⁰ Amu luéi warufudun berese wamá hau amu lidan damuriguaü, lunti giñe wadügüni lidan apurichihani. Ida luba warufuduni lubuidun igaburi le dan le wapurichihan luma dan le wadügün disipulugu? Warihibei lidan leweñegua arütíkulu.