1. Afuranguagüda huméi aban lídangiñe ligaburi Hesusu le buídutimabei ani le adügübei lun tánhingichun wanigi.

ABAN lídangiñe katei le buídutimabei luagu ligaburi Hesusu ani hingí lumutu wanigi, iyaraani le luágubei lun gunfuranda lani turobuli le úmabei hagagibudagua gürigia gafigountiña. Dan meha le Ubouagu lubéi, gúndaati meha hama ha agundaarubaña ani ayahuati hama ha ayahuahabaña (Rom. 12:15). Kéiburi, dan le hagiribudunbei 70 disipulugu gúndaañu luagu lubuidun lidin houn lidan apurichihani, ‘aba labuinchagüdüni sífiri sandu Hesusu lau ugundani’ (Luk. 10:17, TNM,18-21). Luagu le aban oubaü, dan le larihini Hesusu íruni le lanügübei lounwen Lásaru hawagu ha hínsiñehabubaña lun Lásaru, “aba lírudagun tidan lanigi” (Huan 11:33).

2. Ka uagu larufuda Hesusu gudemehabu houn gürigia?

² Íbini mafigoun lan Hesusu, gudemehabuti meha houn gürigia gafigountiña. Ka adügübei lun ítara lan? Ínsiñenitima adügübei lun ítara lan. Kei warihini lidan arütíkulu le lubaragiñebei le, sanditi aban lanarime ínsiñeni hawagun gürigia (Ari. 8:31, TNM). Adügati le lun lasubudiruni buidu ligaburi hasaminan gürigia. Ariñagati apostolu Huan: “Ligía guánarügü subudi lumuti katei lan tídanbei hanigi [gürigia]” (Huan 2:25). Gudemetiña meha gürigia lun Hesusu, saragu hádangiñe sandí hamuti línsiñehabu ani aba hánharun lun uganu luáguti Larúeihan Bungiu. Eibu wáyeihani Hesusu, buídutimabei lidin woun lidan wani ministeriu (2 Tim. 4:5).

3, 4. a) Ánhawa arufuda gudeme hamá amu woun, ida luba warihini apurichihani? b) Kaba wariha lidan arütíkulu le?

³ Subudi lumuti meha apostolu Pábulu mosu lan lapurichihan ani subudi wamuti giñe mosu lan wadügüni ligiaméme  (1 Ko. 9:16). Gama lumoun, ánhawa arufuda gudemehabu, wapurichihaba ladüga berese wamá hau gürigia ani busentiwa wíderaguniña, mama ladüga mosu lan wadügüni. Subudi wamuti luagu ‘gúndaatima lan le íchugubei sügǘ lau le eresibirubei’ (Adü. 20:35). Ánhawa apurichiha lau saminaü le wachüguagu, ladügüba lun gúndaatima wamá lidan apurichihani.

⁴ Lidan arütíkulu le, warihuba ida luba lan warufudun gudemehabu lidan ministeriu. Furumiñe, wayanuhaba luagu ida liña lan meha larihiniña Hesusu gürigia luma le wafurendeirubei lídangiñe le ladügübei. Lárigiñe, wakutihaba gádürü igaburi lun wáyeihani ligaburi (1 Fe. 2:21).

5, 6. a) Ka uagun larufuda Hesusu gudemehabu? b) Ítara kei lariñawagún lidan aban profesía lidan Isaíasi 61:1, 2, ka uagu lasandira Hesusu gudemehabu hawagu gürigia ha únbaña lapurichiha?

⁵ Akutiha wamá luagu ligaburi larufudun Hesusu gudemehabu. Luagu aban dan, lapurichihaña meha Hesusu úara hama lani disipulugu sin hemeraagun. Madaanigubeitiña ni murusun lun heigin. Ábati lanügüniña Hesusu lidoun aban “fulasu le darangilati” lun hemeraagun murusunraü. Gama lumoun, aba houdin saragu gürigia le ñein habéi. Ka ladügübei Hesusu dan le lachülürünbei ani aba larihiniña saragu gürigia ha? “Aba hagudemedagun lun ladüga ítara haña lan kei mudún ha móuniritiña. [Ábati] lagumeserun arufudaha saragu katei houn” (Mar. 6:30-34).

⁶ Ka uagu lasandira Hesusu gudemehabu? Ladüga larihiniña gürigia hagía “kei mudún ha móuniritiña”. Másiñati aba lan líchugun fe luagu fiu lan hádangiñe gudeme hamá ani mosu lan hawadigimaridun saragu lun gayara lan híchuguni le hemegeirubei haduheñu houn. Gayaraati añahein lan meha hádangiñe hírutiña ladüga féridihaña lan meha somu haduhe lidan óunweni. Chóuruti gunfuranda lani Hesusu buidu ida liña lan hasandiragun houngua, másiñati sügühali lan meha lídangiñe fiu lídangiñe katei le, kei warihini lidan arütíkulu le lubaragiñebei le. Adügati berese lan hau amu lun lanügüni uganu le ruti awalidaguni houn (aliiha huméi Isaíasi 61:1, 2).

7. Ida luba wáyeihani Hesusu?

 ⁷ Ida luba wáyeihani Hesusu? Uguñe weyu ítara haña giñe gürigia “kei mudún ha móuniritiña” ani buin haña lau turobuli. Gama lumoun, anihein le hemegeirubei wama: uganu luáguti Larúeihan Bungiu (Aruf. 14:6). Ligíati, adüga wamuti le ladügübei Wamaisturun ani barǘ wamuti uganu buiti houn ladüga gudemehabu wamá houn ha gudemebaña (Sal. 72:13). Gudemetiña gürigia woun ani busentiwa wadügün somu katei lun wíderaguniña.

8. Kaba íderaguawa lun warufudun gudemehabu lidan ministeriu? Abahüdaha humá aban sügǘ.

⁸ Lun gayara lan warufudun gudemehabu houn gürigia ha únbaña wapurichiha, lunti wasaminarun luagu ka lan hasandirubei luma le hasaminarunbei, óusera wamañame kei wabusenrun lun wouserúniwa * (Mat. 7:12). Wariha gádürü katei le lunbei líderaguniwa adügei katei le. Furumiñe, samina wamá luagu le lemegeirubei kada gürigia. Gayaraati wagoubaguagüdüni wapurichihan luma aban surusia. Aban surusia buiti, gabaroun lumuti le lemegeirubei sánditi. Adügati álügüdahani lun ani aganbaléi lóunabagüle lidan anihán lan gürigia afuranguagüdei le lasandirubei. Ani lubaragiñe hamuga líchugun furumiñeguarügü árani lun sánditi, másiñati aba lan ladügün egüsámini luagu lun larihini ka lan lisandibei. Ítara lubati gayara lan líchuguni árani le lunbei lisandi sánditi. Ítarameme, mariñagun wamuti ligiaméme houn sun gürigia ha únbaña wapurichiha, aba wariñaguni dimurei burí le lunbei líderaguniña según le gádanbaliña luma le hasaminarubei.

9. a) Ka katei lunbei masaminarun wamani? b) Ka buídubei lun wadügüni?

⁹ Moun lumuti wasaminarun subudi wamani le gádanbaliña gürigia ha únbaña wayanuha ni lun wasaminarun subudi lan le hafiñerubei woun o ka lan uagu afiñe habéi luagu (Ari. 18:13). Buítimati lun wáfaagun wasubudiruni lira lau wadügün álügüdahani houn lau inebesei (Ari. 20:5). Kei hénpulu, gayaraati wálügüdüniña luagu hawadigimari, haduheñu, ka lan hasaminarubei luagu ítaga katei luma amu burí katei lidan habagari, anhein anihein lubéi échuni le lidan fulasu le ñein lubéi wawinwanda. Lau le hariñagubei woun, ítara luba wasubudiruni ka lan uagu megei habalin uganu luáguti Larúeihan Bungiu. Danme le subudi wamaali, gayaraahalime webereserun luagu le hemegeirubei luma wíchuguni ariñahani le hemegeirubei houn, ítara kei ladügüni Hesusu (ariha huméi giñe 1 Korintuna 9:19-23).

10, 11. Úara luma le lariñagubei 2 Korintuna 4:7, 8, ka libiaman katei lunbei líderaguniwa arufuda gudemehabu? Abahüdaha humá aban sügǘ luagu somu gürigia le arufudubalin.

¹⁰ Libiaman, áfaagua wamá wasaminarun  ida liña lan habagari. Lídehaba le lun gunfuranda wamani le hásügürübei, ladüga sun wagía gagibuguatiwa luma ligiaméme turobuli le úmabei hagagibudagua ha híbiri gürigia gafigountiña (1 Ko. 10:13). Subudi wamuti hénrengu lan ibagari lidan ubóu le lábugiñebei lubafu Satanási, Heowárügüñein gayara líderaguniwa lun wawandun (aliiha huméi 2 Korintuna 4:7, 8). Samina wamá ida liña lan habagari ha áfaagubaña lun houdin habaruaguóun ani mamadaguatiña luma Bungiu. Ítara kei Hesusu, gudemehabutiwa houn ani ligía wanügübalin “uganu buiti” houn (Isa. 52:7).

¹¹ Ariha waméi likesin aban íbiri gíriti Sergey. Lubaragiñe lasubudiruni Sergey Heowá, hénrenguti meha lun layanuhan ladüga haburi lan. Lau lásügürün dan, aba laturiahanu Bíbülia. Abahüdaguati Sergey: “Furendeitina lidan naturiahanu Bíbülia mosu lan hayanuhan kristiánugu houn gürigia luagu hafiñen. Chouru numuti meha maweiyasunbadina lan adügei le”. Gama lumoun, meredeti lasaminarun Sergey luagu ida liña lan habagari gürigia ha ibidiñeti inarüni houn ni Heowá. Ariñagati: “Ruti le nafurendeirubei ugundani nun luma darangilaü. Subudi numuti giñe añahein lan gürigia mégeitiña hasubudiruni inarüni”. Lau líchugun fe luagu lira, adügati lun leferidiruni anufudei luéi apurichihani. Ida? Ariñagati: “Ibidiñega nun, derebugüda lumuti katei le ichouruni le nasandirubei ani rédeiti arufudahani le tídanbei Bíbülia tidan nanigi”. *

12, 13. Ka uagu lunti lubéi gaguraasun wamá habá ha únbaña wíchiga aturiahani tídangiñeti Bíbülia? Ru humá aban hénpulu.

¹² Lǘrüwan, gaguraasun wamá habá ha únbaña wíchiga aturiahani tídangiñeti Bíbülia. Haritagua waméi másiñati lan furumiñe lan wéiyaasu haganbuni arufudahani le tídangiñeti Bíbülia le wasubudirubei. Gama lumoun, saragu hádangiñe ragüñu haña luagu hafiñen ani másiñati ligía lan adügübei lun lidan hamá aban hama haduheñu, hechun luma hama lílana fulasu le ñein lubéi hawinwanda. Ida luba wíderaguniña?

¹³ Samina wamá luagu sügǘ le. Ka san  adügǘbei dan le mégeiwa lan teweñegua aban burichi to wéiyaaru? Aba tadügǘn aban iseri. Dan le óuwenbunhaaru to iseri, aba tagünrinchawagun to binadu. Ítarameme, lubaragiñe wamuriahan luma gürigia le unbei wíchiga aturiahani lun lígiruni binadu lafiñen, le wéiribei línsiñe lun, lunti giñe wíderaguni lun gebegi lan arufudahani le tídanbei Bíbülia lun, le iserigilibei lun. Ítararügüba aranseñu luba lan lun lígiruni binadu lafiñen. Gayaraati ladurarun katei le saragu dan (Rom. 12:2).

14, 15. Ida luba wíderaguniña ha murusunrügüñein hasubudin o ha ibidiñeti ni kata houn luagu füramasei lun wawinwandun lun súnwandan lidan Paraísu ya Ubouagu? Ru humá aban hénpulu.

¹⁴ Ánhawa gaguraasun habá gürigia, magurabun baadiwa lun gunfuranda hamani inarüni tídangiñeti Bíbülia ni lun hánharun lun dan le haganbuni luagu furumiñeti wéiyaasu. Línchahabadiwa gudemehabu lun wíderaguniña lun hasaminarun luagu le tariñagubei Bíbülia sun dan le hemegeirubei. Kei hénpulu, samina wamá luagu füramasei le tídanbei Bíbülia luáguti wawinwandun lidan aban Paraísu ya Ubouagu. Saragu gürigia murusunrügüñein hasubudirun luagu Paraísu o ibidiñeti ni kata houn luagu. Añahein hádangiñe afiñetiña óunweni lan lagumuchagülebei sun katei. Añahein amu saminatiña sun lan ha buídubaña igaburi hóudiba lan sielun. Ida luba wíderaguniña lun hánharun lun le tarufudahabei Bíbülia?

¹⁵ Afuranguagüda lumuti aban íbiri le ladügübei. Furumiñe, aba laliihani Agumesehani 1:28 ani aba lálügüdahan halía lan meha ani ida liña lan meha labusenrun Bungiu lun hawinwandun gürigia. Hiibe-agei gürigia, aba hóunabun ya lan Ubouagu luma lun gúndaañu hamá. Lárigiñe, aba laliihani íbiri, Isaíasi 55:11, lárigiñe aba lálügüdahan anhein sánsihali lubéi le labuserunbei Bungiu. Aba burí hóunabun gürigia, ua lan. Lagumuhóun, aba laliiruni Sálumu 37:10, 11, aba lálügüdahan: “Según Bíbülia, ida luba habagari gürigia ámuñegü?”. Lau burí saminaü le, ibihaali íbiri le lun gufuranda hamani saragu gürigia busenmémegili lan Bungiu lun hawinwandun gürigia buítiña lun súnwandan lidan aban Paraísu ya Ubouagu.

16, 17. Según le lariñagubei Ariñawagúni 3:27, ida luba gayara lan warufudun gudemehabu? Abahüdaha humá aban sügǘ.

¹⁶ Ligadürün, samina wamá luagun burí igaburi le ídanbei gayara lan warufudun berese wamá hau gürigia. Kéiburi ánhawa adaünha luagu habenari gürigia lidan aban oura le mabuidunti houn, gayaraati wariñagun houn sarí wamani ani wagiribuduba lan amu dan. Anhein megei habéi gürigia lun ladügǘn somu fulesei houn le ménrengunti o siñá lan háfuridun hábiñegiñe ani mégeitiña lun ladügǘn somu katei houn, gayaraati wariñagun houn wadügübei lan (aliiha huméi Ariñawagúni 3:27).

¹⁷ Ariha waméi le lanügübei warufudun berese wamá hau gürigia. Dan le tíchugubei aban  íbiri fe luagu féridi hamá lan aban iduheñu hasaani weyu le lagüriahóunbei, aba tadügün aban liraüraü katei: aba tabürühan aban gárada houn iduheñu hagía lau fiu saminaü tídangiñeti Bíbülia le ruti dǘgüdaguaü. Ida liña hóunabun iduheñu hagía? Aba tabürühan úguchuru tun íbiri, aba tariñagun: “Híruti nuéyuri wurinouga. Ma lubuidun tábürühan higaradan woun sun wagía. Úabei dimurei buídurügüti numa lun neteingirunün ni lun nariñaguni ida liña lan wasandiragun woungua lárigiñe waliihanu. Wurinouga aliiha numutu gárada kéiburi wein wéiyaasu. Ma lubuidun burí dimurei le tídanbei! Teinki niña hun tídangiñe sun nanigi”. Chóuruti, lasusereduba lan aban katei ítarati woun ánhawa íchaagua woungua lidoun halugaarun ha asufurirubaña ani adüga wagíame somu katei lun wíderaguniña.

18. Úara luma le lariñagubei 1 Korintuna 3:6, 7, ida luba warihini le wadügübei lidan apurichihani?

¹⁸ Lunti warihini le wadügübei lidan apurichihani keisi lubudubu. Lau sun ídeha wamá lun hasubudiruni gürigia Bungiu, mama wagía adügübalin le súdinitimabei (aliiha huméi 1 Korintuna 3:6, 7). Heowá achawahabaliña gürigia luouguoun (Huan 6:44). Kada gürigia anúadirubalin anhein lánharuba lubéi o mánharunbei lan lun uganu según le tídanbei lanigi (Mat. 13:4-8). Haritagua waméi hiibe-agei lan gürigia mánharutiña lun uganu le lapurichihabei Hesusu ani ligíatima Máisturu buídutimabei le wínwanhalibei ya Ubouagu. Ligíati, mábürühan lan warüna anhein amahada saragu gürigia lun uganu le wapurichihabei o mabusenrun hamá haganbuni.

19. Kaba buiti wibiha ánhawa arufuda gudemehabu lidan ministeriu?

¹⁹ Wasagaruba saragu katei buiti ánhawa gudemehabu lidan ministeriu. Gúndaabadiwa lidan apurichihani, wasandiruba ugundani lau gíchigadi wamá ani wadügüba lun ménrengun lan lun hánharun “ha lúntiñabaña ibagari le magumuchaditi” lun uganu luáguti Larúeihan Bungiu (Adü. 13:48). “Adüga waméi lubeiti le buídubei houn súngubei sagü gayara lan” (Gal. 6:10). Ítarati, wasandirubei ugundani le lanügübei wíchugun uéiriguni lun Heowá, Wáguchi le siélubei (Mat. 5:16).