Anhein laliiha somu gürigia sügǘ le sin lararamagun asaminara gayaraati liabin álügüdaguni le lichügüwagu. Gama lumoun añahein meha bián gürigia gíritiña Mefi-bosetü; ánhawa akutihei sügǘ le buidu buidu gayaraabei wafurendeirun lídangiñe.

Garahüñüti meha urúei Saulu le lurúeite Ísüraeli sedü wügüriña hama bián würiña. Le furumiñeti lisaani Saulu, Yónatan líribei. Lárigiñe aba gasaani lan Saulu tau Risüpá to lubúali aban wügüri gíriti Mefi-bosetü. Ani gasaaniti meha giñe Yónatan aban wügüri gíriti Mefi-bosetü. Ligíati, dandu lisaani Saulu kei libari Mefi-bosetü híribei.

Ka san uagu, lederegera Dawidi saragu wügüriña lun háfarawagun hilagubei? Luagu somu dan, aba lagumeserun urúei Saulu asandira iyereehabúni hawagu gabaónna ha awinwandubaña haganagua ísüraelina ani aba láfaagun lun lagumuchun hau. Genegeti gibe hamá láfaragun. Aban meha óunwenbu charati lira, lugundun lidan meha lidaani Hosué aba meha hadügün ábutigu ísüraelina daradu hama gabaónna lídanbaña lan darangilaü (Hosué 9:3-27).

Aniheingua meha daradu le lidan lidaani Saulu. Lubaragiñe hamuga inebe lan daradu le lun urúei, ábarüga lálugun lagumuchun hau gabaónna. Kei le aubei warihei gadurunti Saulu hau sun tílana luban ladüga “háfaraguniña gabaónna” (2 Sam. 21:1). Dan le lañuruubei Dawidi luagu lálana arúeihani, aba habahüdahani gabaónna ha esefurubaña lun Dawidi le asuseredubei. Aba lálügüdüniña Dawidi ka lan lunbei ladügüni lun lagaranihan lun óunwenbu figóu wuribati le ladügübei Saulu lun gayara lan labiniruni Heowá lumúan Ísüraeli. Mamuriahantiña gabaónna seinsu, le habusenrunbei lun hederegerun sedü lisaanigu wügüri le álugubei lagumuchun hau (1 Lur. 35:30, 31). Adüga lumuti Dawidi le hamuriahabei luma (2 Sam. 21:2-6).

Lidan meha dan ligía hilá meha Saulu luma Yónatan wuriburugu. Anhein méhati liráü Yónatan le gíribei Mefi-bosetü wínwangili meha. Aba meha lerederun danimañu lúmagiñe liñüraü ladüga aban danaguaü ani madan lumuti meha le ladügübei láruguti houn gabaónna. Adügaali meha Dawidi aban daradu le lánina gamadaguaü luma Yónatan, daradu le lunbei meha lachawaragun darí hamoun hadügawagun íbini Mefi-bosetü beluti meha lidoun daradu ligía (1 Sam. 18:1; 20:42). Ariñagati abahüdaguni luagu Dawidi: “Mederegerun lumuti urúei Dawidi Mefi-bosetü le liráü Yónatan luagu meha fiñún le hadügübei hámagua ligía luma Yónatan” (2 Sam. 21:7).

Adüga lumuti meha Dawidi le hamuriahabei gabaónna. Aba lederegeruniña Dawidi bián lirahüñü Saulu, aban hádangiñe Mefi-bosetü líribei, hama giñe seingü libañan Saulu (2 Sam. 21:8, 9). Ítara liña lagumuchun Dawidi lau líñarawagun Ísüraeli ladüga áfarahani ligía.

Arufudahati abahüdaguni le somu katei woun. Lun hamuga madurun hamá bián lisaanigu Saulu hama seingü libañan lidan áfarahani ligía mígirunbei yebe Heowá lun háfarawaguniwa, lugundun furanguti lariñaguni lilurudun Bungiu moun lumuti lan hóunwegun isaanigu ladüga hadurun hagübürigu. Ariñagati gumadi le: “Kádaba aban ounwe luagu láfarahan” (2 Lur. 24:16). Adügati le lun wasaminarun, sédügubei lan lisaanigu Saulu ha óunwegubaña gadan lumutiña lagumuchun yebe hau gabaónna. Ligíati sédügubei hagía fáyeitiña luagu wuribani le hadügübei.

Kati wafurendeirubei lídangiñe sügǘ le? Úatiña ni aban lun haricharaguagüdüni wuribani le hadügübei lau hasaminarun o lau hariñagun hagunfuliruña lan somu gumadi le ichugúbei houn. Le lunbei hadügüni hánharun lun hadurun. Ariñagati aban ariñawagúni: “Arihabá buidu halía lan bíchigei bugudi, ítara luba bararamun buidu súnwandan. Madireirabá luéi bémeri; méibugaba lidan lagübüri üma” (Ari. 4:24-27; Efe. 5:15).