LÍDANÑADIWA meha lagumuhóun weyu lidan unsu-hati irumu 1932 uburugu Méhiku. Aban meha dimaasu lúmagiñe lichugún furumiñeti burí leiti le asansihabei likolorun ǘmadarugu lun tararamagun ugunei lidan uburugu le, le ñein lubéi saragu areinchuni ani wínwantiña hóugiñe aban míñunu gürigia ñein. Gama lumoun, mámaali aban ñunsu iseriti lira. Aranseñu haña meha ha íchugubaña ñunsu lun hásügüragüdüni le lunbei lasuseredun lidan dimaasu ligía. Lídanñanu meha fulasu le ñein lubéi tararamagua íngiini tau adiraagülei háhaburugu agurabaha aban agunbirahóuti gíriti Joseph F. Rutherford, le meha arihibei tau Sociedad Watch Tower. Añahein giñe gefentiña luagu Heowá ñein lun híchugun aban buiti achülürüni lun íbiri Rutherford, le meha lunbei lachülürün lun aban adamurini ǘrüwati weyu.

Ariñagatu garüdia The Golden Age (to gíriboun lidan chumagü guentó ¡Despertad!): “Furanguti laritawagúba lan adamurini le kei aban lídangiñe katei súdiniti le susereelibei lidan lawanserun inarüni lidan sun Méhiku”. Gama lumoun, ka uagu weiri lubéi lisudinin adamurini le lau sun san-dimirügüñanu lan gürigia achülürütiña lidoun?

Lubaragiñe adamurini ligía murusunrügüñanu meha gürigia ánharutiña lun uganu luáguti Larúeihan Bungiu Méhiku. Lau sun adügǘwaali lan meha fiú adamurini ñǘbüriti ñein lúmagiñe lidan irumu 1919, lidan irumu burí le asigirubei aba lararirun linumerun damuriguaü. Lidan irumu 1929, darawatu aban sukursáli uburugu Méhiku. Genegeti buídubei lan meha katei le lun lawanserun wadagimanu, gama lumoun, aba ñein lan fiú turóbuli. Aba lagañidun aban prekursoru dan lichugúnbei adundehani luagu siñá lan hamigisiruni apurichihani luma bísinisi, aba láfuridun tídangiñe lóundarun Heowá, lárigiñe aba ladügün aban iseri lani sétanu lánina taturiahóun Bíbülia. Lídanmeme dan ligía, mosu meha lasansirún le arihibei tau sukursáli ladüga ladügün katei wuribati. Mégeitiña meha íbirigu ha úaraguabaña Méhiku dǘgüdaguaü lun habuiduragüdüni hamadagua luma Bungiu.

Ruti meha íbiri Rutherford dǘgüdaguaü houn íbirigu lidan dan ligía. Ruti giñe bián lubuidun yanu lidan adamurini luma seingü tidan radiu. Ligía furumiñeti wéiyaasu hásügüragüdüni uganu luáguti Larúeihan Bungiu tídangiñe radiu Méhiku. Lárigiñe adamurini ligía, aba lagumeserun iseri íbiri le arihibei tau sukursáli aransehei luáguti apurichihani. Lúmagiñe dan ligía sandí hamuti íbirigu labiniruniña Heowá ani aba hasigirun eseriwida lun lau iseri erei luma ubebeni.

Lidan irumu le asigirubei, aba ñein lan bián adamurini, aban uburugu Veracruz ani le aban uburugu Méhiku. Arihúati buiti le lanügübei áfaaguni le hadügübei íbirigu. Añahein meha 82 apurichihatiña lidan irumu 1931 ani 10 irumu lárigiñe, aba hagibedagun diisi wéiyaasu hanwoun. Chülütiña kéiburi milu gürigia lidoun aban adamurini lidan irumu 1941, uburugu Méhiku.

Lidan irumu 1943 furitiña gefentiña ǘmadarugun lun hawisahan ñeinbei lan meha aban adamurini gíriti “Nación Libre”, le meha lunbei ladügǘn lidan 12 uburugu lidan sun ageiraü. * Aba meha hadahirun bián gárada hawougua lau ñunsu, aban hagibugiñe tuma aban hanagangiñe. Adüga hamuti meha gefentiña katei le lúmagiñe irumu 1936.

 Ariñagatu aban garüdia mesiganu gíritu La Nación buidu lan lidin houn gefentiña luagu Heowá lidan hamarücharun lau ñunsu le híchugubei lidan uburugu Méhiku. Ariñagatu: “Lidan furumiñeti weyu, amuriahóuati hama lun hanügün hanwoun gürigia. Lidan le aban weyu, aba meha labuinchun fulasu ligia hau gürigia”. Kei aba lubéi hasafaragun tílana ligilisi Katolika ladüga le lanügübei hamarücharun gefentiña, aba hagumeserun ayanuha wuriba hawagu íbirigu. Íbini ítara, sigitiña íbirigu ganigitiña ha amarüchara ǘmadarugu. Ariñagatu giñe garüdia La Nación ariha hamá hiibe-agei gürigia saragu “wügüriña hama würiña íchiga ñunsu tau gárada fadañu hagibugiñe luma hanagan kamá hamuga aban ‘sandwichs’”. Anuhein meha aban iyawaü lidan arütíkulu ligía le ídanbei harihúa íbirigu ǘmadarugu uburugu Méhiku. Ariñagati meha dimurei le ǘnabubei tun iyawaü: “Aba habuinchun ǘmadarugu”.

Lidan meha irumu ligía mosu meha hadügün hiibe-agei gefentiña óunwebun sákürifisiu lun gayara lan houdin lidan fiú adamurini le meha adügǘbei Méhiku. Wínwantiña meha saragu hádangiñe lidan fulasu díseti, ñein lubéi ua tan íngiini ni üma tun ugunei. Mosu meha haweiyasuhan Gefentiña eibu o lidan burigü lun gayara lan hachülürün lidan fulasu le ñéingiñe lubéi tásügüra íngiini lun tanügüniña ñeinhin lubéi ladügǘwa adamurini.

Lúnrügüñein meha houdin íbirigu ha gebegi lan hapasein. Saragu hádangiñe hábiñe íbirigu ha yarafabaña lun fulasu le ñein lubéi ladügǘwa adamurini heredera, ha meha eresibirubaliña lau sun hagundan. Añahein hádangiñe arumugatiña meha tidan Luban Wadamuridagun. Lidan aban dan, aba herederun kéiburi 90 íbirigu tidan sukursáli, aba harumugun tidan burí gabana to adügǘboun tau 20 gafu kada aban. Ariñagatu Anuario weiri lan eteingiruni le hasandirubei íbirigu ladüga aba lan hariñagun “buídutima lan hasandiragun houngua arumuga ñein sügǘ lau harumugun múarugu”.

Wéiriti meha hagundan íbirigu ha lidan dan ligía darí lun masaminarun hamá saragu lun hadügüni sun hayaraati lun hachülürün lidoun adamurini. Meferidirun hamagili íbirigu mesiganu lanarime heteingiradi ani guentó añaheinhaña yarafa houn aban míñunu apurichihatiña ñein. * Lidan irumu 1949, ariñagati aban ariñahani le ichugúbei tídangiñe sukursáli Méhiku: “Madügünti dan hénrenguti lun heferidiruni íbirigu ubebeni luagu heseriwidun lun Heowá. Lárigiñe kada adamurini, ayanuhatiña luagu, luagu saragu dan ani súnwandan hálügüdahan: Ídaame san ñein lan ábanya adamurini?”. Inarünimémegili dimurei le ariñawagúbei lidan ariñahani ligía. (Lídangiñe ariñahani le areidúañubei tidan sukursáli to lánina Lamidan Meriga).