LAU lídehan Bungiu íridati apostolu Pábulu nefu igaburi buíduburiti le líchugubei sífiri sandu (Gal. 5:22, 23). Sun igaburi le lidan aban subudiwati kei “igaburi le líchugubei sífiri” * ani lídangiñeti iseri igaburi le lunbei harufuduni kristiánugu (Kol. 3:10). Ítara kei tagindun aban tídibu wewe dan le góunigiwa tan buidu, arufuda hamuti giñe gürigia igaburi le líchugubei sífiri sandu dan le hígirun lun ladundehani sífiri habagari (Sal. 1:1-3).

Ínsiñeni furumiñeti igaburi le líridubei Pábulu. Wéiriti san lisudinin ínsiñeni? Ariñagati Pábulu anhein lan mínsiñehabu lubéi “ni kata” lan ligía (1 Ko. 13:2). Gama lumoun, katei san ínsiñenibei, ani ida luba hínsiñehabu wamá ani arufuda wameime sagü weyu?

Íbini hénrengu lan lariñawagún lau dimurei ka lan ínsiñenibei, ariñaga tumuti Bíbülia ida liña lan harufuduni gürigia igaburi le. Kei hénpulu, ariñagatu aban lan gürigia le hínsiñehabuti “gaguraasunti, areidati” ani gúndaati lau inarüni. Ariñagatu giñe “súfuri lumuti [lan] le hínsiñehabubei sun katei; afiñe lumuti sun katei; aguraba lumuti sun katei; ani awanda lumuti giñe sun katei”. Ani aba gürigia le hínsiñehabubei houn amu arufudati luagu berese lan hau gürigia tídangiñe sun lanigi ani úaraguati kei umadaü. Ánheinti aban gürigia le mínsiñehabuti gimugati, barüguati lungua, móuserunti buidu, luouguounrügüñein lasaminara, areidati igarihabu ani úati feruduna lan. Lubaragiñe warufuduni igaburi burí wuribati le, busentiwa warufudun ínsiñeni le adügübei lun mámarügü lan wawougua waritagua (1 Ko. 13:4-8).

“Ínsiñeni Bungiu” (1 Huan 4:8). Arufuda lumuti lidan sun le ladügübei. Arufudati óunwenbu ínsiñeni lau lóunahani Hesusu ubouagun lun lasufurirun ani hilá ligía wawagu. Abürühati apostolu Huan: “Arufuda lumuti Bungiu wínsiñe lun lau lóunahani Liráü le ábanrügüti ubouagun gabagari wamaamuga lídangiñe. Anihán ínsiñenibei: Mama luagu wagía lan hínsiñehabubei lun Bungiu, luagu ligía lan hínsiñehabubei woun, aba lóunahani Liráü le ábanrügüti lun lounwen, lun lébuname ferudunawa lan wafigoun” (1 Huan 4:9, 10). Seremei línsiñehabu Bungiu, ferudunawati wafigoun, gemenigitiwa ani gayaraati wawinwandun lun súnwandan.

Arufuda lumuti Hesusu ínsiñeni le lasandirubei hawagu gürigia lau lánharun liabin lun lagunfuliruni lugundan Bungiu. Afuranguagüdati Pábulu: “Ligía lugundanbei Bungiu, lun larumadagüdüniwa ligibugiñe lau lounwen Hesukrístu aban wéiyaasu lun sun dan luagu wafigoun” (Ebü. 10:9, 10). Ligía ínsiñeni wéiritimati le gayaraabei larufuduni aban gürigia. Ariñagati Hesusu: “Lueirin-agei ínsiñeni le gayaraabei gani lani gürigia, lun líchuguni libagari hawagu lumadagu” (Huan 15:13). Gayaraati san wáyeihani línsiñehabu Heowá luma Hesusu lau sun gafigoun wamá? Anha, gayaraati. Ariha waméi ida luba lan wáyeihani.

Ínchaha lumutiwa Pábulu lau dimurei le: “Kei lirahüñü hubéi Bungiu ha hínsiñetiña lun, houcha humá háyeihani. Hínsiñegua humá húniwagua ítara kei wínsiñedun lun Kristu, aba lederegeragun lungua wawagu” (Efe. 5:1, 2). Lun wasigirun lidan émeri lánina ínsiñeni, mosu warufuduni igaburi le lidan sun le wadügübei. Lau le wadügübei warufudubei wínsiñehabu, mámarügü lau dimurei. Abürühati Huan: “Nirahüñü, moun lumuti wayumárurügü lan wínsiñehabu; lunti aban lan ínsiñehabuni le arihúati lidan katei le wadügübei” (1 Huan 3:18). Kei hénpulu, línchahabadiwa ínsiñeni le wasandirubei luagu Heowá luma hawagu gürigia lun wapurichihani “uganu buiti le luáguti larúeihan Bungiu” (Mat. 24:14; Luk. 10:27). Arufudatiwa giñe ínsiñeni dan le gaguraasun wamá, dan le areida wamá ani gíchigadi wagía ferudun. Ligía tíchugunbalin Bíbülia adundehani le woun: “Ferudunagua humá húmagua ítara kei feruduna lanün Bungiu lidan Kristu” (Efe. 4:32).

Gama lumoun, siñati wayuridagun asaminara ínsiñehabuni lan higirún gürigia lun hadügüni le habusenrun. Kei hénpulu, añahein agübürigu ígiratiña lun hadügüni hasaanigu sun le habusenrun lúnrügü mayahuahan hamá. Ánheinti agübürigu ha hínsiñehabubaña houn hasaanigu deregüdati hagumadihan dan le lunti lan hadügüni. Ítara liña giñe Heowá, ínsiñeni Heowá, gama lumoun, “arufudahati [...] houn ha hínsiñebaña lun” (Ebü. 12:6). Ligíati, arufudúati ínsiñeni dan le lererehóun houn gürigia dan le megei hamani (Ari. 3:11, 12). Gama lumoun, lunti waritaguni gafigoun wamá súngubei ani mama lan sun dan wóuserun lau ínsiñeni. Ligíati, anihein katei le gayaraabei buídutima lan wadügüni. Ariha wamá ǘrüwa igaburi le ídanbei gayara lan wadügüni.

Furumiñe. Amuriaha wamá luma Bungiu lun líchuguni lani sífiri sandu woun. Ariñagati Hesusu ruti lan Heowá “[s]ífiri “[s]andu houn ha amuriahabalin” (Luk. 11:13). Ánhawa amuriaha sífiri sandu lidan furíei ani áfaagua wagíame lun wasigirun abagarida kei labusenruni sífiri, warufudatimaba ínsiñeni eibu dan (Gal. 5:16). Kéiburi wéiyaaña lidan afiñeni gayaraati hamuriahan sífiri sandu luma Heowá lun líderaguniña íchiga eweridihani lau ínsiñeni. Luagu amu oubaü, gayaraati giñe hafurieidun agübürigu lun líderaguniña lani Bungiu sífiri sandu lun hererehan houn hasaanigu lau ínsiñeni, mama lau anarimeni.

Libiaman. Samina wamá luagu ida liña lan larufudun Hesusu ínsiñeni íbini dan le louserún wuriba (1 Fe. 2:21, 23). Gayaraati líderaguniwa lani hénpulu dántima le lanabaguniwa somu gürigia o dan le ladügǘn somu marichaü woun. Lidan burí kesi le, buiti lun wálügüdagun woungua: “Kaba hamuga san ladüga Hesusu?”. Seriwiti álügüdahani le saragu tun aban íbiri gíritu Leigh, íderagua lumutu lun tasaminarun lubaragiñe tadügün furumiñeguarügü katei. Ariñagatu: “Luagu aban weyu, aba tóunahan aban nani paaná lidan wadagimanu aban gárada luéigiñe Internet houn amu wánigu paaná ayanuha wuriba nuagu luma luagu nuadigimari. Gáriti katei ligía nun saragu. Ábati nálügüdagun nungua: ‘Ida liña hamuga san lóunabun Hesusu?’. Lárigiñe nasaminarun luagun le lunbei hamuga ladügüni Hesusu, aba desidírü nan marihin nani katei ligía kei aban katei súdiniti. Dan lárigiñe, aba níchugun fe súfuri tan nani paaná aban lanarime sandi ani weiri lan tidiheri. Aba nasaminarun háfuga lan mama lan lau luriban saminaü tadügei. Íderagua lumutina nasaminarun luagun ínsiñeni le larufudubei Hesusu íbini dan le lasufuriruña lan lun nóuserun kei ligía ani lun narufudun ínsiñeni tun nani paaná lidan wadagimanu”. Anhein wáyeiha Hesusu, wóuseruba lau ínsiñeni súnwandan.

Lǘrüwan. Furendei wamá adüga sákürifisiu hawagu amu. Ligía ínsiñeni le arufudubaliña kristiánugu ha inarünitiña (Huan 13:34, 35). Ínchaha tumutiwa Bíbülia lun wáyeihani “ligaburi lasaminarun Kristu Hesusu”. Dan le lígirunbalin libagari sielu, ígira lumuti sun lúmati wawagu ani aranseti íbini lun lounwen (Fili. 2:5-8). Anhein wáyeiha  sífiri lánina sákürifisiu le larufudubei luma línsiñehabu, ítara luba wasaminan luma le wasandirubei kei ligía ani wíchugubei hemegeirun amu furumiñe lubaragiñe wemegeirun guánarügü. Ida liña san lahuudun woun warufudun ínsiñeni?

Dan le warufudun ínsiñeni, ibihatiwa saragu buiti. Ariha wamá biámarügü lídangiñe.

• ÍBIRIGU LIDAN SUN UBÓU. Kei le hínsiñegua wamá wámagua, subudi wamuti furumiñeguarügü lan íbirigu ha wabisidahan lidan somu damuriguaü, heresibirubadiwa lan lau ínsiñeni. Chóuruti aban lan abinirúni gayara lan wasandiruni hínsiñehabu wíbirigu lidan sun ubóu (1 Fe. 5:9). Hádanrügüñein lumutuniña Heowá gayara lan ladarirún aban ínsiñeni ítarati.

• DARANGILAÜ. Dan le gaguraasun wamá wabaruagua lau ínsiñeni, gayaraati wagundaarun lau “darangilaü le óundarubaliwa súngubei” (Efe. 4:2, 3). Sun wagía sandí wamuti darangilaü ligía lidan wadamuridagun luma lidan burí adamurini wéinamuti, aban katei le marihínwabei lidan ubóu fánreinguali le ídanbei wawinwanda (Sal. 119:165; Isa. 54:13). Dan le wouchun lun buidu lan wanaagun woungua hama ha híbiri, arufuda wamuti weiri lan hínsiñe woun ani gúndaagüda wamuti giñe Wáguchi le siélubei (Sal. 133:1-3; Mat. 5:9).

Ariñagati Pábulu: “Anhein ínsiñeni, awansegüda lumutiña [gürigia] lidan lubuidun igaburi” (1 Ko. 8:1). Ka mini lubéi dimurei burí le? Tidan furumiñetu gárada houn Korintuna kapítulu 13, afuranguagüda lumuti Pábulu le mini lubéi dimurei le. Áluaha lumuti gürigia le hínsiñehabubei le buídubei houn amu furumiñe (1 Ko. 10:24; 13:5). Luagu amu oubaü, kei le gaguraasun habéi gürigia ha hínsiñehabubaña, areidatiña ani gamadountiña, súdiniti ínsiñeni lun buidu lan lidin houn gürigia hama haduheñu ani ídehati giñe lun ñein lan úarani lidan damuriguaü (Kol. 3:14).

Úati ínsiñeni buídutimati kei le wasandirubei luagu Bungiu. Seremei ínsiñeni ligía, huduguatiña gürigia ha lídangiñetiña sun rasa luma iñeñein lun Heowá lidan úarani luma ugundani, ani seriwitiña lun lidan aban (Sof. 3:9, TNM). Áfaagua wamá lun warufuduni igaburi le sagü weyu.