Ámuñegueinarügüti labahüdagun Matéu luma Lúkasi luagu furumiñeti burí irumu lánina libagari Hesusu ladüga abürühatiña kada aban hádangiñe lidan amu igaburi.

Luágutima libagari Hosé labahüdagua Matéu. Abahüdaguati luagu ligaburi lóunabun dan le líchugunbei fe dageinañoun lan María, dan le lafuranguagüdünbalin aban ánheli lun Hosé lidan aban uénedü kaba lan asusereda luma ida liña lan meha lafalaruni adundehani le líchugubei ánheli ligía lun (Mat. 1:19-25). Afuranguagüdati giñe Matéu gaganbaditi lan meha Hosé dan le lariñagunbei aban ánheli lun lidan amu uénedü mosu lan meha lanurahan Ehiptun habu liduheñu. Abahüdaguati giñe ariñaga lan aban ánheli lun Hosé lidan luénedü lun lagiribudun Ísüraelin ani aba lagiribudun, ani desidírüti lawinwandun Nasarétü (Mat. 2:13, 14, 19-23). Fuati liri Hosé diisi wéiyaasu lidan furumiñeti bián Kapítulu tidan liliburun Matéu, ánheinti tiri María sísirügüñein wéiyaasu láfuachun.

Luagu amu oubaü, tuágutima María labürüha Lúkasi. Abahüdaguati ñüdün lan ánheli Gabüriéli bisidoun María ani ñüdün tan María bisidoun Isawéli ani ariñaga tuguya fiú dimurei lun talawahani Heowá (Luk. 1:26-56). Ariñaga lumuti giñe Lúkasi le lariñagubei Simeón tun María luagu le meha lunbei lasufuriruni Hesusu. Ani dan labahüdaguni le asuseredubei dan le meha 12 lubéi irumu lau Hesusu ani aba lidin ténpulurugu hama liduheñu, írida lumuti dimurei burí le tariñagubei María, mama le lariñagubei Hosé. Ariñagati giñe weiri lan lani sügǘ burí ligía efekütu tuagu (Luk. 2:19, 34, 35, 48, 51). Fuati tiri María disedü wéiyaasu lidan furumiñeti bián Kapítulu tidan liliburun Lúkasi, ánheinti liri Hosé sísirügüñein wéiyaasu láfuachun. Ligíati, ayanuhati Matéu luagu le lasaminarubei luma le ladügübei Hosé ánheinti Lúkasi ayanuhati luagu le tasaminarubei luma le tadügübei María.

Ámuñegueinarügütu giñe halísütan dan le hayanuhan hawagu ladügawagun Hosé hama tadügawagun María. Ayanuhati Matéu hawagu ladügawagun Hosé ani arihagüda lumuti Hosé lan meha lúguchibei Hesusu le anuriahabalin, ligía lun lubéi meha Hesusu yu lan leresibiruni alagan lúmagiñe urúei Dawidi. Ka uagu? Ladüga lídangiñeti lan ladügawagun urúei Dawidi Hosé luéigiñe Salomón le lisaani (Mat. 1:6, 16). Luagu amu oubaü ayanuhati Lúkasi hawagu tadügawagun María ani arihagüda lumuti Hesusu lan lunbei leresibiruni alagan keisi ladügawagun urúei Dawidi (Rom. 1:3). Ka uagu? Ladüga lídangiñetu lan meha ladügawagun urúei Dawidi María luéigiñe amu lisaani le gíribei Natán (Luk. 3:31). Gama lumoun, anhein María lubéi lisaaniboun Elí, ka uagu lariñaga Lúkasi lisaani lan meha Elí Hosé? Ladüga hírirügüñein meha wügüriña áfuacha tidan lísüta hánina adügawaguni. Ligíati, dan lariñagunbei Lúkasi luagu lisaani lan Elí Hosé layanuhaña meha luagu libarimu lan (Luk. 3:23).

Arufudahatu lísüta hawagutu adügawaguni to tídanboun liliburun Matéu luma Lúkasi Hesusu lan Mesíasi le füramasewabei. Subudiwati meha hádangiñe lan ladügawagun Dawidi liabin Hesusu, ligía siñá lubéi hariñagun fariséugu ni ha híbiri tábutigu ligilisi mítaran lan. Súdinigiru bián lísüta hánina adügawaguni to uguñe weyu ladüga derebugugüda lumuti wafiñen luagu lagunfuliruba lan Heowá lau sun le füramase lubéi.