1, 2. a) Ida liña wasubudiruni gayara lan wadaüragun lau iseri igaburi? b) Ka hagaburi gürigia ha adaüragubaña lau iseri igaburi wadarirubei lidan Kolosana 3:10-14?

FUATI dimurei “iseri igaburi” bián wéiyaasu tidan Traducción del Nuevo Mundo de las Santas Escrituras (Efe. 4:24; Kol. 3:10). Layanuhaña luagu aban igaburi “le ladügübei Bungiu kei ligaburi guánarügü”. Gayaraati san wadaüragun lau iseri igaburi ligía? Anha, ladüga lenege guánarügü Bungiu ladügawa. Ligía gayara lubéi wáyeihani lubuidun burí ligaburi (Agu. 1:26, 27; Efe. 5:1).

² Inarüni súngubei lan wagía galagante wamuti figóu hámagiñe Adán tuma Ewa, ani ligía wayumahanbei katei wuribati. Gániti giñe le geyegubei wau efekütu wawagu. Gama lumoun, lau ídemuei le líchugubei Heowá woun lau ínsiñeni, gayaraati gürigia wamá ha labusenrubaña. Lun busentima wamá wadügüni katei le, lidan arütíkulu le wakutihaba saragu igaburi le harufudubei gürigia ha adaüragubaña lau iseri igaburi le uágubei layanuha Pábulu tidan Bíbülia (aliiha huméi Kolosana 3:10-14). Warihibei giñe ida luba lan warufuduni lidan apurichihani.

3. Írida humá aban igaburi súdiniti le harufudubei ha daüguañabaña lau iseri igaburi.

³ Lárigiñe línchahaniwa Pábulu lun wadaüragun lau iseri igaburi, ariñagati súdini lan lun ua lan himei wamá aban gürigia luéi aban. Lidan Kolosana 3:11 ariñagati: “Mámaali katei lánina huríu humá o mama humá huríu, ni lánina heresibiruni seini luagu húgubu o meresibirun humani, ni lánina terencha humá, machülaaguntiña, idamuni o líbüretiña”. Moun lumuti lasaminarun ni aban hádangiñe lílana damuriguaü buídutima lan hawéi ha híbiri ladüga amu lan lirasan, lageira o ladüga risi lan. Ka uagu moun lumuti lubéi ladügüni? Ladüga sun kristiánugu inarünitiña ábanhaña úgubu, lidan amu dimurei, lídanñanu aban súngubei (Gal. 3:28).

4. a) Ida liña san lunti lan hóuseragun lubúeingu Bungiu hóuniwagua? b) Ka gayaraabei ladügün lun hénrengu lan ñein lan úarani hadan kristiánugu?

⁴ Dan le wadaüragun lau iseri igaburi, óusera wamutiña sun gürigia lau inebesei meberesenga ka lan harasanbei o anhein gudeme habéi o risi hamá (Rom. 2:11). Hénrenguti katei le lidan fiú fulasu ubouagu. Kéiburi lidan dan le sügühalibei, fánreingua hamutiña meha gumadimatiña Suruáfürikana gürigia según harasan. Anihein meha fulasu le ñein lubéi hawinwanda gürigia ha harutiña, anihein le ñein lubéi hawinwanda wuritiña luma amu fulasu ñein habéi mígisi. Añaheingua hiibe-agei Gefentiña awinwanda lidan fulasu burí ligía. Gama lumoun, busenti meha Sétanu le arihibei lau Hawadigimari Gefentiña luagu Heowá línchahaniña íbirigu lun hafalaruni adundehani le lídanbei 2 Korintuna 6:13, ñein lubéi lariñaga: “Hínsiñehabu humá”. Ligíati, lidan diisi-hati lidan irumu 2013 aba lagumeserun aban programa espechaliti lun hasubudiragun íbirigu houngua buidu. Ka meha san lisuunibei programa ligía?

5, 6. a) Ka adügǘbei lidan aban ageiraü lúntima ñein lan úarani hadan íbirigu? (Ariha humóun iyawaü burí to lídanboun lagumeseha arütíkulu). b) Ka resultóu ibihúbei?

⁵ Adügǘwati meha programa ligía lun gayara lan hásügürün íbirigu ha lídangiñetiña bián damuriguaü le lánina ámuñegueinarügü iñeñein o rasa dan hámagua luagu fiú samudi luma dimaasu. Apurichihatiña meha ani ñüdün hagía adamuridagua úara ani amisuraguatiña meha giñe houngua hábiñoun. Gíbeti meha damuriguaü ebeluruti lidoun programa ligía. Ibihatu meha sukursáli dimurei burí le buiti íbini hámagiñe gürigia ha mama Gefentiña. Kei hénpulu, ariñagati aban alidihati relihión: “Mama Gefenti au, gama lumoun, subudi numuti buidu lan laransehóun huádigimari ani anihein lan úarani hidan íbini lídangiñetün lan ámuñegueinarügü rasa”. Ka buiti lanügübei programa le houn íbirigu?

⁶ Furumiñe, hanufudetu meha aban íbiri gíritu Noma to ayanuhaboun iñeñein xhosa tamisurahaniña íbirigu ha lídangiñetiña damuriguaü inglési túbiñoun. Gama lumoun, lárigiñe tapurichihan hama ani ñüdün tuguya hábiñe, aba tariñagun: “Ítara haña kei wagía!”. Ligíati, dan le leresibirunbaliña tani damuriguaü íbirigu ha lídangiñetiña damuriguaü inglesi, aba tábougun ani aba tamisurahan fiú hádangiñe túbiñoun. Haganagua ha tamisurahabaña anihein meha aban wéiyaali lidan afiñeni haruti. Aba tariñagun: “Aba taweiridun nanigi luagu aba lan lañuurun tigibuagu aban gafu múarugu”. Aniheingua programa le. Ani seremei katei ligía, adügaaña íbirigu dandu wügüriña kei würiña iseri umadagu ani desidírühaña hasigirun asubudiraña íbirigu ha lídangiñetiña amu rasa luma échuni.

7. Ka uagu lunti lubéi wasigirun arufuda gudemehabu?

⁷ Lidan awanheingua lan awinwanda lidan  ubóu le lani Satanási, wasufuriramémeba ladüga lúan wadagimanu, lanarime burí sandi, éibaahouni, chagaguaü lánina liñawan dan, íweruhani luma amu burí turóbuli. Mégeitiwa wasandirun gudemehabu le inarüniti lun gayara lan wíderagun amu. Línchahabadiwa wagudemehabu lun areida wamá (Efe. 4:32). Líderagubadiwa iseri igaburi lun wáyeihani Bungiu luma lun wíchugun gurasu houn amu (2 Ko. 1:3, 4).

8. Kaba resultóu ánhawa arufuda gudemehabu luma areiduni houn sun lílana damuriguaü? Ru humá aban hénpulu.

⁸ Háfuga añahein lan íbirigu lidan wani damuriguaü ha ñübüintiña lídangiñe amu ageiraü o ha gudemetiña. Ida luba warufuduni houn areida wamá? Lau wadügün umadaguaü hama luma lau wíderaguniña arihei luagu gebegi hamá lidan damuriguaü (1 Ko. 12:22, 25). Ariha waméi likesin Dannykarl, le águyubei Filipinagiñe lun Hapóun. Mouserúnwati meha buidu lidan luadigimari kei houserún nadagimeintiña ha hapónna. Aban weyu, aba lidin lidan aban hadamuridagun gefentiña luagu Heowá. Haritaguati: “Hapónna meha hiibe-agei. Gama lumoun, resibi hamutina lau ínsiñeni, kamá hamuga lüha hasubudirunina”. Sigitiña íbirigu óuserei buidu, ani ligía íderagubalin lun ladügün umadaguaü luma Bungiu. Aba labadiseirun ani ábanhali wéiyaali lidan afiñeni guentó. Arihatiña ha híbiri wéiyaaña lidan afiñeni dandu lan ligía kei Jennifer, to lani weiriou, weiri lan hídehan lidan damuriguaü. Ariñagatiña: “Sensiyuti habagari bián prekursorugu ha ani rútiña aban hénpulu buiti luagu le mini lubéi láluahoun Larúeihan Bungiu furumiñe” (Luk. 12:31).

9, 10. Ka afayeiruahaü ibiha hamaalibei fiú íbirigu luagu harufudun gudemehabu lidan ministeriu?

⁹ Ruti apurichihani aban chansi buiti woun lun wadügüni “le buídubei houn súngubei” (Gal. 6:10). Gumeseeña saragu Gefentiña afurendeira amu iñeñein ladüga gudemehabu hamá houn gürigia ha ñǘbuinbaña lídangiñe amu ageiraü (1 Ko. 9:23). Barühali katei le saragu buiti. Anuhein aban prekursora Australiana gíritu Tifaany busentu meha tídehan lidan aban damuriguaü le ñein lubéi layanuhóua suajili lidan uburugu Brisbane. Íbini hénrengu lan meha tun tafurendeiruni iñeñein, sandítu ru lan ugundani lun tibagari. Ariñagatu: “Le busenti lawinwandun sügǘ buíduburiti lidan lapurichihan, lunti lidin eseriwida lidan aban damuriguaü le ñein lubéi layanuhóua amu iñeñein. Ítara liña kamá baweiyasuhaña lidan guánarügü uburugu le ñein lubéi bawinwanda. Ani gayaraati bagundaarun lau úarani le hádanbei íbirigu lidan sun ubóu”.

¹⁰ Ariha waméi giñe hakesin fiú iduheñu hapónna. Abahüdaguatu Sakiko, to hasaani: “Lidoun  burí irumu 1990, daritiwa meha saragu gürigia brasilina lidan apurichihani. Dan burí meha le waliihan bérusu tídangiñeti Bíbülia houn kéiburi Arufudúni 21:3, 4 o Sálumu 37:10, 11, 29 lidan iñeñein portugués, aganba hamutiwa meha ani anihein dan aban hayahun”. Gama lumoun, adügati hagudemehabu íbirigu ha lun hadügün somu katei. Ariñagatu Sakiko: “Dan le warihinbalin lueirin habusenrun hasubudiruni Heowá, aba desidírü wamá wafurendeirun portugués”. Dan lárigiñe, ídehatiña iduheñu ha lun ladügǘn aban damuriguaü lidan iñeñein portugués. Lau lásügürün burí irumu, íderaguaña saragu gürigia lun lubúeingu hamá Heowá. Ariñagatu Sakiko: “Mosu meha wáfaagun saragu lun wafurendeiruni iñeñein ligía, gama lumoun resibitiwa afayeiruahaü buiti. Wéiriti weteingiruni Heowá” (aliiha huméi Adügaü 10:34, 35).

11, 12. a) Ka lébunabei wadaüragun lau iseri igaburi? b) Kaba íderaguawa lun ǘnabugumeme wamá?

¹¹ Lunti wadaüragun lau iseri igaburi lun wíchugun inebesei lun Heowá, mama lun wibihin uéiriguni hámagiñe wügüriña. Haritagua waméi aba lan lafigouhan aban ánheli le úaraguati ladüga aba lan líñudun lanaagun lungua (konparárü huméi luma Esekiéli 28:17). Hénrengutimati woun móuserun wamá lau íñuguni ladüga gafigoun wamá. Ani íbini ítara, gayaraati warufudun ǘnabuguni. Ida?

¹² Mosu wasagarun dan sagü weyu lun waliihanu Bíbülia luma lun wasaminarun luagun le waliihabei (2 Lur. 17:18-20). Líderagubadiwa wasaminarun saragu luagun larufudahan Hesusu luma luagun lubuidun hénpulu lánina ǘnabuguni le líchugubei (Mat. 20:28). Wéiriti ǘnabugu lan darí lun lachibuni hagudi apostolugu (Huan 13:12-17). Mosu giñe wamuriahan luma Heowá súnwandan lun líchuguni lani sífiri sandu woun lun wáfaagun lun masandiragun wamá woungua wéirigu hawéi ha híbiri (Gal. 6:3, 4; Fili. 2:3).

13. Kaba afayeiruahaü wibiha anhein ǘnabugu wabéi?

¹³ (Aliiha huméi Ariñawagúni 22:4). Busenti Heowá lun ǘnabugu hamá sun lubúeingu. Anhein ǘnabugu wabéi, wibihiba saragu abinirúni. Kei hénpulu, wídehaba lun ñein lan úarani luma darangilaü lidan damuriguaü. Ani líchugubei giñe Heowá lareini woun. Ariñagati apostolu Féduru: “Lunti heseriwidagun súngubei hóunigua lau ǘnabuguni, lugundun tariñahare Lererun Bungiu: “Magundanti Bungiu hau ha barüguabaña houngua, gama lumoun íderagua lumutiña ha ǘnabugubaña” (1 Fe. 5:5).

14. Ka íchugubalin hénpulu le buídutimabei lánina darangilaü luma gaguraasuni?

¹⁴ Uguñe weyu, añahein gürigia saminatiña débili hamá gürigia ha darangilubaña ani gaguraasun hagía. Ani mítaranti. Lúmagiñe Heowá liabin lubuidun burí igaburi le, gürigia le gabafutimabei lidan sun ubóu. Ligía íchugubalin hénpulu le buídutimabei lánina darangilaü luma gaguraasuni (2 Fe. 3:9). Ariha wamuti lidan óunabagülei le líchugubei lun Abüraámü luma Lotu lau hídehan lani ánheligu (Agu. 18:22-33; 19:18-21). Ariha wamuti giñe lidan gaguraasun lan meha habá ísüraelina ha maganbadibaña lun luagu lóugiñe 1,500 irumu (Ese. 33:11).

15. Ka hénpulu líchugubei Hesusu woun?

¹⁵ Gaguraasunti meha Hesusu (Mat. 11:29). Gaguraasunti meha dan le hachararun lani disipulugu. Dan le ya lubéi ubouagu, awanda lumuti hachuraguni láganiñu ha lábutigu relihión ani ru hagía lidurun. Ani darangiluti meha giñe gaguraasun ligía darí lounwen. Dan le anihán lubéi asufurira lanarime gáriti luagu wagabu, aba lamuriahan luma Heowá lun feruduna lániña ha áfarubalin. Ariñagati: “Núguchi, feruduna baña ladüga ibidiñeti houn ka  lan hadügübei” (Luk. 23:34, TNM). Kei aubei warihei, darangiluti meha Hesusu ani gaguraasun ligía íbini laganagua saragu asufuriruni. Ma lubuidun hénpulu le líchugubei woun! (Aliiha huméi 1 Féduru 2:21-23).

16. Ida luba warufudun darangilaü luma gaguraasuni?

¹⁶ Ida luba san warufudun darangilaü luma gaguraasuni? Furumiñe lau feruduna wamaniña ha híbiri. Abürühati Pábulu houn kristiánugu: “Ferudunagua humá húmagua ítara kei feruduna lanün Bungiu lidan Kristu” (Efe. 4:32). Furanguti mosu lan darangilu wamá ani gaguraasun wagíame lun gaganbadi wamá lun gumadi le. Dan le wadügüni, ídehatiwa lun ñein lan úarani lidan damuriguaü.

17. Ka uagu súdini lubéi darangilaü luma gaguraasuni?

¹⁷ Ruti Heowá gumadi woun lun wóuserun lau darangilaü luma gaguraasuni. Mosu warufuduni igaburi burí le anhein busén wabéi wawinwandun lidan iseri ubóu (Mat. 5:5; Sant. 1:21). Le súdinitimabei, anhein lan warufuda igaburi burí le, wíchuguba lan inebesei lun Heowá ani wíderaguba amu gürigia lun gaganbadi hamá lun le tarufudahabei Bíbülia (Gal. 6:1; 2 Tim. 2:24, 25).

18. Ida liña úara lan ínsiñeni luma houserún sun gürigia buidu?

¹⁸ Sun igaburi le akutiha wamaalibei lidan arütíkulu le úarati luma ínsiñeni. Kei hénpulu, mosu meha lererehan disipulu Santiagu houn líbirigu ladüga buídutima lan hóuseruniña rísitiña sügǘ hau gudemetiña. Aba lafuranguagüdüni houn luagu múaran lan katei ligía luma lugumadin Bungiu le: “Hínsiñela gürigia bíledi bun kei bínsiñegua bungua”. Lárigiñe aba lariñagun: “Anhein mama lubéi aban lau hanügüniña sun gürigia, hadügüña figóu” (Sant. 2:8, 9). Anhein hínsiñe habéi gürigia wáledigu woun, móuserun wabaña wuriba ladüga maleskuelan hamá, ladüga amu lan harasan o ladüga gudeme hamá. Siñati wafamurun luagu hínsiñe hamá sun gürigia woun, mosu hínsiñehabu wamá tídangiñe sun wanigi.

19. Ka uagu súdini lubéi lun wadaüragun lau ínsiñeni?

¹⁹ Gürigia le hínsiñehabubei “gaguraasunti, areidati” ani “manaagun ligía lungua” (1 Ko. 13:4). Ligía megei wabéi gurasu, areiduni luma ǘnabuguni lun wasigirun anügei uganu luáguti Larúeihan Bungiu houn gürigia (Mat. 28:19). Íderagua lumutiwa giñe igaburi burí le lun buidu lan wanaagun woungua hama sun íbirigu lidan damuriguaü. Anhein warufuda ínsiñeni le sun wagía, laganwounduba úarani lidan damuriguaü ani híchuguba uéiriguni lun Heowá. Ani habusenruba giñe amu gürigia hafurendeiruni inarüni. Ligía lagumuchunbei tayanuhan Bíbülia luagu iseri igaburi lau dimurei burí le: “Lóugiñe sun katei, hínsiñehabu humá; ligía katei le íchugubalin sun katei lidan aban” (Kol. 3:14).

20. a) Ka burí álügüdahani lunbei wadügüni wóuniwagua, ani ka uagu? b) Ka katei memenihabei wanigi lun lasuseredun?

²⁰ Sun wagía lunti wálügüdagun woungua: “Ka amu katei gayaraabei nadügüni lun nagidaruni binadu igaburi nuáriua sunsuinagubei?”. Mosu wayumuragun lun Heowá lun líderaguniwa ani adüga wameime sun wayaraati lun wagidaruni saminaü luma burí igaburi le wawagubei le gayaraabei ladügün lun mawinwandun wamá lábugiñe Larúeihan Bungiu (Gal. 5:19-21). Lunti giñe wálügüdagun woungua: “Anaheingua san asansirei ligaburi nisaminan lun lagundaarun Heowá nau?”. Kei le gafigoungidiwa lubéi, mosu wasigirun áfaagua lun wasansirun luma lun wadaüragun lau iseri igaburi (Efe. 4:23, 24). Wéiribei lubuidun ibagari danme le mafigounhaña gürigia ani daüguañame súngubei lau iseri igaburi lun súnwandan!