WÉIRITI lubafu afiñeni. Kei hénpulu, lau sun busén lan Satanási lagadeiruni wamadagua luma Heowá, adügati afiñeni lun ‘wararamunu sun gimara durunguatu to lachüühaboun Mafia wawagun’ (Efe. 6:16). Lau lídehan wafiñen gayaraati wagagibudagun luma burí lanarime turobuli le ítarabei kei aban wübü. Ariñagati Hesusu houn lani disipulugu: “Ninarün hau luagu anhein lan ibiha hubéi afiñeni íbini ñǘraüraü lan kei aban tagu mosutása, hariñaguba lun wübü le: ‘Gidaba yáagiñe, beiba lidoun amu fulasu’, ábame lagidarun wübü ligía” (Mat. 17:20). Kei adüga lubéi afiñeni lun derebugu lan wamadagua luma Bungiu, buiti lun wakutihani álügüdahani burí le: Katei san afiñenibei? Ka igaburi arufudubalin afiñe wamá? Ida luba wadügün lun héretima lan wafiñen? Ani kaba uagu wíchigei wafiñen? (Rom. 4:3).

Úati buídurügü lan lariñagun gürigia afiñe lan anihein lan Bungiu o lasubudiruni inarüni lan le tarufudahabei Bíbülia, lugundun Bíbülia mémegua ariñaguboun íbini lan giñe máfianu afiñetiña luagu lira, adadagara hagía lau anufudei luéi (Sant. 2:19). Ligíati, katei san afiñenibei?

Dan le tariñaguni Bíbülia ka lan mini lubéi afiñeni, arufudatu bián katei. Furumiñe ariñagatu: “Afiñeni, achoururuni le gumuti luagu wabihibei lan le wagurabubei” (Ebü. 11:1a). Anhein afiñe wabéi, chouru wamuti inarüni lan sun le lariñagubei Heowá ani lagunfuliruba lan. Kei hénpulu, ariñaga lumuti Bungiu dimurei le houn ísüraelina: “Siñati magunfulirun lan daradu le nadügübei luma wéyuagu labu luma áriebu, lun lerederun láfuachun kada aban lidan lidaani. Ítarameme siñá lan magunfulirun lan daradu le buga nadügübei luma Dawidi” (Her. 33:20, 21). Belú haali san mafiñeni woun luagu aban dan lau wasaminarun máfuachunbei lan Weyu ani úabei lan larungounga ni guñoun? Le linarün katei, anhein afiñe wabéi ua lan lunti leredehani Ubóu le ñein lubéi wawinwanda libügürü lagararahan, agararaha ligía geyegu lau Weyu, ma giñe lunti wafiñerun lau ichouruni lagunfuliruba lan le füramase lubéi Bungiu le Adügübalin katei burí le? (Isa. 55:10, 11; Mat. 5:18).

Libiaman, Afiñeni, “wachoururuni le gumuti luagu anirein lan burí katei lau sun marihin wamani” (Ebü. 11:1b). Samina wamá luagu aban hénpulu. Samina wamá aban lan lálügüdüniwa aban irahü ka lan uagu chouru wabalin anihein lan garabali. Íbini marihin wamagili lan garabali, ménrengunti woun lun wadügün lun gunfuranda lani irahü lau ichouruni anihein lan garabali, kéiburi lau wawaragun, lau láfuhan o amu katei. Lárigiñe lachoururuni irahü katei le seremei wafuranguagüdüni lun, aba lagumeserun afiñera luagu aban katei le marihin lumuti. Ítara liña giñe afiñeni, aban achoururuni le gumuti (Rom. 1:20).

Kei le lídangiñe lan achoururuni liabin afiñeni, lun lafiñerun aban gürigia, furumiñe, mosu ‘lasubudiruni inarüni’ (1 Tim. 2:4). Gama lumoun úati buídurügü lan katei le. Abürühati apostolu Pábulu arufudúa lan afiñeni ‘lau wafiñerun tau sun wanigi’ (Rom. 10:10). Úati buídurügü lan láurügü wasubudiruni inarüni, súdiniti giñe lun gebegi lan woun. Ítara gayaraabei warufuduni afiñe wamá, lidan amu dimurei, wawinwandun según inarüni le wafurendeirubei  (Sant. 2:20). Dan le larufuduni gürigia tídangiñe sun lanigi mebegi lan inarüni lun, másiñati gayara lan lamahadun lun katei le achoururagüdübalin anihein lan somu katei, ani áluahati laricharaguagüdüni lafiñen o láluahan lébuna ladügüni le layumahabei ǘgürügü (2 Fe. 3:3, 4; Hud. 18). Ligía mama lubéi sun gürigia ha meha arihibalin lani Bungiu milaguru lidan tidaani Bíbülia lun hafiñeruba lan luagu (1 Lur. 14:11; Huan 12:37). Adügati lani Bungiu sífiri sandu lun ñein lan afiñeni dánrügü le hínsiñe lan inarüni lun gürigia iyereegu ligía iyeeni lun (Gal. 5:22, TNM; 2 Tesa. 2:10, 11).

Haganagua lubúeingu Bungiu ha arufudubaña aban afiñeni héreti lidan binadu dan, anihein urúei Dawidi hadan (Ebü. 11:32, 33). Gama lumoun siñati lariñawagún ligiaméme hawagu ha híbiri liduheñu. Kei hénpulu, arufudati Eliabü le líbugaña, lilouguan afiñeni dan le ladeinhanbei lun Dawidi ladüga busén lan Dawidi lasubudirun luagu anabaguni le ladügübei Goliadi (1 Sam. 17:26-28). Úati ni aban gürigia agüriahóuti lau afiñeni, ani mibihínti giñe hámagiñe agübürigu kei alagan. Ligíati afiñeni le meha luágubei Dawidi, ibiha lumuti lídangiñe lumadagu luma Bungiu.

Lidan Sálumu 27, arufuda lumuti Dawidi ka lan uagu here lubéi lafiñen (bérusu 1). Ráramaguati asaminara luagu ida liña lan meha libagari lidan dan le sügühalibei luma luagu le ladügübei Heowá houn láganiñu (bérusu 2 luma 3). Wéiriti meha tínsiñe lani Heowá sanduariu lun (bérusu 4) ani huduguati meha lun Heowá ñein úara hama amu ísüraelina (bérusu 6). Áluaha lumuti meha ladundehan Heowá súnwandan lidan furíei (bérusu 7 luma 8). Ani busenti meha giñe lun larufudahani Heowá lémeri lun (bérusu 11). Le lueirin lisudinin afiñeni lun darí lun lálügüdahan halíañein lan hamuga funa lun hamuga mafiñen lan (bérusu 13, TNM).

Gayaraati ítara lan wafiñen kei meha Dawidi, ánhawa áyeihei ligaburi lisaminan luma échuni le larufudubei según warihini lidan Sálumu 27. Kei le lídangiñe lan lasubudiruniwa inarüni liabin afiñeni, éibutima waliihanu Lererun Bungiu tuma wani agumeiraguagüdüni, ménrenguntimabei woun warufuduni igaburi lánina sífiri le (Sal. 1:2, 3). Dan le waturiahan, sagá wamá dan lun wararamagun asaminara, lugundun arufudatiwa eteingiruni dan le wararamagun asaminara. Dan le weiri lan eteingiruni le wasandirubei luagu Heowá, wéiritimabei warufudun afiñeni lau wáhuduragun lun lidan wadamuridagun luma lun wayanuhan luagu wemenigin houn amu (Ebü. 10:23-25). Arufudatiwa giñe afiñeni, dan le wafurieidun súnwandan mábürühanga warüna (Luk. 18:1-8). Ligíati, furíei wamá lun Heowá “sun dan” afiñeñu ‘lóunigirubadiwa lan le tímatimaati’ (1 Tesa. 5:17; 1 Fe. 5:7). Ínchaha lumutiwa afiñeni lun wadügün somu katei, ani adügati le wadügübei lun lederebugudun wafiñen (Sant. 2:22).

Guñoun le lubaragiñebei lounwen Hesusu ariñagati houn lani disipulugu: “Afiñe humá luagu Bungiu, afiñe huguyame nuagu” (Huan 14:1). Ligíati mosu lubéi wafiñerun luagu Hesusu, mámarügü luagu Heowá. Ida? Ariha wamá ǘrüwa igaburi.

Furumiñe, arihawa waméi lebegi asalbaruni kei aban idewesei le líchugubei Bungiu lun kada aban wádangiñe. Ariñagati apostolu Pábulu: “Ibagari le nabagaridubei lidan núgubu, nabagariduñein lau sun nafiñen luagu Liráü Bungiu le hínsiñehabubei nun, aba lederegeragun lungua lun lounwen nuagu” (Gal. 2:20). Dan le wafiñerun luagu Hesusu, chouru wamuti wounti lan lebegi esefuruni, ligía lan layusurubei Bungiu lun feruduna lani wafigoun, adüga lan lun hemenigiñu wamá lun wawinwandun lun súnwandan ani weiri lan giñe wínsiñe lun Bungiu (Rom. 8:32, 38, 39; Efe. 1:7). Ladügüba katei le lun wárügüdün erei luma lun mígiraguagüdün wamá woungua lun luriban saminaü (2 Tesa. 2:16, 17).

Libiaman, yarafa wamá lun Heowá lidan furíei seremei lídehan lani Hesusu sákürifisiu. Seremei lebegi esefuruni gayaraati wafurieidun lun Heowá afiñeñu wibihibei lan lugudemehabu, “íderagua láwame lau lareini lidan wemegeirun” (Ebü. 4:15, 16; 10:19-22). Ruti furíei erei woun lun mábürüha wamá lidoun óuchawaguni (Luk. 22:40).

Lǘrüwan, gaganbadi wamá lun Hesusu. Abürühati apostolu Huan: “Le afiñebei luagu Liráü Bungiu, gabagariti le magumuchaditi; ánheinti le máhabei lafiñerun luagu [o le maganbadibei lun] Liráü Bungiu, mabagaribei libe ibagari ligía; [...] lábürüharügüba ligañi Bungiu luagun” (Huan 3:36). Ariha waméi arufuda lani Huan menegegua lan afiñeni luma maganbadi. Ligíati, arufudatiwa afiñe wamá luagu Hesusu dan le gaganbadi wamá lun. Ani gaganbaditiwa lun dan le wafalaruni “lilurudun Kristu”, lidan amu dimurei, dan le gaganbadi wamá lun sun le larufudahabei luma lugumadin (Gál. 6:2). Gaganbaditiwa giñe lun lau wafalaruni ladundehan lúmagiñe “musu úaraguati ani gunfuranda ligía” (Mat. 24:45). Ánhawa gaganbadi lun lilurudun Hesusu, wibihubei erei le wemegeirubei lun wawandun lénrengunga lánina ibagari (Mat. 7:24, 25).

Luagu aban dan aban lariñagun aban wügüri lun Hesusu: “Afiñetina; íderagua bana lúntima laganwoundun nafiñen!” (Mar. 9:24). Afiñeti meha wügüri ligía, gama lumoun gabaroun lumuti gádanti ani aba lasubudiruni megei lan lanwoun lafiñen. Ítara kei ligía, sun wagía anihein dan megei wamá lanwoun wafiñen. Ani sun wagía gayaraati wederebudagüdüni wafiñen guentó. Kei aubei warihei, ibiha wamuti dan le waturiahanu Lererun Bungiu ráramagua wagía asaminara luagu le waturiahabei ani adügati katei le lun wéiritima lan weteingiruni Heowá. Derebugutimaabei wafiñen dan le wáhuduragun lun úara hama wíbirigu, wayanuhan luagu wemenigin houn amu ani furíei wagía súnwandan. Ánhawa ederebudagüdei wafiñen le harumabei lau wadügüni sun katei le, wibihubei abiniruni létima wéiritimabei: werederun lidan línsiñehabu Bungiu (Hud. 20, 21).