1. Ka hamuga hínsiñebei woun lun hadügüni waduheñu?

ARIÑAGATU aban íbiri gíritu Paulina: * “Lúmagiñe nafurendeiruni inarüni ayumahatina meha lun hawinwandun niduheñu úara numa lidan paraísu. Ligibuagu lira, busentina meha lun leseriwidun Wayne, le nani weiriei luma wasaani le ñǘraügilibei lun Heowá”. Anhein añahein lubéi hádangiñe waduheñu ibidiñegili Bungiu houn ani meseriwiduntiña lun, másiñati wasandiragun woungua kei Paulina.

2. Kaba burí álügüdahani wóunaba lidan arütíkulu le?

² Siñati wafosuruniña waduheñu lun hánharun lun inarüni. Lau sun lira gayaraati wíderaguniña lúntima haganbuni uganu tídangiñeti Bíbülia (2 Tim. 3:14, 15). Ka uagu mosu lubéi wapurichihan houn waduheñu? Ka uagu mosu lubéi gudemehabu wamá houn? Ka gayaraabei wadügüni lun línsiñedun Heowá houn kei línsiñe woun? Ani ida luba gayara lan híderaguniwa íbirigu lídangiñetiña damuriguaü?

3. Kei lariñaguni 2 Féduru 3:9, ka uagu mosu lubéi wapurichihan houn waduheñu?

³ Málühali Heowá agumucha lau ubóu le le lábugiñebei lubafu Satanási. Gürigiarügübaña ha lúntiñabaña ibagari le magumuchaditi asalbara (Adü. 13:48). Áfaaguatiwa saragu lun wapurichiha houn gürigia ha lídanbaña fulasu le ñein lubéi weredera, ligíati aguraba wabéi lun heseriwidun waduheñu lun Heowá. Mabusenrunti Wáguchi hínsiñehabuti le siélubei “lun leferidirun ni  aban hádangiñe; labusenrun lun hasakürihan sun gürigia” (aliiha huméi 2 Féduru 3:9).

4. Ka burí charati gayaraabei wadügüni dan le wapurichihan houn waduheñu?

⁴ Lunti waritaguni gayara lan wayanuhan luagu uganu lánina asalbaruni lidan aban igaburi buiti o lidan aban igaburi mabuidunti. Háfuga dan le wapurichiha lun aban gürigia le ibidiñeti woun adüga wamuti lidan aban lubuidun igaburi, ánheinti dan le wapurichiha houn waduheñu furanguyati wayanuhan houn.

5. Ka lunbei gabaroun wamani dan le wapurichihan houn waduheñu?

⁵ Dan le waritaguni furumiñetibei wéiyaasu wálugun wapurichihan houn waduheñu, másiñati asaküriha wamá ladüga ligaburi wadügüni ani saminatiwa gayara lan yebe hamuga wadügüni buidu. Ru lumuti apostolu Pábulu adundehani le houn kristiánugu: “Lunti gúndaawa lan lau hiyanun súnwandan, lunti giñe semé lan, lunti giñe hasubudiruni ida luba lan hóunabuniña gürigia” (Kol. 4:5, 6). Lunti gabaroun wamani dimurei le dan le wayanuhan hama waduheñu. Anhein madügün wamá ítara, gayaraati wadügün lun hadisedun waduheñu luéi inarüni, lubaragiñe hamuga wachawahaniña lun inarüni.

6, 7. Ru humá aban hénpulu le arufudubalin súdini lan lun larufudún gudemehabu houn úmarigu ha mama Gefentiña?

⁶ Warufudun gudemehabu. Ariñagatu Paulina to buga uáguboun wayanuhan: “Furumiñe, luágurügüñein meha katei lúmagiñeti Bungiu nabusenra nayanuhan luma nani weiriei. Mayanuhantiwa meha wámagua luagu burí katei le asuseredubei woun lidan wabagari”. Gama lumoun, murusunrügüñein meha lasubudirun Wayne tuagu Bíbülia ani úati meha gunfuranda lani le tafuranguagüdübei lani weiriou lun. Saminati meha luágurügüñein lan tani Paulina relihión tasaminara. Hanufudeti meha luéi  lídanñoun lan aban luwuyeri óundaruni le denchati ani heyeeduñoun lan.

⁷ Subudi tumuti Paulina liibe-agei lan dan le tásügürübei rábounweyu luma samudi luma dimaasu hámañoun lan íbirigu, dandu lidan adamuridaguni kei lidan apurichihani luma burí amu isebáhari. Abahüdahatu: “Anihein dan dan le burí lachülürün Wayne múnadoun úatiña ni aban, ábati lasandiragun lungua lábugua”. Gunfurandawati luagu áluga lan tuagu lani weiriou luma luagu lisaani. Ibidiñetiña meha gürigia ha úmabaña hóundaragua lun ani aba lasaminarun súdini hamá iseri tumadagu Paulina tun sügǘ lau. Aba lubeiti lasiadirunu lau lariñagun tun lígiraru lan. Ma lunti hamuga buga tarufudun gudemehabu, adián?

8. Según 1 Féduru 3:1, 2, ka katei unbei hetenira waduheñu?

⁸ Warufudun aban lubuidun igaburi. Liibe-agei dan ténitimatiña waduheñu lun le wadügübei sügǘ luéi le wariñagubei (aliiha huméi 1 Féduru 3:1, 2). Subudi tumuti Paulina katei le dan lárigiñe. Ariñagatu: “Subudi numuti meha hínsiñe wamá lun Wayne ani le lan lúgubu mabusenrun lan lun lígiragun. Gama lumoun adügati lasiadihan lun gunfuranda nani mosu lan nagumeserun adügei katei kei lariñaguni Heowá. Ligíati, lubaragiñe nerederun ayanuha saragu tuagu Bíbülia lun, mosu meha níchugun aban hénpulu buiti lau nigaburi”. Ábati mafosu taali lan tani weiriei lau tayanuhan lun tuagu Bíbülia, lubaragiñe lira gumesetu ayanuha luma luagu burí ida liña lan luéyuri. Aba larihini Wayne darangilu haali lan tóuserun lani weiriou ani buídutimahali lan lóuserun lisaani (Ari. 31:18, 27, 28). Dan le larihini Wayne ida liña lan tabuiduragüdüni Bíbülia habagari liduheñu, ábatima aranseñu lan lun laganbuni uganu le tídanbei (1 Ko. 7:12-14, 16).

9. Ka uagu moun lumuti lubéi lábürühan warüna?

 ⁹ Mígira wamá lun lábürüha warüna. Ru lumuti Heowá hénpulu woun. Ruti chansi houn gürigia saragu wéiyaasu lun hánharun lun uganu buiti luma lun habihin ibagari (Her. 44:4). Ariñagati apostolu Pábulu lun Timotéu lun merederun lan líderaguniña amu lun gayaraabei lan lasalbarun salba hagíame ha aganbubalin (1 Tim. 4:16). Kei hínsiñe habéi waduheñu woun, busentiwa lun hasubudiruni inarüni le tídanbei Bíbülia. Lidan tikesin Paulina, adügati ligaburi tayanuhan luma ligaburi tóuserun lun ñein lan ugundani hadan tiduheñu, lugundun teseriwiduña úara luma tani weiriei lun Heowá, ani biángubei hagía heseriwiduña kei prekursorugu ani Wayne leseriwiduña kei wéiyaali lidan afiñeni.

10. Ka uagu lunti lubéi gaguraasun wamá?

¹⁰ Gaguraasun wamá. Dan le wagumeserunbei afalarei lilurudun Bungiu, háfuga gürewei lan meha houn waduheñu lun héchudun luagu wafiñen luma ligaburi wóuserun. Liibe-agei dan, furumiñeti katei le harihibei lau mefeduhan wamaali lan burí fedu tánina relihión hama ani mádaragun wagía woungua lidoun polítika. Lidan lagumeseha, háfuga hagañidun wama (Mat. 10:35, 36). Gama lumoun moun lumuti wasaminarun maweiyasunbaña lan asansira. Anhein míderagun wamá gunfurandei wafiñen, le linarün katei aguseragüda wamaaña ani ariñagaadiwa hawagu madüna hamani ibagari magumuchaditi. Lun Hesusu líchigei Heowá wadagimanu lun laguseragüdüniña gürigia, mama woun (Huan 5:22). Ánhawa gaguraasun, lau lásügürün dan, másiñati hánharuba lan waduheñu lun haganbuni uganu buiti (ariha huméi rekuáduru “ Yusu waméi wani páhina lidan Internet”).

11-13. Ka wafurendeirubei lídangiñe ligaburi tóuseruniña Alice tagübürigu?

¹¹ Hínsiñehabu wamá ani mígiraguagüda wamá woungua (Ari. 15:2). Ariha waméi le asuseredubei tun Alice. Subudi tumuti inarüni dan le tawinwandubei dise hawéi tagübürigu, ha meha mafiñenbaña luagu Bungiu ani wéiriti meha gadan lániña katei lánina polítika. Gunfuranda tumuti meha mosu lan tayanuhan lau lóufudagun luagu sun katei buiti le tafurendeirubei. Ariñagatu: “Ánhabu agurabaha saragu lun babahüdahani houn biduheñu luagu iseri bafiñen luma bechun, wéiritimabei hagañidun buma”. Aba lubeiti tabürühan gárada houn tiduheñu le ñein lubéi tálügüdaña ka lan hasaminarubei luagu burí tema tídangiñeti Bíbülia le uágubei gayara lan hebereserun, kéiburi luáguti ínsiñeni (1 Ko. 13:1-13). Teinki tumutiña luagu hagüriahanun, hóunigirunün ani óunahatu meha giñe idewesei houn. Dan meha le tabisidahaniña, adüga tumuti sun tiyaraati lun tíderagunu túguchu lidan burí beresegu múnada. Furumiñe, magundantiña meha tagübürigu dan le tabahüdahabei houn luagu iseri tafiñen.

¹² Dan meha le hábiñeñoun lan tagübürigu, aliiha tumutu Bíbülia sagü weyu. Ariñagatu Alice adüga lan tadügüni katei le lun tarihini túguchu súdini lan tun Alice taliihóun Lererun Bungiu. Luéigiñe le aban oubaü, aba busén lan túguchi lafurendeirun somu katei tídangiñeti Bíbülia lun gunfuranda lani ka lan uagu tasansira lisaani luma lun ladarirun charati tidan Bíbülia. Ariñagatu Alice: “Rútina aban Bíbülia lun, abürüha nuguya aban tiraüraü gárada lun”. Ka asuseredubei? Madariti túguchi ni murusun charati tidan Bíbülia, lubaragiñe lira, aban taweiridun lanigi luagu le laliihabei.

¹³ Mosu hínsiñehabu wamá gama lumoun moun lumuti wígiraguagüdün woungua lun hadundehani waduheñu wasaminan íbini wásügürün lídangiñe óuchawaguni (1 Ko. 4:12b). Kei hénpulu, mosu meha tawanduni Alice tóuchagunun túguchu. Ariñagatu: “Dan le nabadiseirunbei, aba tariñagun núguchu nun aban lan isaani wuriba tigaburi nuguya”. Ka tadügübei Alice? Tuguya guánarügü ariñaguboun:  “Lubaragiñe nadügün lun mayanuhan wamá luagu iseri nani relihión, aba nariñagun houn lau inebesei nuguya lan busenbei lun gefén nan luagu Heowá ani masaminarun nan nasansiruni. Áfaaguatina lun nasubudiragüdüni tun hínsiñe tan nun saragu. Biángubei wagía aba wayahun ani aba naranserun aban éigini semeeti. Lúmagiñe dan ligía, aba tasubudiruni núguchu Bíbülia lan adügüboun lun aban nan gürigia to buitu”.

14. Ka uagu moun lumuti lubéi wígiraguagüdün woungua lun hasansiruni waduheñu ligaburi wasaminan?

¹⁴ Másiñati lásügürün saragu dan lubá gunfuranda hamani wagübürigu weiri lan lisudinin eseriwiduni lun Heowá woun. Kei hénpulu, dan le tanúadirubei Alice teseriwidun kei prekursora lubaragiñe taturiahani aturiahani le hanúadirubei tagübürigu tun, aba tayahun túguchu. Lau sun lira, madügünti katei le lun tasansiruni Alice tisaminan. Ariñagatu: “Ánhabu ígiraguagüda bungua lun bagundaragüdüniña biduheñu lidan somu katei, gayaraati hasigiruba lan adügüdara buagu lun badügün ámuya katei. Gama lumoun, ánhabu mígiraguagüdün bungua ani arufuda buguya ínsiñeni, gayaraati badügün lun haganbunibu fiu hádangiñe”. Anihán le asuseredubei tun. Guentó heseriwiduña tagübürigu kei prekursorugu ani leseriwiduña giñe túguchi kei wéiyaali lidan afiñeni.

15. Según lariñaguni Matéu 5:14-16 luma 1 Féduru 2:12, ida liña líderaguniña “buiti le hadügübei” íbirigu waduheñu?

¹⁵ Yusu lumuti Heowá “buiti le hadügübei” lubúeingu lun lachawahaniña gürigia luouguoun (aliiha huméi Matéu 5:14-16; 1 Féduru 2:12). Anhein mama lubéi gefenti luagu Heowá hani  weiriei, subuditiña san lílana damuriguaü lun? Agunbiraha tumutiña Paulina, to buga uáguboun wayanuha, íbirigu túbiñoun lun lasubudiruniña Wayne. Haritagua lágili ida liña lan líderaguni aban íbiri lun lagidaruni liyerehabun hawagu Gefentiña. Ariñagati: “Amuriahati aban weyu lidan luadigimari lun larihini tahurerún baali numa. Ítara liña níchugun fe aban hamá gürigia kei furumiñeguarügü”.

16. Ka uagu lunti lubéi wagunbirahaniñu waduheñu lidoun adamuridaguni?

¹⁶ Aban lubuidun igaburi lun wíderaguniña waduheñu, lau wagunbirahaniña lidoun wadamuridagun (1 Ko. 14:24, 25). Lidan furumiñeti adamuridaguni le ídanbei lidin Wayne, lidan Aritaguagülei, lugundun adügǘwati lárigiñe luadigimari ani maduraruti saragu oura. Ariñagati: “Úati gunfuranda nani sun le ariñawagúbei ñein, lau sun lira, haritagua nágili ida liña lan hóuserunina. Yarafatiña nun ru haméi háhabu nun lau ínsiñehabuni. Aba gunfuranda nani inarüniti lan hínsiñehabu”. Íderagua hamaaru meha aban feru maríeitiña Paulina saragu lau tisaani lidan burí damuriguaü luma lidan apurichihani. Ligíati dan le busén lubéi Wayne lun lasubudirun saragu katei luagu tafiñen Paulina, aba lariñagun lun wügüri maríeiti ligía lun líchugun aturiahani tídangiñeti Bíbülia lun.

17. Kaba uagu míchugun wamani duru, ani ka uagu moun lumuti lubéi wararamuni wíderaguniña waduheñu?

¹⁷ Agurabatiwa lun lachülürün weyu lun heseriwidun sun waduheñu lun Heowá. Gama lumoun, lunti giñe gabaroun wamani íbini lan wadügüni sun wayaraati lun wíderaguniña, mabusenrunbaña hafurendeiruni inarüni. Anhein asusereda katei le, míchiga waméi duru wawougua luagu le hanúadirubei. Le linarün katei, siñati wafosurun ni aban lun lánharun lun wafiñen. Lau sun lira, masaminara wamá masudinin lan harihiniwa eseriwida lun Heowá gúndaañu. Furíei wamá hawagu, ayanuha wamá houn luagu inarüni lau inebesei ani sigí wamá íderaguaña (Adü. 20:20). Afiñe wamá labinirubei lan Heowá wáfaagun. Ani anhein hanúadira waduheñu haganbuniwa, hasalbaruba.