HÍNSIÑETI hamuga san woun lun wibihin somu buligasion lidan damuriguaü le siñati wibihini guentó? Háfuga aban buligasion le lagunfulirubei aban íbiri o aban buligasion le meha ídanbei weseriwida luagu aban dan. Másiñati mibihin wamani le wayumahabei ladüga warumudiri, luriban wátuadi, maseinsuni o ladüga somu buligasion hadan waduheñu. O háfuga ladüga lan burí asansiruni le tídanbei óundaruni, aba wígiruni eseriwiduni le meha ídanbei weseriwida luagu saragu irumu. Meberesenga ka lan asuseredubei, háfuga genegeti woun mama lan wadügüñein sun le wabusenrubei lidan weseriwidun lun Heowá. Anhein ítara liña lubéi, kamaniti burí lun wasandirun murusun maguraasuni. Gama lumoun, ka gayaraabei wadügüni lun mígiraguagüdün wamá woungua lun maguraasuni, igañini o igarihabu? Kaba íderagua lun gúndaameme wamá?

Líderagubadiwa wakutihan luagu Huan le abadiseihabei. Ibihati lubúein Bungiu le aba lubuidun buligasion lánina eseriwiduni. Gama lumoun háfuga masaminarungubei lumuti katei le lunbei meha lasuseredun lun lidan libagari, kéiburi lásügürüba lan saragu dan dáüwañu sügǘ lau lerederun apurichiha. Íbini ítara meferidirun lumuti lugundan sun wínwanñu lan. Ka íderagubalin? Ani ida luba gúndaameme wamá íbini masuseredun lan katei kei wagurabuni?

Kéiburi lidan gádürü-hati, irumu 29 lidan lidaani Hesusu, gumeseti Huan aranseraña gürigia lubá lachülürün Mesíasi, ítara kei lariñaguni Heowá lun. Ariñagati meha: “Asaküriha humá, ladüga yarafaali larúeihan Bungiu!” (Mat. 3:2; Luk. 1:12-17). Ánhatiña saragu lun le lariñagubei Huan. Darí lun ñübuin hamá saragu gürigia lídangiñetiña fulasu díseti aganbei luganute ani asakürihatiña saragu gürigia badisei hagía. Ererehati giñe Huan lau ganigi houn lábutigu relihión ha biánguabaña igibu luagu le lunbei lasuseredun houn anhein masansirun hamá hagaburi (Mat. 3:5-12). Sügǘ le súdinitimabei lidan leseriwidun, susereti kéiburi lidan diisi-hati, irumu 29, dan le labadiseirunbei Hesusu. Lidan dan ligía, aba línchahaniña gürigia lun hafalaruni Hesusu, Mesíasi le füramasewabei (Huan 1:32-37).

Ladüga wadagimanu espechaliti le ladügübei Huan, aba lariñagun Hesusu luagu: “Ninarün hau, hadan sun gürigia, úagili ni aban wéiriguti luéi Huan le abadiseihabei” (Mat. 11:11). Chóuruti gebegi lan  meha lun Huan sun le ladügübei luagu Heowá ani gúndaati meha luagu abiniruni le leresibirubei. Ítara kei ligía, gúndaatiña giñe kristiánugu uguñe weyu ha eseriwidubaña lun Heowá tau sun hanigi luagu burí lubuidun abiniruni le heresibirubei. Ariha waméi le asuseredubei lun aban íbiri gíriti Terry, le barühalibei lóugiñe 50 irumu eseriwida lidan dan dayarüti úara tuma Sandra to lani weiriou. Ariñagati: “Ibihaadina saragu lubuidun buligasion. Seriwihadina kei prekursoru le adügübei 70 oura, seriwihadina betelirugu, seriwihadina kei prekursoru espechaliti luma kei óunigiruti sirkuitu luma distritu ani guentó anahánya eseriwida kei prekursoru espechaliti”. Adügati weresibiruni dasi burí le lun gunda wamá. Larufudahaba lani Huan hénpulu woun mama lan según dasi burí le weresibirubei adügübei lun gunda wamá ani mégeiwati lan áfaaguni lun wasigirun gúndaañu.

Aban katei le ídehabei lun meferidirun lani Huan lugundan, ladüga súnwandan lan lasandirun eteingiruni luagu lubuidun chansi le líchugubei Bungiu lun. Kei hénpulu, lárigiñebei labadiseirun Hesusu, aba míbeeña lan meha lani Huan disipulugu, ánheinti Hesusu aba aganwoundeina hamá lani disipulugu. Le hadiheri lani Huan disipulugu luagu katei le, aba hariñagun lun: “Ligira le meha uágubei badimureha woun, guentó labadiseihaña gürigia ani hafalaruñeinti sun gürigia” (Huan 3:26). Ábati lariñagun Huan houn: “Lidan aban maríei, adari taubei ladari. Leti lumada adari, le ñeinbei aganbei, wéiriti lugundan lau laganbuni ladimurehan. Ítara niña giñeti, dayarühali nugundan guentó” (Huan 3:29). Marihin lumuti meha Huan Hesusu kei aban gürigia le lunbei lagidaruni luadigimari luéi, masaminarunti giñe mebegi lan luadigimari ladüga súdinitima lan le ladügübei Hesusu. Lubaragiñe lira, sigiti arufuda ugundani lugundun gebegi lan meha lun aban lan “lumada adari”.

Íderagua lumuti igaburi le larufudubei Huan lun gunda lan íbini hénrengu lan buligasion le libihubei. Kei meha nasaréu lubéi lúmagiñe lagüriahóun, siñati meha latun diwéin (Luk. 1:15). Ariñagati Hesusu luagu ligaburi lanügüni Huan libagari: “Ladüga liabin Huan meigin liña buidu kei leigin furumiñeguarügü, matun”. Ánheinti Hesusu hama lani disipulugu mama meha nasaréugu hagía ani winwan hamuti habagari kei furumiñeguarügü gürigia (Mat. 11:18, 19). Lanwoun lira, íbini madügün lan Huan milaguru ni aban wéiyaasu, subudi lumuti meha gayara lan hadügüni lani Hesusu disipulugu, íbini ha meha lánigubaña disipulugu luagu aban dan (Mat. 10:1; Huan 10:41). Gama lumoun meteniti Huan lun katei le, beresegu liña meha lidan dasi le líchugubei Heowá lun.

Anhein giñe gebegi lubéi woun le wadügübei guentó lidan weseriwidun lun Heowá, meferidirun wabéi wagundan. Ariñagati Terry le buga uágubei wayanuha: “Ténitina lun kada aban buligasion le nibihibei”. Lau lasaminarun luagu libagari kei lubúein Bungiu le eseriwidubei lidan dan dayarüti, ariñagati: “Masakürihantina luagu ni kata. Saminarügütina luagu lubuidun lidin nun”.

Gúndaatimabadiwa ánhawa araramagua asaminara luagu le adügübei lun gebegi lan furumiñeguarügü dasi le weresibirubei: lau wídehan lidan weseriwidun lun Bungiu (1 Ko. 3:9). Ru wamá aban hénpulu. Ánhawa írichaguei ani góunigi wameime aba lubuidun binadu ílagu le meha hani waduheñu, lau lásügürün dan buídubei laríawagun ani maburuwadunbei. Ítarameme, ánhawa asaminara hulili luagu lubuidun chansi lau weseriwidun lun Bungiu, madügünbei saminaü mabuidunti lun weferidiruni wagundan. Ani magoubaguagüdün wabéi giñe weseriwidun luma le hadügübei amu, masaminarunbadiwa giñe lougua lan lebegi wani buligasion lumoun le resibi hamaalibei amu (Gal. 6:4).

Másiñati subudi lani Huan madurabei lan lapurichihan luagu saragu dan, gama lumoun háfuga masaminarungubei lumuti láfaruaba lan hilagubei (Huan 3:30). Lidan irumu 30, ruti urúei Erodesi lúrudu lun ladaürǘn Huan, kéiburi 6 hati lárigiñe labadiseirun Hesusu. Íbini ítara, adüga lumuti sun liyaraati lun lapurichihan (Mar. 6:17-20). Ka íderagubalin lun gunda lan íbini laganagua asansiruni burí le? Lau letenirun lun lumadagua luma Bungiu.

Dan le furisunrugu lubéi Huan, ibihati ñunsu luagu burí katei le ladügübei Hesusu lidan apurichihani (Mat. 11:2; Luk. 7:18). Chouru lumuti meha Huan, Hesusu lan Mesiasibei, íbini ítara, háfuga álügüdagua lan lungua anhein lagunfulirubei lubéi Hesusu sun le tariñagubei Bíbülia luagu Mesíasi. Kei  hénpulu, kei meha ábanbei lubéi urúei Hesusu, lagumeseruba funa san arúeiha lau lóufudagun? Ladügüba funa san lun láfuridun furisunrugugiñe? Wéiriti meha layumahan Huan lasubudiruni le lunbei ladügüni Hesusu, ábati lóunahan bián hádangiñe lani disipulugu álügüdaguei, “anhein ligía lubéi Krístubei le lunbei liabin, o anhein lan hagurabahaba lubéi amu” (Luk. 7:19). Dan le hagiribudunbei chóuruti aganba lani Huan le hariñagubei luagu milaguru le ladügübei Hesusu luagu lareidaguagüdüniña gürigia luma óunabagülei le lóunahabei Hesusu ariñaga lun: “Luagu arihaña lan marihintiña, éibugaaña lan méibuguntiña, areidaguaaña lan láutiña lépüra, aganbaaña lan ha maganbunñáhabaña, águyuguaaña lan hilaaña, luma luagu lichugún uganu luáguti asalbaruni houn gudemetiña” (Luk. 7:20-22).

Chóuruti adüga lan ñunsu le lun lárügüdün Huan erei. Arufudati meha le, lagunfuliruñein lan Hesusu profesía le ayanuhabei luagu Mesíasi. Lau sun meha masaga lubéi lan Hesusu Huan furisurungungiñe, subuditi meha lun Huan mabulieidúa lan le ladügübei. Meberesenga ka lan meha gádanbalin, gébunati meha lun gunda lan.

Ánhawa óusera kei Huan ani teni wagíame lun katei lúmagiñeti Bungiu, wawanduba lau ugundani luma lau gurasu (Kol. 1:9-11). Líderagubadiwa waliihanu Bíbülia luma wararamagun asaminara lun wibihini katei le, lugundun haritaguagüda tumutiwa mabulieidun lubéi lan Bungiu le wadügübei lidan weseriwidun lun (1 Ko. 15:58). Ariñagatu Sandra to buga uáguboun wayanuha: “Íderagua láadina naliihan aban kapítulu tídangiñeti Bíbülia sagü weyu lúntima nayarafadun lun Heowá luma lun nadügüni lugundan lubaragiñe nadiheridun luagu gádantina”. Gayaraati giñe warihini ariñahani le ichugúbei libügürü sun le adügǘbei luagu Larúeihan Bungiu. Ítara, metenirunbadiwa saragu lun gádantiwa, lubaragiñe lira, weteniruba lun le ibiha láalibei Heowá darí guentó. Ariñagatu Sandra: “Seremei lun programa ságüti hati JW Broadcasting, sandiguatiwa woungua lídanñadiwa lan aban tuma lóundarun Heowá ani kipu wamuti wagundan lidan weseriwidun”.

Gúnfuliti Huan le abadiseihabei lau murusun dan le laubei apurichiha “lau lubafu luma lani profeta Elíasi sífiri”. Ani “aban meha wügüri profeta Elíasi kei wagía” (Luk. 1:17; Sant. 5:17). Anhein gateingiradi wabéi ani teni wagía lun katei lúmagiñeti Bungiu ítara kei ladüga Huan, wasigiruba lau ugundani lidan eseriwiduni lánina Larúeihan Bungiu, meberesenga ka lan gádanbaliwa.