1. Ka lunbei hadügüni kristiánugu lun wachülürün lumoun lébeha éibaaguni lánina ibagari?

WAGÍA kristiánugu lídanñadiwa aban éibaaguni ani ibagari afayeirúahabei. Íbini anhein málügidiwa lubéi eseriwida lun Heowá o barühadiwa lan saragu irumu, mosu wasigirun éibaagua darí wachülürün lumoun lébeha. Gayaraati líderaguniwa adundehani le líchugubei apostolu Pábulu houn kristiánugu ha Filipubaña lun wachülürün lumoun lébeha éibaaguni. Añahein hádangiñe lílana damuriguaü le lánina furumiñeti sígulu barühaña meha saragu irumu eseriwida lun Heowá dan le heresibirunbarun ligaradan Pábulu. Íbini buidu lan meha hadügüni, haritaguagüda lumutiña Pábulu lunti lan hasigirun lidan éibaaguni mabuchadunga hawagu. Busenti meha Pábulu lun háyeihani lun hasigirun habaruaguóun darí hachülürün “lumoun lébeha éibaaguni” (Fili. 3:14).

2. Ka uagu buidu lubéi adundehani le líchugubei Pábulu houn Filipuna?

² Buiti meha adundehani le líchugubei Pábulu. Lugundun éibaahouatiña meha lílana damuriguaü le Filipubei lúmagiñe lagumeserun. Sun le gumeseti lidan irumu 50 dan le lachülürünbei Pábulu luma Sílasi lidan uburugu ligía lárigiñe heresibiruni agunbirahani le ladügübei Bungiu houn lun houdin Masedónioun (Adü. 16:9). Ñein hadarira aban würi to aganbubaliña gíritu Lidia. Aba ladaarunu Heowá tanigi lun taganbuni uganu buiti (Adü. 16:14). Murusun dan lárigiñe, aba tabadiseirun hau sun tílana tuban. Gama lumoun, merederunti Mafia lau lúhabu cháguñu. Aba haduruguduni fiu wügüriña Pábulu luma Sílasi hagibugiñoun gumadimatiña. Aba híchugun lidurun luagu anihán lan achagaraguágüdaña gürigia. Adügati katei le lun hagayuahan luagu Pábulu luma luagu Sílasi, aba hadaürüniña, ñéingiñe aba hamuriahan hama lun háfuridun uburugugiñe (Adü. 16:16-40). Ábürühati san harüna? Uá. Anti harüna lílana iseri damuriguaü? Rútiña aban hénpulu buiti lugundun awandatiña giñe. Chóuruti ru lan hénpulu le líchugubei Pábulu luma Sílasi gurasu houn.

3. Ka lasubudirubei Pábulu, ani kaba álügüdahani wakutiha?

 ³ Aranseñu liña meha Pábulu lun mábürüha lan larüna (2 Ko. 4:16). Gama lumoun, subudi lumuti meha lun lan lachülürün lumoun lébeha éibaaguni moun lumuti lan larihin lidoun amu fulasu. Ka wafurendeirubei lúmagiñe? Ka gürigia lídangiñetiña wadaani ha arufudubaña afiñeni arufudubalin woun gayara lan wawandun lénrengunga? Ani ida liña líderaguniwa wemenigin lubá ámuñegü lúntima aranseñu wamá lun mábürüha lan warüna?

4. Ka katei ladügübei Pábulu meberesenga le gádanbalin?

⁴ Ariha waméi ka burí lan sügǘ ídanbei ladariragua Pábulu lungua dan le labürühanbei houn filipuna. Ladaürǘña meha Pábulu tidan muna to láhayahaboun Roma, ligíati, siñati meha láfuridun apurichiha. Íbini ítara, rédeiti beresegu apurichiha houn gürigia ha abisidahabalin ani abürühati giñe gárada houn lílana damuriguaü ha erederubaña dise. Uguñe weyu, saragu kristiánugu ha siñabei háfuridun hábiñegiñe sagatiña dan lun hapurichiha houn gürigia ha abisidahabaliña hábiñe. Abürühatiña giñe tubuidun burí gárada houn gürigia ha siñabei habisidahaniña.

5. Ítara kei lariñawagún lidan Filipuna 3:12-14, ka íderagubalin Pábulu lun lachülürün darí lumoun lébeha?

⁵ Mígiraguagüdünti Pábulu lungua lun ladügün le ibiha láalibei ni charati le meha ladügübei lun ladireiruni larihin. Ariñagati adüga lan ‘labulieiduni sun le erederubei árigi luma láfaagun lun lárügüdüni le ligibugiñebei lun lachülürün lumoun lébeha éibaaguni’ (aliiha huméi Filipuna 3:12-14). Ka meha katei gayaraabei hamuga ladügün lun meteni lan Pábulu lun le ladügübei? Furumiñeti, lubuidun meha dan lun kei huríu. Gama lumoun barǘ lumuti Pábulu sun katei ligía “kei ife” (Fili. 3:3-8). Libiaman, lasandiragun lungua wuriba luagu meha léibaahaniña kristiánugu. Lau sun lira, mígirunti lun ladügün burí katei le lun lábürühan larüna. Le lǘrüwan, le ladügübei lidan leseriwidun kei kristiánu. Ibihati meha lun buidu lan lidin lun lau sun meha daüwa lan, búleseiwa ligía, chamugua hagía dübü luagu, bulú tuguya ugunei lau, redei ligía méiginga luma madaüragunga. Lau sun lira, masaminarungubeiti gíbeyaali lan katei ladügün lidan leseriwidun lun Bungiu (2 Ko. 11:23-27). Lau sun le libihubei luma le lasufurirubei, subudi lumuti meha mosu lan lasigirun lubaruaguóun. Gayaraati giñe wadügüni ligiaméme.

6. Ka burí katei le ‘erederubei árigi’ másiñati lunti lan wabulieiduni?

⁶ Ítara kei Pábulu, ida luba gayara lan ‘wabulieiduni katei burí le erederubei árigi’? Háfuga añahein lan wádangiñe mosu háfaagun lun hígiruni hasaminarun wuriba hawouguoun luagu figóu le meha hadügübei luagu aban dan. Anhein ítara liña lubéi, ka uagu masagarun wabéi dan lun wakutihan luagu lebegi asalbaruni? Líderagubadiwa waturiahan, wararamagun asaminara luma wafurieidun luagu katei le lun masaminarun wamá wuriba wawouguoun. Ani másiñati líderagubadiwa lan lun masigirun wamá íchiga duru wawougua luagu figóu le feruduna láalibei Heowá. Ariha wamá ábaya katei le wafurendeirubei lúmagiñe Pábulu. Añahein Gefentiña ígira hamaali hawadigimari le fáyeiti lun haganwoundagüdüni heseriwidun lun Heowá. Anhein ligía lubéi wadügübei, wabulieiduni katei burí le erederubei árigi, mini lan mayumahan wamá wibihiniya katei le ígira wamaalibei (1 Lur. 11:4-6; Apu. 7:10). Lidan katei le ‘erederubei árigi’ gayaraati anihein lan le ibiha wamaalibei lidan weseriwidun lun Heowá o óuchawaguni le úmabei wagagibudagua. Inarüni adüga lan waritaguni ida liña lan labiniruni luma ida liña lan líderaguniwa Wáguchi Heowá lidan burí irumu le sügühalibei lúntima wayarafadun lun. Gama lumoun, mabusenruntiwa lun wagufurumadun ni lun wasaminarun buídürügaali lan le wadügübei lidan weseriwidun lun Heowá (1 Ko. 15:58).

7. Según 1 Korintuna 9:24-27 ka mégeiwabei lun ladügǘn lun gayara lan lachülürǘn lidoun lébeha éibaaguni? Ru humá aban hénpulu.

 ⁷ Gunfuranda lumuti meha Pábulu dimurei lúmagiñeti Hesusu le: “houcha humá lun gayaraabei lan hebelurun” (Luk. 13:23, 24). Subudi lumuti meha apostolu mosu lan giñe láfaagun darí lumoun lagumuhóun, ítara kei Kristu. Ligía lagoubaguagüdün bali habagari kristiánugu luma éibaaguni (aliiha huméi 1 Korintuna 9:24-27). Ha éibaagubaña le habusenrunbei hachülürün darí lagumuhóun ani áfaaguatiña lun ua lan ni kata eberesehatiña. Kei hamuga lidan burí éibaaguni le adügǘbei lidan aban üma lidan aban uburugu másiñati hásügürüba lan éibaagutiña tigibugiñe somu bísinisi o ligibugiñe amu katei le gayaraabei ladügün lun hadigiragun luagun. Ma inarüni mararamunbei lan ni aban éibaaguti lun larihini ka burí lan alugurahóubei tidan budigü? Chóuruti madügün lubéi lan, lugundun le labusenrunbei lun lagañeirun. Ítarameme waña lidan éibaaguni lánina ibagari, mosu wadügüni sun wayaraati lun madigirun wamani warihin lidoun amu fulasu. Ánhawa íchigei warihin lun wachülürün lumoun lébeha éibaaguni ani áfaagua wagía saragu, ítara kei ladügüni Pábulu, wibihibei afayeiruahaü.

8. Kaba burí ǘrüwa lénrengunga wakutiha?

⁸ Guentó, akutiha wamá ǘrüwa lénrengunga le gayaraabei ladügün lun hámaru lan wéibaagun. Le furumiñeti, magunfulirun lan lau lóufudagun le wayumahabei, libiaman, leferidirún erei ladüga aweiyaduni ani le lǘrüwan, óuchawaguni le aduraruti saragu dan. Líderagubadiwa warihini le adüga hamaalibei amu lubúeingu Bungiu lun wasubudiruni le gayaraabei wadügüni (Fili. 3:17).

9. Ka gayaraabei lasuseredun woun ladüga magunfulirun lan lau lóufudagun le wayumahabei?

⁹ Magunfulirun lan lau lóufudagun le wayumahabei. Maribanti wayumahan lun warihini lagunfulirun lubuidun burí lani Bungiu füramasei. Kéiburi dan le lariñagunbei profeta Abakúku ayumaha lan lun lagumuchun wuribani le hudaabei, ariñagati Heowá lun lagurabahan ani lachülürüba lan lidan dan (Abak. 2:3). Gama lumoun gayaraati eferidireina wamani wemenigin  dan le warihin magunfulirungili lan le wayumahabei. Gayaraati giñe ladügün lun weferidiruni waguraasun (Ari. 13:12). Anihán le asuseredubei lidan lagumeseha sígulu wein. Lidan meha dan ligía agurabatiña meha saragu kristiánugu anuadirúaaña houdin sielun lidan irumu 1914. Ka hadügübei íbirigu ha úaraguabaña dan le magunfulirun lubéi le hagurabubei?

10. Ka hadügübei aban feru maríeitiña úaraguatiña dan le magunfulirun lubéi le hagurabubei habihin?

¹⁰ Ariha waméi le asuseredubei lun Royal tuma Pearl Spatz, bián íbirigu úaraguatiña ha ásügürübaña lídangiñe sügǘ le. Badiseiti íbiri Spatz lidan irumu 1908, dan le 20 lubéi irumu lau. Chouru laali meha málühali lan eresibirei lafayeiruaha. Dan le lamuriahabei tuma íbiri Pearl lidan irumu 1911 lun tamarieidun luma ariñagati tun: “Subudi baali kaba lan asusereda lidan irumu 1914 adián? Anhein wamarieida lubéi, mosu wamarieidun lau lóufudagun”. Ígira hamuti san feru maríeitiña ha héibaagun lidan éibaaguni lánina ibagari lau moudin hamá sielun lidan irumu 1914? Uá, ladüga lun lan meha heseriwidun lun Heowá lau úaraguni hetenira, mama lun habihin afayeiruahaü. Aranseñu haña meha lun hasigirun éibaagua lau awanduni. Ani ligía hadügübei. Seriwitiña lun Heowá lau ubebeni luma úaraguni luagu saragu irumu, darí lagumuchun habagari ya ubouagu. Chóuruti ayumaha wamá warihini lagunfulirun larumadahani Heowá liri, luma liricha lun larúeihan luma giñe lagunfuliruni sun le füramasei lubéi. Gayaraati wachoururuni lagunfuliruba lan sun katei le lidan dan le lanúadirubei Heowá. Darí guentó, sigí wamá beresegu lidan weseriwidun lun Bungiu ani maweiyasun wamá ígira lun lábürühan warüna o lun lalouguadun wéibaagun ladügarügü warihin darasa lan lagunfulirun le wayumahabei.

11, 12. Ka uagu gayara lubéi wasigirun wabaruaguóun lau sun méreediwa lan saragu? Ru humá aban hénpulu.

¹¹ Leferidirun erei ladüga aweiyaduni.  Aban éibaaguti mégeiti lun here lan. Ánheinti wagía memegeiruntiwa lun here wamá kei aban éibaaguti lun gayaraabei lan wawanserun lidan wéibaagun keisi kristiánugu. Le lúgubu, saragu íbirigu ha méreeña saragu, añahagua ederebudagüdei hamadagua luma Heowá (2 Ko. 4:16). Ariha waméi lani íbiri Arthur Secord * hénpulu. Luagu aban weyu, dan le barühali 55 irumu eseriwida Betelirugu ani 88 irumu lau, aba taríaguni aban anosuhatu to óunigirubalin ani aba tariñagun lun lau ínsiñehabuni: “Íbiri Secord, seriwihali úgubu le lun Heowá saragu”. Gama lumoun mama luagu le adüga láalibei íbiri lidan leseriwidun lun Heowá letenira. Ábati larihin tuagun, hayeina ligía ani aba lariñagun tun: “Anha, binarün, lau sun lira, mama le adüga wamaalibei súdinibei, le súdinitimabei le wadügübei lúmagiñe guentó”.

¹² Háfuga seriwi haadiwa lan lun Heowá luagu saragu irumu ani guentó siñaali wadügün saragu  lidan weseriwidun kei meha. Anhein ítara liña lubéi, mábürüha lan warüna. Gayaraati wachoururuni gebegi lan lun Heowá sun le adüga wamaalibei luagu aban dan (Ebü. 6:10). Haritagua waméi mama lan según le wadügübei lidan weseriwidun lun Heowá arufudubalin anhein hínsiñe lubéi woun. Lubaragiñe lira, arufuda wamuti hínsiñe lan woun lau warufudun aban lubuidun igaburi luma lau wadügüni sun wayaraati lidan weseriwidun lun (Kol. 3:23). Gunfuranda lumuti gádantiwa ani mamuriahanti wama lóugiñe le gayara wabéi íchiga (Mar. 12:43, 44).

13. Ka asuseredubei lun Anatoly tuma Lidiya, ani ida liña líderaguniwa le hásügürübei lun wasigirun wabaruaguóun íbini wasufurirun lénrengunga saragu dan?

¹³ Óuchawaguni le aduraruti saragu dan. Añahein lubúeingu Bungiu ha awandaaña óuchawaguni luma éibaahouni luagu saragu irumu. Ariha waméi le asuseredubei lun Anatoly Melnik, * lídangiñeti ageiraü Molüdáwia. Duusu meha irumu lau dan le hárügüdünbalin súdaragu lúguchi ani daü haméi, óunaha haméi Siberioun dise hawéi liduheñu kéiburi lóugiñe 7.000 kilómeturu (4.000 maili). Irumu lárigiñe aban giñe hóunahani Anatoly, dandu lúguchu kei lárugutinu lun siberioun. Dan lárigiñe, aba gayaraahali lan habasihan lidoun adamuridaguni, gama lumoun lun meha hachülürün mosu meha héibugun 30 kilómeturu (20 maili) taganagua niewe ani lidan lanarime lidiliga. Fiu dan lárigiñe dáüwati íbiri Melnik luagu ǘrüwa irumu, dise tuéi Lidiya to lani weiriou luma tuéi hasaani ani aban meha irumu tau. Lau sun meha gagibugua lan dandu Anatoly hama liduheñu luma lénrengunga luagu saragu irumu, sigitiña habaruaguóun. Guentó 82 irumu lau Anatoly ani ligía aban hádangiñe lílana Sétanu le Arihibei tau Sukursáli to Lamidanboun Asia. Ítara kei Anatoly tuma Lidiya, adüga waméi sun wayaraati lidan weseriwidun lun Heowá ani sigí wamá awanda ítara kei wadügüni lidan burí dan le sügühalibei (Gal. 6:9).

14. Ka katei lasubudirubei Pábulu luagu le lunbei ladügüni lun libihini lafayeiruaha?

¹⁴ Chouru lumuti meha Pábulu lachülürüba lan lumoun lébeha éibaaguni. Kei meha aban lubéi kristiánu anuadirúaali, agurabati meha libihini lafayeiruaha lun lawinwandun sielu. Gama lumoun, subuditi meha lun mosu lan lasigirun lubaruaguóun lun gayaraabei lan libihini (Fili. 3:14). Lun líderaguniña kristiánugu filipuna lun madireirun hamani harihin aba layanuhan houn luagu aban lubuidun hénpulu.

15. Lun líchugun Pábulu gurasu houn filipuna lun hasigirun habaruaguóun, ida liña layanuhan luagu gürigia le adügagubei lungua rómaname?

¹⁵ Haritaguagüda lumutiña Pábulu filipuna  luagu siéluba lan hawinwanda (Fili. 3:20). Ka meha uagu súdini lubéi lun mabulieidun hamani? Lidan meha dan ligía gíbeti meha buiti le libihubei aban gürigia lau rómana * lan. Gama lumoun wéiritimabei meha buiti le lunbei habihini kristiánugu anuadirúaaña, lugundun siéluba lan hawinwanda. Ánheinti rómana lan aban gürigia masudininti saragu. Ligía lariñagunbalin Pábulu dimurei le houn filipuna lun líchugun gurasu houn: “Houcha humá lun úaragua lan ligaburi habagaridun luma larufudahan Kristu” (Fili. 1:27). Uguñe weyu rútiña kristiánugu anuadirúaaña aban lubuidun hénpulu le lunti hayeihóun, lugundun sigitiña habaruaguóun darime habihin ibagari magumuchaditi sielu.

16. Según Filipuna 4:6, 7, ka lunbei wasigirun adüga íbini anhein hemenigi wabéi wawinwandun sielu o ya ubouagu?

¹⁶ Mosu wasigirun wabaruaguóun lun gayaraabei lan wibihini wafayeiruaha, wawinwandun lan yebe sielu lun súnwandan o wawinwandun lidan aban paraísu ubouagu. Meberesenga gádantiwa, magiribuda wamá ariha luagu katei le wígirubei árigi, mígirun wagíame lun ñein lan somu katei eberesehei weseriwidun lun Heowá (Fili. 3:16). Háfuga magunfulirun lan le wayumahabei lau lóufudagun o méreediwa lan saragu. Másiñati giñe awandaadiwa lan lénrengunga luma óuchawaguni luagu saragu irumu. Meberesenga le asusereduti woun, moun lumuti wadiheridun luagu ni kata, ariñagarügü waméi katei lun Bungiu lidan wafurieidun. Ábameti líchuguni lidarangilan woun lidan aban igaburi le masaminarungubei wamuti (aliiha huméi Filipuna 4:6, 7).

17. Kaba wakutiha lidan leweñegua arütíkulu?

¹⁷ Ítara kei láfaagun aban éibaaguti lun lachülürün lumoun lébeha éibaaguni dántima le yarafatimahali lan, mosu giñe wáfaagun sunsuinagubei lun wachülürün lumoun lébeha éibaaguni le lánina ibagari. Según gádantiwa, adüga waméi sun wayaraati lidan weseriwidun lun Heowá ani áfaagua wamá lun wibihini lubuidun burí katei le wagibugiñebei. Ka lunbei wadügüni lun wasigirun awanda? Líderagubadiwa leweñegua arütíkulu lun wanúadahani “le súdinitimabei” lidan wabagari luma lun wachoururuni (Fili. 1:9, 10, TNM).