1. Ka uagu ladügei Heowá ibagari?

ANIHEIN meha aban dan le ídanbei lábuguarügüñein lan Heowá, gama lumoun masandirunti meha lábuguarügüñein lan. Úati meha ni kata lemegeirun. Gama lumoun, busenti meha lun hasandiruni amu ugundani le lasandirubei. Ligíati, aba línchahani línsiñehabu lun lagumeserun adüga burí katei (Sal. 36:9; 1 Huan 4:19).

2. Ka lasandirubei Hesusu hama ánheligu dan le ladügünbei Heowá amu burí katei?

² Furumiñe, aba ladügüni Heowá Hesusu, le Lisaani. Lárigiñe, lau lídehan Hesusu, aba ladügüni “sun katei le siélubei luma le ubouagubei”, hama saragu míñunu ánheligu (Kol. 1:16). Gúndaati meha Hesusu lau lawadigimaridun úara luma Lúguchi (Ari. 8:30). Ani gébunati meha giñe lun hagundaarun ánheligu ladüga ariha hamuti ladügüni Heowá luma Hesusu sielu luma Ubóu. Kati hasandirubei ánheligu? Ariñagatu Bíbülia aba lan heremuha lau ugundani, ani chóuruti sigitiña lan alawahei Heowá luagu sun le ladügübei darí lagumuchuni le ladügübei, lau ladügüniña gürigia (Hob. 38:7; Ari. 8:31). Arufuda lumuti sun le ladügübei Heowá línsiñehabu luma lichú lau (Sal. 104:24; Rom. 1:20).

3. Según le lariñagubei 1 Korintuna 15:21, 22, ka ladügübei lesefuruniwa Hesusu?

³ Busenti meha Heowá lun hawinwandun gürigia lun súnwandan lidan lubuidun ubóu le ladügübei. Gama lumoun, dan le lebedaagunbei Adán tuma Ewa lun Háguchi le hínsiñehabubei aba laburuchagun figóu luma óunweni ubouagu (Rom. 5:12). Ka meha ladügübei Heowá? Lau lóufudagun aba lariñaguni ida luba lan lesefuruniña gürigia (Agu. 3:15). Aba lanúadirun líchuguni libagari Liráü lun lesefuruniña ladügawagun Adán tuma Ewa lídangiñe figóu luma óunweni. Ítara, aba líchugun aban chansi  lun kada gürigia lun lanúadirun anhein busén, lun leseriwidun lun luma lun libihini ibagari magumuchaditi (Huan 3:16; Rom. 6:23; aliiha huméi 1 Korintuna 15:21, 22).

4. Kaba wakutiha lidan arütíkulu le?

⁴ Adügati le füramase lubéi Heowá luagu láguyuguagüdübaña lan hilaaña lun liábingua fiu álügüdahani. Kei burí, ídatima luba funa san águyuguni?, wasubudirubaña san waduheñu danme le háguyugun?, ka uagu lanügüba lubéi águyuguni saragu ugundani? ani ida luba larufudahan háguyugun hilaaña woun lun gebegi lan línsiñehabu, lichú lau luma luguraasun Heowá woun? Ariha waméi.

5. Ka uagu gayara lubéi wafiñerun máguyugunbaña lan gürigia súngubei lidan aban?

⁵ Lau lídehan Liráü, lásaaragüdüba Heowá saragu míñunu gürigia. Másiñati másaaragüdün lubaña lan súngubei lidan aban. Ka uagu? Ladüga anhein lásaaragüda súngubei lidan aban, ñeinbei saragu chagaguaü lidan sun Ubóu. Ani mínsiñeti chagaguaü lun Heowá. Subudi lumuti lun ñein lan darangilaü, mégeiwati lun ladügǘniwa katei lau lubudubu (1 Ko. 14:33). Arufudati Heowá lichú aau luma gurasu lau laransehani ubóu habá gürigia murusun murusun lau lídehan Hesusu. Ani larufudubei Hesusu ligiaméme igaburi danme le larúeihan luagu Milu Irumu, danme le líderaguniña ha lúnbaña hásügürün wínwanñu lídangiñe Arümahedón lun haranseruni Ubóu lun heresibiruniña ha lúnbaña háguyugun.

6. Según Adügaü 24:15, kátaña lúnbaña hadan hamá ha lúnbaña háguyugun?

⁶ Le súdinitimabei le lunbei hadügüni ha lúnbaña hásügürün wínwanñu lídangiñe Arümahedón lun harufudahan houn ha lúnbaña háguyugun luagu Larúeiha Bungiu luma luagu lilurudun. Ka uagu mégeiwa lubéi katei le? Ladüga hiibe-agei ha lúnbaña háguyugun hagía  ha únbaña tagúara Bíbülia marichatiña (aliiha huméi Adügaü 24:15). Mósume hadügün gürigia ha saragu asansiruni lun gayaraabei lan lahuudun lani Hesusu sákürifisiu houn. Gama lumoun, mégeiwabei saragu wadagimanu lun larufudahóuniwa inarüni luáguti Bungiu houn saragu míñunu gürigia ha ibidiñebei Bungiu houn. Wíchuguba funa san aturiahani tídangiñeti Bíbülia lun kada aban gürigia kei wadügüni uguñe weyu? Hóunahouba funa san lidoun aban damuriguaü lun larufudahóuniwa houn lun gayaraabei lan harufudahan houn ha lúnbaña háguyugun hárigiñe? Mósume wagurabaha lun warihini kaba lan asusereda. Le wasubudirubei, danme lan lagumuchun Milu Irumu le lánina Larúeihan Kristu, búinhalime “sun fulasu lau lasubudiruniwa luéirigun Wabureme” Heowá (Isa. 11:9). Mame lubuidun milu irumu ligía lau saragu beresegu!

7. Ka uagu gunfuranda habaña lubéi lubúeingu Heowá gürigia ha lúnbaña háguyugun danme le harufudahan houn?

⁷ Lídanme milu irumu, sunme lubúeingu Heowá mósume hadügün asansiruni lun hagundaaragüdüni. Ligíati, gunfuranda wabaña ha lúnbaña háguyugun danme le wíderaguniña ígira somu échuni le lanügübei figóu, luma lun wíderaguniña awinwanda kei le aubei labusenra Heowá (1 Fe. 3:8). Chóuruti, danme le harihini gürigia ha lúnbaña háguyugun, ǘnabugu hamá lubúeingu Bungiu ani ítara haña lan kei hagía ani háfaaguña lan lun hadügün asansiruni luma lun hagundaaragüdüni Bungiu, línchahabaña katei le lun háhuduragun lun Bungiu (Fili. 2:12).

8. Ka uagu gébuna lubéi lun wafiñerun wasubudirubaña lan waduheñu hama wamadagu danme le háguyugun?

⁸ Gíbeti lébuna lun wafiñerun ha lan lúnbaña heresibiruniña haduheñu ha lúnbaña háguyugun, hasubudirubaña lan. Ladüga subudi hamutiña meha gürigia haduheñu ha águyugubaña lidan tidaani Bíbülia, genegeti ladügayabaña lan Heowá gürigia lau ligiaméme igaburi le meha hawagubei, ligaburi hayanuhan luma ligaburi saminaü le hawagubei lubaragiñe meha hounwen. Gama lumoun, aritagua waméi ariñaga lan Hesusu dan le lan hounwen gürigia ítara haña lan kamá harumuguña ani dan le lan háguyugun ítara liña kamá hagagudahouña lídangiñe idabagu (Mat. 9:18, 24; Huan 11:11-13). Dan le hagagudún gürigia, ligiamémegili ligaburi haríawagun, hamalali luma le haritagubei lubaragiñe harumugun. Samina wamá luagu likesin Lásaru. Dan le lásaaragüdünbalin Hesusu, barühali meha Lásaru gádürü weyu lúmagiñe lounwen, chóuruti gumeseeli lan meha lúgubu añalada. Dan le láguyugunbei subudi lumutiña lítunu ani subudi haméi giñe (Huan 11:38-44; 12:1, 2).

9. Ka uagu masansiragunbei lubéi ni hasaminan ni hágubu ha lúnbaña háguyugun?

⁹ Füramaseti Heowá lábugiñe lanme larúeihan Kristu úabei ni aban ariñaguti: “Sándiñadina” (Isa. 33:24; Rom. 6:7). Ligíati, danme le láguyuguagüdüniña Heowá hilaaña, líchuguba aban lubuidun úgubu houn. Gama lumoun, magidabei dáseiti hawéi lau lóufudagun. Lun hamuga madasei hamá, ibidiñebaña hamuga houn haduheñu. Genegeti lagumuchaguba lan figóu hawéi gürigia murusun murusun lídanme Larúeihan Kristu le lánina Milu Irumu. Danme le lagumuchun milu irumu ligía, ábame lagiribudagüdüni Hesusu Arúeihani lun Lúguchi. Gúnfuli láalime arúeihani le, le lunbei ladügüni, kei burí lagidaruni figóu hawéi gürigia (1 Ko. 15:24-28; Aruf. 20:1-3).

10. Ida luba ladügün águyuguni lun wasandiragun woungua buidu?

¹⁰ Samina wamá danme le warihiniña waduheñu ha hilaguaañabaña. Wéherehaba san?  Wayahuba san lau ugundani? Leme lanarime wasandiragun woungua lau ugundani, weremuhaba san uremu lun Heowá? Le wachoururubei buidu buidu wasandiruba lan aban lanarime ínsiñeni luagu Wáguchi Bungiu le hínsiñehabubei luma luagu Liráü le hínsiñehabubei luagu hadügün lun ñein lan águyuguni.

11. Según dimurei le lídanbei Isaíasi 26:19, kaba hibiha gürigia ha lúnbaña háguyugun ha gaganbadibaña lun lúrudu richati le lani Bungiu?

¹¹ Samina wamá luagu ugundani le lunbei hasandiruni ha lúnbaña háguyugun danme lagidarún binadu hagaburi luma lun hawinwandun úara luma lúrudu richati le lani Bungiu. Ha lúnbaña hadügüni sánsiguaü le, háguyuguba lun hawinwandun lun súnwandan, ánhañati ha lúnbaña hebedaagun lun Bungiu migirúnbaña lun hagadeiruni darangilaü le lídanbei Paraísu (aliiha huméi Isaíasi 26:19; Isa. 65:20).

12. Ida luba labiniruniña Bungiu sun ha lúnbaña hawinwandun ubouagu?

¹² Lábugiñe Larúeihan Bungiu, sun lubúeingu harihibei inarüni lan le ariñawagúbei lidan Ariñawagúni 10:22, le ariñagubei: “Irisini labiniragülebei Bungiu, ani manügünti igarigu lúmagua”. Lau lídehan lani Heowá sífiri sandu rísibei hamadagua luma Bungiu, mini lan le, genegeguabei lan hagaburi luma ligaburi Kristu ani agidareina luba figóu hawéi murusun murusun (Huan 13:15-17; Efe. 4:23, 24). Éibutima lásügürün dan lídanme dan ligía, buídutimahañame gürigia ha ani buíduhalime giñe hágubu. Mame hagundan! (Hob. 33:25). Guentoti, ida liña lahuudun woun wasaminarun luagu águyuguni?

13. Según le lariñagubei Sálumu 139:1-4, ida liña larufuduni águyuguni subudi lániwa Heowá buidu buidu?

¹³ Kei le aubei warihei, danme le láguyuguagüdüniña Heowá gürigia, lagiribudagüdübei hasaminan houn luma igaburi le meha hawagubei lubaragiñe hóunwegun. Samina wamá luagu katei le. Wéiriti línsiñe kada aban wádangiñe lun Heowá, ligía berese lubéi lau wasaminan, le wasandirubei, le wariñagubei luma le wadügübei. Ligíati, lun gayaraabei lan láguyuguagüdüniwa lídangiñe óunweni ménrengubei lun lun lagiribudagüdüni waritagun woun, wagaburi luma le wasaminarubei. Subudi lumuti meha urúei Dawidi subudi lumutiwa lan Heowá kada aban wádangiñe buidu buidu (aliiha huméi Sálumu 139:1-4). Ida liña wasandiragun woun dan le warihini súdini wamá lun Heowá saragu?

14. Ida luba hamuga wasandiragun woungua lau wasubudiruni subudi wamá lun Heowá buidu?

¹⁴ Lau wasaminarun hínsiñe wamá lun Heowá, adügati lira lun madiheridun wamá. Ka uagu? Haritagua waméi hínsiñe wamá lun Heowá saragu ani gebegiti lan kada aban wádangiñe lun. Gama lumoun, subudi lumuti sun le wásügürübei lidan dan le sügühalibei, íbini katei le adügübei lun ñein lan sánsiguaü lidan wagaburi. Ma ruti darangilaü woun wasubudiruni le? Maweiyasun wamá asandiragua woungua wábuguarügüñadiwa lan, anihein Heowá wama lidan sun wagararaagun, aranseñu lun líderaguniwa (2 Kro. 16:9).

15. Ka uagu aban lubéi lídangiñe lichú lau Heowá águyuguni?

¹⁵ Aban sádara anufudei luéi óunweni ani gabafutu. Ha lábugiñebaña lubafu Mafia fosu hamutiña gürigia lun hagarabaagun hawagun hamadagu o lun hígiruni hafiñen. Gama lumoun, mabafuti anufudei le wawagu, subudi wamuti ánhawa lan háfaragua wáganigu láguyuguagüdübadiwa lan Heowá (Aruf. 2:10). Chouru waméi meberesenga le lunbei hadügüni woun, úabei ni kata afanreinraguagüdütiwa luéi línsiñehabu Bungiu (Rom. 8:35-39). Ma lanarime lichú lau Heowá lau líchuguni emenigini lánina águyuguni woun! Lau lira, lagidara aban  tídangiñe sádara to gabafutimaboun to layusuruboun Satanási, ru ligía aban ganigi le siñá hamuti ni aban agidara wawéi.

16. Ka álügüdahani lunbei wadügüni ani kaba larufuda óunabagülei?

¹⁶ Ánhawa hasiadira wáganigu háfarubadiwa lan hilagubei, wafiñeruba san láguyuguagüdübadiwa lan Heowá? Lun wasubudiruni, álügüdagua wamá woungua: “Arufudati san le nadügübei sagü weyu afiñe nan luagu Heowá?” (Luk. 16:10). “Arufuda numuti san lau ligaburi nawinwandun afiñe nan luagu lani Heowá füramasei luagu líchugubei lan le nemegeirubei nun ánhana áluahei Larúeihan furumiñe?” (Mat. 6:31-33). Anhein anha lubéi wóunabagülebei, líderagubadiwa afiñeni le lun wawandun furumiñeguarügü óuchawaguni le ñǘbuinti (Ari. 3:5, 6).

17. a) Ida luba larufuduni dan le anúadira láalibei Heowá lun láguyuguagüdüniña hilaaña gaguraasun lan? b) Ida luba warufuduni seremei wamani Heowá luagu luguraasun?

¹⁷ Anúadiraali Heowá weyu luma oura lun lagumuchun lau lagübüri ubóu le (Mat. 24:36). Íbini ayumuha lan láguyuguagüdüniña hilaaña, meferidirun lubéi luguraasun ani madügün lubéi giñe katei lubaragiñe lidaani (Hob. 14:14, 15). Lagurabahañein dan le buídutimabei lun ladügüni (Huan 5:28). Anihein resun buiti wama lun wíchugun seremei lun Heowá luagu luguraasun. Kei burí, seremei lun luguraasun saragu gürigia gachansintiña lun hasakürihan, íbini wagía (2 Fe. 3:9). Busenti Heowá lun hawinwandun saragu gürigia lun súnwandan. Ligíati, arufuda waméi seremei wamani luagu luguraasun lau wáfaagun saragu lun wáluahaniña “ha lúntiñabaña ibagari le magumuchaditi” luma lau wíderaguniña lun hínsiñe lan Heowá houn luma lun heseriwidun lun (Adü. 13:48). Ítara luba giñe lahuudun luguraasun Heowá houn.

18. Ka uagu lunti lubéi gaguraasun wamá habá amu?

¹⁸ Lau gurasu, lagurabahaba Heowá milu irumu lunme mafigoun wamá. Lubaragiñeme dan ligía, súnwandan feruduna lubéi lan wafigoun. Ligíati, áyeiha waméi ligaburi, teni wamá lun lubuidun hagaburi amu luma lun gaguraasun wamá habá. Ariha waméi le asuseredubei tun aban íbiri. Aba lagumeserun tani weiriei lau sandi le lánina saragu idiheri ani aba mídinhali lan adamuridagua. Ariñagatu: “Gáriti le asuseredubei nun. Aransehani le wadügübei kei iduheñu lubá ámuñegü aba liabin ǘnabun”. Íbini laganagua turobuli le, sigimémetu íbiri óuserei  tani weiriei lau ínsiñeni luma lau gurasu. Afiñetu luagu Heowá ani mígiruntu lun lábürühan tarüna. Kei ladügüni Heowá, arihatu yagüraünmeme ani aban tetenirun lun lubuidun ligaburi tani weiriei. Ariñagatu: “Anihein igaburi buiti luagu nani weiriei ani ladügüñein sun liyaraati lun lóuchaadagun murusun murusun”. Súdiniti lun gaguraasun wamá habá waduheñu luma habá íbirigu ha lídanbaña damuriguaü ha ageindagubaña luma lénrengunga.

19. Ka aranseñu wabéi lun wadügün?

¹⁹ Gúndaati Hesusu hama ánheligu dan le ladügünbalin Heowá Ubóu. Samina wamá luagu ugundani le lunbei hasandiruni danme le harihini ubóu buin hau gürigia mafigountiña, ha hínsiñeti Heowá houn seriwi hagía lun. Samina wamá giñe luagu ugundani le lunbei hasandiruni ha lúnbaña harúeihan luma Kristu sielu danme le harihini buiti le lunbei lanügüni hawadigimari luagu hafulesein gürigia (Aruf. 4:4, 9-11; 5:9, 10). Samina wamá giñe ida luba lan ibagari danme le liabin águiraü lánina ugundani leweñegua águiraü lánina íruni, danme lagumuchúniwa lau sandi, íruni luma óunweni (Aruf. 21:4). Sunme awanha lan agurabaha, aranseñu wamá lun wáyeihani línsiñehabu, lichú lau luma luguraasun Wáguchi Bungiu. Ánhawa adügei, meferidirun wabéi wagundan danme wagagibudagun luma furumiñeguarügü óuchawaguni (Sant. 1:2-4). Rútiwa óunwenbu eteingiruni lun Heowá lau füramase lan “lásaaragüdübaña lan hilaaña” (Adü. 24:15).