1. Ka lubuidun chansi wámabei?

ABA lubuidun chansi tílana wamá lóundarun Heowá. Sun wagía gúndaatiwa ani sanditiwa darangilaü lau hadan wamá lubúeingu Heowá. Gama lumoun, ka lubarabei kada aban wádangiñe lidan damuriguaü?

2. Ka hénpulu layusurubei apostolu Pábulu tidan saragu gárada to labürüdüboun lau lídehan Bungiu?

² Tidan saragu gárada to labürüdüboun apostolu Pábulu lau lídehan Bungiu, yúsuti saragu hénpulu le arufudahabei saragu woun luagu katei le. Ariñagati ítara liña lan damuriguaü kei lúgubu aban gürigia ani ha lan lílana ítara haña kei lumegegun úgubu (Rom. 12:4-8; 1 Ko. 12:12-27; Efe. 4:16).

3. Ka ǘrüwa arufudahani lunbei wakutihani lidan arütíkulu le?

³ Lidan arütíkulu le, wakutihaba ǘrüwa arufudahani súdiniti le wafurendeirubei lídangiñe hénpulu le líchugunbei apostolu Pábulu. Furumiñe, warihuba kada lan aban wádangiñe gabara lan lidan damuriguaü. * Libiaman, wakutihabei ka lan lunbei wadügüni anhein gürewei lubéi woun warihini ka lan wabarabei lidan damuriguaü. Le lǘrüwan, warihubei ka lan uagu lunti lubéi wetenirun lun wadügüni dasi le ru laalibei Heowá woun.

4. Ka larufudahabei Rómana 12:4, 5 woun?

⁴ Furumiñeti katei le wafurendeirubei lídangiñe le larufudahabei Pábulu súdini lan lubara kada aban wádangiñe hadan lumutuniña  Heowá. Gumeseti Pábulu arufudaha lau burí dimurei le: “Lugundun ítara kei gibe lan umegeguni luagu ábanrügü úgubu, ani mama ábanmeme lifisiute sun umegeguni ligía, ítara waña giñe, lau sun gibe wamá, ábanrügüñadiwa úgubu lidan aban luma Kristu, ani sun wagía, ámuñegueinarügü lumegegu ábanmeme úgubu” (Rom. 12:4, 5). Le labusenrubei Pábulu lariñagun, gabara lan kada aban wádangiñe lidan damuriguaü, ani gebegitiwa lun Heowá.

5. Ka idewesei líchugubei Heowá lun damuriguaü?

⁵ Dan le wasaminarun hawagu ha gabarabaña lidan damuriguaü, másiñati aba lan wasaminarun lau lóufudagun hawagu ha alidihabalin (1 Tesa. 5:12; Ebü. 13:17). Inarüni rúhali lan Heowá lau lídehan Kristu “wügüriña keisi idewesei” lun halidihani damuriguaü (Efe. 4:7, 8, TNM). Hadan wügüriña ha, añahein lílana Musu Úaraguati hama ha íderagubaliña, ha lídanbaña Sétanu le arihibei tau Beteli, óunigirutiña sirkuitu, íbirigu ha arufudahabaña tidan burí Leskuela to tadügüboun lóundarun Heowá, wéiyaaña lidan afiñeni hama ídehatiña lidan damuriguaü. Sun íbirigu ha, iridúaaña lau lídehan sífiri sandu lun hóunigiruniña lubúeingu Heowá ha gebegibaña lun luma lun hederebudagüdüni damuriguaü (1 Fe. 5:2, 3).

6. Según 1 Tesalónikana 2:6-8, ka áfaaguni hadügübei íbirigu ha iridúbaña lau lídehan sífiri sandu?

⁶ Iridúatiña íbirigu lau lídehan sífiri sandu lun hetenirun lun ámuñegueinarügü dasi. Ítara kei ladügün úhabu, ugudi luma amu lumegegun úgubu wadagimanu le huubei lun úgubu, ítara giñe adügatiña íbirigu ha iridúaaña, wadagimanu le huubei lun damuriguaü. Lubaragiñe háluahan lun híchugun hábirigu uéiriguni houn, áfaaguatiña lun híchugun dǘgüdaguaü luma iderebugu houn (aliiha huméi 1 Tesalónikana 2:6-8). Rútiwa seremei lun Heowá lau añahein lan íbirigu ha derebuguti hafiñen ha áluahabalin le buídutimabei houn amu lubaragiñe háluahani le buídutimabei houn.

7. Ka abiniruni habihubei prekursorugu hama misionerugu?

⁷ Másiñati añahein lan lidan damuriguaü le ñein wabéi misionerugu, prekursorugu espechalitiña hama prekursorugu ha adügübaña 70 oura lidan hati. Ligíati, lidan sun ubóu añahein íbirigu dandu wügüriña kei würiña ha íchugubalin apurichihani luma hadügǘn disipulugu lidan furumiñeti lúgaaru lidan habagari. Íderaguaaña íbirigu ha saragu gürigia lun hadügagun houngua lánime Hesusu disipulugu. Lau sun mibe lan hámati, rúhali Heowá aban ibagari buin lau abiniruni houn (Mar. 10:29, 30). Ma gúndaatiwa añahein lan íbirigu hínsiñehabutiña ha wama lidan damuriguaü?

8. Ka san uagu gebegi lubéi kada apurichihati lun Heowá?

⁸ Íbirigüñanu san ha iridúaaña hama ha lídanbaña dan dayarüti gabara lidan damuriguaü? Ua. Súdiniti kada apurichihati lun Heowá luma lun damuriguaü (Rom. 10:15; 1 Ko. 3:6-9). Ítara liña katei le, ladüga le súdinitimabei lun damuriguaü hadügǘn disipulugu (Mat. 28:19, 20; 1 Tim. 2:4). Sun apurichihatiña ha lídanbaña damuriguaü, badiseihaña o mabadiseirungiña, áfaaguatiña lun súdinitima lan hadügǘn disipulugu houn lidan habagari (Mat. 24:14).

9. Ka uagu gebegi habéi wíbirigu würiña woun?

⁹ Kaba wariñaga hawagu wíbirigu würiña? Ruti Heowá aban ubaraü súdiniti houn lidan damuriguaü. Gebegitiña íbirigu würiña maríeitiña lun Heowá, úguchurugu, würiña ha hilaalibei hani weiriei hama würiña ha mamarieidungiña ha eseriwidubaña lun lau úaraguni. Ayanuhatu Bíbülia luagu lubuidun igaburi le harufudubei würiña ha áubaña lagundaara Bungiu ha arufudubaña lichú aau, afiñeni, ubebeni, ganigi, gíchigadi luma luagu lubuidun wadagimanu le hadügübei (Luk. 8:2, 3; Adü.  16:14, 15; Rom. 16:3, 6; Fili. 4:3; Ebü. 11:11, 31, 35). Lidan damuriguaü añahein íbirigu würiña ha arufudubalin lubuidun igaburi le. Wéiriti weteingiruni Heowá luagu añahein lan íbirigu ha wama.

10. Ka uagu gebegi habéi íbirigu derebuguhaña woun?

¹⁰ Gúndaatiwa añahein lan saragu íbirigu derebuguhaña wama ha ítarabaña woun kei abiniruni. Añahein hádangiñe barǘ haña saragu irumu eseriwida lun Heowá lau úaraguni. Añahein hádangiñe másiñati giñe málügili lan lúmagiñe hasubudiruni inarüni. Másiñati hageindaguña lan luma luriban átuadi le lanügübei aweiyaduni ani siñaali hadügün saragu lidan damuriguaü luma lidan apurichihani. Íbini ítara, adüga hamuti sun hayaraati lidan apurichihani ani yusu hamuti here lun híchugun dǘgüdaguaü houn amu luma lun harufudahan houn. Sagatiwa buiti lídangiñe le winwan hamaalibei! Chóuruti gebegi hamá lun Heowá dandu woun (Ari. 16:31).

11, 12. Ka uagu ru habéi nibureintiña ha lídanbaña damuriguaü ugundani woun?

¹¹ Samina wamá hawagu nibureintiña. Hénrenguti houn nibureintiña hawinwandun lidan ubóu le lábugiñebei lubafu Mafia (1 Huan 5:19). Ruti ugundani woun waganbuni hóunabagüle lidan damuriguaü, warihiniña apurichiha luma wasubudiruni ayanuha hamá luagu hafiñen lau ganigi. Nibureintiña, súdiniti hubara tidan lóundarun Heowá (Sal. 8:2).

¹² Añahein íbirigu wügüriña hama würiña hénrenguti houn hafiñerun hu hamá lidan damuriguaü. Ka gayaraabei líderaguniwa arihei hu lan kada aban wádangiñe lidan damuriguaü? Ariha waméi.

13, 14. Ka uagu añahein lubéi íbirigu asaminarutiña mahuudun hamá lidan damuriguaü?

¹³ Le libiaman katei le uágubei larufudaha Pábulu, adügati lun wasaminarun luagu aban turobuli le úmabei hagagibudagua saragu íbirigu uguñe weyu, hénrenguti houn lun hafiñerun hu hamá lidan damuriguaü. Abürühati Pábulu: “Anhein hamuga ariñaga ugudi: ‘Mama au líbiri úgubu lugundun mama nan úhabu’, mama luéigiñe lira lun mámabei lan líbiri úgubu; anhein  lan hamuga ariñaga arigei: ‘Mama au líbiri úgubu lugundun mama nan aguu’, mama luéigiñe lira lun mámabei lan líbiri úgubu” (1 Ko. 12:15, 16). Ka wafurendeirubei lídangiñe dimurei burí le?

¹⁴ Ánhawa etenira lun le hadügübei amu lidan damuriguaü, másiñati wasaminarun ua lan hu wamá. Añahein íbirigu buítiña lidan arufudahani, lidan laransehoun katei o lidan lichugún dǘgüdaguaü houn amu. Másiñati wasaminarun ua lan buidu wamá kei hagía. Arufudati katei le ǘnabugu wamá (Fili. 2:3). Íbini ítara, duari wamá. Ánhawa etenira lun lubuidun iyarani le hawagubei amu lábürühaba warüna. Kei lariñaguni apostolu Pábulu gayaraati giñe wasaminarun mabara wamá lidan damuriguaü. Ka gayaraabei líderaguniwa lun wagidaruni saminaü le wawariua?

15. Kei lariñaguni 1 Korintuna 12:4-11, ka lunbei wasubudiruni luagu furumiñeguarügü ubafu le wawagubei?

¹⁵ Samina wamá luagu le: añahein meha kristiánugu ha lánina furumiñeti sígulu ha ibihubaña ubafu lau lídehan lani Heowá sífiri sandu, íbini ítara, ámuñegueinarügüti meha ubafu le hawagubei (aliiha huméi 1 Korintuna 12:4-11). Íbini ru lan meha Heowá ámuñegueinarügüti ubafu luma iyarani lun kada kristiánu, gebegitiña meha súngubei lun. Inarüni mibihinhadiwa lan ubafu kei meha habihini kristiánugu ha lánina furumiñeti sígulu, gama lumoun, masansirungili le lasaminarunbei Heowá. Másiñati ámuñegueinarügüti lan iyarani le wawagubei, íbini ítara, gebegitiwa lun Heowá.

16. Ka adundehani lúmagiñeti apostolu Pábulu lunbei wafalaruni?

¹⁶ Lubaragiñe wetenirun lun le hadügübei amu kristiánugu, falá waméi adundehani le líchugubei apostolu Pábulu: “Kada aban gürigia lunti laríaagun lungua ida liña lan ligaburi lóuserun. Ánheinti adariragua lungua buíduñu, gayaraati lanaagun lungua luagu le ladügübei, metenirunga lun le hadügübei amu” (Gal. 6:4).

17. Ida liña lahuudun woun wafalaruni ladundehan Pábulu?

¹⁷ Ánhawa afalarei ladundehan Pábulu ani akutiha wameime le wadügübei, gayaraati wagumeserun ariha gayara lan wadügün  somu katei le siñá habéi amu adüga. Kéiburi, másiñati mama lan aban íbiri garufudahaditi lidan damuriguaü aban wéiyaali lidan afiñeni, lau sun lira, buiti lidan apurichihani. O másiñati mama lan aban íbiri buiti lidan latouhóun katei, lau sun lira, subudiwati kei aban wéiyaali hínsiñehabuti le huálibei houn íbirigu lun háluahan adundehani tídangiñeti Bíbülia luma. O másiñati subudiwati lan kei aban íbiri le eresibiruti amu gürigia lúbiñe (Ebü. 13:2, 16). Dan le furangu lan woun ka lan ídanbei buidu wamá, warihibei gébuna lan lun wagundaarun luagu le wayaraabei adüga lidan damuriguaü. Ani lanwoun lira, méiguadunbadiwa lidoun gimugaü luagu le gayara habéi íbirigu adüga.

18. Ida luba garufudahaditima wamá?

¹⁸ Meberesenga ka lan wabarabei lidan damuriguaü, sun wagía lunti wáfaagun wabuiduragüdüni wapurichihan luma lun garufudahaditima wamá. Ligía larufudahabei Heowá woun lau layusurunu lóundarun. Kéiburi lidan damuriguaü le labadinaguabei dimaasu arufudahóuati woun ida luba lan buídutima lan wapurichiha. Wasagaruña san buiti lídangiñe arufudahani le?

19. Ka lunbei wadügüni lun gayaraabei lan woudin tidan Leskuela houn Apurichihatiña Larúeihan Bungiu?

¹⁹ Ábaya lubuidun programa le lánina arufudahani le aniheinbei, ligía le gíribei Leskuela houn Apurichihatiña Larúeihan Bungiu, le ídanbei houdin íbirigu wügüriña hama würiña ha eseriwidubaña lidan dan dayarüti ani ha barühañabaña kéiburi 23 irumu darí 65. Saminatiwa san siñabei lan woudin tidan leskuela to? Lubaragiñe wadügün aban lísüta le ídanbei wabürüdei ka lan uagu siñabei lan woudin, adüga wamá aban to ídanbei wabürüda ka lan uagu busén wabéi woudin. Lárigiñe, adüga wamá aransehani le gayaraabei líderaguniwa ñüdün tidan leskuela to. Lau lídehan Heowá luma lau wáfaagun gayaraabei wadügüni le uágubei wasaminara siñabei lan.

20. Ka wafurendeirubei lídangiñe Rómana 12:6-8?

²⁰ Lǘrüwan katei le wafurendeirubei lídangiñe le larufudahabei Pábulu, darí wamuti lidan Rómana 12:6-8 (aliiha huméi). Lidan bérusu le, ariñagayati Pábulu ámuñegueinarügüti lan iyarani le wawagubei lidan damuriguaü. Guentó, arufudati lunti lan wayusuruni kada aban wádangiñe iyarani le wawagubei lun wíchugun gurasu luma dǘgüdaguaü houn lílana damuriguaü.

21, 22. Ka wafurendeirubei lídangiñe le asuseredubei lun Robert luma lun Felice?

²¹ Ariha waméi le asuseredubei lun aban wéiyaali lidan afiñeni le unbei wagúara Robert. Lárigiñe leseriwidun lidan amu ageiraü aba lóunahoun eseriwida tidan Beteli to lídanboun lageira. Íbini chóurugüda hamani lun mama lan ladüga somu katei wuribati lasansirubei lidasin. Ariñagati: “Aban nasaminarun katei wuribati luagu saragu hati, sandí au ua lan hu nan. Anihein meha dan le ídanbei busén nan nidin Betelirugiñe”. Ida liña libihiniya lugundan? Haritaguagüda lumuti aban wéiyaali lidan afiñeni le lan larufudahabei Heowá woun lidan binadu dasi le wadügübei, íderagua lániwa lúntima hu wamá lidan iseri dasi le wadügübei guentó. Aba gunfuranda lani Robert lunti lan labulieiduni le sügühalibei luma lun letenirun lun le ladügübei guentó.

²² Susereti aban katei ítarati lun íbiri Felice Episcopo. Dandu ligía tuma lani weiriou eresibihatiña tídangiñe leskuela Galaadü lidan irumu 1956 ani seriwitiña kei óunigirutiña sirkuitu Boliwia. Lidan irumu 1964 aba gasaani hamá aban wügüri irahü, ariñagati Felice: “Hénrenguti meha woun lun wígiruni wadasin le hínsiñebei  woun. Le linarün katei, sügütina aban irumu asaküriha. Gama lumoun, lau lídehan Heowá aba nasansiruni nigaburi ani aba netenirun lun iseri nidasin keisi úguchili”. Sandiguatiwa san woungua kei Robert o Felice? Hírutiwa san ladüga meseriwidunhadiwa lan lidan dasi le meha ídanbei weseriwida luagu aban dan? Anhein ítara liña lubéi, wéiritimabei wagundan ánhawa etenira lun le gayaraabei wadügüni guentó lidan weseriwidun lun Heowá luma houn wábirigu. Beresegu wamá lau wayusuruni iyarani le wawagubei lun wíderaguniña amu. Ánhawa adüga ítara, gúndaabadiwa lau wíchugun dǘgüdaguaü houn lílana damuriguaü.

23. a) Kaba un wasagara dan? b) Kaba wakutiha lidan le aban arütíkulu?

²³ Wéiriti hebegi kada aban hádangiñe lubúeingu Heowá lun. Busenti lun aban wamá hádangiñe lumutuniña. Ánhawa araramagua asaminara luagu le gayaraabei wadügüni lun wíchugun dǘgüdaguaü houn wíbirigu áfaagua wagía lun wibihini, másiñati warihini wabara lidan damuriguaü. Ligíati, ida liña warihiniña wíbirigu? Ida luba warufuduni houn gebegi hamá woun? Wakutihabei álügüdahani súdiniti le lidan le aban arütíkulu.