1. Ka áfaaguni hadügübei saragu íbirigu, ani ka uagu?

UGUÑE weyu, adügaña saragu míñunu lubúeingu Heowá saragu áfaaguni ladüga aban katei súdiniti: busentiña lun heseriwidun lun Heowá lau sun hayaraati. Saragu hádangiñe anúadiraaña lun herederun mamarieidunga. Añahein maríeitiña anúadiraaña lun marahüñü hamá guentó. Ani añahein giñe saragu iduheñu anúadiraaña lun mibe lan hámati. Sun hagía gúndaañu haña ani afiñetiña líchugubei lan Heowá sun le hemegeirubei houn ani meyeedun lubaña. Ka uagu chouru wabalin lira? Ladüga óunigira lumutiña Bungiu lubúeingu lidan dan le sügühalibei. Kei hénpulu, biní lumuti Bungiu Abüraámü, háguchi “sun ha richaguabaña lau hafiñerun luagu Bungiu” (Rom. 4:11).

2. a) Según Ebüréu 11:8-10, 16, ka uagu aranseñu liña lubéi meha Abüraámü lun láfuridun Úrugiñe? b) Kaba wariha lidan arütíkulu le?

² Aranseñu liña meha Abüraámü lun lígiruni sun lubuidun libagari uburugu Uru. Ka uagu? Ladüga aguraba lan lebelurun “lidoun uburugu le derebugubei ebu” (aliiha huméi Ebüréu 11:8-10, 16). Ka san “uburugu” ligía? Ka lénrengunga úmabei lagagibudagua Abüraámü dan le aniha lan agurabahei uburugu ligía? Ani ida luba wáyeihani Abüraámü hama ha afalarubalin lani hénpulu lidan wadaani? Warihibei óunabagülei lidan arütíkulu le.

3. Ka meha “uburugu” lagurabahabei Abüraámü?

³ Larúeihan Bungiu le ídanbei anihein lan Hesusu hama 144,000 kristiánugu anuadirúaaña, ligía meha uburugu le lagurabubei Abüraámü. Wati Pábulu lun Arúeihani le “luburugute Bungiu le  wínwanbei, le Herusalén le siélubei” (Ebü. 12:22; Aruf. 5:8-10; 14:1). Arufudahati meha Hesusu houn lani disipulugu lun hafurieidun lun liabin Arúeihani le, lun ladügǘniwa lugundan Bungiu ya “ubouagu kei ladügǘniwa sielu” (Mat. 6:10).

4. Según Agumesehani 17:1, 2, 6, ka meha lasubudirubei Abüraámü luagu uburugu o Arúeihani le füramasei lubéi Bungiu?

⁴ Machourun lumuti meha Abüraámü ídatima luba lan Larúeihan Bungiu. Ladüga aba meha “katei aramudaguati” luagu saragu sígulu (Efe. 1:8-10; Kol. 1:26, 27). Lau sun lira, subudi lumuti meha urúeigubaña lan hádangiñe ladügawagun, ladüga füramasei laali meha Heowá lun (aliiha huméi Agumesehani 17:1, 2, 6). Wéiriti meha lafiñen Abüraámü luagu le füramasei lubéi Bungiu, ítara liña kamá hamuga larihiñein le Anuadirúbei o Mesíasi le lunbei Urúei lan lidan Larúeihan Bungiu. Ligía lariñagubei Hesusu houn huríu: “Abüraámü le meha hagücha, gúndaati meha lau lasubudiruni luagu larihibei lan nuéyuri; ani ariha lumuti aba lagundaarun” (Huan 8:56). Furanguti meha lun Abüraámü gafanranbaña lan ladügawagun lidan Larúeihan Bungiu ani aranseñu liña meha lun lagurabuni lagunfuliruni Heowá le füramasei lubéi.

5. Ida liña wasubudiruni lagurabahañein lan meha Abüraámü “uburugu” o Larúeihani Bungiu?

⁵ Ida liña meha larufuduni Abüraámü lagurabahañein lan “uburugu” o Larúeihani Bungiu? Furumiñe, míchaagunti lungua lun lílanabei lan aban ageiraü. Meredeti lidan aban fulasu luagu saragu dan, míchugunlei lídehan lun aban urúei ubouaguna. Lanwoun lira, máfaagunti lun ladügün aban arúeihani. Lubaragiñe lira, súnwandan gaganbadi lan lun Heowá ani agurabati meha lun lagunfuliruni Heowá le füramasei lubéi. Ítara liña larufuduni lueirin lafiñen luagu Bungiu. Ariha wamá fiu lénrengunga le úmabei lagagibudagua luma ka lan lunbei wafurendeirun lídangiñe lani hénpulu.

6. Ida liña meha uburugu Uru?

⁶ Uburugu le meha lígirubei Abüraámü, aba meha uburugu chóuruti ani awanseti. Anihein meha aban óunwenbu baríeiru geyegu lau ani anihein meha duna luagu ǘrüwa oubaü le meha adügübei lun chouru lan. Subuditi meha luáguti abürühani luma tuáguti matemátika houn lílana Uru. Genegeti aban lan meha uburugu le ídanbei léibaagua bísinisi, lugundun darihaña  gürigia ha aturiahabaña luagu katei le binadu, dugumedu to lánina bísinisi ñein. Lautu meha ladüríyu muna uburugu Uru ani aputihouatu meha, féindiwa tuguya lau haruti. Anuhein tuguya anihein meha 13 o 14 rumu tidan geyegu lau aban bürürü.

7. Ka meha uagu mosu lubéi lafiñerun Abüraámü lóunigirubei lan Heowá hama liduheñu?

⁷ Mosu meha lafiñerun Abüraámü lóunigirubei lan Heowá hama liduheñu. Ka uagu? Haritagua waméi aba lan lígiruni ligía tuma Sara, to lani weiriou, uburugu Uru tau luban to chóuruboun luma lubuidun libagari, lun lawinwandun tidan kianpu lidan fulasu wayati Kanán. Úaali meha aban baríeiru ni duna huliliti le adügübei lun chouru lan lasandiragun lungua. Guentó, úaali ni kata lun lóunigiruniña hawéi háganiñu.

8. Ka sügǘ úmabei lagagibudagua Abüraámü luagu aban dan?

⁸ Íbini adüga lani Abüraámü lugundan Heowá, anihein meha dan mibihin lumuti le lemegeirunbei lun lanúriahaniña liduheñu. Sügüti meha lídangiñe aban óunwenbu ümi le meha adagarubei lidan fulasu le ñein lubéi lóunahei Heowá. Hénrenguti meha le gádanbalin darí lun lanügüniña liduheñu Ehiptun luagu aban dan. Dan le Ehiptu lubéi, aban lanügünün lurúeite Ehiptu Sara luéi. Gayaraati wasaminaruni idiheri le lasandirubei Abüraámü chülǘ lumoun dan le ídanbei ladüga Heowá lun lagiribudagüdünun lurúeite Ehiptu lani weiriou lun (Agu. 12:10-19).

9. Ka lénrengunga úmabei lagagibudagua Abüraámü lúbiñe?

⁹ Sügütiña liduheñu Abüraámü lídangiñe sügǘ hénrenguti. Siñati meha tagaraüdün Sara, lani weiriou to hínsiñeboun lun. Wínwantiña lau ligifi ibagari le luagu saragu irumu. Lau lásügürün dan, aban tíchugunu Sara, Agarü to tidamun, lun Abüraámü lun garáü tan lau. Ani ítara luba meha garahüñü hamá túmagiñe Agarü. Dan le tasandiragunbei Agarü tungua dageinañoun lan aba tagumeserun óuseroun Sara lau mebereseni. Aban lawosudun turobuli darí lun tadügün Sara lun tidin Agarü túbiñegiñe (Agu. 16:1-6).

10. Ka sügǘ luáguti Ísümaeli luma Isaakü adügübei lun lóuchawagun lafiñen Abüraámü luagu Heowá?

¹⁰ Chülüdüga meha dan lun tadageinadun Sara ani aba tíchugun aban irahü lun tani weiriei, le unbei lagúara Isaakü. Hínsiñetiña meha bián lirahüñü Abüraámü lun, Ísümaeli luma Isaakü. Ligíati, kei wuriba lubéi meha lóuseruni Ísümaeli Isaakü, mosu meha lóunahanu Abüraámü Agarü lúbiñegiñe (Agu. 21:9-14). Átiri irumu lárigiñe, aba lamuriahan Heowá luma Abüraámü lun líchuguni Isaakü keisi adagaragüdüni (Agu. 22:1, 2; Ebü. 11:17-19). Lidan bián sügǘ le, mosu meha lafiñerun Abüraámü lagunfulirubei lan Heowá le füramasei lubéi hawagu lisaanigu.

11. Ka uagu aguraba lubéi Abüraámü lau gurasu lun ladügüni Heowá le füramasei lubéi?

¹¹ Lidan sun dan le, agurabati Abüraámü lau gurasu lun ladügüni Heowá le füramasei lubéi. Másiñati lóugiñe lan meha 70 irumu lau dan le láfuridunbei Úrugiñe hama liduheñu (Agu. 11:31-12:4). Ani kei burí san irumu, wínwanti tidan kianpu lidan sun lumúan Kanán. Aba lounwen dan meha le 175 lubéi irumu lau (Agu. 25:7). Lau sun lira, marihin lumuti lagunfuliruni Heowá le füramasei lubéi luagu lederegeruni sun lumúan Kanán houn ladügawagun. Marihin lumuti meha giñe uburugu le lagurabubei, lidan amu dimurei, Larúeihan Bungiu. Íbini ítara, ariñagatu Bíbülia aba lan lounwen Abüraámü gúndaañu dan le “wéirihali lueiyan” (Agu. 25:8). Lau sun gaturobulin lan meha saragu, derebuguti meha lafiñen ani agurabati lun ladügüni Heowá le füramasei lubéi. Ka uéigiñe gayara lubéi meha lawandun? Ladüga lidan sun libagari, góunigi lumuti meha Heowá Abüraámü ani buiti meha lumadagua luma (Agu. 15:1; Isa. 41:8; Sant. 2:22, 23).

12. a) Ka wagurabahabei wagía lubúeingu Heowá? b) Kaba wakutiha guentó?

 ¹² Ítara kei Abüraámü wagurabahañein giñe uburugu le derebugubei ebu o Larúeihan Bungiu. Inarüni, mama wagurabahaña lun lagumeserun Larúeihan Bungiu arúeiha, lugundun gumeseti arúeiha lidan irumu 1914 ani gumeseeli arúeihani le sielu (Aruf. 12:7-10). Gama lumoun, awanhagua agurabaha lun larúeihani sun Ubóu. Lidan awanhán lan agurabahei dan le, másiñati wásügürüba lan giñe lídangiñe ligiaméme sügǘ libe le lásügürübei Abüraámü tuma Sara. Áyeiha hamuti san íbirigu lánina wadaani Abüraámü? Furihali tidan Garüdia Awisahatu abahüdaguni luáguti habagari íbirigu ha arufudubaña afiñeni luma gaguraasuni kei meha Abüraámü tuma lani weiriou. Akutiha wamá fiu lídangiñe sügǘ le ani ariha wamá kaba lan wafurendeira lídangiñe.

13. Ka hafurendeirubei lídangiñe le lásügürübei íbiri Walden?

¹³ Aranseñu wamá lun wadügün sákürifisiu. Anhein busén wabéi lun wíchuguni Luburugute Bungiu, mini lan le Larúeiha, lidan furumiñeti lúgaaru lidan wabagari, mosu ítara wamá kei Abüraámü ani aranseñu lun wadügün sákürifisiu lun wagundaaragüdüni Heowá (Mat. 6:33; Mar. 10:28-30). Ariha waméi le asuseredubei lun íbiri Bill Walden. * Lidan irumu 1942, murusun dan lubaragiñe leresibihan kei Arükitektu Meriga, aba lagumeserun Bill aturiaha hama gefentiña luagu Heowá. Ibihaali meha aban hádangiñe lumaisturungu wadagimanu lun, lun lawadigimaridun lárigiñe leresibihan, gama lumoun, máhati meha Bill lun lárügüdüni wadagimanu ligía. Aba lariñagun mawadigimaridun lubéi lan le laturiahabei ladüga anúadiraali lan lun laganwoundagüdüni leseriwidun lun Heowá. Murusun dan lárigiñe aba hárügüdüni súdaragu lun lasudarahan. Lau inebesei aba lariñagun houn masudarahabei lan, kei maha lan aba hariñagun lun mosu lan lafayeirun 10.000 fiádürü merigein siadi haméi hadaüraali lan luagu seingü irumu. Ǘrüwa irumu lárigiñe, aba hígiragüdüni. Lau lásügürün dan, aba lagunbirahóun tidoun Leskuela Galaadü, lárigiñe aba lóunahoun kei misioneru Áfürikoun.  Aba lamarieidun Bill tuma Eva aba heseriwidun úara Áfürika, ani mosu meha hadügün bandi sákürifisiu. Átiri irumu lárigiñe, mosu meha hagiribudun hárigoun Merigoun lun hóunigirunu lúguchu Bill. Ariñagati: “Aba labuinchun nagu lau águiraü dan le nasaminarun luagu lubuidun chansi le nibihibei lau layusurunina Heowá lidan lóugiñe 70 irumu lidan neseriwidun lun. Gabügürüguati níchugun seremei lun Heowá luagu lígirun lun níchuguni neseriwidun lun lidan furumiñeti lúgaaru”. Gayaraati san híchuguni heseriwidun lidan dan dayarüti lidan furumiñeti lúgaaru?

14, 15. Ka larufudahanbei le hásügürübei íbirigu Apostolidis hun?

¹⁴ Magurabaha wamá úabei lan turobuli lidan wabagari. Arufudaha lumuti le lawinwandubei Abüraámü woun íbini lan ha ederegerubalin habagari lun Heowá hagagibudaguba lan luma turobuli (Sant. 1:2; 1 Fe. 5:9). Ligía meha asuseredubei lun íbiri Aristotelis Apostolidis. * Badiseiti íbiri Aristotelis Güresia lidan irumu 1946, ani lidan irumu 1952, aba gadaradun lan tuma Eleni, ani busentiña meha lun haganwoundagüdüni heseriwidun lun Heowá úara. Gama lumoun, aba tasandirun Eleni ani aba hadarirun surusiagu aban tumoru tichügüwagu. Gidawati tumoru ligía, ani murusun irumu lárigiñe hamarieidun ábaya láhüchün. Ábaya híbugununu, gama lumoun lárigiñe lira aba güreweihali lan tánhingichuni túgubu ani aba giñe lásiñarun tayanuhan buidu. Íbini sandi tan ani éibaahalaña gumadimatiña gefentiña luagu Heowá lidan dan ligía, apurichihamemetu Eleni lau ubebeni.

¹⁵ Góunigi lumutu íbiri Aristotelis lani weiriou luagu darandi irumu. Lidan sun dan ligía, seriwiti kei wéiyaali lidan afiñeni, ídehati kei aban hádangiñe lílana sétanu le arihibei lau adamurini, ani ídehati giñe lidan tábunawagun aban Luban Adamurini. Lidan irumu 1987, súfuritu Eleni aban danaguaü hanarimeti dan le tapurichihaña lubéi. Ǘrüwañein irumu tau komorañu, ani lárigiñe lira aba tounwen. Ariñagati Aristotelis luagu le winwan láalibei: “Lidan sun dan le sügühalibei, sügǘ le íchugubei idiheri, turobuli hénrenguti luma sügǘ le magurabunti,  adügati lun nawandun luma lun mábürühan lan narüna. Lau sun lira, súnwandan líchuguni Heowá erei le nemegeirubei nun lun gayara lan nawanduni lénrengunga” (Sal. 94:18, 19). Chóuruti wéiriti lan hínsiñe lun Heowá sun ha adügübalin sun hayaraati lun heseriwidun lun íbini laganagua turobuli.

16. Ka adundehani buiti líchugunbei íbiri Knorr tun meha lani weiriou?

¹⁶ Samina wamá luagu le lunbei liabin ámuñegü. Kei le samina lan meha Abüraámü luagu sun afayeiruahaü le lunbei líchugunu Heowá lun ámuñegü, awanda lumuti sun turobuli le úmabei lagagibudagua. Áfaaguatu meha íbiri Audrey Hyde lun tasaminarun luagu lubuidun emenigini le lunbei tibihini ámuñegü, íbini lau lan meha kánserü lounwen furumiñeti tani weiriei, íbiri Nathan Knorr, ani le libiaman tani weiriei, íbiri Glen Hyde, aba meha ladagarun Alzheimer luagu. * Abahüdaguatu íderagua lumutu lan fiu dimurei le lariñagubei íbiri Knorr tun fiu dimaasu lubaragiñe lounwen. Ariñagati tun: “Chóurutima halime wemenigin lárigiñe wounwen, maweiyasun haadiwame asufurira gáriti”. Lárigiñe, aba líchuguni adundehani le tun: “Arihabá bubaruagua, luagu bafayeiruahaü”. Ani ariñagati giñe: “Beresegubá súnwandan, yusubéi bibagari lun bíderaguniña amu. Ligíaba adüga lun buidu lan basandiragun bungua”. Ma lubuidun adundehani le luáguti lunti lan beresegu wamá adüga buiti hawagu amu luma giñe lun wagundaarun luagu emenigini le wámabei (Rom. 12:12).

17. a) Ka uagu gébuna lubéi lun wasaminarun luagu le lunbei wibihini ámuñegü? b) Ida luba líderaguniwa abinirúni le lunbei wibihini ámuñegü adügei le lariñagubei Mikeasi 7:7?

¹⁷ Guentotima sügǘ luéi amu dan, gebunatimahali lun wasaminarun luagu le lunbei wibihini ámuñegü. Furanguti larufuduni le asuseredubei ubouagu lídanñadiwa lan lagumuchagüle lagumuhóun dan. Yarafa madise, magurabaha haadiwame lun lagumeserun uburugu le derebugubei ebu o Larúeihan Bungiu arúeiha lidan sun Ubóu. Aban lídangiñe saragu abiniruni le lunbei wibihini, warihini háguyugun waduheñu. Ligíati, líchuguba Heowá lafayeiruaha Abüraámü ladüga lafiñen luma luguraasun laume láguyuguagüdüni dandu ligía hama liduheñu. Ñéinbadün san lun heresibiruniña? Gayaraabei hibihini ánhadün adüga sákürifisiu luagu Larúeihan Bungiu, ánhadün arufuda afiñeni meberesenga turobuli luma ánhadün arufuda gaguraasuni sun aünha lan agurabahei le lunbei ladügüni Heowá, ítara kei meha Abüraámü (aliiha huméi Mikeasi 7:7).