1. Ka ladügübei gürigia le asakürihaalibei?

 DAN le wadügün somu katei wuribati, lunti wasakürihan luagu. Arufudahatu Bíbülia dan le lan asakürihaali aban gürigia, aba lan lagumeserun asandira iyereehabúni luagu katei wuribati le ladügübei, ligíati masigi lubéi óusera ítara ani adüga lumuti sun liyaraati lunya mábürühan lan lidoun ligiaméme charati (ariha huméi dimurei “arrepentimiento” tidan Glosario).

2. Ka uagu sun lubéi gürigia mosu wafurendeirun luagu asakürihani? (Neemíasi 8:​9-11).

² Sun gürigia, mosu wafurendeirun luagu asakürihani. Ka uagu? Ladüga sagü weyu wafigouhan. Kei ladügawagun lubéi Adán tuma Ewa súngubei wagía, ligía gafigoun wabéi ani hilagua wagía (Rom. 3:23; 5:12). Úati gayaraati lesefuragun lungua luéi alagan le. Íbini meha wügüriña ha wéiribei hafiñen, kéiburi apostolu Pábulu, ageindaguatiña luma figóu (Rom. 7:​21-24). Úati mini lan lira mosu lan wásügürüni sun weyu asandiragua woungua wuriba ladüga gafigoun wamá. Wéiriti lugudemehabu Heowá ani busenti lun gunda wamá. Samina wamá luagun hakesin huríu ha meha awinwandubaña lidaaniwagu Neemíasi (aliiha huméi Neemíasi 8:​9-11). Mabusenrunti meha Heowá lun wéiriya lan íruni le hasandirubei ladüga hafigoun, lubaragiñe lira, busenti meha heseriwidun lun lau ugundani. Kei subudi lani Heowá íderagua lániwa wasakürihan luagu wuribati le wadügübei lun gunda wamá, ligía larufudahanbei woun luagu asakürihani. Chouru wamuti feruduna lani Wáguchi Heowá wafigoun ladüga weiri lan lugudemehabu.

3. Kaba wafurendeira lidan aturiahani le?

³ Lidan aturiahani le, wasigiruba afurendeira luagu asakürihani. Furumiñe, warihibei ka lan meha larufudahabei Heowá houn ísüraelina luagu asakürihani. Lárigiñe, wayanuhaba luagu ida liña lan líderaguniña Heowá gürigia lun hasakürihan. Ani lagumuhóun, wayanuhaba luagu le hafurendeirubei lani Hesusu disipulugu luagu asakürihani.

 LE MEHA LARUFUDAHABEI HEOWÁ HOUN ÍSÜRAELINA LUAGU ASAKÜRIHANI

4. Ka meha larufudahabei Heowá houn ísüraelina luagu asakürihani?

⁴ Adügati meha Heowá aban daradu hama ísüraelina dan le lanúadirunbaliña keisi lumutuniña. Füramaseti meha houn ánhaña lan gaganbadi lun lilurudun, lóunigirubaña lan. Ani chóurugüda lumuti giñe katei le houn: “Gumadi le níchugubei hun uguñe, mama katei wéiriti lénrengun hun, ani mama giñe katei le siñá humuti agunfulira” (2 Lur. 30:​11, 16). Lau sun lira, ánhaña meha ebedaagua lun —kéiburi lau háhuduragun houn amu búngiugu— ladügüba meha lira lun magundanhali lanme hau ani hasufurirubei meha giñe sun wuribani le lunbei lanügüni luriban hóuserun. Anhein méhati asusereda lira, mini lan meha san lira luagu mibihindigiaaya lanme lunya lagundaarun Heowá hau? Uá, lugundun ariñagati meha Lúrudu gayara lan hagiribudun lun Heowá luma lunya gaganbadi hamá lun (2 Lur. 30:​1-3, 17-20). Lidan amu dimurei, gayaraati meha hasakürihan. Anhein méhati hadüga ítara, lanügayabaña meha Heowá hárigoun ani labinirayabaña meha.

5. Ida liña meha larufuduni Heowá masaminarun lan máraninaali lan hawaguti lumutuniña? (2 Urúeigu 17:​13, 14).

⁵ Ebedaaguatiña meha lumutuniña Heowá lun saragu wéiyaasu. Huduguatiña meha houn amu búngiugu, adüga hagía amu burí katei le hanarimeti luriban. Ani súfuri hamuti meha wuribani le lanügübei luriban hóuserun. Lau sun lira, masaminarunti meha Heowá máraninaali lan hawaguti, ligía meha lóunahanbei saragu profetagu lun línchahaniña lun hasakürihan luma lun hagiribudun lun (aliiha huméi 2 Urúeigu 17:​13, 14).

6. Ida liña meha layusuruniña Heowá lánigu profeta lun larufudahan houn lumutuniña lunti lan hasakürihan? (Ariha humóun giñe iyawaü).

⁶ Súnwandan meha lóunahan Heowá profetagu eweridiraña lubúeingu luma erereha houn. Kéiburi dan meha lóunahanbalin Heremíasi ariñaga houn ísüraelina: “Giribubá nun, mabuchahatu Ísüraeli! Meresibirun nubadibu lau luriban, magañidun aume lun sun dan, lugundun gudemehabutina […]. Buídurügüti lun bánharun luagu adügaadibu lan wuribani, ani mabuchaha ban lun […] Bubungiute” (Her. 3:​12, 13). Yusu lumuti giñe Heowá profeta Hoeli lun lariñagun:  “Giribu humá nun tau sun hanigi” (Hoe. 2:​12, 13). Adügati meha lun lariñaguni Isaíasi dimurei burí le houn: “Chibagua humá hungua, haruma humá! Direi huméi huriban luéi narihin! Hebé hadügün wuribani!” (Isa. 1:​16-19). Adügati meha giñe lun lariñagun Esekiéli houn: “Mabusenruntina lun lounwen gürigia le wuribabei, nabusenrun lun lasansiruni lusan, lun labagaridun”. “Mabusenruntinaga lun lounwen ni aban […]. Dise humá luéi wuribani ábame habagaridun” (Ese. 18:​23, 32). Wéiriti lugundan Heowá dan le hasakürihan gürigia lídangiñe hafigoun lugundun busenti lun hawinwandun lun súnwandan. Furanguti merederun lan Heowá chagu larüna agurabaha lun lídangiñeba lan gürigia le afigouhabei láhücha lagiribudun lun, lubaragiñe lira, álugati líderaguni lun lasakürihan. Ariha wamá fiu kesi.

7. Ka meha larufudahabei Heowá houn lumutuniña lau layusuruni likesin Oseasi tuma lani weiriou?

⁷ Teni wamá lun ida liña lan meha layusuruni Heowá likesin profeta Oseasi tuma Gómerü, to lani weiriou, lun larufudahan houn lumutuniña. Agabaraha tumuti meha Gómerü Oseasi, ani lau lásügürün dan, ígira tumuti hawagu amu wügüriña. Saminati meha san Heowá máraninaali lan tuáguti Gómerü? Kei ariha lani Heowá kátima lan tídanbei hanigi gürigia, aba meha lariñagun lun Oseasi: “Beiba adariha aban würi to hínsiñetu lun tubúali, to agabaraha tumuti túmari. Ítara liña hínsiñe Ísüraelina nun, […] íbini houdin hárigi búngiugu terencha” (Ose. 3:1; Ari. 16:2). Mabulieida waméi anuhagua lan meha Gómerü adaagua figóu wéiriti dan le lamuriahanbei Heowá luma Oseasi lun feruduna lanu luma lun larandarun tuma. a Yusu lumuti meha Heowá sügǘ le lun larufuduni houn lumutuniña marihin lániña kamá máraninaaña. Ani lau sun lan meha añahagua lan adaagua figóu le wéinamuti, hínsiñememegiña lan meha lun. Sigiti óunaha profetagu lun líderaguniña asaküriha luma lun hasansiruni habagari. Mini lan san le lóuchuba lan Heowá, le arihubarun anigi, lun líderagun aban gürigia lun lasakürihan lau sun anihagua lan gürigia ligía adüga somu figóu wéiriti? (Ari. 17:3). Ariha waméi.

IDA LIÑA LÍDERAGUNIÑA HEOWÁ HA AFIGOUHABAÑA LUN HASAKÜRIHAN?

8. Ka meha ladügübei Heowá lun louchun líderaguni Kaín lun hasakürihan? (Agumesehani 4:​3-7; ariha humóun giñe iyawaü).

⁸ Kaín meha furumiñetibei liráü Adán tuma Ewa. Ani galagante lumuti luriban hagaburi lagübürigu lánina hígiraguagüdün houngua lun figóu. Ligía meha tariñagunbei Bíbülia “wuriba lan meha le ladügübei Kaín” (1 Huan 3:12). Háfuga ligía meha lébunabei magundan lan Heowá ni lau Kaín ni lau lidewese dan meha le ladügünbei aban adagaragüdüni lun. Lubaragiñe hamuga méhati lasansiruni Kaín ligaburi, ábarüga “lagañidun […] saragu” ani “aba larufudun luriban igibu”. Ka meha ladügübei Heowá? Aba layanuhan luma (aliiha huméi Agumesehani 4:​3-7). Ayanuhati meha Heowá lau ínsiñehabuni luma Kaín. Chóurugüda lumuti lun gayara lan libihin lun lagundaarun lau ani wéridi lumuti luagu le gayaraabei lasuseredun anhein meha masansirun lan luriban lóuserun. Ma lirun maha lan meha Kaín laganbuni Heowá, mígirun ligía lun líderaguni lun hasakürihan. Íbini ítara, madügünti luriban lóunabun Kaín lun masigi lan Heowá áfaagua lun líderaguniña gürigia lun hasakürihan.

9. Ida liña meha líderaguni Heowá Dawidi lun hasakürihan?

⁹ Wéiriti meha línsiñe urúei Dawidi lun Heowá. Ligía meha lariñagubei: “Aban wügüri le aubei nagundaara [Dawidi]”(Adü. 13:22). Lau sun lira, adügati meha Dawidi luéinamun burí figóu, kéiburi agabarahani luma áfarahani ani según lariñaguni  Lilurudun Moisesi, lunti meha lounwen luagu lira (Fad. 20:10; 1 Lur. 35:31). Keiti weiri lubéi lubuidun Heowá, aba meha lóunahani profeta Natán ayanuha luma Dawidi íbini meha marufudungili lan Dawidi ni murusun asakürihani. b Aba meha labahüdagun Natán aban sügǘ lun lánhingichunu lanigi Dawidi. Ñéinhali méhati gunfuranda lani urúei Dawidi afigouhaali lan ligibugiñe Heowá ani aban lasakürihan (2 Sam. 12:​1-14). Abürühati meha Dawidi aban lubuidun sálumu le arufudubalin lueirin luriban lasandiragun lungua lidoun dan ligía (Sal. 51, ichügüdinaü). Lidan sun dan le sügühalibei, húuhali sálumu le lun líchugun gurasu houn saragu gürigia ha afigouhaañabaña ani ínchaha lumutiña lun hasakürihan. Ma gúndaagüda lumutiwa wasubudiruni íderagua lani meha Heowá Dawidi lau ínsiñehabuni lun hasakürihan?

10. Ida liña hasandiragun hungua lau hasubudiruni gaguraasun lan Heowá wabá ani feruduna lániwa?

¹⁰ Úati figóu unti lánhara Heowá, iyereeguti sun luwuyeri figóu lun (Sal. 5:​4, 5). Ani íbini subudi lani gafigoun wamá súngubei wagía, wéiriti wínsiñe lun darí lun busén lan líderaguniwa ageindagua luma figóu. Súnwandan louchun líderaguniña íbini hátima wéiribei hafigouhan lun hasakürihan luma lun hayarafadun lun. Ma lueirin awalidaguni le wasandirubei lau wasubudiruni katei le! Dan le wararamagun asaminara luagun luguraasun luma líchigadi Heowá ferudun, ínchaha lumutiwa lira lun úaraguameme wamá lun luma lun wasakürihan lau lóufudagun ánhawa afigouha. Guentó, ariha waméi ka lan meha hafurendeirubei lani Hesusu disipulugu luagu asakürihani.

LE MEHA HAFURENDEIRUBEI LANI HESUSU DISIPULUGU LUAGU ASAKÜRIHANI

11, 12. Ka meha labahüdagubei Hesusu lun larufuduni aranseñu liña lan Lúguchi súnwandan lun líchugun ferudun? (Ariha humóun iyawaü).

¹¹ Dan meha le chülümémeeli Mesíasi ubouagun, aba meha layusuruni Heowá Huan le Abadiseihabei lun lapurichihan houn gürigia luma lun línchahaniña lun hasakürihan. Dan méhati le lagumeserunbei Hesukrístu apurichiha, ínchaha lumutiña giñe gürigia lun hasakürihan (Mat. 3:​1, 2; 4:17).

 ¹² Dan meha le lapurichihanbei Hesusu ubouagu, arufudahati houn gürigia luagu aranseñu liña lan Lúguchi súnwandan lun líchugun ferudun. Furanguti larufuduni katei le lau abahüdaguni luáguti isaani le acharagadubei. Aba meha lidin nibureinti le hábiñegiñe ani aba lanügün aban ibagari le mabuidunti. Lauti lásügürün dan, aba “lasaminarun” luouguoun ani aba lagiribudun hábiñoun. Ka ladügübei lúguchi? Ariñagati Hesusu: “Dísegi liña, aba larihini úguchili irahü le, aba lagudemedagun lun. Aba léibaagun lubaroun, aba lóuburuni, aba lachuuruni”. Saminati yebe isaani le lamuriahan luma lúguchi lun leresibiruni keisi aban idamuni. Ánheinti úguchili, wéiriti meha layumahan lun ferudun lani lisaani luma lun lígirun lunya tílana lan luban. Ariñagati: “Anihán niráü le, [ . . . ] féridihali yebe gama lumoun darí wamá” (Luk. 15:​11-32). Chóuruti lubaragiñe lan meha liabin Hesusu ubouagun, gibe lan meha wéiyaasu larihini Lúguchi arufuda gudemehabu houn afigouhatiña ha asakürihabaña. Ligía meha gayara lubéi layanuhan lidan aban lubuidun igaburi luagu ida liña lan larufudun Wáguchi le siélubei gudemehabu houn gürigia.

13, 14. Ka meha lafurendeirubei apostolu Féduru luagu asakürihani, ani ka larufudahabei houn amu luagu katei le? (Ariha humóun giñe iyawaü).

¹³ Gíbeti meha katei lafurendeirun apostolu Féduru lúmagiñe Hesusu luagu asakürihani luma lichugún ferudun. Adügati meha Féduru bandi charati ani súnwandan meha aranseñu liña lan Hesusu lun feruduna lani. Kéiburi dan le leyeedagunbei Féduru lau Hesusu ǘrüwa wéiyaasu ani aba lasandiragun lungua wuriba lárigiñe (Mat. 26:​34, 35, 69-75). Lau sun lira, lárigiñebei láguyugun Hesusu, aba larufudagun lungua lun Féduru ani genegeti lábuguarügüñein lan Féduru oura ligía (Luk. 24:​33, 34; 1 Ko. 15:​3-5). Kei meha subudi lubalin Hesusu asakürihaali lan Féduru luagu le ladügübei, chóuruti meha meferidirun lani chansi ligía lun líchugun gurasu lun  luma lun lachoururagüdüni lun feruduna laali lan (ariha huméi Márükosu 16:7 luma abürüdǘni lánina aturiahani “y a Pedro”).

¹⁴ Ariha lumuti meha Féduru lungua kátima lan mini lubéi asakürihani luma leresibirúniwa ferudun. Ligía meha gayara lubéi larufudahan luagu katei le houn amu gürigia. Lau lásügürün dan, lidan meha Fedu le gíribei Pentekosutesi, ruti Féduru aban yanu houn saragu huríu le ídanbei laritaguagüdaña hagía lan meha áfarubalin Mesíasi ani ínchaha lumutiña lau ínsiñehabuni lun hadügüni le: “Asaküriha humá; giribu huguyame lun Bungiu, chibawa láamuga hifigoun” (Adü. 3:​14, 15, 17, 19). Lau dimurei burí le larufudei Féduru lunti lan lasansiruni gürigia le asakürihaalibei ligaburi lisaminan, lígiruni luriban üma ani gumese ligíame awinwanda kei línsiñe lun Bungiu. Ariñagati meha giñe apostolu Féduru houn huríu hagía lachibubei lan Heowá hafigoun, lidan amu dimurei, labulieidúaba lan hafigoun sunsuinagubei. Ani, saragu irumu lárigiñe, ariñagati Féduru luagu Heowá: “Gaguraasunrügüti habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia” (2 Fe. 3:9). Ma lubuidun wasubudiruni gayara lan feruduna lániwa Heowá sunsuinagubei, íbini ánhawa adüga aban figóu le wéiriti!

15, 16. a) Ida liña meha lafurendeirun Pábulu luagu ferudun? (1 Timotéu 1:​12-15). b) Kaba uagu wayanuha lidan leweñegua aturiahani?

¹⁵ Míbetiña gürigia emegeirutiña hasakürihan lídangiñe saragu figóu kei meha Saulu le tárüsuna. Éibaaha lumutiña meha wügüri le lánigu Kristu disipulugu lau furundei. Ligíati, chóuruti samina hamá meha hiibe-agei hádangiñe maweiyasunbei lan Saulu asansira. Ánheinti Hesusu, masaminarunti meha ítara. Dandu ligía kei Lúguchi ténitiña meha lun lubuidun burí igaburi le luágubei Saulu. Ariñagati Hesusu luagu: “Anúadira naali wügüri ligía lun ladimurehan nuagu” (Adü. 9:15). Ani adügati meha Hesusu aban milaguru lun líderaguni Saulu lun hasakürihan (Adü. 7:​58–8:3; 9:​1-9, 17-20). Dan lárigiñe, dan meha le ladügagunbei Saulu lungua kristiánume ani aba lasubudirúniwa kei apostolu Pábulu, ruti seremei dandu lun Heowá kei lun Hesusu luagu gudemehabu luma areini le meha aubei hóuserei (aliiha huméi 1 Timotéu 1:​12-15). Buin lau eteingiruni tidan lanigi lariñaga: “Arufuda lani Bungiu lareini bun lun gayaraabei lan basakürihan” (Rom. 2:4).

¹⁶ Aban weyu, aba líchugun Pábulu fe anihein lan meha aban hádangiñe lílana damuriguaü le Korintubei adaagua magíaguni. Ida liña meha lahandilihani Pábulu turobuli ligía? Aba meha larufudahan houn luagu línsiñehabu Heowá, luagu ligaburi lererehan luma luagu lunti lan larufudúniwa gudemehabu. Wayanuhaba buidu buidu luagu katei le lidan leweñegua aturiahani.