1, 2. a) Ida liña larihiniña Heowá ha afigouhabaña ani masakürihantiña? b) Ka labusenrubei Heowá?

 MAGUNDANTI Heowá hau ha adügübaña wuribani ani mígirunbei lun herederun gürigia ha adaagubaña figóu wéinamuti hadan lumutuniña (Sal. 5:​4-6). Ani lau sun magurabun lan Heowá lun machararunbadiwa lan ladüga subudi lani gafigoun wamá, agurabati lun gaganbadi wamá lun lilurudun le wadarirubei tidan Lererun (Sal. 130:​3, 4). Añahein gürigia ha áutiña magundan lan Bungiu ladüga wuriba hamá ani “arufudahatiña luagu gayara lan hadügün gürigia furumiñeguarügü katei mabuidunti, ani mabeichun lubaña lan Bungiu luéigiñe, ladüga lueirin lareini” (Hud. 4). Le linarün katei, ariñagatu Bíbülia lagumuchuba lan Bungiu hau sun gürigia wuribatiña lídanme wuribu le gíribei Arümahedón (2 Fe. 3:7; Aruf. 16:16).

² Mabusenrunti Heowá lun leferidirun ni aban gürigia. Kei wafurendeiruni lidan burí aturiahani le lubaragiñebei le, furanguti tarufudahani Bíbülia busén lan Heowá “lun hasakürihan sun gürigia” (2 Fe. 3:9). Áyeiha hamuti wéiyaaña lidan afiñeni ligaburi lóuserun Heowá lau háfaagun lun híderaguniña ha adügaañabaña figóu wéinamuti lun hasakürihan luma lunya gamadagua hamá luma. Ani adüga hamuti wéiyaaña katei lira lau gaguraasuni (Isa. 6:9). Híruti añahein lan máhatiña lun híderawagun. Madügüntiña gasu hau wéiyaaña lidan afiñeni ha áfaagubaña, saragu wéiyaasu, lun hínchahaniña lun hasakürihan. Ka lunbei ladügǘniwa lidan burí kesi le?

 “SAGÁ HUMÉI GÜRIGIA LE WURIBABEI HAGANAGUAGIÑE”

3. a) Según Bíbülia, ka lunbei ladügǘn anhein maha gürigia le afigouhabei lun lasakürihan? b) Anhein maha gürigia lun lasakürihan, ka uagu gayara lubéi wariñagun ligía guánarügü lan asagaraguagüdübei lungua lídangiñe damuriguaü?

³ Ánheinti maha lubéi aban gürigia le adügaalibei aban figóu wéiriti lun lasakürihan, úabei amu árani luéidigia gaganbadi hamá wéiyaaña lidan afiñeni lun gumadi tídangiñeti Bíbülia le: “Sagá huméi gürigia le wuribabei haganaguagiñe” (1 Korintuna 5:​13, TNM). Gayaraati lariñawagún gürigia guánarügü lan asagaraguagüdübei lungua lídangiñe damuriguaü lau ligaburi lóuserun; lidan amu dimurei, lalubahañein le lábunagubei (Gal. 6:7). Ka uagu? Ladüga lumahan ladügün gasu hau wéiyaaña lidan afiñeni ha óuchubaña saragu wéiyaasu lun híderaguni (2 Uru. 17:​12-15). Lau ligaburi lóuserun gürigia ligía, arufudati mabusenrun lan lun gaganbadi lan lun lugumadin Heowá (2 Lur. 30:​19, 20).

4. Dan le lasagarún aban gürigia lídangiñe damuriguaü, ka uagu lichugúa aban awisahani houn íbirigu?

⁴ Dan le sagawaali aban gürigia lídangiñe damuriguaü, ladüga adügaali lan aban figóu le wéiriti ani masakürihanti, lichugúba aban awisahani houn lílana damuriguaü luagu mámaali lan gefenti luagu Heowá gürigia ligía. a Mama lun lanügagüdüniwa gürigia ligía busiganu lichugúa awisahani le, lichugúba lun gayara lan gaganbadi hamá íbirigu lun gumadi le tídanbei Bíbülia luáguti moun lumuti lan hasigirun óundaragua ni eiga luma (1 Ko. 5:​9-11). Ru lumuti Heowá gumadi le woun lun wabuidun guánarügü. Lugundun abürühati meha apostolu Pábulu luagu “résigüda lanu murusun lébini sun fulúaru to ídounboun lichugúa” (1 Ko. 5:6). Anhein hamuga masagarún aban afigouhati le máhati lasakürihan lídangiñe damuriguaü, gayaraabei hamuga hasaminarun ha híbiri íbirigu mama lan mosu háfaagun lun úaragua lan habagaridun luma lilurudun Heowá (Ari. 13:20; 1 Ko. 15:33).

5. Ida luba warihini gürigia le mámaalibei gefenti luagu Heowá ani ka uagu?

⁵ Ida lubati warihini gürigia le mámaalibei gefenti luagu Heowá? Lau sun móundarunhaadiwa lanme luma, moun lumuti warihini kei máraninaali, lubaragiñe lira, lunti warihini kei aban mudún to gayaraati tagiribudun lárigiñe féridiharu lan. Mabulieida waméi derege laali lan meha gürigia ligía libagari lun Heowá. Le turobulibei mama lan lagunfuliruña guentó lau le füramase lubéi lun Heowá ani lídanñein peliguru (Ese. 18:31). Íbini ítara, sunme anihagua lan dan ani aranseñu ligíame Heowá lun larufudun gudemehabu, anihein emenigini luagu lagiribuduba lan gürigia ligía. Ida lubati híderaguni wéiyaaña lidan afiñeni gürigia le mámaalibei lílana damuriguaü?

KA LUNBEI HADÜGÜNI WÉIYAAÑA LIDAN AFIÑENI LUN HÍDERAGUNIÑA GÜRIGIA HA SAGAWAAÑABAÑA LÍDANGIÑE DAMURIGUAÜ?

6. Ka lunbei hadügüni wéiyaaña lidan afiñeni lun híderagun aban gürigia le sagawaalibei lídangiñe damuriguaü?

⁶ Ka lunbei hadügüni wéiyaaña lidan afiñeni dan le lasagarún aban gürigia lídangiñe damuriguaü? Mararamagunbei háfaagun lun híderaguni lun lagiribudun lun Heowá. Danme le hariñaguni wéiyaaña lidan afiñeni ha óundaragubaña luma gürigia ligía mámaali lan lílana damuriguaü, hafuranguagüdübei giñe lun ka lan lunbei ladügüni lun lagiribudun. Lanwoun lira, lidan liibe-agei kesi, hálügüdübei anhein gayaraaya lubéi hóundaragun luma fiu hati lárigiñe lun harihini ida liña lan léibugun katei. Anhein ánhara, dánmeya le hadamuridagun luma hínchahabei lau ínsiñehabuni lun lasakürihan luma lun lagiribudun. Ánheinti masansirungili lubeime ligaburi lúmounme dan ligía? Íbini ítara, hasigiruba wéiyaaña lidan afiñeni áfaagua  lun híderaguni lau hadamuridagun luma kada átiri dan.

7. Ida luba háyeihani wéiyaaña lidan afiñeni lugudemehabu Heowá lidan ligaburi hóuserun aban gürigia le sagawaali lídangiñe damuriguaü? (Heremíasi 3:12).

⁷ Mosu háfaagun wéiyaaña lidan afiñeni lun háyeihani lugudemehabu Heowá lidan ligaburi hóuseruniña gürigia ha mámaañabaña lílana damuriguaü. Kéiburi meha dan le maganbadi habéi ísüraelina lun Heowá lidan binadu dan, magurabunti meha lun hasakürihan lubaragiñe lálugun líderaguniña. Kei warihini lidan libiaman aturiahani le tídanbei garüdia to, yusu lumuti meha Heowá likesin profeta Oseasi lun larufuduni weiri lan lugudemehabu. Amuriahati meha Heowá luma Oseasi lun lidin arandara tuma lani weiriou lau sun meha anuhagua lan würi tuguya afigouha (Ose. 3:1; Mal. 3:7). Ítara kei Heowá, busentiña giñe wéiyaaña lidan afiñeni tídangiñe sun hanigi lun híderaguniña gürigia ha afigouhaañabaña lun hasakürihan luma lun hagiribudun tidoun lóundarun Heowá, ani áfaaguatiña lun híderaguniña lun ménrengun lan houn hadügüni katei le (aliiha huméi Heremíasi 3:12).

8. Ida liña líderaguniwa abahüdaguni luáguti isaani le acharagadubei lúntima gunfuranda wamani lugudemehabu Heowá? (Lúkasi 15:7).

⁸ Haritagua waméi giñe abahüdaguni luáguti isaani le acharagadubei, le uágubei wayanuha lidan libiaman aturiahani le tídanbei garüdia to. Meredeti meha úguchili le agurabaha lun lamuriahan lisaani ferudun luma. Kei larihini, “aba léibaagun lubaroun, aba lóuburuni, aba lachuuruni” (Luk. 15:20). Ligiamémeba hamuga ladüga furumiñeguarügü úguchili le hínsiñehabuti. Aban katei ítarati hasandirubei wéiyaaña lidan afiñeni hawagu íbirigu ha díseeñabaña luéi Heowá, ligía háfaagunbei lun híderaguniña lun hagiribudun (Luk. 15:​22-24, 32). Dan le lagiribudun aban íbiri lidoun damuriguaü, anihein ugundani sielu. . . luma ubouagu! (Aliiha huméi Lúkasi 15:7).

9. Ka agunbirahani ladügübei Heowá lau ínsiñehabuni houn ha adügaañabaña aban figóu le wéiriti?

⁹ Furanguti larufuduni sun le aturiaha wamaalibei darí guentó mabusenrun lan Heowá lun herederun afigouhatiña ha masakürihantiña tidan lóundarun. Íbini ítara, michu lumuti lanagan hawagun gürigia ha, busenti lun hagiribudun. Lidan Oseasi 14:​4, ariñagati Heowá hawagu ha asakürihabaña: “Nagaraniha houn lídangiñe hariban; hínsiñebaña nun lau sun madüna hamani, ladüga díreiha nigañi hawéi”. Lunti lubeiti hetenirun wéiyaaña lidan afiñeni lun furumiñeguarügü asansiruni le harihin luagu gürigia le arufuduti gumeseeli lan asaküriha. Lunti giñe furese lan hadügüni gürigia ha díseeñabaña luéi Heowá sun le emegeirúbei lunya hagiribudun lun.

10, 11. Ida liña houchun wéiyaaña lun híderaguniña gürigia ha meha asagarúbaña lídangiñe damuriguaü?

¹⁰ Ida lubati hahandilihani wéiyaaña lidan afiñeni hakesin ha meha asagarúbaña lídangiñe damuriguaü lidan dan le sügühalibei? Háfuga masigihaña lan gürigia hagía adügei figóu le meha lébunabei hasagarún, ani másiñati maritagun hamaali lan ka lan meha uéigiñe hasagarúa. Meberesenga átirihali lan dan lau gürigia lúmagiñe lasagarún lídangiñe damuriguaü, háfaaguba wéiyaaña lidan afiñeni lun hadariruniña sun gürigia ha luma lun hachülürün le ñein habéi, lun hafurieidun hama luma lun hínchahaniña lau ínsiñehabuni lun hagiribudun lidoun damuriguaü. Anhein lüha lubéi lúmagiñe lasagarún aban gürigia lídangiñe damuriguaü, chóuruti mégeiyaali lan lun lichugún aturiahani tídangiñeti Bíbülia lun. Ligíati, anhein ariñaga gürigia ligía busén lan lagiribudun, háfuga háluahaba lan wéiyaaña lidan afiñeni aban íbiri lun líchugun aturiahani lun, íbini lubaragiñe lanharún lunya lílana lan damuriguaü gürigia ligía.

¹¹ Kei busén hamá wéiyaaña háyeihani lugudemehabu Heowá, áfaaguatiña lun hadariruniña hiibe-agei gürigia ha hayara lun hasubudiragüdüni houn gayaraagili lan hagiribudun, ánhaña  busén. Anhein arufuda aban gürigia asakürihaali lan, gayaraayabei lanharún lun lidan damuriguaü lau lóufudagun (2 Ko. 2:​6-8).

12. a) Ka burí sügǘ ídanbei lunti lan duaritima hamá wéiyaaña lidan afiñeni? b) Ka uagu siñá lubéi wariñagun úabei lan feruduna lániña Heowá gürigia ha adügaañabaña ítaga figóu? (Ariha huméi giñe abürüdǘni).

¹² Anihein kesi le ídanbei mosu lan duari hamá wéiyaaña lidan afiñeni lubaragiñe hánharun lunya lílana lan damuriguaü aban gürigia, kéiburi anhein gadurun lubéi meha gürigia ligía luagu ladügün iwiyei hau irahüñü, lagarabaagun luagun Bungiu o lálugun lígiragun, háfuga lau lagabarahan. Lidan burí kesi le, mosu hachoururuni wéiyaaña buidu buidu le lan lúgubu asakürihaali lan gürigia ligía lubaragiñe hánharun lun  (Mal. 2:14; 2 Tim. 3:6). Lau sun mosu lan hóunigiruniña wéiyaaña lidan afiñeni lílana damuriguaü, gabaroun hamuti giñe lánharayaba lan Heowá hadan lumutuniña houn sun gürigia ha asakürihabaña tídangiñe sun lanigi, ígira hameime hadügün figóu wéinamuti. Ligíati, íbini lunti lan duari hamá wéiyaaña lidan afiñeni danme hahandilihani hakesin gürigia ha adügaañabaña katei burí le wéinamuti luriban, mariñagunbaña maweiyasunbei lan Heowá arufuda gudemehabu lun ítaga gürigia (1 Fe. 2:10). b

LE GAYARAABEI HADÜGÜNI LÍLANA DAMURIGUAÜ

13. Ida liña wóuseruni gürigia le unbei lererehóua ani ida liña wóuseruni le sagawaalibei lídangiñe damuriguaü?

¹³ Kei warihini lidan aturiahani le lubaragiñebei le, anihein dan lichugún awisahani luáguti ererehóuaali lan lun aban gürigia. Dan le lasuseredun lira, gayaraagili wasigirun óundaragua luma gürigia ligía ladüga subudi wamuti asakürihaali lan ani masigihali lan adügei figóu le buga ladügübei (1 Tim. 5:20). Ábanmemegili lílana damuriguaü ani mégeiti lun híchugun íbirigu gurasu lun sigí láamuga adügei katei le buídubei (Ebü. 10:​24, 25). Ánheinti dan le lasagarún aban gürigia lídangiñe damuriguaü, mítaranti lugundun, aba móundaragunhadiwa lan luma gürigia ligía, meigin wagía luma (1 Ko. 5:11).

14. Ka gayaraabei lanúadiruni kada kristiánu, según lariñaguni lisaminan le aranse táalibei Bíbülia lun, lidan hakesin gürigia ha sagawaañabaña lídangiñe damuriguaü? (Ariha humóun giñe iyawaü).

¹⁴ Mini lan san lira dan le lan lasagarún aban gürigia lídangiñe damuriguaü aba lan wíchuguni wanagan luagun? Uá, mama ligía wabusenrubei wariñagun. Lau sun inarüni lan luagu móundaragunhadiwa lanme luma gürigia ligía, ánhawa lígira wasaminan le aranse táalibei Bíbülia lun wadügüni, gayaraabei wagunbirahani —háfuga ladüga waduhe lan o aban lan gürigia le meha úmabei buidu lan wanaagun woungua— lidoun adamuridaguni. Ida lubati wóuseruni anhein achülüra? Luagu meha aban dan, maweiyasunbadiwa hamuga abusura lun. Ánheinti guentó, gayaraabei giñe larihini kada kristiánu kaba lan ladüga según lariñaguni lisaminan lun. Ani lau sun ñéinbaña lan wádangiñe ha masandiraguntiña houngua wuriba lau habusurun lun o híchuguni lubuidun achülürüni lun, meredebadiwa eiga yanu luma gürigia ligía ni ásügüra dan luma.

15. Ka hawuyeri gürigia uágubaña ladimureha 2 Huan 9-11? (Ariha huméi giñe rekuáduru “ Layanuhaña meha san Huan luma Pábulu luagu ligiaméme luwuyeri figóu?”).

 ¹⁵ Másiñati wálügüdagun woungua: “Ma san ariñagatu Bíbülia ánhawa lan abusura lun aban gürigia ítarati, gadan lumutiwa lan giñe ‘wuribani le ladügübei’?” (aliiha huméi 2 Huan 9-11). Lidan burí bérusu le, layanuhóuña hawagu ha agarabaagubaña houngua luagun Bungiu ani adüga hagía lun maganbadi hamá amu lun (Aruf. 2:20). Ligíati mídinbaña lubéi wéiyaaña lidan afiñeni áluaha aban gürigia le arufudahati katei burí le ínchaha lumutiña amu lun hagarabaagun luagun Bungiu o lun hafigouhan. Inarüni gayara lan lachülürün dan lun hasansirun hawuyeri gürigia ha, lau sun lira, sunme añahagua lan óusera ítara, mabusurunbadiwa houn, magunbirahan wamañame lidoun adamuridaguni.

ÁYEIHA WAMÉI LAREINI LUMA LUGUDEMEHABU HEOWÁ

16, 17. a) Ka labusenrubei Heowá lun hadügüni ha afigouhabaña? (Esekiéli 18:32). b) Ida liña hídehan wéiyaaña lidan afiñeni luma Heowá?

¹⁶ Ka furendei wamaalibei lidan seingü aturiahani le? Mabusenrun lan Heowá lun lounwen ni aban (aliiha huméi Esekiéli 18:32). Le labusenrubei, lun harandarun gürigia ha afigouhaañabaña luma (2 Ko. 5:20). Lidan sun dan le sügühalibei, amuriahaali Heowá saragu wéiyaasu hama gürigia ha afigouhabaña lun hasakürihan luma lun hagiribudun lun. Ma lubuidun chansi le hámabei wéiyaaña lidan afiñeni lau gayara lan hídehan luma Heowá íderaguaña ha adügübaña figóu wéiriti lun lasakürihan! (Rom. 2:4; 1 Ko. 3:9).

¹⁷ Ma funa lueirin ugundani le siélubei dan le lasakürihan aban gürigia le afigouhabei! Wéiriti lugundan Wáguchi Heowá dan le lagiribudun aban gürigia lidoun damuriguaü. Sigí wamá lubeiti asaminara hulili luagun lueirin lareini luma lugudemehabu Heowá, lídehaba lira lúntima laganwoundun ínsiñeni le wasandirubei luagu eibu lásügürün dan (Luk. 1:78).