1, 2. a) Katei san figoubei, ani ida luba wagañeiruni? (Ariha huméi giñe “Ariñahani súdiniti”). b) Kaba wariha lidan aturiahani le luma lidan le líbiri aturiahani le tídanbei Garüdia Awisahatu to? (Ariha huméi giñe ariñahani le gíribei “Aban abürüdǘni hun, huguya le aliihabei” le tídanbei Garüdia Awisahatu to).

 IDA liña larufuduni Heowá weiri lan hínsiñe lun? Gayaraabei hasubudiruni óunabagülei anhaün aturiaha libügürü sun le adüga láalibei lun lesefurunün lídangiñe figóu luma óunweni. Aban lanarime ágani figóu a ani lásiñarubei ni aban wádangiñe agañeira lau lubafu guánarügü. Sagü weyu hafigounhan sun gürigia, ligía wóunwegunbei (Rom. 5:12). Lau sun lira, anihein ñunsu buiti: chouru wamuti gayara lan wagañeiruni figóu lau lídehan Heowá.

² Barühali Heowá kéiburi 6,000 irumu íderaguaña gürigia ageindagua luma figóu. Ka uagu? Ladüga weiri lan wínsiñe lun. Lúmagiñebei meha ladügüniña gürigia, sanditi aban óunwenbu ínsiñeni wawagu, ligía aranseñugubeiñein lubéi lun ladügün óunwenbu burí katei lun líderaguniwa lidan ageindaguni le. Subudi lumuti Bungiu lidoun lan óunweni lanügawa figóu ani mabusenrunti lun lounwen ni aban wádangiñe, busenrügüti lun wawinwandun lun súnwandan (Rom. 6:23). Ítara liña, ligía labusenrubei hun! Lidan aturiahani le, wóunabuba ǘrüwa álügüdahani: 1) ka meha ladügübei Heowá lun líchugun emenigini woun wagía le gürigia?, 2) ka meha hadügübei gürigia lidan tidaani Bíbülia lun lagundaarun Heowá hau íbini gafigoun hamá? ani 3) ka meha ladügübei Hesusu lun lesefuruniña gürigia lídangiñe figóu luma óunweni?

 KA MEHA LADÜGÜBEI HEOWÁ LUN LÍCHUGUN EMENIGINI WOUN WAGÍA LE GÜRIGIA?

3. Ka meha adügübei lun gafigoun lan Adán tuma Ewa?

³ Dan meha le ladügünbalin Heowá Adán tuma Ewa, busenti yebe lun gunda lan habagari. Ligía meha líchugunbei aban lubuidun fulasu houn lun ñein lan heredera, ani lau lamarieidagüdüniña ruti aban lubuidun idewesei houn luma chansi lun habuinchagüdüni Ubóu hau harahüñü, adüga hagíame lun aban lan paraísu kei meha fuluri-agei Edén. Ábanrügüñein meha katei lamuriahan hama lun madügün hamani ani wéridi lumutiña luagu hóunweguba lan ánhaña maganbadi. Subudi wamaali le asuseredubei: aba liabin aban sífiri wuribati, le mínsiñehabubei ni lun Heowá ni houn ani aba línchahaniña lun hafigounhan. Lubaragiñe hamuga méhati lafiñerun Adán tuma Ewa luagu Háguchi le hínsiñehabubei houn, ábarüga hadügün gasu lau Mafia ani aba hafigouhan. Suseretiti le buga lariñagubei Heowá houn luagu ligíaba lan asusereda. Lúmagiñeti weyu ligía lun lubaruaguóun, aba hagagibudagun luma wuribani le lanügübei hamaganbadin: aba hagumeserun aweiyada ani lau lásügürün dan, aba hóunwegun (Agu. 1:​28, 29; 2:​8, 9, 16-18; 3:​1-6, 17-19, 24; 5:5).

4. Ka uagu iyereegu lubéi figóu lun Heowá ani ka uagu líderaguawa ageindagua luma? (Rómana 8:​20, 21).

⁴ Lau sun weiri lan lirun abahüdaguni le, adügaali Heowá lun labürüdǘn wabá tidan Bíbülia lun gunfuranda wamá aban lueirin inarüni: ka lan uagu weiri lubéi liyereegun figóu lun. Dísegüda lumutiwa figóu luéi Wáguchi hínsiñehabuti le siélubei ani figouméme lébunabei wóunwegun (Isa. 59:2). Ani ladügatima dísegüda lániwa figóu luéi Heowá, hanarime lubéi línsiñe figóu lun ánheli wuribati le adügagubei lungua Satanásime. Ligía meha lébunabei línchahani Mafia Adán tuma Ewa lun hafigounhan ani ligía giñe anihagua lubéi áluga lóuchaguniwa lun wábürühan lidoun figóu. Másiñati meha samina lan Satanási gáñeihali lan lau le ladügübei lidan fuluri-agei Edén. Le ibidiñebei lun, mama lan murusun ínsiñeni le lasandirubei Heowá. Masansirun lumuti Bungiu le labusenrubei houn ladügawagun Adán tuma Ewa. Hínsiñetiña gürigia lun Heowá, ligía weyuméme lubéi le lafigouhanbei Adán, aba líchugun Bungiu emenigini houn sun gürigia (aliiha huméi Rómana 8:​20, 21). Subudi lumuti meha Heowá ñéinbaña lan gürigia ha hínsiñehabutiña lun hadan ladügawagun Adán ani háluahabei lan lídehan lidan hageindagun luma figóu. Keiti le aban lan Úguchili hínsiñehabuti Heowá ani ligía adügübaliwa, ladügübei meha sun liyaraati lun gayara lan wayarafadun lun luma lun wagañeiruni figóu luma óunweni. Ida luba méhati libihini lira?

5. Ídabuga ani ida liña líchugun Heowá emenigini houn gürigia luagu furumiñeti wéiyaasu? (Agumesehani 3:15).

⁵ (Aliiha huméi Agumesehani 3:15). Ruti Heowá emenigini houn gürigia luagu furumiñeti wéiyaasu dan le lariñagunbalin ida luba lan meha lagumuchun Satanási. Weyu ligía, ayanuhati Bungiu luagu aban “adügawaguni” le meha lunbei lagumuchun lau Satanási aransehaléime sun turobuli le agumeserubei lidan fuluri-agei Edén (1 Huan 3:8). Ani lubaragiñeme buga lasuseredun lira, ladügüba meha Satanási lun lafarúniwa Adügawaguni ligía hilagubei. Wéiribei meha ligari katei le lun Heowá lidan tilulin-agei lanigi. Íbini ítara, aranseñu liña meha Heowá lun lásügürün lídangiñe lanarime igarigu ligía ladüga subudi lani ítararügübei lan meha gayara lan hesefurun saragu míñunu gürigia lídangiñe figóu luma óunweni.

KA MEHA HADÜGÜBEI GÜRIGIA LIDAN TIDAANI BÍBÜLIA LUN LAGUNDAARUN HEOWÁ HAU ÍBINI GAFIGOUN HAMÁ?

6. Ka meha hadügübei wügüriña afiñetiña kéiburi Aweli luma Noé lun hayarafadun lun Heowá?

⁶ Ida luba méhati habihin gürigia hayarafadun lun Heowá lau sun gafigoun hamá? Heowá guánarügü afuranguagüdübalin katei le murusun murusun lau lásügürün dan. Aweli, le libiamanbei lisaani Adán tuma Ewa, ligía meha furumiñetibei gürigia le arufudubei afiñeni luagu Heowá lárigiñebei hebedaagun lagübürigu.  Hínsiñeti meha Heowá lun Aweli ani busenti meha lagundaaragüdüni luma layarafadun lun. Ani kei meha hóuniri lubéi mudún ligía, ragüti fiu “hádangiñe furumiñetiña hama habuidun-agei harahüñü lilügüniña mudún” lun ladagaragüdüniña lun Heowá. Kati asuseredubei? “Aba larihin Bungiu lau saragu ugundani luagun Aweli labu lidewese” (Agu. 4:4). Lau lásügürün dan, aba meha giñe lánharun Heowá lun burí sákürifisiu libe lira, le hámagiñeti amu gürigia ha giñe hínsiñehabubaña lun ani afiñe hagía luagu, kéiburi Noé (Agu. 8:​20, 21). Arufudati meha le gayara lan hagundaaragüdüni gürigia Heowá luma hayarafadun lun íbini gafigoun hamá. b

7. Ka wafurendeirubei lídangiñe aranseñu liña lan meha Abüraámü lun lederegeruni lisaani keisi sákürifisiu?

⁷ Amuriahati meha Heowá luma Abüraámü, ábanya wügüri le wéiribei lafiñen, lun ladügün aban katei le hanarimeti lénrengun: ladagaragüdüni Isaakü, le lisaani, keisi sákürifisiu lun Bungiu. Chóuruti sandí lan meha Abüraámü wéiriya lan ligari katei le lamuriahabei Heowá luma. Íbini ítara, adüga lumuti le ariñawagúbei lun. Dan yebe le láfaraali lubéi Abüraámü Isaakü, aba lararamuni Heowá luéi ladügüni. Lau sun lira, ídehati meha sügǘ le lun harihini sun gürigia ha wéiribei hafiñen aranseñu luba lan meha Heowá lun ladügün aban óunwenbu sákürifisiu: lederegeruni libagari Liráü le wéiribei línsiñe lun hawagu sun gürigia (Agu. 22:​1-18).

8. Ka meha larufudubei adagaragüdüni le meha adügǘbei lábugiñe Lilurudun Moisesi? (Fádirigu 4:​27-29; 17:11).

⁸ Saragu sígulu lárigiñe, dan meha le líchugunbalin Heowá Lilurudun houn ísüraelina, ariñagati meha houn mosu lan hadagaragüdün animaalugu lun lun gayara lan ferudunawa lan hafigoun (aliiha huméi Fádirigu 4:​27-29; 17:11). Arufudati meha adagaragüdüni burí ligía, ladügüba lan meha Heowá aban adagaragüdüni le buítimati, ladüga lesefurubaña lan gürigia sunsuinagubei lídangiñe figóu. Adügati giñe Bungiu lun hafuranguagüdüni lánigu profeta lasufuriruba lan meha Adügawaguni le füramase lubéi —lememe Liráü Bungiu le ábanrügüti— ani lafarúba lan meha hilagubei. Ítara luba meha sákürifisiu ligía kei meha dan le tadagarawagüdün aban mudún lun Heowá (Isa. 53:​1-12). Samina humá luagun le: lederegerubei meha Heowá Liráü le hínsiñebei lun keisi sákürifisiu lun lesefuruniña sun gürigia lídangiñe figóu luma óunweni, huguya haganagua.

KA MEHA LADÜGÜBEI HESUSU LUN LESEFURUNIÑA GÜRIGIA LÍDANGIÑE FIGÓU LUMA ÓUNWENI?

9. Ka meha lasubudirágüdübei Huan le Abadiseihabei? (Ebüréu 9:22; 10:​1-4, 12).

⁹ Lidan irumu 29, dan meha le larihinbalin Huan le Abadiseihabei Hesusu le Nasarétüna, aba lariñagun: “Anihán mudún le lóunahabei Bungiu lun lagidaruni hafigoun gürigia” (Huan 1:29). Ítara liña lasubudiragüdüni Huan Hesusu lan Adügawaguni le meha füramase lubéi Bungiu. Líchugubei meha Hesusu libagari keisi sákürifisiu wawagu. Ítarati, derebugutimahali meha hemenigin gürigia luagu lagumuchúba lan lau figóu luma óunweni (aliiha huméi Ebüréu 9:22; 10:​1-4, 12).

10. Ida liña meha larufuduni Hesusu liábiña lan áluahaña gafigountiña?

¹⁰ Wéiriti meha letenirun Hesusu houn ha wuribabei hasandiragun houngua ladüga gafigoun hamá ani agunbiraha lumutiña lun hadügagun houngua lánigume disipulu. Subudi lumuti meha Hesusu figoutima lan lébunabei hasufurirun sun gürigia. Ligía meha másuhan lubéi lun layarafadun houn wügüriña hama würiña ha meha wuribabei hiri. Ligía guánarügü ariñagubei: “Ha magadiñebaña, memegeiruntiña surusia; ha sándibaña, hagía emegeirubaña surusia”. Ani ariñagati giñe: “Mama niábiña áluahaña ha richaguabaña […], niábiña áluahaña gafigountiña” (Mat. 9:​12, 13). Ani arufuda lumuti meha lau burí katei le ladügübei. Kéiburi dan le feruduna lubalin  tifigoun würi to achibubalin lugudi lau táguira (Luk. 7:​37-50). Lau sun meha giñe subudi lani Hesusu wuriba lan ligaburi tanügüni samariana, to úmaboun ladunragua lubadu aban welu, tibagari, arufudahati inarüni gebegiti tun tídangiñe Lererun Bungiu (Huan 4:​7, 17-19, 25, 26). Ani ruti meha giñe Heowá ubafu lun Hesusu lun láguyuguagüdün hilaaña, dandu wügüriña kei würiña hama irahüñü, ítara liña meha lagañeirun luagu óunweni katei le ídounbei lanügawa figóu (Mat. 11:5).

11. Ka meha uagu manufude habéi gafigountiña hayarafahóun lun Hesusu?

¹¹ Íbini meha gürigia ha adügaañabaña óunwenbu burí figóu, manufudetiña meha lun hayarafahóun lun Hesusu. Maweiriduntu wanigi lau busén hamá meha hadügüni lira lugundun rúguati meha Hesusu lungua lidan halugaarun, óuseralaña lau gudemehabu (Luk. 15:​1, 2). Ariñaga lumuti meha houn buidu lan hadüga lau harufudun afiñeni luagu, ru ligía hafayeiruaha (Luk. 19:​1-10). Arihúati meha lidan ligaburi lóuserun Hesusu áyeiha lani lugudemehabu Lúguchi buidu buidu (Huan 14:9). Dandu meha lau le lariñagubei Hesusu kei lau le ladügübei, arufuda lumuti meha hínsiñe wamá lun Heowá, weiri lan lugudemehabu ani busén lan líderaguniwa lun wagañeiruni figóu. Adügati meha Hesusu lun busén hamá gafigountiña hasansirun luma lun hafalaruni (Luk. 5:​27, 28).

12. Ka meha larufudahabei Hesusu luagu lounwen guánarügü?

¹² Subudi lumuti meha Hesusu buidu buidu kaba lan meha asusereda lun. Ariñaga lumuti meha houn lani disipulugu saragu wéiyaasu lalugurúba lan ani ládarawaguba lan luagu aban  wagabu (Mat. 17:22; 20:​18, 19). Subudi lumuti meha giñe lagidarubei lan lani sákürifisiu figóu ubouagugiñe, ítara kei meha lariñaguni Huan le Abadiseihabei hama ha híbiri profetagu luagu. Arufudahati meha Hesusu lárigiñe lanme lounwen ñéinbaña lan ámuñegueinarügü gürigia ha adügagutiña houngua lánigume disipulu (Huan 12:32). Sun ha afiñerutiña luagu Hesusu ani áyeiha haméi ligaburi, gayaraabei hagundaaragüdüni Heowá luma hesefurún luéi “lugumadin figóu” (Rom. 6:​14, 18, 22; Huan 8:32). Arufudati ganigi lau aranseñu lan lun lounwen lidan aban luriban igaburi lun gayara lan lasuseredun lira (Huan 10:​17, 18).

13. Ida liña meha lounwen Hesusu ani ka wafurendeirubei luagu Heowá lídangiñe sügǘ le? (Ariha huméi giñe dibuhu).

¹³ Alugurúati meha Hesusu, ragǘ hamuti súdaragu, anabúati, ariñawagúati iyeeni luagu, siádiwati ani súfurigüda hamuti. Lagumuhóun, aba meha hádaraguni súdaragu luagu aban wagabu lun háfaruni hilagubei. Awanda lumuti meha Hesusu sun asufuriruni le lau úaraguni. Keiti weiri lan línsiñe Liráü Heowá lun gáriti meha lun larihini sun le adügǘbei lun. Ani íbini mébeha lan lubafu Heowá, meredehan lumutiña ha adügübalin sun lira lun Liráü. Ka uagu? Ladüga lueirin línsiñehabu. Hesusu guánarügü ariñagubei: “Wéiriti hínsiñe gürigia ha ubouagubaña lun Bungiu darí lun lóunahani Liráü le ábanrügüti, lun lounwen luagu hafigoun, lun sun lan ha afiñerutiña luagu, meferidirun hamaamuga, gabagarirügü hamaamuga aban ibagari le magumuchaditi” (Huan 3:16).

14. Ka larufudubei lani Hesusu sákürifisiu hun?

¹⁴ Lídantima sákürifisiu le meha ladügübei Hesusu larihúa lueirin wínsiñe lun Heowá, sun wagía le ladügawagun Adán tuma Ewa, huguya haganagua. Wéiriti hínsiñe lun. Chóuruti adüga lan hasaminarun luagun óunwenbu sákürifisiu le meha aranseñu lubéi Bungiu huagu, lun lesefurunün lídangiñe figóu luma óunweni, lun taweiridun hanigi (1 Huan 4:​9, 10). Busenti Heowá líderaguni kada aban wádangiñe ageindagua luma figóu gayara láamuga wagañeiruni.

15. Ka lunbei wadügüni lun gafanran wamá lidan buiti le líchugubei lani Hesusu sákürifisiu?

¹⁵ Aban idewesei lúmagiñeti Bungiu sákürifisiu le ladügübei Liráü le ábanrügüti lun gayara lan ferudunawa lan wafigoun. Íbini ítara, anihein aban katei le lunti wadügüni. Dandu meha Huan le Abadiseihabei kei Hesukrístu, afuranguagüda hamuti katei lan: “Asaküriha humá, ladüga yarafaali larúeihan Bungiu” (Mat. 3:​1, 2; 4:17). Ligíati, anhein le lubéi lúgubu busén wamá wageindagun luma figóu luma lun wayarafadun lun Wáguchi le hínsiñehabubei, lunti wasakürihan. Kati lílabei asakürihani ani ida liña líderaguniwa lun wagundaaragüdüni Heowá íbini gafigoun wamá? Warihibei lidan leweñegua aturiahani.