1. Dan le ladügün aban gürigia aban figóu wéiriti, ka gayaraabei libihíniwa?

 LIDAN aturiahani le lubaragiñebei le, furendeitiwa ariñaga lani apostolu Pábulu houn lílana damuriguaü le Korintubei ka lan meha lunbei hadügüni lidan likesin aban wügüri le adügübei aban figóu wéiriti. Kei meha masakürihangili lubéi wügüri ligía, mosu meha lasagarún lídangiñe damuriguaü. Lau sun lira, kei larufuduni bérusu le ídangiñebei lasagarúa aturiahani le, gayaraati líderawagun gürigia le afigouhabei lun lasakürihan (Rom. 2:4). Ida liña layusuruniña Heowá wéiyaaña lidan afiñeni lun híderagun aban gürigia le afigouhabei lun lasakürihan?

2, 3. Ka lunbei wadügüni ánhawa íchiga fe adügaali lan aban íbiri aban figóu wéiriti, ani ka uagu?

² Ka hamuga lunbei wadügüni ánhawa íchiga fe luagu adügaali lan aban íbiri aban figóu wéiriti le gayaraabei ladügün lun lasagarún lídangiñe damuriguaü? Lun gayaraabei lan híderaguni wéiyaaña lidan afiñeni íbiri ligía, mosu hasubudiruni ka lan anügübei fulasu. Ligíati, lunti wínchahani lun láluahan ídemuei hama wéiyaaña (Isa. 1:18; Adü. 20:28; 1 Fe. 5:2).

³ Ánheinti mabusenrun lubéi íbiri ligía lun layanuhan hama wéiyaaña? Kei busén wabéi lun liderawagúniwa, wagíaba ayanuha hama wéiyaaña lidan afiñeni. Warufuduña ínsiñehabuni lau wadügüni lira ladüga mabusenrúntiwa lun leferidirun wábiri. Anhein masansirun, lagadeiratimabei lumadagua luma Heowá ani gayaraati giñe ladügün lun layanuhóun wuriba luagu damuriguaü. Íbini hénrengu lan lira, warufuduba ganigi ani wayanuhaba hama wéiyaaña ladüga línsiñe Heowá luma wábiri woun (Sal. 27:14).

 IDA LIÑA HÍDERAGUN WÉIYAAÑA LIDAN AFIÑENI ABAN GÜRIGIA LE ADÜGÜTI ABAN FIGÓUN WÉIRITI?

4. Ka habusenrunbei wéiyaaña lidan afiñeni habihin dan le hadamuridagun luma aban gürigia le adügübei aban figóu wéiriti?

⁴ Dan le ladügün aban íbiri aban figóu wéiriti, hanúadiruba wéiyaaña lidan afiñeni a ǘrüwa hádangiñe ha subudihaña saragu lun hadamuridagun luma afigouhati ligía. Lunti ǘnabugu hamá, subudi hameime íbini lan busén hamá híderaguni afigouhati lun lasakürihan, mafosurun habéi lan lun lasansirun (2 Lur. 30:19). Subudi hamuti mama lan sun afigouhatiña lun harufuduba lan lubuidun igaburi ítara kei meha ladügüni urúei Dawidi (2 Sam. 12:13). Añahein mabusenruntiña lun gaganbadi hamá lun lilurudun Heowá (Agu. 4:​6-8). Lau sun lira, busentiña wéiyaaña lidan afiñeni hadügüni sun hayaraati lun híderaguni afigouhati lun lasakürihan. Ka adundehani hafalarubei wéiyaaña dan le hadamuridagun luma aban gürigia le afigouhabei?

5. Ka adundehani lunbei haritaguni wéiyaaña lidan afiñeni dan le hóundaragun luma gürigia le afigouhabei? (2 Timotéu 2:​24-26; ariha humóun giñe iyawaü).

⁵ Ariha hamuti wéiyaaña lidan afiñeni afigouhati kei aban mudún eferidirutu to wéiriti tebegi (Luk. 15:4 6). Arihúati ítara liña lan lidan igaburi le harufudubei lun dan le hadamuridagun luma, dandu lau ligaburi hayanuhan kei lidan ligaburi hóuseruni. Mayanuhantiña lun lau éregu ni lau magudemehabuni, marihin haméi adamuridaguni ligía kéirügü aban katei le lunti hadügüni. Lubaragiñe lira, arufuda hamuti igaburi le uágubei layanuha 2 Timotéu 2:​24-26 (aliiha huméi). Súnwandan hóuserun lau gamadóuni, areini luma lau darangilaü lun gayaraabei lan hachülürün tidoun lanigi gürigia ligía.

6. Ida liña haranserunu wéiyaaña lidan afiñeni hanigi lubaragiñe hadamuridagun luma gürigia le afigouhabei? (Rómana 2:4).

⁶ Aranse hamutu wéiyaaña lidan afiñeni hanigi guánarügü. Gabaroun hamuti dimurei le lariñagubei Pábulu: “Arufuda [laali] Bungiu lareini bun lun gayaraabei lan basakürihan” (aliiha huméi Rómana 2:4). Ligía háfaagunbei lun háyeihani areini le aubei lóuseraña Heowá gürigia ha afigouhabaña. Moun lumuti habulieiduni ítara haña lan kei hóuniri mudún ani mosu hafalaruni ladundehan luma lani Kristu hénpulu (Isa. 11:​3, 4; Mat. 18:​18-20). Lubaragiñe hadamuridagun wéiyaaña luma le afigouhabei, furíeitiña lun Heowá lun hasubudiruni ida luba lan híderaguni afigouhati lun gayara lan lasakürihan. Áluahatiña ariñahani tidan Bíbülia luma tidan wani agumeiraguagüdüni, amuriaha hagía luma Heowá lun líchugun lichú aau houn lun gunfuranda hamani gürigia luma le gádanbalin.  Harihibei ka lan ariñahani hemegeirubei lun hasubudiruni ka lan saminaü, óuseruni luma igaburi le anügübalin gürigia ligía lun lafigouhan (Ari. 20:5).

7, 8. Ida luba háyeihani wéiyaaña lidan afiñeni liguraasun Heowá dan le hadamuridagun luma aban gürigia le afigouhabei?

⁷ Áyeiha hamuti wéiyaaña lidan afiñeni luguraasun Heowá. Gabaroun hamuti ligaburi lóuseruniña Heowá gürigia ha afigouhabaña lidan binadu dan. Kéiburi dan meha le layanuhanbei luma Kaín lun líderaguni asaminara, ariñagati lun gayara lanya libihini lufulesein anhein lasansira ligaburi, ariñagaléi lun kaba lan asusereda anhein masansirun (Agu. 4:​6, 7). Lídanya amu dan, óunaha lumuti Heowá profeta Natán lun lererehan lun urúei Dawidi, yúsuti Natán aban hénpulu lun ladunrunu lanigi Dawidi (2 Sam. 12:​1-7). Lanwoun lira, óunaha lumutiña meha giñe lani profetagu “aban lárigi aban” lun líderaguniña ísüraelina ha maganbadibaña (Her. 7:​24, 25). Magurabahanti lun hasakürihan lubúeingu furumiñe lubá líderaguniña, ligía ádarubalin furumiñeti pasu ani lidan añahagua lan afigouha, amuriahati hama lun hasakürihan.

⁸ Ka hadügübei wéiyaaña lidan afiñeni lun háyeihani Heowá dan le híderagun aban gürigia le adügübei aban figóu wéiriti? Ítara kei lariñawagún lidan 2 Timotéu 4:​2, mosu hóuseruni lau gurasu, mini lan lira mosu lan hárügüdagun houngua, ayanuha hagíame lau darangilaü lun le afigouhabei lun híderaguni lun ladügüni le buídubei. Ánhaña ígiraguagüda wéiyaaña lidan afiñeni houngua lun igañi, gayaraabei ladügün lira lun maganbun lániña le afigouhabei, maha ligíame lasakürihan.

9, 10. Ka gayaraabei hadügüni wéiyaaña lidan afiñeni lun híderaguni íbiri le afigouhabei íchiga fe wuriba lan le ladügübei?

⁹ Áfaaguatiña wéiyaaña lidan afiñeni lun gunfuranda hamani ka lan anügübalin íbiri ligía afigouha. Aba funa san ledebilidun lafiñen ladüga díseguaali lan laturiahanu Bíbülia, láfuridun apurichiha o lafurieidun lun Heowá? Odi aba funa lígirun lun láhüchün luriban ayumahani tidan lanigi? Ladüga funa lagumeserun óundaragua hama hagübüri umadagu o lerederun aríagua katei mabuidunti? Gunfuranda lumuti san adügaali lan ligaburi lóuserun lun lírudagun Wáguchi Heowá?

¹⁰ Hadügüba wéiyaaña lidan afiñeni álügüdahani le samina hamuti buidu lun íbiri ligía, málügüdahanga luagu katei luáguti libagari le memegeirun hamuti hasubudirun. Lau hóuseruni lau gamadóuni, híderagubei lun darangilu lan lasandiragun lungua lun layanuhan luma lun gunfuranda lani ka lan anügübalin afigouha. Hadügüba álügüdahani burí lun lau ínsiñehabuni (Ari. 20:5). Ani ítara kei meha ladüga Natán luma Dawidi, gayaraati hayusurun hénpulu o habahüdahan somu sügǘ lun lun híderaguni íbiri ligía gunfurandei ka lan uagu wuriba lubéi le ladügübei. Másiñati ladügün lira lun lagumeserun íbiri ligía asandiragua lungua wuriba luagu le ladügübei, asaküriha ligía lúmagiñe furumiñeti adamuridaguni le hadügübei luma.

11. Ida liña meha lóuseruniña Hesusu gürigia ha afigouhabaña?

¹¹ Áfaaguatiña wéiyaaña lidan afiñeni lun háyeihani Hesusu. Luagu aban dan, álügüda lumuti Hesusu Saulu le Tárüsuna: “Saulu, Saulu, ka san uagu béibaahana?”. Lídanñein meha dan álügüdahani le, lugundun adügati lun gunfuranda lani Saulu wuriba lan meha le ladaagubei (Adü. 9:​3-6). Lidan Arufudúni 2:​20, 21, ayanuhati Hesusu tuagu aban würi gíritu “Hesawéli” ani ariñagati: “Rúhadina dan tun lun tasansiruni tigaburi”.

12, 13. Ka gayaraabei hadügüni wéiyaaña lidan afiñeni lun híchugun dan lun gürigia le afigouhabei lun lasakürihan? (Ariha humóun giñe iyawaü).

¹² Ítara kei Hesusu, móufudahantiña wéiyaaña lidan afiñeni asaminara mabusenrun lan afigouhati lasakürihan. Añahein asakürihatiña lidan furumiñeti adamuridaguni le adügǘbei hama, ánhañati amu, mégeitiña dan lun hasakürihan. Ligía gayara lubéi hadamuridagun wéiyaaña  luma gürigia le afigouhabei lóugiñe aban wéiyaasu. Másiñati lárigiñe lanme furumiñeti hadamuridagun wéiyaaña lidan afiñeni luma gürigia ligía, aba lanme lararamagun asaminara luagu le ariñawagúbei lun, ani ábame lamuriahan lau ǘnabuguni luma Heowá lun feruduna lani (Sal. 32:5; 38:18). Háfuga sánsihali lanme ligaburi sunsuinagubei dánmeya le hadamuridagun luma.

¹³ Lun híderaguni wéiyaaña lidan afiñeni gürigia lun lasakürihan, lunti híchaagun houngua lidoun lilugaarun, arufuda hagíame areini lun. Amuriahatiña luma Heowá lun labiniruni háfaagun ani hemenigitiña gayaraabei lan híderaguni lunya lárügüdagun gürigia lungua luma lun lasakürihan (2 Tim. 2:​25, 26).

14. Ka adügübei lun lasakürihan gürigia le afigouhabei, ani ka uagu wariñagei le?

¹⁴ Adügati lasakürihan aban afigouhati lun ñein lan saragu ugundani (Luk. 15:​7, 10). Dan le lasuseredun lira, hadüga san wéiyaaña lidan afiñeni? Uá. Haritagua waméi ariñaga lan Pábulu gayara lan “lasansiruni Bungiu ligaburi hasaminarun” ha afigouhabaña (2 Tim. 2:25). Ligíati, mama gürigia adügübei lun lasakürihan kristiánu ligía, Heowá adügübei lun lasakürihan. Ábati lasuseredun le lariñagubei Pábulu: “Lun gayaraabei lan hagagudún ani sefu hagíame tídangiñe lisadaran Mafia” (2 Tim. 2:26).

15. Ka gayaraabei hadügüni wéiyaaña lidan afiñeni lun hasigirun íderaguei afigouhati le asakürihabei?

¹⁵ Anhein asaküriha aban gürigia, lunti hasigirun wéiyaaña lidan afiñeni achülüha lárigi lun híderaguni lun lederebugudun lafiñen, mábürühan láamuga lidoun óuchawaguni le líchaahabei Mafia lubá, gayara láamuga lasigirun íbiri ligía adügei le buídubei (Ebü. 12:​12, 13). Moun lumuti hariñaguni wéiyaaña lidan afiñeni ni ka un ka lan ladügübei íbiri ligía. Íbini ítara, másiñati anihein lan somu katei le lunti lasubudiragüdüniwa houn lílana damuriguaü, ka katei? Ariha waméi.

“LUNTI BADEINHAN HOUN HAGIBUGIÑE SUN AFIÑETIÑA”

16. Ka meha labusenrunbei Pábulu lariñagun lidan 1 Timotéu 5:20 dan le layusurunbalin dimurei “hagibugiñe sun afiñetiña”?

¹⁶ (Aliiha huméi 1 Timotéu 5:20). Ariñagati Pábulu lun Timotéu —le meha giñe ábanbei  wéiyaali lidan afiñeni— lunti lan ladeinhan houn afigouhatiña “hagibugiñe sun afiñetiña”. Ka meha labusenrubei lariñagun? Mama meha layanuhaña hawagu sun lílana damuriguaü, layanuhaña meha hawagu ha íchugubaña fe luagu le ladügübei gürigia le afigouhabei, ladüga lan yebe harihini lau hagu guánarügü o ladüga ligía guánarügü lan abahüdagubalin houn. Hóunrügübei íbirigu ha hariñaga wéiyaaña lidan afiñeni arihúaali lan lau kesi ligía ani ererehóuaali lan lun íbiri le afigouhabei.

17. Anhein subudiwa lubéi o lasubudirúaba lan adügǘwaali lan aban figóu wéiriti, ka awisahani lunbei lichugún ani ka uagu?

¹⁷ Anihein burí figóu le subudi hamuti saragu lílana damuriguaü o lasubudirúaba. Anhein ítara liña lubéi, hawagu sun lílana damuriguaü layusurúa dimurei “hagibugiñe sun afiñetiña”. Ligíati, lunti híchugun wéiyaaña lidan afiñeni aban awisahani lidan damuriguaü luagu ererehóuaali lan lun o tun ítaga íbiri. Kame? Kei lafuranguagüdüni Pábulu: “Lun hanufudedun súngubei luéi hafigouhan”.

18. Ka hadügübei wéiyaaña lidan afiñeni dan le magunfulirungili lan irahü le afigouhabei 18 irumu? (Ariha humóun giñe iyawaü).

¹⁸ Ánheinti aban lubéi kristiánu badiseihali le magunfulirungili 18 irumu afigouhabei? Ida luba hahandilihani wéiyaaña lidan afiñeni kesi le? Hóundaraguba bián hádangiñe dandu luma irahü le afigouhabei kei hama lagübürigu o luma gürigia le anuriahabalin ha gefentiña luagu Heowá. b Hakutihabei ka lan adüga hamaalibei lagübürigu irahü lun híderaguni adügei asansiruni le mégeiwabei luma lun lasakürihan. Anhein arufuda isaani ligía aban lubuidun igaburi, gayaraabei hígirun wéiyaaña lidan afiñeni lun agübürigu  lan asigira íderaguei hasaani. Lugundun houn agübürigu líchigei Heowá dasi lun hererehan houn hasaanigu lau ínsiñehabuni (2 Lur. 6:​6, 7; Ari. 6:20; 22:6; Efe. 6:​2-4). Lau lásügürün dan, hayanuhaba wéiyaaña ha hama agübürigu kada átiri dan lun harihini ida liña lan léibugun katei lau hasaani, anhein leresibiruñein lubéi ídemuei le lemegeirubei. Ánheinti maha irahü ligía lun lasakürihan ni lun lasansirun? Hóundaraguba wéiyaaña dandu luma kei hama lagübürigu ha gefentiña luagu Heowá lun harihin lau likesin.

“AREIDATI BUNGIU, GUDEMEHABU LIGÍA”

19. Ida liña háyeihani wéiyaaña lidan afiñeni Heowá lidan ligaburi hóuseruniña ha adügübaña somu figóu wéiriti?

¹⁹ Wéiyaaña lidan afiñeni ha arihubaña lau somu kesi lunti hadügüni sun hayaraati lun mígirun hamá gürigia ha adaagubaña katei wuribati lidan damuriguaü ladüga ligía dasi le ru láalibei Heowá houn (1 Ko. 5:7). Busentiña giñe hadügüni sun hayaraati lun híderaguniña afigouhatiña lun hasakürihan. Ligía masaminarun habéi wuriba luagu gürigia le afigouhabei ani arufudatiña aban lubuidun igaburi. Ítara liña háyeihani Heowá le areidabei ani “gudemehabu ligía” (Sant. 5:11). Samina wamá luagun lubuidun burí dimurei le labürühabei apostolu Huan dan meha le derebuguhali: “Nirájüñü, nabǘrüjañein buri cátei le jun lun mafígounjan jumá. Láu sun líra, ánjawa afígounja, ladímurejaba Wabúreme Jesucrístu lueígiñe wafúleisein ligíbugiñe Wáguchi Búngiu, ladǘga ligía rügǘñein richágua ligíbugiñe Búngiu” (1 Huan 2:​1, LBID).

20. Kaba wariha lidan lagumuhóun aturiahani le tídanbei garüdia to?

²⁰ Híruti anihein lan dan maha lan kristiánu le afigouhabei lasakürihan. Anhein asusereda lira, mosu lasagarún lídangiñe damuriguaü. Ida liña hahandilihani wéiyaaña lidan afiñeni kesi burí le? Warihubei lidan lagumuhóun aturiahani le tídanbei garüdia to.