Ariñagati meha apostolu Pábulu houn kristiánugu ha Tesalónikabaña: “Anhein ñein aban le madügünti gasu lau le wariñagubei tidan gárada to, ariha huméi katei lan” (2 Tesa. 3:14). Luagu aban dan, ariñagatiwa meha hounti lan wéiyaaña lidan afiñeni adundehani le. Anhein meha anihein lubéi aban íbiri le máhati ladügün gasu lau adundehani le tídanbei Bíbülia íbini híchugun wéiyaaña lidan afiñeni eweridihani lun saragu wéiyaasu, mosu meha lichugún aban yanu asubudiragüdei houn lílana damuriguaü “katei lan”. Lúmagiñe méhati oura ligía, aba meha móundaragunhaña lan íbirigu luma íbiri ligía anhein mama lubéi tidan Luban Adamuridaguni o lidan apurichihani.

Ánheinti guentó, gunfuranda wamaali mama lan meha layanuhaña Pábulu luagu lunti lan híchugun wéiyaaña lidan afiñeni aban yanu eweridiraña lílana damuriguaü. Kati uagu layanuha? Layanuhaña meha luagu le lunbei ladügüni kada aban hádangiñe lílana damuriguaü dan le anihein lan aban íbiri le maganbaditi lun lugumadin Heowá. Ka uagu lasansira ligaburi gunfuranda wamani katei le? Akutiha waméi ka lan meha uagu layanuha Pábulu lidan burí bérusu le.

Ariñagati Pábulu añahein lan meha íbirigu lidan damuriguaü ha mabagariduntiña “úaragua luma arufudahani” tídangiñeti Lererun Bungiu le líchugubei houn. Lugundun ariñagaali meha houn dan le labisidahanbaliña luagu aban dan: “Le máhabei luadigimaridun, meigalá”. Íbini ítara, añahagua meha hádangiñe máhatiña hawadigimaridun lun hanuriagun houngua lau sun gayara lan hadügüni. Aba meha giñe herederun etenira lun le moun lubéi hetenirun lun. Ida luba meha hóuseruniña íbirigu gürigia maganbaditiña ha? (2 Tesa. 3:​6, 10-12).

Ariñagati Pábulu: “Ariha huméi katei lan [le madügünbei gasu]”. Mini lan dimurei güriegu le ayusurúbei ya lunti lan lasubudirúniwa katei lan gürigia ligía lun duari wamá luéi luma lun wóunigiragun woungua luéi wáyeihani luriban lóuserun. Rúati meha adundehani le houn sun lílana damuriguaü, mámarügü houn wéiyaaña lidan afiñeni (2 Tesa. 1:1; 3:6). Ligíati, anhein meha íchiga aban íbiri fe luagu anihein lan aban lílana damuriguaü le maganbaditi lun le tariñagubei Lererun Bungiu, íbiriba meha ligía anúadira ladüraaguni lumadagua luma gürigia ligía luma lun móundaragun lan luma.

Mini lan san le lunti lan wóuseruni gürigia ligía kei wóuserun aban gürigia le sagawaalibei lídangiñe damuriguaü? Uá, lugundun ariñagati giñe Pábulu: “Ererarügü humá lun keisi íbiri”. Ligíati, kádaba meha kristiánu ariha anhein lasigiruba lubéi ásügüra dan luma gürigia ligía lidan burí fedu o katei líbeina lira, lau sun lasigiruba lan óundaragua luma lidan burí adamuridaguni luma lidan apurichihani. Ariñaga lumuti Pábulu ka lan uagu: “Barǘ láamuga busiganu”. Gayaraati meha ladügün masigirun hamá ásügüra dan luma kristiánu le óuserubei wuriba lun lasaminarun luouguoun luma lun lasansiruni lóuserun (2 Tesa. 3:​14, 15).

Agia wagía? Ida luba wafalaruni adundehani le uguñe weyu? Furumiñe, lunti wachoururuni le lan lúgubu mama lan labagariduña íbiri ligía úaragua luma arufudahani le libihubei, ítara kei lariñaguni Pábulu. Mama meha layanuhaña hawagu íbirigu ha anúadirubaña hadügün somu katei le madügün hamuti amu según líchuguni hasaminan houn. Mama giñe hayanuhaña hawagu íbirigu ha achararubaña woun. Layanuhaña meha Pábulu hawagu íbirigu ha resibihaña somu ererehóuni tídangiñeti Bíbülia ani mafala hamuti ladüga mabusenrun hamá.

Ánhawa íchiga fe anihein lan aban íbiri le maganbaditi lun adundehani le tídanbei Bíbülia, a wagíaba ariha anhein wasigiruba lubéi ásügüra dan luma lidan burí fedu o katei líbeina lira o madügün wabéi lan. Keiti wani lan lira woungua, moun lumuti wayanuhani hama amu gürigia luéidigia hama tílana waban ha gefentiña luagu Heowá. Lau sun lira, gayaraabei wasigirun óundaragua luma íbiri ligía lidan burí adamuridaguni luma lidan apurichihani. Dánmeti le lasansiruni íbiri ligía ligaburi lóuserun, gayaraabei wasigirun óundara luma kéiñaha wadügüni.