1. Ida liña lahuudun uremu woun?

LUAGU aban dan, ariñagati aban abürühati uremu adüga lan dimurei lun wasaminarun ani adüga lan músika lun wasandiruni dimurei, ánheinti uremu adügati lun wasandiruni le wasaminarubei. Úati amu katei buídutimati luéi “wasandiruni” le wasaminarubei luagu Wáguchi le siélubei, Heowá, kéiburi dimurei lánina alawahani luma ínsiñeni le warufudubei lun lidan weremun. Sun lubúeingu Bungiu subudi wamuti aban lan fánreinti súdiniti eremuhani lidan wáhuduragun, dandu anhein wadüga wábugua o hama wíbirigu lidan damuriguaü.

2, 3. a) Ka hasandirubei fiú dan le mosu lan hiñuruni hamalali lun heremuhan lidan damuriguaü? b) Kaba burí álügüdahani wóunaba lidan arütíkulu le?

² Hínsiñeti san woun wiñuruni wamalali lun weremuhan lidan damuriguaü o ruti busiganu woun? Lidan fiú échuni, masandiraguntiña wügüriña houngua buidu lun heremuhan hagibugiñe bandi gürigia. Gayaraati lagadeiruni igaburi le sun damuriguaü, dántima le meremuhan hamá wéiyaaña lidan afiñeni lau ubebeni o dan le hadügün amu katei dan heremuhaña lan ha híbiri (Sal. 30:12).

³ Anhein gunfuranda wabalin buidu súdini lan uremu lidan wáhuduragun, máfuridunbadiwa lídangiñe adamuridaguni lidan lóurate eremuhani. Álügüdagua wamá woungua: “Ka san nasaminarubei luagu weremuhan lidan adamuridaguni? Ka gayaraabei  nadügüni lun manufude nan neremuhan lau ugundani? Ka gayaraabei nadügüni lun narufuduni sun le nasandirubei dan le neremuhan?”.

4, 5. Ka uagu gayara lubéi wariñagun súdini lan meha eremuhani lidan áhuduraguni lun Heowá Ísüraeli?

⁴ Yusu hamaali lubúeingu Heowá músika luagu saragu sígulu lun halawahani Bungiu. Dan le meha úaragua hamá ísüraelina lun Heowá, súdiniti meha eremuhani lidan háhuduragun. Kéiburi dan le laransehanbalin Dawidi eseriwiduni tidan ténpulu, íridati 4,000 lewitagu lun halawahani Bungiu lau músika. Hádangiñe 4,000 hagía, añahein meha 288 ha “geremuhadibaña lun Bungiu” (1 Kro. 23:5; 25:7, TNM).

⁵ Súdiniti meha músika luma eremuhani lidan tederegerúniwa ténpulu. Ariñagatu Bíbülia: “Ábati hagumeserun áfara, íñaaha luma eremuha úara, lun híchugun uéiriguni lun Wabungiute tau fidu, pülatíyu tuma amu burí tuwuyeri fidu sun añaha lan eremuha. [...] Lidan oura ligía aba tabuinchun litenpulun Wabungiute lau dúeri [...] lugundun buíngüdala meha luéirigun Wabungiute ténpulu”. Chóuruti adüga lan meha katei ligía lun léredun hafiñen ísüraelina (2 Kro. 5:13, 14; 7:6).

6. Ida liña meha layusurún músika luma uremu dan le Neemíasi lubéi gumadimati Herusalén?

⁶ Dan le meha haranserunbalin ísüraelina ha úaraguabaña lubarieirun Herusalén, adügati meha gumadimati Neemíasi lun ñein hamá lewitagu eremuha luma áfara. Dan le lásurunbei ladügǘn baríeiru, ídehati músika lun gúndaatima hamá gürigia. Aba ladügǘn bián sétanu hau eremuhatiña uremu lánina eteingiruni. Aban léibugun kada aban hádangiñe ligibuagugiñe baríeiru híbiri awansera luagun aban oubaü híbiri luagun le aban oubaü darí hadunragun yarafa tun ténpulu. Reinti meha heremuhan darí lun laganbún diseun (Neem. 12:27, 28, 31, 38, 40, 43). Chóuruti gunda lan meha Heowá lau laganbuniña lubúeingu eremuha lun lau saragu ubebeni.

7. Ida liña meha larufuduni Hesusu lunti lan heremuhan lánigu lun háhuduragun lun Bungiu?

⁷ Lidan lidaani Hesusu, súdinimemegili meha músika lidan áhuduraguni inarüniti. Lárigiñebei ladügüni Ladinerun Aburemei, lidan guñoun le súdinitimabei lidan sun dan, eremuhati Hesusu úara hama lani disipulugu (aliiha huméi Matéu 26:30).

8. Ka hénpulu híchugubei kristiánugu ha lánina furumiñeti sígulu woun?

⁸ Ru hamuti kristiánugu ha lánina furumiñeti sígulu hénpulu woun lau heremuhan lun Bungiu úara keisi aban fánreinti lidan háhuduragun. Íbini mama lan meha ténpulurugu hadamuridagua, tidan meha muna to sensiyutu hadamuridagua, madügünti katei le lun meremuhan hamá lau ubebeni. Ariñagati apostolu Pábulu houn lánigu paaná kristiánugu lau ladundehan Bungiu: “Arufudaha humá húmawagua eweridiragua huguyame húmawagua lau lichú aau. Heremuha luagu luéirigun Bungiu lau eteingiruni lun tidan hanigi lau sálumu luma burí uremu” (Kol. 3:16). Ítara liña lunti lan weremuhan lun Bungiu tídangiñe waliburun lánina uremu. Lídangiñeti ariñahani lúmagiñeti Bungiu le líchugubei “musu úaraguati” woun uremu burí le (Mat. 24:45).

9. a) Ka uagu hanufude habéi fiú heremuhan here lidan adamuridaguni luma lidan adamurini wéinamuti? b) Ida liña san lunti lan weremuhan lun Heowá, ani ka lúnbaña híchuguni hénpulu? (Ariha humóun iyawaü to lídanboun lagumeseha arütíkulu).

⁹ Háfuga añahein lan fiú wádangiñe hanufudetiña heremuhan ladüga mechun hamá adügei hama haduheñu o lidan hanechani. O  háfuga aba lan wasandirun busiganu o mabafu wamá lun weremuhan dan le wíchaagun woungua hóubagiñe eremuhatiña ha geremuhadibaña tidan radiu o bigibigitu. Gama lumoun, moun lumuti ladügün katei le lun magunfulirun wamá lau wani buligasion lun weremuhan lun Heowá. Lubaragiñe lira, ragǘ wamóun waliburun lánina uremu, iñura waméi wachügü ani weremuha tídangiñe sun wanigi (Ésüd. 3:11; aliiha huméi Sálumu 147:1). Uguñe weyu, tidan saragu Luban Adamuridaguni anuhein bigibigitu to ídanboun láfuacha uremu bürüñu. Gayaraati líderaguniwa katei le lúntima weremuhan lau erei. Luagu amu oubaü, súdiniti aremuhóuaali lan uremu tidan Leskuela houn wéiyaaña lidan afiñeni guentó. Afuranguagüdati le súdini lan híchugun wéiyaaña lidan afiñeni aban hénpulu buiti lau heremuhan lidan adamuridaguni.

10. Ka lunbei waritaguni anhein manigi wabéi lun wiñuruni wamalali dan le weremuhan?

¹⁰ Añahein íbirigu miñurun hamuti hamalali ladüga nibusigari hamá laganbún hamalali saragu ladüga samina hamá luagu wuriba lan hamalali. Gama lumoun, samina waméi le. Dan le wayanuhan “sun wagía charatiwa” saragu wéiyaasu, ani sigitiwa ayanuha (Sant. 3:2). Ítarameme, mígirun wabéi weremuhan lun Heowá ladügarügü mabuidun lan wamalali.

11, 12. Ka burí adundehani gayaraabei líderaguniwa lun buídutima lan weremuhan?

¹¹ Háfuga hanufude wamá weremuhan ladüga machourun wamani ida liña lan leremuhóun. Ariha wamá fiú adundehani le lunbei líderaguniwa lun buídutima lan weremuhan. *

¹² Líderagubadiwa wafurendeirun awaragua buidu lun gayara lan wiñuruni wamalali dan le weremuhan. Ítara kei ladügün elekütrisida lun ladurangun leiti, adügati giñe wawaragun lun here lan wamalali lun wayanuhan luma lun weremuhan. Lunti weremuhan íbini kei liñun wamalali dan le wayanuhan (ariha huméi adundehani le tídanbei líburu  Benefíciese de la Escuela del Ministerio Teocrático, páhina 181 darí 184, ñein lubéi lariñaga “Control del volumen de aire”). Le linarün katei, ariñagatu Bíbülia lunti lan hagúarahan lubúeingu Bungiu lau ugundani dan le heremuhan lun (Sal. 33:1-3).

13. Írida huméi kaba lan wadüga lun weremuhan lau ichouruni.

¹³ Danme le wadügüni áhuduraguni hadan iduheñu o dan le wábuguarügü wamá, adüga waméi le: anúadaha wamá aban lídangiñe uremu le hínsiñetimabei woun tídangiñe waliburun lánina uremu ani ábame waliihani lau umalali héreti lau erei luma lau ichouruni; lárigiñe ábame wárügüdün garabali ábame wariñaguni sun fánreinti ligía laumeme umalali héreti; lárigiñe ábame weremuhani fánreinti ligía lau umalali héreti (Isa. 24:14). Héretimabei wamalali, ani buiti katei le. Manufude wamá ani mabusigaridun wagíame.

14. a) Ka uagu súdini lubéi lúntima wadaaruni wayuma buidu dan le weremuhan? (Ariha huméi rekuáduru “ Ida luba buídutima lan weremuhan”). b) Írida humá fiú adundehani lun gayara lan waransehani wamalali.

¹⁴ Lun here lan láfuridun wamalali, mosu wadaaruni wayuma buidu. Ligíati, dan le weremuhan lunti wéiritima lan wadaaruni wayuma sügǘ lau dan le wayanuhan. Ánheinti genege lubéi woun débiliya lan wamalali o héreya lan? Wadariruba adundehani lun waransehani turóbuli le tidan líburu Benefíciese de la Escuela del Ministerio Teocrático, páhina 184, lidan rekuáduru le gíribei “Cómo superar problemas específicos”.

15. a) Ka awisahani ichugúbei lidan adamurini irumu-auti le lánina 2016? b) Ka uagu mosu lubéi meha ladügǘn asansiruni tidan waliburun lánina uremu?

¹⁵ Lidan adamurini irumu-auti le tadügübei Watch Tower Bible and Tract Society of Pennsylvania lidan irumu 2016, rúati aban ñunsu súdiniti. Ruti íbiri Stephen Lett, aban hádangiñe lílana Sétanu le Arihibei lau Hawadigimari gefentiña luagu Heowá lidan sun ubóu, ñunsu tuagu aban iseri líburu lánina uremu to gíriboun “Eremuha wamá lun Heowá lau ugundani”. Afuranguagüda lumuti íbiri Lett adügǘwa lan asansiruni tidan líburu lánina  uremu lun úara lan ariñahani le tídanbei luma asansiruni le adügǘbei tidan Traducción del Nuevo Mundo de las Santas Escrituras to lánina irumu 2013 lidan inglési. Adügati le lun lasansirúniwa dimurei burí le máfuachunhalibei tidan iseri Bíbülia. Ani adügǘwati giñe lanwoun uremu le ayanuhabei luagu apurichihani ani le arufudubei eteingiruni luagu lebegi asalbaruni. Luagu amu oubaü, kei le súdini lubéi uremu lidan wáhuduragun, aba lasagarun musu úaraguati aban líburu to buiti tubuña ani ítara liña tidáü kei iseri Bíbülia Traducción del Nuevo Mundo.

16, 17. Ka asansiruni adügǘbei tidan iseri líburu lánina uremu?

¹⁶ Lun ménrenguntima lan tayusurún iseri líburu lánina uremu, apakühóuati uremu según liri. Kéiburi le furumiñeti 12 uremu layanuhaña luagu Heowá, le widü le asigirubei layanuhaña luagu Hesusu luma luagu lebegi asalbaruni. Ani lidan furumiñeti burí tubana waliburun lánina uremu anuhein aban lísüta dayarütu lau liri sun uremu. Seriwiti katei le lun lanuadahóun uremu lubá burí yanu hounti sun gürigia luma lun amu katei.

¹⁷ Lun gayara lan weremuhan tídangiñe sun wanigi, adügǘwaali asansiruni lidan fiú uremu lun ménrenguntima lan gunfurandawa lan ni leremuhóun. Kéiburi hamuga uremu le gíribei “Furíei lánina eteingiruni”, tidan iseri líburu “Aban furíei lun lichugún eteingiruni lun Bungiu” líribei. Sánsiwati giñe fiú dimurei lídangiñe saragu uremu lun lichugún dimurei le gayaraati ladürühóun según sínbolu lánina músika. Luagu amu oubaü, sánsiwati liri luma fiú dimurei lídangiñe uremu le gíribei “Góunigiboun banigi”, guentó “Góunigi wamóun wanigi” líribei. Adügǘwati asansiruni le lun masandiragun hamá íbirigu würiña, nibureintiña hama iseri gürigia ha achülürübaña adamuridagua houngua wuriba. Dan le meha heremuhani uremu le, hariñaguñein meha houn amu ka lan lunbei hadügüni, ani gayaraati meha ladügün le lun hasandiragun houngua wuriba.

18. Ka uagu lunti lubéi wafurendeiruni uremu burí le tídanbei iseri waliburun lánina uremu? (Ariha huméi giñe abürüdǘni).

¹⁸ Saragu lídangiñe uremu le tídanbei líburu Eremuha wamá lun Heowá lau ugundani bürüwati kamá aban furíei lun Bungiu. Ídehati le lun gayara lan wariñaguni le wasandirubei lun. Anihein giñe amu burí uremu le ínchahabaliwa íchiga gurasu houn wíbirigu, arufuda ínsiñeni luma adügei le buídubei (Ebü. 10:24). Ligía buidu lubéi lun wasubudiruni uremu luma lumusikan buidu. Líderagubadiwa waganbahani leremuhóun uremu burí le lídanbei jw.org. Anhein wasayaha uremu burí le wábiñe, wafurendeiruba eremuha tídangiñe sun wanigi lau ichouruni. *

19. Ida liña gayara lan háhuduragun sun lílana damuriguaü lun Heowá?

¹⁹ Haritagua waméi súdiniti lan eremuhani lidan wáhuduragun. Ligía aban igaburi súdiniti lun warufuduni wínsiñehabu luma weteingiradi lun Heowá (aliiha huméi Isaíasi 12:5). Dan le weremuhan lau ugundani luma ubebeni, ínchaha wamutiña amu adügei ligiaméme. Lidan damuriguaü, dandu nibureintiña, wéinamuhaña o ha iserigiña lidan damuriguaü, gayaraati wáhuduragun lun Heowá lidan igaburi le. Ligíati, masaminara wamá saragu lubá weremuhan lun tídangiñe sun wanigi. Gaganbadi wamá lun gumadi furanguti le: “Heremuha lun Aburemei”. Eremuha wamá lun Heowá lau ugundani! (Sal. 96:1).