Mígira wamá lun weferidiruni wafayeiruaha
“Mígiraguagüda humá hungua [...] lun hanügüni hagañeirun huéi” (KOL. 2:18).
UREMU: 32, 55
1, 2. a) Ka afayeiruahaü hagurabubei lubúeingu Heowá hibihin? b) Kaba íderaguawa lun magidarun wamani warihin luéi afayeiruahaü? (Ariha huméi dibuhu le lídanbei lagumeseha arütíkulu).
ÍTARA kei meha apostolu Pábulu, resibi hamuti giñe kristiánugu anuadirúaaña lubuidun emenigini lun hibihini “le lunbei líchuguni Bungiu sielu lun le agañeiruti” (Fili. 3:14). Wéiriti habusenrun lun luma hamá Hesusu lidan Larúeihan sielu ani lun híderaguniña gürigia lun lagidarun figóu hawéi (Aruf. 20:6). Ma lubuidun emenigini le líchugubei Heowá houn! Ánhañati amu mudún, amu katei hagurabahabei. Agurabatiña hibihin ibagari magumuchaditi ubouagu, ani ruti katei le ugundani houn (2 Fe. 3:13).
2 Lun líderaguniña Pábulu kristiánugu anuadirúaaña lun úaragua hamá luma lun hibihini afayeiruahaü, ru lumuti eweridihani le houn: “Samina humá luagu burí katei le lánina sielu” (Kol. 3:2). Mosu meha gabaroun hamani lubuidun emenigini lun hibihini halagante sielu (Kol. 1:4, 5). Dandu anhein aguraba wabéi wawinwandun sielu o ubouagu, chóuruti líderagubadiwa lan wararamagun asaminara luagun abinirúni le füramase lubéi Heowá lun magidarun wamani warihin luéi afayeiruahaü (1 Ko. 9:24).
3. Ka burí peliguru uéibei leweridiraña Pábulu kristiánugu?
3 Wéridi lumutiña giñe Pábulu líbirigu luéi fiú peliguru le gayaraabei ladügün lun mibihin hamani afayeiruahaü. Kei hénpulu, abürühati lun damuriguaü le Kolosabei hawagu kristiánugu mama inarünitiña ha álugubaña lun lagundaarun Bungiu hau lau hafalaruni Lúrudu lubaragiñe hamuga hafiñerun luagu Kristu (Kol. 2:16-18). Ayanuhati giñe houn luagu luriban ayumahani lánina agamariduni, luagu turóbuli hama amu kristiánugu luma luagu turóbuli hadan iduheñu. Aniheingua turóbuli burí le uguñe weyu, ligía humémegili lubéi adundehani le líchugubei Pábulu. Ligíati, ariha wamá fiú lídangiñe adundehani le líchugubei tidan ligaradan houn kolosana.
ÁFAAGUA WAMÁ KÓNTÜRA LURIBAN AYUMAHANI
4. Ka uagu gayara lubéi ladügün luriban ayumahani lánina agamariduni lun mibihin wamani afayeiruahaü?
4 Lárigiñe laritaguagüdüniña Pábulu líbirigu luagun lubuidun emenigini le hámabei, aba labürühan: “Ígira huméi sun le higaburibei le láninabei ubóu le: Ualá ni aban hídangiñe agamariduti mamarieidunga, madügün huguyame katei wíyeti, mafalara huméi luriban haritagun, ígira humeime igaaduaü” (Kol. 3:5). Gayaraati weiri lan lere luriban ayumahani ani gayaraati ladügün lun mibihin wamani irisini le lúmagiñeti Bungiu, kéiburi wemenigin luma aban lubuidun umadaguaü luma. Aban íbiri le meha ígiraguagüdübei lungua lun luriban ayumahani lánina agamariduni ani lárigiñe aba lagiribudun lidoun damuriguaü ariñagati hanarime lan lere ayumahani ligía darí lun aba lan leferidiruni lichügü, darí dan le létihali ligía líchugun fe.
5. Ka gayaraabei wadügüni lun wóunigiragun woungua dan le lídanñadiwa lan peliguru?
5 Súdiniti lun duari wamá dan le lidan wamá somu sügǘ le gayaraabei ladügün lun wadüraaguni lilurudun Heowá. Kéiburi adarigu, súdiniti lun hayanuhan furangu lúmagiñe furumiñeti oura luagu katei le lunbei hadügüni luma le lunbei madügün hamani lidan adarigu hamá kéiburi óuburahani, ínchuahani o herederun hábugua (Ari. 22:3). Gayaraati giñe hagagibudagun kristiánugu luma aban sügǘ le denchati dan le dise hamá tuéi haban lidan somu wéiyaasu lánina bísinisi o dan le lawadigimaridun aban wügüri úara tuma aban würi (Ari. 2:10-12, 16). Ánhawa adariragua woungua lidan aban sügǘ ítarati, arufudagua wamá woungua kei gefentiña luagu Heowá, óusera wamá buidu ani haritagua waméi luriban resultóu le lanügübei hadügün lun hasaminarun amu hínsiñe hamá hun. Lunti duáritima wamá dan le hiru wamá o dan le wasandirun mabusenrúnwa wamá. Lidan dan burí ligía, háfuga megei wamá lun ladügün somu gürigia lun wasandirun mégeiwa wamá. Gayaraati weiri lan wabusenrun lun letenirúniwa woun darí lun wánharun lun sun katei buiti le gayaraabei wibihini lúmagiñe furumiñeguarügü gürigia. Anhein asusereda somu katei ítarati woun, amuriaha wamá ídemuei luma Heowá luma hama íbirigu lun madügün wamá ni kata le gayaraati ladügün lun mibihin wamani wafayeiruaha (aliiha huméi Sálumu 34:18; Ariñawagúni 13:20).
6. Ka lunbei gabaroun wamani dan le wanúadahani wisebáhari?
6 Lun wagidaruni luriban ayumahani lánina agamariduni wawariua, lunti giñe wadisedun luéi isebáhari le wíyeti. Saragu tídangiñe kónpeni lánina isebáhari uguñe weyu haritaguagüda tumutiwa luagun uburugu Sodoma luma Gomora (Hud. 7). Adügatiña ha nadagimeinbaña tidan kónpeni burí tuguya lun larihín agamariduni le múaranti luma lilurudun Bungiu kei aban katei buiti ani le manügünti igarigu. Moun lumuti wánharun lun sun le áfuridubei tídangiñe kónpeni burí to. Ánhawa manúadahan lau duari, gayaraabei ladireirun warihin luéi ibagari le lunbei wibihini keisi afayeiruahaü (Ari. 4:23).
DAÜGUA WAMÁ LAU ÍNSIÑENI LUMA AREIDUNI
7. Ka burí turóbuli gayaraabei lasuseredun lidan damuriguaü?
7 Úarati wasaminan sun wagía luagu aban lan abinirúni lidan wamá damuriguaü kristiánu. Íderagua lumutiwa taturiahóun Lererun Bungiu lidan adamuridaguni luma ídemuei le wíchugubei wóuniwagua lau ínsiñeni luma areiduni lun madireirun wamani warihin luéi afayeiruahaü. Gama lumoun, dan le ua lan gunfuranda wamani le hadügübei o le hariñagubei wíbirigu buidu gayaraati ladügün lun ñein lan magundani wadan. Anhein maransehan wamá turóbuli burí le, gayaraati wareidun igarihabu tidan wanigi (aliiha huméi 1 Féduru 3:8, 9).
8, 9. a) Kaba íderaguawa lun wibihini abinirúni? b) Kaba íderaguawa lun wakipuruni darangilaü anhein adüga aban íbiri somu katei le mínsiñeti woun?
8 Kaba wadüga lun madügün lan igarihabu lun weferidiruni afayeiruahaü? Ru lumuti Pábulu eweridihani le houn kolosana: “Hínsiñetün lun Bungiu; ani anúadaha laadün lun lánigume. Ítara liña lubeiti, abagarida humá keisi lánigu, lau gudemehabu, areiduni, ǘnabuguni, gaganbadi, luma gaguraasuni. Gaguraasun humá hubaruagua, ferudunagua huguyame húmawagua; ítara kei feruduna lanün Kristu, ítarala giñe hadüga. Lóugiñe sun katei, hínsiñehabu humá; ligía katei le íchugubalin sun katei lidan aban” (Kol. 3:12-14).
9 Líderagubadiwa ínsiñeni luma areiduni lun ferudunagua wamá wóuniwagua. Kéiburi anhein adüga o ariñaga aban íbiri somu katei le gáriti woun, áfaagua wamá lun waritaguni adügañahaadiwa lan giñe o ariñagaadiwa lan somu katei le gáriti lun somu gürigia. Chóuruti seremei wamaniña íbirigu ha arufudubaña ínsiñeni luma areiduni lun feruduna hamani wachara (aliiha huméi Apurichihati 7:21, 22). Wéiritimati weteingiradi luagu areini le larufudubei Hesusu lau lóundaraguniña lubúeingu Bungiu ha inarünitiña (Kol. 3:15). Sun wagía ligiaméme Bungiu hínsiñebei woun, ligiaméme uganu wapurichihabei ani genegeguati turóbuli burí le úmabei wagagibudagua. Anhein hínsiñe habéi wíbirigu woun, areida wagía houn ani ferudunagua wagía wóuniwagua, wídehaba lun ñein lan úarani wadan keisi kristiánugu ani wakipuraguba woungua áfaagua lun wibihini ibagari magumuchaditi.
10, 11. a) Ka uagu peliguru lubéi gimugaü? b) Kaba wadüga lun madügün lan gimugaü lun weferidiruni wafayeiruaha?
10 Gayaraati ladügün gimugaü lun mibihin wamani afayeiruahaü. Anihein hénpulu burí tidan Bíbülia le arufudubalin peliguru lan igaburi le. Kéiburi Kaín, gimugati meha lun Aweli le lamulen darí lun láfaruni hilagubei. Gimugati meha Koré, Datán luma Abirán lun Moisesi ligía aba lubéi hagarabaagun luagun. Ani gimugati meha giñe urúei Saulu lun Dawidi darí lun lálugun láfaruni hilagubei. Ligía maweiridun tubéi wanigi lau tariñagun Bíbülia: “Le ñein lumuti gimugaü luma gáganiguaü, anihein chagaguaü ñein luma sun luwuyeri wuribani” (Sant. 3:16).
11 Hénrengutimabei wasandirun gimugaü ánhawa áfaagua lun ñein lan ínsiñeni luma areiduni tidan wanigi. Ariñagatu Lererun Bungiu: “Le hínsiñehabubei gaguraasunti, areidati, ani magimuganti” (1 Ko. 13:4). Lun mabadülerun lan gimugaü tidan wanigi, mosu wáfaagun lun warihini katei kei larihini Heowá. Mosu gunfuranda wamani lumegegun lan ábanmeme úgubu wíbirigu, lidan amu dimurei, lílana ligiaméme damuriguaü. Líderagubadiwa katei le lun wasandiruni le hasandirubei wíbirigu, ítara kei lariñaguni dimurei burí le: “Anhein giñe ouserúa aban lídangiñe [lumegegun úgubu] buidu, aba lagundaarun le burí líbiri luma” (1 Ko. 12:16-18, 26). Ítarati, lubaragiñe wasandirun gimugaü, wagundaaruba danme le hibihin amu abinirúni. Samina wamá luagun likesin Yónatan, le liráü urúei Saulu. Masandirunti gimugaü ladüga manúadirun lani Heowá lun ligía lan arúeiha lárigiñe Saulu, ani aba lanúadiruni Dawidi. Lubaragiñe lira, arufudati Yónatan ínsiñeni luma areiduni, ani ruti gurasu lun ani íderagualei (1 Sam. 23:16-18). Gayaraati san wáyeihani lani hénpulu?
ÍDERAGUA WAMAÑA WADUHEÑU IBIHEI AFAYEIRUAHAÜ
12. Kaba adundehani tídangiñeti Bíbülia íderaguaña waduheñu ibihei afayeiruahaü?
12 Anhein wagunfulira adundehani le tídanbei Bíbülia hama waduheñu wibihiba ugundani luma darangilaü ani líderagubadiwa giñe ibihei afayeiruahaü. Ka adundehani líchugubei Pábulu houn iduheñu tidan ligaradan houn kolosana? Ariñagati: “Würiña, gaganbadi humá houn húmarigu; ligía katei buiti le lunbei hadügüni keisi afiñetiña luagu Wabureme Kristu. Wügüriña, hínsiñe hamá húmarigu hun, móusera humaña wuriba. Isaanigu, aganba humaña hagübürigu lidan sun katei, ladüga ligía hínsiñebei lun Bungiu. Agübürigu, másügüraguala hagumadiruniña hisaanigu, ragühañein maguraasuni” (Kol. 3:18-21). Chóuruti úara lan hisaminan wama luagu humémegili lan adundehani burí le houn wügüriña hama würiña maríeitiña luma houn isaanigu.
13. Ida luba tibihin aban íbiri lun lánharun tani weiriei lun inarüni?
13 Samina waméi le. Aban tasaminarun aban íbiri móuserun lanu tani weiriei, le mama gefenti, buidu. Tídehaba san lun labuidurun katei anhoun asigeneha luma luagu ligaburi lóuserun? Íbini anhoun ibiha lun ladügüni le tabusenrubei, tadügüba san lun busén lan leseriwidun lun Heowá? Uá. Tídehatimaba anhoun arufuda inebesei lun keisi ichügüdinaü hadan iduheñu. Tídehaba lun ñein lan darangilaü 1 Féduru 3:1, 2).
hadan iduheñu, tíchuguba uéiriguni lun Heowá ani háfuga íbini labusenrun tani weiriei leseriwidun lun Bungiu. Anhein asusereda ítara, háfuga hibihini biángubei hagía afayeiruahaü (aliiha huméi14. Ka lunbei ladügüni aban íbiri anhein mineben lubéi tun lani weiriou?
14 Guentó samina wamá aban lan íbiri wügüri asaminarubei mineben lan tun lani weiriou, to mama Gefentu. Libihiba san lun linebedun tun lau lagúarahan tun lun larufuduni ligía lan agumadihabei múnada? Uá. Agurabati Heowá lun láyeihani Hesusu lun lóuserunu lani weiriou lau ínsiñeni (Efe. 5:23). Ru lumuti Hesusu lilurudun lidan damuriguaü lau ínsiñeni luma gurasu (Luk. 9:46-48). Kristiánu le afalaruti lani Hesusu hénpulu háfuga libihin lun giñe tabusenrun lani weiriou teseriwidun lun Heowá.
15. Ida liña larufuduni aban kristiánu tun lani weiriou hínsiñe tan lun?
15 Ariñagatu Bíbülia houn wügüriña maríeitiña: “Hínsiñe hamá húmarigu hun, móusera humaña wuriba” (Kol. 3:19). Kristiánu le hínsiñehabubei tun lani weiriou óusera lumutu lau inebesei lau laganbuni tisaminan luma lau larufuduni gebegi lan le tasaminarubei lun (1 Fe. 3:7). Íbini siñá lan ladügüni le tariñagubei súnwandan, dan le lálügüdünu ka lan tisaminanbei íderagua lumuti lun desidírü lan buidu (Ari. 15:22). Dan le hínsiñe tan lani wügüri weiriou lun mafosurun lumutu lun inebe lan tun, gañein lumuti tinebese. Dan le hínsiñe tan lani aban kristiánu weiriou hama lisaanigu lun, ménrenguntimati lun heseriwidun lun Heowá lau ugundani ani lun hibihini afayeiruahaü lánina ibagari magumuchaditi.
Ka gayaraabei wadügüni lun madügün lan turóbuli hama waduheñu lun weferidiruni afayeiruahaü? (Ariha huméi párafu 13 darí 15).
NIBUREINTI MÍGIRABA LUN LADÜGÜN SOMU KATEI LUN BEFERIDIRUNI AFAYEIRUAHAÜ
16, 17. Anhein nibureingidibu lubéi, ka gayaraabei badügüni lun masafaragun ban luagu ligaburi hóuserun bagübürigu?
16 Háfuga aban ban nibureinti le agüriarúbei hama agübürigu kristiánu ani háfuga samina ban ua lan gunfuranda hamanibu bagübürigu o luagu deregüdaya lan halurudun. Gayaraati ladügün magundani lun machourun bani eseriwiduni lan lun Heowá üma le buídutimabei. Gama lumoun, anhein bígira inarüni, málübadibu íchiga fe úati lan súdini ban houn ha híbiri gürigia kei bínsiñe houn bagübürigu luma houn íbirigu ha lídanbaña damuriguaü.
17 Súdiniti hererehan agübürigu houn hasaanigu. Lun hamuga mererehan hamá bun, ma bálügüdaguña hamuga bungua anhein inarüni lubéi nidiheri hamá buagu? (Ebü. 12:8). Gama lumoun, háfuga mínsiñe lan bun ida liña lan hererehan bun. Lubaragiñe betenirun lun ligaburi hererehan bun, houchabá basaminarun anihein lan somu resun le uágubei hadügei. Ligíati, darangilubá ani áfaaguaba lun bóunigiruni ligaburi bóunabun. Ariñagatu Bíbülia magañidun hamá gürigia ha chúbaña aau (Ari. 17:27). Áfaaguaba lun aban ban gürigia le derebuguti le gabafuti lun leresibirun adundehani lau darangilaü ani le asagarubei buiti lídangiñe adundehani meberesenga ida liña lan lichugún lun (Ari. 1:8). Ruti saragu buiti bun kristiánugu hamá bagübürigu ha hínsiñehabutiña lun Heowá luma lun inarüni. Chóuruti busén hamá híderagunibu ibihei ibagari magumuchaditi.
18. Ka uagu desidírü hubéi meferidirun humani afayeiruahaü?
18 Sun wagía gachansintiwa lun wibihin aban afayeiruahaü le buiti: ibagari lun súnwandan sielu o ibagari magumuchaditi lidan Paraísu ubouagu. Chóuruti emenigini le, lugundun Bungiu le adügübaliwa füramasebalin. Ariñagati luagu ibagari lidan Paraísu labuinchuba lan “lau lasubudiruniwa luéirigun Wabureme” (Isa. 11:9). Sun ha lúnbaña hawinwandun ubouagu lidan dan ligía larufudahaba Heowá Bungiu houn. Mosu wáfaagun lun wibihini afayeiruahaü ligía. Ligíati, madireira waméi warihin luéi lani Heowá füramasei. Ualá adügüti lun weferidiruni wafayeiruaha.