Wáluahaña san aramudaguagülei luma Heowá?
“Sefu lumuti Aburemei habagari lubúeingu; mabeichawagunbaña ha afiñebaña luagu!” (SAL. 34:22).
UREMU: 49, 32
1. Ida liña hasandiragun saragu lubúeingu Bungiu houngua ladüga figóu?
LUAGU aban dan, féridi laali meha apostolu Pábulu luguraasun darí lun lariñagun: “Fugiabu au!” (Rom. 7:24). Uguñe weyu, sandiguatiña giñe saragu lubúeingu Bungiu ha úaraguatiña houngua ítara. Íbini áfaagua hamá kristiánugu lun hadügüni lugundan Heowá, sun wagía charatiwa ladüga galagante wamani figóu. Ani añahein hádangiñe ha adügaañabaña aban figóu wéiriti, saminatiña úabei lan feruduna lániña Heowá.
2. a) Según Sálumu 34:22, ka uagu moun lumuti lubéi hasandiragun lubúeingu Bungiu houngua lau duru? b) Kaba wariha lidan arütíkulu le? (Ariha huméi rekuáduru “ Lun wafurendeirun, o lun wáluahani le mini lubéi somu profesía?”).
2 Rutu Bíbülia ichouruni woun luagu ha lan áluahabaña aramudaguagülei luma Heowá moun lumuti hasandiragun houngua lau duru (aliiha huméi Sálumu 34:22). Ka mini lubéi wáluahan aramudaguagülei luma Heowá? Ka burí katei lunbei wadügüni lun gudemehabu lan Bungiu woun ani feruduna láwame? Wóunabubei álügüdahani burí le danme le wakutihani katei lan meha uburugu aramudaguagülei le uágubei layanuha Lúrudu lidan binadu Ísüraeli luma ka lan un leseriwida. Inarüni gumese lan aban iseri daradu leweñeguame daradu lánina Lúrudu lidan fedu lánina Pentekosutesi lidan irumu 33. Gama lumoun, lunti waritaguni Heowá lan íchugubalin Lúrudu. Ligíati, le lariñagubei Lúrudu luagu uburugu aramudaguagülei arufuda lumuti woun ka lan lasaminarubei Heowá luagu figóu, hawagu afigouhatiña luma luagu asakürihani. Gumese wamá akutihei ka lan meha uagu anihein lubéi uburugu burí le ani ida liña lan meha layusurún.
HANÚADAHA “UBURUGU ARAMUDAGUAGÜLEI” HÚNIWAGUA
3. Ka meha lunbei ladügǘn lau le áfaruti aban gürigia Ísüraeli?
3 Wéiriti meha luriban ligibugiñe lagu Heowá lagidaruni aban gürigia libagari gürigia líledi. Anhein meha áfaraha aban gürigia, mosu meha lidin “liduhe le afarúbei le yarafatimagilibei liduhegua luma”, áfarei le áfarubalin liduhe (1 Lur. 35:19). Ítara liña meha lafayeiruni áfarahati lidurun lau libagari guánarügü ladüga láfarun aban gürigia le madurunti. Mosu meha lánhingichun le lunbei laguburahani lita liduhe lau lóufudagun lun mawiyedun lan Fulasu Füramasewati, ladüga ariñagaali meha Heowá: “Dasei lumuti áfarahani ubóu”. Ani ru laali meha gumadi le: “Madaseira huméi ageiraü le ñeinba lubéi haganawa” (1 Lur. 35:33, 34).
4. Ka meha asuseredubei dan le láfarahan aban gürigia mabusenrunga Ísüraeli?
4 Ka meha asuseredubei dan le láfarun aban ísüraelina aban gürigia mabusenrunga? Íbini meha mama lan lau lugundan ladügei, gadurunti meha luagu láfarun aban gürigia madurunti (Agu. 9:5). Gama lumoun, kei le mama lubéi labusenrun, ígirati meha Heowá lun larufudún gudemehabu lun. Gayaraati meha lanurahan áfarahati ligía lidoun aban lídangiñe sisi uburugu aramudaguagülei, séfuñu luba meha ñein luéi liduhe gürigia le láfarubei. Gama lumoun, siñati meha láfuridun ñéingiñe darí lounwen fádiri le íñutimabei (1 Lur. 35:15, 28).
5. Ka uagu gayara lubéi líderaguniwa uburugu aramudaguagülei lun buídutima lan gunfuranda wamani Heowá?
5 Ariñagati meha Heowá lun Hosué lun lanúadahani uburugu burí le dan le lariñagun lun “hanúadahan uburugu aramudaguagülei”. Bungiu guánarügü íchugubei gumadi lun lanuadirúniwa uburugu burí ligía lun aramudaguagüleime, lidan amu dimurei, lun meha sagüráubei lan fulasu burí ligía (Hos. 20:1, 2, 7, 8). Ligía gayara lubéi wálügüdagun woungua: “Ida liña san líderaguniwa fulasu aramudaguagülei lun gunfuranda wamani lugudemehabu Heowá buidu? Ani ida liña líderaguniwa lun wáluahan aramudaguagülei luma Heowá uguñe weyu?”.
“GASU LARIÑAGUNI [ÁFARAHATI] HOUN ÁBUTIGU KA LAN LÉBUBEI LANURAHAN”
6, 7. a) Ka meha lunbei hadügüni ábutigu dan le láfarahan aban gürigia mabusenrunga? (Ariha huméi dibuhu le lídanbei lagumeseha arütíkulu). b) Ka uagu lunti lubéi meha layanuhan áfarahati hama ábutigu?
6 Dan le meha láfarun aban ísüraelina aban gürigia mabusenrunga, mosu meha lanurahan lidoun uburugu aramudaguagülei ani dan lachülürün lubenari uburugu mosu meha “lariñaguni houn ábutigu ka lan lébubei lanurahan”. Mosu meha hígiruni lun lebelurun (Hos. 20:4). Fiú dan lárigiñe, mosu meha hóunahani lidoun fulasu le ñein lubéi láfaraha lun haguseragüdüni lábutigu uburugu ligía (aliiha huméi 1 Lúrudu 35:24, 25). Anhein meha hariha aguseragüdütiña mama lan labusenrun áfarahati láfarunbalin gürigia ligía, aba meha hígiruni lun lagiribudun lidoun uburugu aramudaguagülei.
7 Ka uagu mosu lubéi meha layanuhan áfarahati hama ábutigu? Ladüga mosu lan meha hakipuruni damuriguaü le Ísüraelibei harumañu luma lun híderaguni le áfarahabei ibihei lugudemehabu Heowá. Afuranguagüdati aban sásaamu lidan taturiahóun Bíbülia anhein lan meha mayanuhan anurahati hama ábutigu, gayaraati lan meha lafarún hilagubei. Ani ariñagati giñe: “Ligía guánarügüba meha gadurun luagu lounwen, ladüga mayusurun lani chansi le líchugubei Bungiu lun líchugun ichouruni lun”. Le meha áfarahati mabusenrunga gayaraati meha libihin ídemuei, gama lumoun, mosu meha láluahani ani anha ligía lun. Anhein meha midin aramudagua lidan aban lídangiñe uburugu burí ligía, gayaraati meha láfaruni liduhe gürigia le láfarubei.
8, 9. Ka uagu lunti lubéi lamuriahan aban kristiánu le adügübei aban figóu wéiriti ídemuei hama wéiyaaña lidan afiñeni?
Sant. 5:14-16). Libiaman, ladüga ligía lan hawadigimaribei wéiyaaña lidan afiñeni, híderaguniña afigouhatiña ha asakürihaaña lun haransehani hamadagua luma Bungiu luma lun hígiruni figóu ligía (Gal. 6:1; Ebü. 12:11). Ani lǘrüwan, ladüga iridúa hamá wéiyaaña lidan afiñeni ani arufudahóua ligía houn lun híderaguniña afigouhatiña ha asakürihaaña lun hawalidagun lídangiñe igarigu luma duru le hasandirubei. Ariñagati Heowá ítara haña lan wéiyaaña lidan afiñeni kei “aramudaguagülei luéi garabali luma luéi luriban dan” (Isa. 32:1, 2). Ma arufuda lumuti sun katei le lugudemehabu Bungiu?
8 Uguñe weyu, dan le lábürühan aban kristiánu lidoun figóu wéiriti megei lumuti hídehan wéiyaaña lidan afiñeni ha lídanbaña damuriguaü. Ka uagu súdini lubéi ladügüni? Furumiñe, ladüga Heowá lan ariñagubei tidan Lererun wéiyaaña lan lidan afiñeni lúnbaña hetenirun lun figóu le wéinamuti (9 Sandihaña saragu lubúeingu Bungiu awalidaguni dan le hayanuhan hama wéiyaaña lidan afiñeni ani resibi hagía ídemuei. Kéiburi aban íbiri gíriti Danieli, adügati aban figóu wéiriti, gama lumoun, sügüti saragu hati ani hanufudeti labahüdaguni houn wéiyaaña lidan afiñeni. Ariñagati: “Kei le sügühali lubéi meha saragu dan, genegeti meha nun úaali lan ni kata le gayaraati hadügüni nuagu”. Súnwandan meha hanufude lan Danieli luéi hasubudiruni amu le ladügübei. Ani sagü meha lafurieidun, sanditi meha mosu lan lagumeserun lau lamuriahan ferudun luma Heowá. Aban weyu, aba lamuriahan ídemuei hama wéiyaaña lidan afiñeni. Dan le laritaguni le asuseredubei, aba lariñagun: “Inarüni hanufude nan yebe nayanuhan hama. Gama lumoun, lárigiñebei nadügüni, ítara liña kamá aba hagidarun aban lihürü anügüni nuéi. Guentó sanditina úaali lan adarasahati nafurieidun lun Heowá”. Guentó, darangilu haali lisaminan Danieli, ani málügili liridún keisi ídehani lidan damuriguaü.
MOSU LANURAHAN “LIDOUN ABAN LÍDANGIÑE UBURUGU LIGÍA”
10. Ka meha lunbei ladügüni áfarahati anhein busén lubéi larufudún gudemehabu lun?
10 Anhein meha busén lubéi aban gürigia le áfarahati mabusenrunga lun larufudún gudemehabu Hosué 20:4). Mosu meha lachülürün furese lidoun uburugu ligía ani mosu meha lerederun ñein darí lounwen fádiri le íñutimabei lun lesefuruni libagari. Mini lan le mosu lan meha lígirun saragu katei, kéiburi luadigimari tuma luban ani siñá meha laweiyasuhan (1 Lur. 35:25). * Gama lumoun, gebegiti meha sun sákürifisiu ligía. Anhein meha áfurida áfarahati lídangiñe uburugu aramudaguagülei, larufuduña meha meberesen lan lau áfaraali lan aban gürigia, ani líchuguñein meha libagari lidan peliguru.
lun, mosu meha lanurahan lidoun uburugu aramudaguagülei le yarafatimabei (aliiha huméi11. Ka gayaraabei ladügüni kristiánu le asakürihabei lun larufuduni megei lani lugudemehabu Bungiu?
11 Uguñe weyu, mosu giñe ladügün afigouhati le asakürihabei somu katei lun gudemehabu lan Bungiu lun. Mosu lígiruni figóu le ladügübei sunsuinagubei, ani mosu giñe ladisedun luéi furumiñeguarügü katei le gayaraati ladügün lunya lábürühan lidoun figóu. Lau lídehan Bungiu ariñagati apostolu Pábulu hawagu kristiánugu korintuna ha asakürihabaña luagu hafigoun luagu anihein lan “íruni le ñǘbuinbei lúmagiñe Bungiu” hawagu ani íderagua laaña lan katei ligía lun hesefurun lídangiñe duru, igañi, anufudei, emeidini luma abeichúni (2 Ko. 7:10, 11, TNM). Anhein giñe wadüga sun wayaraati lun wígirun aban figóu wéiriti, warufudubei lun Heowá nidiheri wamá luagu gádantiwa ani megei wamani lugudemehabu.
12. Ka burí katei lunbei lígiruni aban kristiánu anhein busén lubéi gudemehabu lan Bungiu lun?
12 Ka burí katei háfuga mosu lan lígiruni aban kristiánu lun lasigirun Bungiu arufuda gudemehabu lun? Mosu lígiruni íbini katei burí le hínsiñebei lun anhein gayara lubéi ladügün lun lafigouhan (Mat. 18:8, 9). Kéiburi anhein ínchaha habaliwa wamadagu lidoun katei le mabuidunti, wígirubei san wamadagua hamá? Anhein hénrengu lubéi woun matun wamá saragu uniñein le gayaraati labacharuadagüdüniwa, wadiseduba san luéi burí sügǘ le ñein lubéi busén wamá watun lóugiñe le lubeibei? Anhein wáfaaguña lubéi lun wagidaruni luriban ayumahani lánina agamariduni wawariua, wígirubei san waríagun pelíkula, páhina lidan Internet o somu katei le gayaraabei ladügün lun liabin saminaü wíyeti woun? Haritagua waméi buidu lan furumiñeguarügü sákürifisiu le wadügübei lun úaragua wamá lun Heowá. Úati katei gáritimati luéi wasubudiruni ígira láadiwa lan Bungiu. Gama lumoun, úati katei íchuguti saragu ugundani kei wasandiruni línsiñehabu súnwandan (Isa. 54:7, 8).
LUNTI LESERIWIDUN HUN KEISI ARAMUDAGUAGÜLEI
13. Ka uagu gayara lubéi meha chouru lan lasandiragun áfarahati lungua ani gunda ligía lidan fulasu aramudaguagülei?
13 Dan le beluhali áfarahati lidoun fulasu aramudaguagülei, séfuhali. Ariñagati Heowá luagu uburugu burí ligía lunti lan leseriwidun houn keisi “aramudaguagülei” (Hos. 20:2, 3). Mamuriahanti meha lunya laguserawagüdün áfarahati luagu ligiaméme kesi. Ani migirúnwati meha giñe liduhe le afarúbei lun lebelurun lidoun uburugu ligía lun lidin áfarei le aramudagubei. Sun dan le laubei áfarahati lidan uburugu, lóunigiruñein meha Bungiu ani moun lumuti meha lanufudedun. Mámañein meha tidan aban furisun, gayaraati meha lawadigimaridun, líderagun amu gürigia ani seriwi ligía lun Heowá lidan darangilaü. Gayaraati meha gunda lan libagari.
Chouru huméi feruduna laadün lan Heowá. (Ariha huméi párafu 14 darí 16).
14. Ka gayaraabei lachoururuni aban kristiánu le asakürihaali luagu aban figóu le wéiriti?
14 Añahein lubúeingu Bungiu ha asakürihaaña luagu aban figóu wéiriti le hadügübei ani sandiguagiña houngua lau duru. Añahein fiú saminatiña larihiba lan Heowá somu dáseiti hawagu súnwandan. Anhein ítara liña lubéi hasandiragun hungua, gayaraati hachoururuni arufudaali lan Heowá gudemehabu hun ani feruduna laadün lan sunsuinagubei. Ligía moun lumuti lubéi hanufudedun. Chouru lumuti Danieli, le uágubei Sálumu 103:8-12).
wayanuha lidan párafu 9, katei le. Lárigiñebei híchugun wéiyaaña lidan afiñeni eweridihani lun ani íderagua haméi lun haruma lan lisaminan, aba lasandirun aba lanarime awalidaguni. Ariñagati: “Mámaali meha mosu nasandiragun nungua lau duru. Dan le lidin figóu, lídiña lun súnwandan. Kei lariñaguni Heowá, barǘ lumuti wafigoun ani aba líchuguni dise wawéi. Marihindigia wamaali”. Ariñagaadiwa buga, dan le lan beluhali áfarahati lidoun uburugu aramudaguagülei, mámaali meha mosu lanufudedun luéi láfaruni liduhe gürigia le láfarubei. Ítarameme, dan le feruduna laali Heowá wafigoun, moun lumuti wanufudedun luéi lasagaruniya woun o luéiya laguseragüdüniwa luagu (aliiha huméi15, 16. Ida liña wasandiragun woungua dan le wasubudiruni ru lani Hesusu libagari wawagu ani ligía lan Wafadirinbei le íñutimabei?
15 Le linarün katei, gíbetimati resun wamá lun wafiñerun luagu lugudemehabu Heowá sügǘ meha hau ísüraelina. Kei warihini lidan lagumeseha arütíkulu, ariñagati Pábulu fugiabu lan ligía ladüga siñá lan ladügüni sun le lariñagubei Heowá sin lachararun. Gama lumoun, íbini láfaaguña lan meha kóntüra figóu luma binadu libagari, ariñagati: “Búngiugubeirügü, lídangiñe Wabureme Hesukrístu” (Rom. 7:25). Kei le meha asakürihaali lan, chouru lumuti meha feruduna laali lan Heowá lídangiñe Hesusu. Ru lumuti Kristu libagari wawagu, ítara liña larumadahani wasaminan ani ru ligía darangilaü tun wanigi (Ebü. 9:13, 14). Ani kei ligía lubéi wafadirinbei “ligía gayara lubéi lasalbaruniña ha ayarafadubaña lun Bungiu [...], lugundun gabagariti súnwandan lun layumuragun lun Bungiu hawagu” (Ebü. 7:24, 25). Lidan tidaani Bíbülia, ruti meha hawadigimari fádirigu ichouruni houn ísüraelina luagu feruduna lubéi lan Heowá hafigoun. Uguñe weyu, ruti luadigimari Hesusu keisi fádiri le íñutimabei ámuya resun woun lun wachoururuni gudemehabubei lan woun “íderagua láwame lau lareini lidan wemegeirun” (Ebü. 4:15, 16).
16 Ligíati, anhein busén hubéi háluahan aramudaguagülei luma Heowá, afiñe humá luagu lani Hesusu sákürifisiu. Masaminara humá houn lan sun gürigia lebegi asalbaruni. Afiñe humá luagu hunti lan (Gal. 2:20, 21). Afiñe humá luagu seremei lan lebegi asalbaruni gayara lubéi feruduna lani Bungiu hifigoun. Ani afiñe humá giñe ru lani lebegi asalbaruni emenigini hun lun hibihin ibagari magumuchaditi. Lani Hesusu sákürifisiu idewesei le líchugubei Bungiu hun.
17. Ka uagu busén hubéi háluahan aramudaguagülei luma Heowá?
17 Arufuda lumuti Heowá lugudemehabu lau líchuguni uburugu burí le aramudaguagülei. Afuranguagüda lumuti giñe ítara luagu sagüráu lan ibagari lun. Gama lumoun, arufuda lumuti giñe ida liña lan híderaguniwa wéiyaaña lidan afiñeni, ka lan mini lubéi asakürihani le inarüniti luma ka lan uagu gayara lubéi wachoururuni luagu feruduna lániwa Heowá. Wáluahaña san aramudaguagülei luma Heowá? Ligía aramudaguagülei le chóurutimabei (Sal. 91:1, 2). Lidan leweñegua arütíkulu, warihibei ida liña lan líderaguniwa fulasu burí le aramudaguagülei áyeihei Heowá, le íchugubalin hénpulu le buídutimabei lánina irichaü luma gudemehabu.
^ par. 10 Ariñagatu saragu líburu huríu luagu ñüdün hamá meha liduheñu le áfarahabei mabusenrunga awinwanda luma lidan uburugu aramudaguagülei.