Ida luba wéchudun lidan aban iseri damuriguaü
“DAN le nachülürünbei lidoun iseri damuriguaü le, ma lanarime tádühan nanigi —liña Allen—. * Ibidiñeti meha nun anhein nadariruba lubéi iseri numadagu o anhein buídubei lubéi néiguadun houn íbirigu”. Leseriwiduña meha Allen lidan aban iseri damuriguaü kéiburi 1,400 kilómeturu (900 maili) tuéi luban.
Anhein sánsihadün lubéi lidoun amu damuriguaü, háfuga anihein lan giñe murusun anufudei huagu. Kaba íderaguaün lun héchudun? Ka gayaraabei hadügüni anhein hénrengu lubéi hun lun héchudun sügǘ lau le hagurabubei? Ani íbini anhein masansirun hubéi damuriguaü, ida luba híderaguniña ha achülürübaña lidoun hani damuriguaü?
IDA LUBA HADÜGA LUN HÉCHUDUN?
Dan le lasansirún lubara aban tídibu wewe, súfuriti. Lun ménrengun lan lahandilihóun, libe-agei dan aba ladüürǘn libe-agei lílagüle. Lárigiñe, mosu líchugun tídibu wewe ligía iseri ílagülei. Ítara liña giñe dan le wáguyun lidoun iseri damuriguaü, háfuga hénrengu lan woun. Héchuhadün meha lidan binadu damuriguaü, adügaadün meha umadagu buítiña ñein ani seti humaali meha le lunbei hadügüni lun hakipuruni humadagua luma Heowá. Guentó mósuya héchudun luagu iseri hibagari. Ka gayaraabei líderagunün? Hafalaruni adundehani le tídanbei Bíbülia. Ariha wamá fiú lídangiñe.
Ítara liña gürigia le aliihabarun Lererun Bungiu súnwandan “kei tídibu wewe le abunúti laru duna, le íchuguti lin lidan lidaani, ani másaürati giñe lubana. Buíduti lidin houn lidan sun le hadügübei” (Sal. 1:1-3).
Ítara kei megei lan aban tídibu wewe duna súnwandan lun buidu lan laweiridun, mégeiti giñe aban kristiánu laturiahanu Lererun Bungiu súnwandan lun here lan lumadagua luma Bungiu. Ligíati, mígira huméi haliihanu Bíbülia sagü weyu, hidin adamuridagua luma hadügüni aturiahani keisi iduheñu o hábuguarügü. Haritagua huméi mosu lan hasigirun adügei le meha hadügübei furumiñe lun hakipurun aban lubuidun umadaguaü luma Heowá.
“Ha gareinibaña, awansetiña; ha íchugubaña, ibihatiña giñe” (Ari. 11:25).
Wéiritimabei hugundan ani furesetimabei héchudun ánhadün áfurida apurichiha. Ariñagati aban wéiyaali lidan afiñeni gíriti Kevin: “Weseriwidun keisi prekursorugu ídehatiña murusun dan lárigiñe wachülürün lidoun iseri damuriguaü ligíatima íderagubadiwa, au tuma nani weiriou”. Ani ábaya lariñagun: “Lidan murusun dan subudi wamaaña meha íbirigu, prekursorugu luma fulasu le ñein lubéi wapurichiha”. Ariñagati Roger, le águyubei lidoun aban fulasu díseti kéiburi 1,600 kilómeturu (1,000 maili) ñéingiñe lubéi meha lawinwanda: “Wáfuridun apurichiha súnwandan ligía igaburi buídutimabei lun wéchudun lidan aban iseri damuriguaü. Gayaraati giñe bariñagun houn wéiyaaña lidan afiñeni aranse ban lun bídehan lidan le mégeiwabei, háfuga lidan tarumadahóun Luban Adamuridaguni, lidan somu fánreinti lidan adamuridaguni o lun básügürün abuda somu gürigia lun lidin adamuridagua. Anhein hariha íbirigu aranse ban lun bídehan, furesebei hagahabudun bun”.
“Hínsiñehabu humá” (2 Ko. 6:13).
Súdiniti lun warufudun ínsiñeni houn amu íbirigu. Dan le táguyunbei Melissa hama tiduheñu lidoun aban iseri damuriguaü, aba hetenirun adüga iseri umadagu. Ariñagatu: “Ayanuhatiwa meha hama íbirigu lubaragiñe luma lárigiñe adamuridaguni. Ítara, gachansintiwa meha lun wayanuhan hama mama lúnrügü wariñagun ida hiña luma ayó”. Íderagua lumutiña giñe katei ligía lun hafurendeiruni hiri
íbirigu furese. Areidatiña meha giñe hama íbirigu, ani ídehati katei le lúntima buidu lan hamadagua. Ariñagatu Melissa: “Ru wamuti linumerun wagagamurun wóuniwagua. Ítara liña meha gayara lan hagúarun woun lun hamisurahaniwa lidoun somu aransehani dandu le luáguti weseriwidun lun Heowá kei amu luwuyeri adamuridaguni”.Anhein hénrengu lubéi hun hasubudirun iseri gürigia, gayaraati hagumeserun lau katei ñǘbüriti. Gayaraati háhayachun —íbini hénrengu lan hun furumiñe—. Láurügü háhayachun hayarafaduba amu huagun. Lau sun luwuyeri ariñagatu Bíbülia: “Gúndaaguagüda lumutu áhayachuni lanigi gürigia” (Ari. 15:30). Abahüdaguatu Rachel, to águyuboun dise luéi fulasu le ñein lubéi tágurahoua: “Haburitina saragu”. Ani ábaya tariñagun: “Anihein dan mosu lan nafosuragun nungua lun nayanuhan hama íbirigu lidan damuriguaü le ñein nubéi. Le nadügübei, aba náluahan dan le ñun haña lan gürigia ani dan le mama lan hayanuhaña ni ka uma. Háfuga haburi hamá giñe gürigia hagía kei nuguya”. Ka uagu mouchun hubéi hayanuhan hama ámuñegueinarügü gürigia lubaragiñe luma lárigiñe kada adamuridaguni?
Luagu amu oubaü, háfuga weiri lan habusenrun hasubudirun amu gürigia lidan furumiñeti burí dimaasu. Gama lumoun, gayaraati eferidireina lan ubebeni ligía lau lásügürün dan. Anhein asusereda katei le hun, mosu háfaagun lun hasigirun adüga umadagu.
Dan le lasansirún lubara aban tídibu wewe súfuriti, gama lumoun, ábaya labadülerun lílagüle lidan fulasu le ñein lubéi labunúa.
MÉGEITIÑA GÜRIGIA DAN LUN HÉCHUDUN
Anuhein fiú tídibu wewe hénrenguti lárügüdün tílagüle lidan iseri múa. Ítarameme, mama sun gürigia lun héchudun luagu aban iseri damuriguaü furese. Anihán fiú adundehani tídangiñeti Bíbülia le gayaraabei líderagunün anhein lǘraüha lubéi hasansirun damuriguaü ani méchudungidün:
“Moun lumuti lubeiti labuchadun wawagu adügei katei le buídubei, lugundun ánhawa ítarameme, walubahaba buiti danme le lachülürün dan lun weresibiruni” (Gal. 6:9).
Anhein méchudun hubéi lidan dan le hasaminarubei, ragǘ humá lanwoun dan. Kei hénpulu gíbetiña misionerugu ha áfuridubaña tídangiñe Leskuela Galadü ani aba hounahóun eseriwida lidan amu ageiraü, aba burí herederun saragu irumu lidan fulasu le ñein lubéi heseriwida lubá gayara lan hagiribudun ebeluha hageira. Íderagua lumutiña katei le lun gamadagua hamá hama íbirigu ha ñein lubéi heseriwida luma lun héchudun luagu iseri burí igaburi le ñéinbei.
Águyaali Alejandro saragu wéiyaasu ani subudi lumuti siñati lan hóufudahani gürigia dan le hemegeirubei lun héchudun. Abahüdaguati: “Lidan lagumuhóun asansiruni, ariñagatu nani weiriou: ‘Añahein sun numadagu lidan le aban damuriguaü!’”. Aba laritaguagüdüni tun ligiaméme lan tariñagubei bián irumu lubaragiñe dan le háguyunbei lidoun damuriguaü ligía. Gama lumoun, lidan bián irumu ligía arufudatu lani weiriou berese tan hau ha híbiri, ani aba buidu lan tumadagua hama ha meha ibidiñebaña tun furumiñe.
“Málügüdaguaba bungua ka lan uagu buídutima lubéi sun dan le sügühalibei, lugundun mama álügüdahani lánina lichú aau lira” (Apur. 7:10).
Áfaagua humá lun ua lan konparárü humani binadu hani damuriguaü luma le iseri. Háfuga ua lan fararagua hamá íbirigu ha lídanbaña iseri damuriguaü o háfuga weiri lan furangu lan hayanuhan. Meberesenga ida haña lan, teni humá lun lubuidun hagaburi, ítara kei habusenrun lun ladügǘn hun. Añahein íbirigu ha águyutiña lidoun amu damuriguaü ani mosu hálügüdagun houngua: “Hínsiñetiña san sun níbirigu nun?” (1 Fe. 2:17).
“Hamuriaha, ábame líchugun Bungiu hun” (
Sigí humá amuriaha ídemuei luma Heowá. Ariñagati aban wéiyaali lidan afiñeni gíriti Dawidi: “Máluguntina nadügüni nábugua”. Ani ábaya lariñagun: “Anihein katei le siñabei wadügüni sin lídehan Heowá. Ligía aba lubéi nafurieidun lun luagu katei ligía”. Ligiaméme tariñagubei Rachel, to buga uáguboun wayanuha. Ariñagatu: “Dandu nuguya kei nani weiriei masandiraguntiwa woungua keisi lílana damuriguaü, aba wafurieidun lun Heowá luagu katei ligía ani aba wamuriahan luma lau fulesei lun líderaguniwa arihei anhein wadügüña lubéi somu katei le adügübei lun hadisedun íbirigu wawéi. Ani aba wáfaagun lúntima wásügürün dan hama”.
Agübürigu, anhein hénrengu lubéi houn hisaanigu héchudun, furíei humá hama luagu katei le. Íderagua humaña adarira iseri umadagu lau hadügün aransehani lun hásügürün dan hama íbirigu ha buítiña lun umadagume.
ÍDERAGUA HUMAÑA HA MÁLÜGILIBEI HACHÜLÜRÜN LUN HASANDIRAGUN HOUNGUA BUIDU
Ka gayaraabei hadügüni hawagu ha málügilibei hachülürün lidoun damuriguaü? Áfaagua humá lun aban humá umadaü buiti lúmagiñe furumiñe. Samina humá luagun katei le hínsiñebei hamuga hun lun ladügǘn huagu lun hamuga málügili lan hachülürün lidoun aban damuriguaü, ani adüga huméi (Mat. 7:12). Gayaraati san hamisurahaniña iseri íbirigu lidoun háhuduragun keisi iduheñu o lun harihini programa hati-auti le lánina JW Broadcasting? Ka uagu madügün hubéi aransehani lun hapurichihan hama? O ánhaña hamisuraha eiga somu katei húbiñe, chóuruti mabulieidun habéi lan. Anihein san amu burí ídemuei le gayaraabei híchuguni houn?
Abahüdaguati Carlos: “Dan le wachülürünbei lidoun iseri damuriguaü, aba tíchugun aban íbiri aban ubanaü woun lau tiri budigü burí to ñein lubéi gayara lan wagañeihan ebegi buiti. Huuti katei ligía woun saragu”. Dan le hayabin gürigia lídangiñe amu fulasu háfuga heteingirubadiwa lan luagu warufuduni houn ida luba lan hasansiragun lidan fulasu le süti, le dilitimati o le ñein lubéi láhuya huya saragu. Ani ánhadün ayanuha houn luagu ageiraü luma luagu ka lan hánibei gürigia ha lídanbaña fulasu relihión, híderagubaña lun buídutima lan lidin houn lidan apurichihani.
BUITI ÁFAAGUNI LIGÍA
Barühali Allen, le uágubei wayanuha furumiñe, lóugiñe aban irumu lidan aban iseri damuriguaü, ani ariñagati: “Furumiñe mosu meha nafosuragun nungua lun nasubudiruniña íbirigu. Ani guentó sanditina kama hamuga niduheñu, ani gúndaatina”. Ariñagati Allen madügün lan asansiruni lun leferidiruniña lumadagu. Le linarün katei, gíbetimahaña lumadagu, ani háfuga ladurarun hamadagua lun súnwandan.
^ par. 2 Sánsiwati fiú iri.