Uá. Madarirúnti ni tidan Bíbülia ni tidan líburu to burí ayanuhaboun luagu binadu sügǘ adüga hamani kristiánugu katei le.

Adügati ligaburi lásügürawagüdün bérusu le tidan saragu Bíbülia lun lasaminarún añahein lan meha gürigia badiseitiña hawagu hilaaña lidan lidaani Pábulu. Anuhoun Bíbülia ariñagatu: “Anhein máguyugun habéi hilaaña, kagia uagu habadiseira gürigia hawagu hilaaña?”.

Ariha waméi le hariñagubei bián sásaamu. Ariñagati Gregory Lockwood: “Madaribadiwa lan ni tidan Bíbülia ni tidan líburu to ayanuhaboun luagu binadu sügǘ badisei hamá gürigia hawagu hilaaña o lidan hiri hilaaña”. Ariñagati giñe sásaamu Gordon Fee: “Madarirún lan badisei le tidan Bíbülia ni tidan burí líburu to ayanuhaboun luagu binadu sügǘ. Ariñagati giñe mayanuhóua lan luagu katei le tidan iseri daradu ani uá lan ariñahani luáguti adüga hamani kristiánugu ha lánina binadu dan ni luagu adügǘwa lan tidan ligilisi to burí achülaaguboun lárigiñe hóunwegun apostolugu”.

Según le tariñagubei Bíbülia, ariñagati Hesusu: “Adüga humaña nánime disipulugu; badisei humaña [...]. Arufudaha huguyame houn lun gaganbadi hamá lun sun le uágubei nariñaga hun” (Mat. 28:19, 20). Ligíati, lun meha aban lan lani Hesusu disipulu aban gürigia mosu meha labadiseirun, lafurendeirun luagu Heowá luma luagu Hesusu, luma lun lafiñerun hawagu ani gaganbadi ligíame houn. Ani furanguti siñabei lan ladügüni aban gürigia le hilaali ani bunawaali ani siñabei giñe ladügüni aban kristiánu le wínwangilibei luagu le hilaalibei (Apur. 9:5, 10; Huan 4:1; 1 Ko. 1:14-16).

Kati labusenrunbei Pábulu lariñagun lidan 1 Korintuna 15:29?

Mafiñentiña meha fiu lílana damuriguaü le Korintubei luagu águyuguni (1 Ko. 15:12). Arufuda lumuti meha Pábulu bulíeiguatiña lan lau mafiñen hamá. Ida? Ariñagati: “Sagü weyu yarafa wamá lun wounwen”. Furanguti wínwangili lan meha Pábulu dan le lariñagunbalin dimurei le, íbini lagagibudagun luma denchaü afiñeti meha buidu buidu lárigiñe lanme lounwen láguyuguba lan kei sífiri gabafuti, ítara kei láguyugun Hesusu (1 Ko. 15:30-32, 42-44).

Mosu meha gunfuranda hamani korintuna le, kei kristiánugu lubéi anuadirúaaña hagía, hagagibudaguba meha luma óuchawaguni sagü weyu ani hóunweguba meha lubaragiñe háguyuguagüdüniwa. Lau habadiseirun lidan aban luma Kristu, ítara liña “kéisigubeirügü hamuga lídanñanu lan giñe aban luma lidan lounwen” (Rom. 6:3). Mini lan badisei le, hóuchawaguba lan meha ani hilagua hagíame lubaragiñe háguyugun lun hawinwandun sielu, ítara kei lasuseredun lun Hesusu.

Lóugiñe bián irumu lárigiñebei labadiseirun Hesusu dúnarugu, aba lariñagun Hesusu houn bián hádangiñe lani apostolugu: ‘Habadiseirúaba lau badisei le lunbei nibihini’ (Mar. 10:38, 39). Mama meha labadiseiruña Hesusu lidan duna oura ligía. Le meha labusenrunbei Hesusu lariñagun, óunweniba lan lanüga úaragua lan gürigia lun Bungiu. Ariñagati Pábulu hasufuriruba lan kristiánugu anuadirúaaña lun gafanran hamá lidan luéirigun Kristu (Rom. 8:16, 17; 2 Ko. 4:17). Mini lan le, hóunweguba lan lubaragiñe háguyugun lun hawinwandun sielu.

Ligíati, gayaraati lásügürawagüdün dimurei le lariñagubei Pábulu lau lubudubu ítara: “Anhein ua lubéi águyuguni lídangiñe óunweni, kaba hamuga hadüga ha abadiseirúbaña lidan óunweni? Anhein máguyugunbaña lubéi hilaaña, kagia uagu habadiseira lidan óunweni?”.