IDA liña hasandiragun hungua dan le heresibirun aban gárada to labürühaboun aban umadaü le buiti ani hínsiñehabuti? Resibiti Timotéu aban gárada ítaratu lúmagiñe apostolu Pábulu, gárada to wasubudiruboun uguñe weyu tidan Bíbülia kei ligaradan Pábulu lun Timotéu. Chóuruti busén lan meha Timotéu ladarirun aban fulasu le maniigati lun laliihanu gárada to lóunahaboun lumada lun. Másiñati samina lan Timotéu: “Ida liña funa san ladariragun Pábulu lungua? Anihein funa san somu adundehani lun líchuguni nun lun nabuiduragüdüni ligaburi nadügüni nidasin? Líderagubadina funa san le lariñagubei tidan gárada to lun nabuiduragüdüni nani ministeriu luma lun níderagun amu gürigia?”. Óunaba tumuti gárada gebegitu to álügüdahani burí le. Lidan arütíkulu le, wayanuha luagu fiu adundehani tídangiñe gárada to le gayaraabei líderaguniwa.

Dan le lagumeserubei Timotéu aliihoun gárada to labürüdüboun Pábulu lun, aba líchugun fe berese lan Pábulu lau. Lau saragu ínsiñeni, wati Pábulu lun Timotéu “niráü le hínsiñebei nun” (2 Tim. 2:2). Lau sun kei burí lan 30 irumu lau Timotéu dan le leresibirunbarun gárada to lúmagiñe Pábulu lidan irumu 65 l.l.K., gíbeeli meha lisubudin kei wéiyaali lidan afiñeni. Sügühali meha lóugiñe diisi irumu eseriwida úara luma Pábulu ani furendeihali meha saragu katei lúmagiñe.

Chóuruti ibiha lan meha Timotéu dǘgüdaguaü dan le lasubudirun lawanduñein lan meha Pábulu óuchawaguni lau úaraguni. Ladaürǘña meha Pábulu uburugu Roma ani málühali meha lun lafarún hilagubei (2 Tim. 1:15, 16; 4:6-8). Gayaraati meha larihini Timotéu ganigi le larufudubei Pábulu, ladüga abürühati Pábulu lun ariñageina: “Ligía nawandunbalin sun katei” (2 Tim. 2:8-13). Adügati awanduni le larufudubei Pábulu lun lederebugudun lafiñen Timotéu ani gayaraati giñe lederebudagüdüni wafiñen.

Ínchaha lumuti Pábulu Timotéu lun larihini leseriwidun lun Bungiu kei aban katei gebegiti. Le meha labusenrunbei Pábulu, lun meha ‘layusuruni Timotéu ubafu le líchugubei Bungiu lun’ (2 Tim. 1:6). Yusu lumuti  Pábulu dimurei güriegu khárisma lun layanuhan luagu “ubafu”. Dimurei güriegu le, mini lan libihín aban katei mafayeihanga, ani sin yu lan woun. Resibi lumuti Timotéu ubafu le dan le lanuadirúnbei lun leseriwidun lun Bungiu lidan aban igaburi espechaliti lidan damuriguaü (1 Tim. 4:14).

Ka meha lunbei ladügüni Timotéu lau ubafu le? Línchahanñein meha Pábulu Timotéu lun ‘líchugunu lanigi lidoun lidasin’. Ítara kei mosu lan línchawagun watu lun durungu lan, mosu meha giñe ladügün Timotéu ámuñegueinarügü katei lidan leseriwidun lun Bungiu lun lasigirun adügei lani ministeriu lau ubebeni. Mosu giñe wadügüni ligiaméme uguñe weyu lun wáfaagun lun weseriwidun lun Bungiu lau ubebeni.

Aba lasigirun Timotéu aliihoun gárada to lóunahaboun Pábulu lun ani aba ladarirun fiu dimurei le meha lunbei líderaguni lun buidu lan lidin lun lidan lani ministeriu. Ariñagati Pábulu lun tidan gárada tuguya: “Lau lubafu [s]ífiri [s]andu le wádanbei, góunigibei arufudahani le líchugubei Bungiu labun baríaahan” (2 Tim. 1:14). Kati arufudahani le lunbei meha lóunigiruni Timotéu? Lidan bérusu le lubaragiñebei le, ayanuhati Pábulu luagu “arufudahani harumati”, mini lan le inarüni le adarirubei tidan Sandu Bürütu (2 Tim. 1:13). Kei meha le aban lubéi minisi kristiánu Timotéu mosu meha larufudahani inarüni dandu houn íbirigu kei houn gürigia ha bóugudibaña luéi damuriguaü (2 Tim. 4:1-5). Lanwoun lira anuadirúati meha kei aban wéiyaali lidan afiñeni lun ladundehaniña lumutuniña Bungiu (1 Fe. 5:2). Ida luba meha lóunigiruni Timotéu arufudahani le leresibirubei, mini lan lira inarüni le lunbei larufudahani? Gayaraabei meha lóunigiruni lau lídehan lani Heowá sífiri sandu tuma Lererun Bungiu (2 Tim. 3:14-17).

Ru waali giñe aban arufudahani lábugiñoun waríaahan, inarüni le warufudahabei houn amu gürigia (Mat. 28:19, 20). Maweiyasun wamá abulieidei gebegi lan inarüni le warufudahabei. Lun lira mosu wafurieidun luma lun waturiahanu Lererun Bungiu súnwandan (Rom. 12:11, 12; 1 Tim. 4:13, 15, 16). Másiñati giñe aban lan wéiyaali lidan afiñeni huguya o heseriwiduña lan lidan dan dayarüti. Dasi gebegiti le wámabei, lunti líderaguniwa lun aban wamá gürigia ǘnabuguti le afiñeti luagu Bungiu. Ligíati, gayaraati wóunigiruni irisini le wámabei lau warufuduni gebegi lan woun ani afiñe wagíame líderagubadiwa lan Heowá óunigirei.

Laganagua dasi le lúmabei Timotéu, anihein larufudahan houn amu. Ligía lariñagubei Pábulu lun: “Katei le aganba báalibei nariñagun [...] arufudahabéi houn wügüriña ha afiñewati hawagu, ha gayaraati harufudahani houn amu” (2 Tim. 2:2). Laritaguagüdüñein meha Pábulu Timotéu mosu lan larufudahani sun katei le furendei laalibei houn amu. Uguñe weyu súdiniti lun háfaagun wéiyaaña lidan afiñeni lun hadügüni ligiaméme lidan damuriguaü. Aban wéiyaali lidan afiñeni meredebei lábuguarügü lau le furendei laalibei luáguti ida liña lan ladügǘn ítaga katei. Manufudeti luéi buídutima lan hadügüni amu dasi luéi ni luéi subudiwatima hamá luéi. Le labusenrunbei lun hayusurun lichú au luma lun kristiánugu hamá ha subudihabútiña lun hadasin. Ítarati, gayaraatimabei hídehan “wügüriña ha afiñewati hawagu” lidan damuriguaü.

Chóurutiwa ru lan Timotéu saragu seremei tuagu gárada to leresibiruboun. Ma gayaraati wasaminarun luagu Timotéu aliihei ariñahani gebegiti le luma asaminara sun oura luagu ida luba lan ladügüni le ariñawagúbei lun?

Busentiwa giñe wafalaruni adundehani le. Ida? Lau wáfaagun lun wayusuruni ubafu le líchugubei Bungiu woun, lau wóunigiruni irisini le luma lun warufudahani houn amu sun le wafurendeirubei. Ítarati, kei lariñaguni Pábulu lun Timotéu, gayaraabei wagunfulirun sunsuinagubei lau wani ministeriu (2 Tim. 4:5).