1-3. a) Ka uagu hínsiñe lubéi meha Salomón lun Heowá ani ka abiniruni leresibirubei Salomón? b) Kaba álügüdahani wóunaba lidan arütíkulu le?

NÍBUREINGILI meha Salomón dan le lagumeserunbei arúeiha Ísüraeli. Dan le lagumeserunbei arúeiha, aba larufudagun Heowá lungua lun lidan luénedü, aba lariñagun lun: “Amuriahabei le babusenrun numa, níchugubei bun”. Aba lóunabun Salomón: “Nibureingidina [...]. Ruba lubeiti aban anigi gaganbaditu nun” (1 Uru. 3:5-10). Arufudati le meha lamuriahabei Salomón subudi lani le siñá lubéi adüga. Ligía maweiriduntu lubéi wanigi luagu hínsiñe lan meha Salomón lun Heowá (2 Sam. 12:24). Kei hínsiñe lubéi le lamuriahabei Salomón lun Heowá, aba líchugun ‘lichú aau lun’ (1 Uru. 3:12).

² Sun dan le úaragua lubéi Salomón lun Heowá, ibihati saragu abiniruni. Ibiha lumuti chansi lun lábunagun “aban ténpulu lun Aburemei le Lubungiute Ísüraeli” (1 Uru. 8:20). Subudiwati meha Salomón ladüga lichú aau le líchugubei Bungiu lun. Ani abürühati ǘrüwa tídangiñe líburu to tídanboun Bíbülia lau lídehan Bungiu, aban tídangiñe Ariñawagúni.

³ Tidan líburu to gíriboun Ariñawagúni, fuati dimurei anigi kéiburi lóugiñe darandi wéiyaasu. Kei hénpulu, ariñagati Ariñawagúni 4:23: “Lídangiñe sun katei ubouagu, góunigiboun banigi, ladüga tídangiñe liabin ibagari”. Ka mini lubéi dimurei ‘anigi’ lidan bérusu le? Warihibei lidan arütíkulu le ka lan lílabei. Ani wóunabuba giñe bián álügüdahani súdiniti: Ida liña lálugun Satanási lun legeyedunu wanigi? Ani ka lunbei wadügüni lun wóunigirunu? Líderagubadiwa gufuranda wamani lóunabagüle álügüdahani burí le lun úaragua wamá lun Bungiu.

4, 5. a) Ida liña líderaguniwa Sálumu 51:6 lun gunfuranda wamani le mini lubéi dimurei ‘anigi’? b) Ida liña genegegua lan wóunigirunu wanigi lumoun wóunigiruni wátuadi?

⁴ Lidan Ariñawagúni 4:23, yúsuati dimurei anigi lun layanuhóun luagu kátañadiwa lan múnadagiñe wabiti (Sal. 51:6, TNM, abürüdǘni). Lidan amu dimurei, le mini lubéi dimurei ‘anigi’ wasaminan, le wasandirubei, lébuna wadügüni katei luma le wayumahabei. Arufudati ida waña lan múnadagiñe wabiti mama ida liña lan warihín.

⁵ Genegeguati wóunigirunu wanigi lumoun wóunigiruni wátuadi. Kéiburi hamuga, anhein busén wabéi lun buidu lan wátuadi lunti weigin buidu ani lunti wánhingichuni wágubu. Ítarameme, anhein busén wabéi lun buidu lan wamadagua luma Heowá, mosu waliihanu Bíbülia sagü weyu tuma wani agumeiraguagüdüni ani arufuda wameime wafiñen luagu Heowá sagü weyu lau wawinwanduni le wafurendeirubei luma lau wayanuhan luagu wafiñen (Rom. 10:8-10; Sant. 2:26). Luagu amu oubaü, gayaraati ladügün ligaburi wariawagún lun wafiñerun buidu lan wátuadi, íbini le lan linarün katei sándiñadiwa lan. Ítarameme, gayaraati giñe wafiñerun luagu buidu lan léibugun sun katei lidan wamadagua luma Bungiu íbini awanha lan asaminara katei mabuidunti (1 Ko. 10:12; Sant. 1:14, 15). Haritagua waméi busén lan Satanási lagadeiruni wasaminan. Ida liña lálugun ladügüni ani ida luba wóunigiragun woungua?

6. Ka labuserunbei Satanási libihin ani ida liña lálugun libihini?

⁶ Wuribati Satanási, luouguounrügüñein lasaminara, maganbaditi lun lilurudun Heowá ani busenti ladügün lun wasaminarun luma lun ítara wamá kei ligía. Kei siñá lan lafosuruniwa lun wadügüni le labusenrunbei, áfaaguati lun libihini lidan amu igaburi. Kei hénpulu, geyegu waña hau gürigia ha lábugiñebaña lubafu (1 Huan 5:19). Busenti lun busén wamá wásügürün dan hama íbini subudi lan woun “féridigüda” o gadei hamuti lan hagübüri umadagu ligaburi wasaminan luma ligaburi wóuserun (1 Ko. 15:33). Buiti lidin lun Mafia tau sádara to dan le layusurubarun lidan likesin urúei Salomón, le amarieidubei hama saragu würiña ha meha máhuduragunbaña lun Heowá.  Gabafutiña meha würiña hagía luagu Salomón saragu ani murusun murusun aba hadügün lun tegeyedun “lanigi” luéi Heowá (1 Uru. 11:3).

7. a) Ka amu katei ladügübei Satanási lun laburuchaguagüdüni lisaminan? b) Ka uagu lunti lubéi wóunigiragun woungua tuéi burí sádara to?

⁷ Yúsuti Satanási pelikula o pikchá luma burí programa le tídanbei bigibigitu lun laburuchaguagüdüni lisaminan. Subudi lumuti hanarime lan lubafu abahüdaguni, sansi lumuti ligaburi wasaminan, le wasandirubei luma le wadügübei. Íbini Hesusu yúsuti meha abahüdaguni lun larufudahan. Kéiburi abahüdaguni luagu samariana le buídubei luma isaani le árügüdübei luriban üma (Mat. 13:34; Luk. 10:29-37; 15:11-32). Gayaraati giñe hayusurun ha asaminarubaña kei Satanási abahüdaguni lun hagadeiruni wasaminan. Ligíati, góunigigua wamá woungua. Inarüni anuhein lan pelikula o pikchá luma programa le gayaraati wayusuruni kei isebáhari luma lun larufudahan woun sin lagadeiruni wasaminan. Ligíati, lunti warihini katei keisi lubudubu. Dan le lachülürün oura lun wanúadahan kaba lan wariha, álügüdagua wamá woungua: “Láluguña san programa le o pelikula to lun tarufudahan nun luagu buidu lan lun nadügün gasu lau le nayumahabei?” (Gal. 5:19-21; Efe. 2:1-3). Ánhawa ariha luagu larufuduñein lan katei ligía ligaburi lisaminan Satanási, dise wamá luéi kamá hamuga wóunigiraguña woungua luéi aban sandi le galugurahati.

8. Ida luba híderaguniña agübürigu hasaanigu lun hóunigirunu hanigi?

⁸ Agübürigu, huguyatima gánibalin buligasion lun hóunigiruniña hisaanigu luéi lagadeirunu Satanási hanigi hisaanigu. Chóuruti adüga humani sun hiyaraati lun madaga lan somu sandi hawagun hisaanigu. Kei hénpulu, kipu humutu huban harumañu ani fui humuti sun le gayaraabei ladügün dañu lun hátuadi. Aban katei ítarati lunbei hadügüni lun hóunigiruniña hisaanigu tuéi burí pelikula o pikchá, programa le tídanbei bigibigitu, páhina le lídanbei Internet, huraraü lidan gágamuru, konputadora o katei líbeina lira le gayaraabei lagadeiruniña  lau lisaminan Satanási. Ru laali Heowá buligasion hun lun hóunigiruniña hisaanigu luéi hagadeiruni hamadagua luma (Ari. 1:8; Efe. 6:1, 4). Ligíati, manufude humá lun híchugun gumadi houn según adundehani le tídangiñeti Bíbülia. Ariñaga humá houn hisaanigu ka lan gayaraabei harihini tidan bigibigitu lumoun le moun lubéi harihini ani íderagua humaña lun gunfuranda hamani ka lan uagu híchigei adundehani ligía houn (Mat. 5:37). Eibu aweinamudeina hamá, arufudaha humá houn lun hasubudiruni hagía houngua ka lan buídubei lumoun le wuribabei según lilurudun Bungiu (Ebü. 5:14). Haritagua huméi, furendei hamá isaanigu saragu lídangiñe le hariñagubei houn, gama lumoun, furendeitimatiña dan le híchugun agübürigu hénpulu buiti houn (2 Lur. 6:6, 7; Rom. 2:21).

9. Ka saminaü ládahabei Satanási hábulugun gürigia ani ka uagu denchá lubéi?

⁹ Álugati giñe Satanási lun legeyedunu wanigi lau ladügün lun wafiñerun luagu lichú aau le ubouagubei ani lun mafiñerun wamá luagu lichú lau Bungiu (Kol. 2:8). Kéiburi, ladügün lun hasaminarun gürigia le lan súdinitimabei lidan ibagari lun harisidun. Ka uagu dencha lubéi saminaü le? Ladüga ibiha haméi yebe o mibihin hamani, ha asaminarubaña ítara, aba hetenirun lun hibihin seinsu ani meberesegúntiña hagadeiruni hátuadi, heferidiruniña haduheñu luma hamadagua luma Bungiu (1 Tim. 6:10). Ma wagundan luagu líderaguniwa Wáguchi le siélubei lun warihini seinsu keisi lubudubu! (Apur. 7:12; Luk. 12:15).

10, 11. a) Lun gayara lan wóunigiragun woungua, ka lunbei gayara lan wadügüni? b) Ka meha hadügübei óunigirutiña baríeiru ha lánina binadu dan ani ida luba leseriwidun wasaminan kei óunigiruti baríeiru?

¹⁰ Lun gayara wóunigirunu wanigi, lunti wasubudiruni ka lan gayaraabei lagadeirunu ani dise wagíame luéi lau lóufudagun. Haritaguagüda lumutiwa dimurei le lídanbei Ariñawagúni 4:23 hawagu óunigirutiña ha meha óunigihabaña lidan lidaani urúei Salomón. Óunigira hamuti meha lubarieirun uburugu ani ánhaña meha ariha layarafadun denchaü, aba meha hawisahan. Íderagua lumutiwa hénpulu le lun gunfuranda wamani le lunbei wadügüni lun magadeirun lani Satanási wasaminan.

¹¹ Lidan meha binadu dan, nadagimeintiña meha óunigirutiña ha luágubaña baríeiru úara hama ha óunigirubalin lubenari uburugu (2 Sam. 18:24-26). Óunigira hamuti meha uburugu úara lau hachoururuni darugu lan bena dan le ayarafadeina hamá áganiñu (Neem. 7:1-3). Gayaraati leseriwidun wasaminan le tadundehabei Bíbülia * kei leseriwidun óunigiruti le meha luágubei baríeiru. Ida? Lau lawisahan dan le lálugun Satanási leferidiraguagüdünu wanigi, mini lan le, dan le láfaagun lun lagadeiruni wasaminan, le wasandirubei luma le wayumahabei. Sagü leweridiruniwa wasaminan lunti wadügün gasu lau, lau wadügüni ítara wadouruñein bena luéi Satanási.

12, 13. Ka gayaraabei ladügün lun wouchawagún ani ka lunbei wadügüni?

¹² Ariha wamá aban hénpulu luáguti ida luba lan wóunigiragun woungua luéi lubafu Satanási. Arufuda haali Heowá woun moun lumuti lan nírügü wayanuhan luagu magíaguni ni amu luwuyeri iwiyeni (Efe. 5:3). Gama lumoun, kaba wadüga ánhaña agumesera wánigu paaná lidan wadagimanu o leskuelarugu ayanuha luagu katei wíyeti? Subudi wamuti lunti  lan wamahadun lun “wuribani luma igaburi lánina ubóu” (Titu 2:12). Ligíati, gayaraati lawisaruniwa wasaminan (Rom. 2:15). Kábati wadüga? Wadügüba san gasu lau wasaminan le óunigirubaliwa ani wadourubei bena luéi katei le mabuidunti? Másiñati wasandiragun woungua busén wamá waganbuni le hariñagubei o warihinu iyawaü to harufudahaboun. Le lunbei wadügüni, wasansiruni yanu o woudin ñéingiñe.

¹³ Mégeiwati ganigi lun wawandun dan le hadügüdarun wapanaagu wawagu lun wadügün somu katei mabuidunti o lun wasaminarun luagu. Gayaraati wachoururuni luagu aríagu liña lan Heowá lun áfaaguni le wadügübei lun wamahadun lun lisaminan Satanási ani líchugubei erei le wemegeirubei woun luma lichú aau le wemegeirubei lun gayara lan wagañeirun (2 Kro. 16:9; Isa. 40:29; Sant. 1:5). Ka amu katei gayaraabei wadügüni lun wóunigirunu wanigi?

14, 15. a) Ka un lunti lan wadararunu wanigi ani ida luba wadügüni? b) Ida liña líderaguniwa Ariñawagúni 4:20-22 lúntima wasagarun buiti lídangiñe waliihanu Bíbülia? (Ariha huméi rekuáduru “ Samina humá luagu le haliihabei”).

¹⁴ Lun wóunigirunu wanigi, úati buídurügü lan lun wadouruni üma luéi luriban saminaü, lunti giñe wadararuni lun le buídubei. Samina wamá luagu hénpulu luáguti uburugu le gabarierubei. Darú lumuti meha óunigiruti bena, lubenari uburugu lun mebelurun hamá áganiñu. Gama lumoun, dará lumuti lun lebelurun éigini luma burí katei le hayusurubei gürigia. Anhein hamuga meha madara lan bena, hóunweguña hamuga lílana uburugu ladüga halama. Aban katei ítarati asuseredubei tun wanigi, lunti wadararunu súnwandan lun lebelurun larufudahan Heowá tidoun.

¹⁵ Darí wamuti lisaminan Bungiu tidan Bíbülia. Ligíati súnwandan dan le waliihanu, adügati lun buidu lan wasaminan, le wasandirubei luma le wadügübei. Lúntima wasagarun buiti lídangiñe waliihanu Bíbülia, lunti wadügün bián katei. Furumiñe, súdiniti lun wafurieidun. Ariñagatu aban íbiri: “Lubaragiñe naliihanu Bíbülia, amuriahatina luma Heowá lun líderagunina arihei lubuidun arufudahani le tídanbei Lererun” (Sal. 119:18). Libiaman, lunti wararamagun asaminara luagun le waliihabei. Dan le wadügüni sun le, chülütu Lererun Bungiu dagá lidoun tilulin agei wanigi ani aba línsiñedun ligaburi lisaminan Heowá woun (aliiha huméi Ariñawagúni 4:20-22; Sal. 119:97)

16. Ka buiti hasagarubei saragu íbirigu lau harihini programa JW Broadcasting?

¹⁶ Ábanya lídangiñe igaburi lun wígirun lun lebelurun lisaminan Bungiu wachüguagun lun warihini sun le ichugúbei lidan JW Broadcasting^®. Ariñagatiña aban feru maríeitiña: “Óunaba lumuti Heowá wafurieidun lau programa le áfuridubei sagü hati. Ruti gurasu woun luma dǘgüdaguaü dan le wasandiragun woungua wábuguarügü luma híruñu. Ani aganbaha wamuti burí uremu múnada sun oura: dan le wábougun, dan le warumadahan o dan le wátuña lan ti”. Íderagua lumutiwa programa le lun wóunigirunu wanigi. Arufudahati woun lun wasaminarun kei Heowá luma lun wawandun dan le ladügüdarún wawagu lun wasaminarun kei Satanási.

17, 18. a) Según 1 Urúeigu 8:61, ka asuseredubei dan le wadügüni le larufudahabei Heowá woun? b) Ka wafurendeirubei lídangiñe lani urúei Esekíasi hénpulu? c) Lau warihini ligaburi lafurieidun Dawidi lun Heowá lidan Sálumu 139:23, 24, ka gayaraabei wamuriahan luma Heowá lidan wafurieidun?

¹⁷ Sagü warihini buiti le asagarúbei dan le ladügǘn le buídubei, ábatima lederebugudun wafiñen (Sant. 1:2, 3). Buiti wasandiragun woungua lau wadügün lun panta lan Heowá wau lau lagúarun woun lirahüñü ani ábatima  busén wamá wagundaaragüdüni (Ari. 27:11). Ruti óuchawaguni le úmabei wagagibudagua chansi woun lun warufuduni mafanreinragun tan wanigi (Sal. 119:113). Hínsiñeti Heowá woun tau sun wanigi ani aranseñu waña lun gaganbadi wamá lun lilurudun luma lun wadügüni lugundan (aliiha huméi 1 Urúeigu 8:61).

¹⁸ Inarüni sun lan wagía charatiwa, ladüga gafigoun wamá. Dan le lasuseredun katei le haritagua waméi lani urúei Esekíasi hénpulu. Charati meha, gama lumoun, aba lasakürihan, aba liñuragun lídangiñe lifigoun ani sigiti eseriwida lun Heowá tau “aban anigi gaganbaditu” (Isa. 38:3, TNM, 4-6; 2 Kro. 29:1, 2; 32:25, 26). Ligíati, mánhara wamá lun lagadeiruni Satanási wasaminan. Amuriaha wamá luma Heowá lun líderaguniwa ibiha “aban anigi gaganbaditu” (1 Uru. 3:9; aliiha huméi Sálumu 139:23, 24). Gayaraati úaragua wamá lun Heowá ánhawa óunigiroun wanigi buidu.