ARÜTÍKULU LÁNINA ATURIAHANI 5
Igaburi le warufudubei dan le woudin adamuridagua
“Sigí humá arufudei hafiñen luáguti lounwen Hesusu darime liabin” (1 KO. 11:26, TNM).
UREMU sjj 18 Seremei luagu esefuruni
LE LUNBEI WATURIAHANI *
1, 2. a) Ka larihibei Heowá dan le hadamuridagun saragu míñunu gürigia lidan Ladinerun Aburemei? (Ariha humoun iyawaü to luáguboun tidáü garüdia to). b) Kaba wakutiha lidan arütíkulu le?
KA SAN larihibei Heowá dan le hadamuridagun saragu míñunu gürigia lidan sun ubóu lun haritaguni Ladinerun Aburemei? Mámarügüñanu saragu gürigia lariha, téniti lun kada aban hádangiñe ha achülürübaña. Kéiburi ha achülürübaña sagü irumu. Haganagua gürigia ha, másiñati hádangiñe lan ha achülürübaña lidoun Aritaguagülei hagagibudaguña luma lanarime éibaahouni. Añahein amu, machülaaguntiña adamuridagua sagü dimaasu, gama lumoun, sanditiña mosu lan houdin lidoun Aritaguagülei. Ariha lumutiña giñe Heowá ha achülaagubaña luagu furumiñeti wéiyaasu, háfuga lun harihini ka lan adügǘbei ñein.
2 Chóuruti gunda lan Heowá lau larihin gibe hamá gürigia achülürütiña lidoun Aritaguagülei (Luk. 22:19). Gama lumoun, mama átiriñanu lan achülürütiña súdinibei lun, le súdinibei lun lébuna hachülürün. Lidan arütíkulu le, wakutihaba aban katei súdiniti: Ka uagu mámarügüñein lubéi lidan Ladinerun Aburemei woudin adamuridagua? Ka uagu ñüdün wabéi giñe lidoun adamuridaguni le laransehabei Heowá dimaasu auti houn ha hínsiñehabubaña lun? Ariha waméi ka lan lébunabei woudin adamuridagua.
Lidan sun ubóu, rúati aban buiti achülürüni houn saragu míñunu gürigia ha achülürübaña lidoun Ladinerun Aburemei. (Ariha huméi párafu 1 luma 2).
ADÜGATI ǗNABUGUNI LUN WOUDIN ADAMURIDAGUA
3, 4. a) Ka uagu woudin adamuridagua? b) Ka igaburi warufudubei lau woudin adamuridagua? c) Según le lariñagubei 1 Korintuna 11:23-26, ka uagu mosu lubéi woudin lidoun Aritaguagülei?
3 Ñǘdüntiwa adamuridagua ladüga ligía lan aban lídangiñe fánreinti lánina wáhuduragun lun Bungiu. Ñǘdüntiwa giñe ladüga 3 Huan 9). Ánheinti wagía, busentiwa lun larufudahan Heowá woun tuma lóundarun (Isa. 30:20; Huan 6:45).
ñein larufudaha Heowá woun. Afiñetiña gürigia ha pántabaña úa lan ni kata lun larufudahóun houn (4 Dan le woudin adamuridagua, arufuda wamuti ǘnabugu wamá ani aranseñu wamá lun larufudahan Bungiu woun. Ñǘdüntiwa lidoun Aritaguagülei lani lounwen Kristu mama ladüga fosuwarügü wamá lun woudin, ñǘdüntiwa ladüga ǘnabugu wamá ani busentiwa lun gaganbadi wamá lun gumadi le líchugubei Hesusu: “Adügameme huméi katei le, haritaguagüleme nuagun” (aliiha huméi 1 Korintuna 11:23-26). Derebugüda lumuti adamuridaguni le, wemenigin ani haritaguagüda lumutiwa hínsiñe wamá lun Heowá. Gama lumoun, subudi lumuti luagu ua lan buídurügü lan weresibirun dǘgüdaguaü luma gurasu aban wéiyaasu lidan irumu. Ligía líchugubei adamuridaguni woun sagü dimaasu ani ariñagati woun lun woudin. Adügati ǘnabuguni lun gaganbadi wamá. Ani barütiwa saragu oura aranseha lubá wadamuridagun luma lun wíchuguni wóunabagüle lidan.
5. Ka uagu hánhara gürigia ha ǘnabugubaña lun agunbirahani le ladügübei Heowá?
5 Sagü irumu, hánharun saragu gürigia lau ǘnabuguni lun agunbirahani le ladügübei Heowá lun hafurendeirun luagu (Isa. 50:4). Liibe-agei dan, chülütiña lidoun Aritaguagülei ani lárigiñe ligíaali burí hachülürün lidoun adamuridaguni (Sak. 8:20-23). Dandu wagía kei iseri disipulugu, hínsiñeti woun lun weresibiruni ladundehan Bungiu luma larufudahan, le íderagubadiwa ani sefu lumutiwa (Sal. 40:17). Chóuruti, ua lan ni kata buídutimati ani súdinitimati kei wánharun lun agunbirahani lun adamuridaguni lun larufudahóun woun luagu Heowá luma luagu Hesusu le Liráü, le hínsiñebei lun (Mat. 17:5; 18:20; 28:20).
6. Ida liña líderaguni ǘnabuguni aban gürigia lun lachülürün lidoun Aritaguagülei?
6 Sagü irumu, wáfaagun lun wagunbirahaniña sun ha wayaraatiña lun hachülürün lidoun Aritaguagülei. Saragu gürigia ǘnabugutiña sagahaña buiti lídangiñe wagunbirahaniña. Ariha wamá aban hénpulu. Átiri irumu guentó, aba líchugun aban íbiri aban agunbiraagülei lun aban gürigia, gama lumoun, aba lariñagun gürigia ligía lun siñabei lan lachülürün. Guñoun le ladügǘnbei Aritaguagülei, aba taweiridun lanigi íbiri lau larihini gürigia ligía tidan Luban Adamuridaguni. Wéiritu lanigi gürigia ligía saragu lau eresibiruni le libihubei, ábati lagumeserun abasiha lidoun sun adamuridaguni. Ani ǘrüwarügüñein adamuridaguni leferidirun lidan aban irumu. Ka íderagubalin asansirei laritagun luma lun lidin lidoun sun adamuridaguni? Dan lárigiñe, ariñagati íbiri le agunbirahabalin: “Aban gürigia ǘnabuguti wügüri le”. Furanguti Heowá lan achawahabalin gürigia le lun hádangiñe hamá lumutiña. Uguñe weyu, ábanhali gefenti luagu Heowá le badiseihali (2 Sam. 22:28; Huan 6:44).
7. Ida liña líderaguniwa le wafurendeirubei lidan adamuridaguni luma le waliihabei tidan Bíbülia lun ǘnabugu wamá?
7 Íderagua lumutiwa le wafurendeirubei lidan adamuridaguni luma le waliihabei tídangiñe Bíbülia lun ǘnabugu wamá. Lidan burí dimaasu le lubaragiñebei Aritaguagülei, ayanuhóuati saragu luagu lani Hesusu hénpulu luma ǘnabuguni le larufudubei lau lederegeruni libagari wawagu. Lidan buriti weyu le lubaragiñebei Aritaguagülei, ínchahouatiwa lun waliihani abahüdaguni burí tídangiñeti Bíbülia luáguti lounwen luma láguyugun Hesusu. Sun burí adundehani le, adügati lun wasandirun aban óunwenbu eteingiruni luagu sákürifisiu le ladügübei wawagu. Adügati katei le lun wabusenrun wáyeihani lǘnabugun luma lun wadügüni lugundan Bungiu, íbini dan le hénrengu lan (Luk. 22:41, 42).
ÍDERAGUA LUMUTIWA GANIGI LUN WOUDIN ADAMURIDAGUA
8. Ida liña larufuduni Hesusu ganigi lan?
8 Ganigi ábanya ligaburi Hesusu le wabusenrubei wáyeihan. Samina wamá luagu ida liña lan larufuduni ganigi lan weyu burí lubaragiñe lounwen. Subudi lumuti meha buidu yarafaali lan meha weyu lun héherahaba lan láganigu lau, bei hameime ani áfara hameime hilagubei (Mat. 20:17-19). Íbini ítara, ganigiti meha lun lagagibudagun luma óunweni. Dan le lachülürünbei weyu ligía, aba lariñagun houn lani apostolugu ha úaraguabaña, ha lúmabaña lidan fuluri-agei Hetüsemaní: “Sará humá, keimoun, yarafaali le lunbei lalugurunina” (Mat. 26:36, 46). Dan le hóudinbei láganiñu tau áruma lun hárügüdüni, aba ládarun aban pasu lubaruaguóun, aba lariñagun houn luagu ligía lan háluahabei ani aba lamuriahan hama súdaragu lun hígiruniña apostolugu houngua (Huan 18:3-8). Ma arufuda lumuti ganigi lan? Uguñe weyu, dandu kristiánugu anuadirúaaña kei amu mudún áfaaguatiwa lun wáyeihani ganigi le luágubei Hesusu. Ida?
Ruti erei houn wíbirigu ganigi le warufudubei dan le woudin adamuridagua. (Ariha huméi párafu 9). *
9. a) Ka uagu anihein lubéi dan megei wamá ganigi lun woudin adamuridagua súnwandan? b) Ka lánibei wani hénpulu hawagu wíbirigu ha adaürǘbaña ladüga hafiñen?
9 Másiñati aniheinbei lan dan hénrengu lan woun lun woudin adamuridagua súnwandan. Anhein ligía lubéi asuseredubei hun, mégeitün ganigi. Añahein wíbirigu wuribati hátuadi, dagati lanarime íruni hawagu o sandiguatiña houngua lau maguraasuni. Añahein amu, híchuguña haduheñu o gumadimatiña saragu lidere dan houn ladüga hafiñen. Samina wamá murusunraü hawagu íbirigu ha furisunrugubaña ladüga hafiñen. Saminaadiwa san luagu gayara lan líderaguniña wani hénpulu? (Ebü. 13:3). Dan le híchugun fe luagu awanhagua lan eseriwida lun Heowá íbini laganagua lénrengunga, aba hibihin erei lun meferidirun hamani hafiñen, ganigi luma úaraguni le harufudubei. Ligía asuseredubei lun apostolu Pábulu. Dan le ladaürǘnbei uburugu Roma, aba meha lagundaarun sagü laganbun añahagua lan íbirigu eseriwida lun Heowá lau úaraguni (Fili. 1:3-5, 12-14). Murusun dan lubaragiñe o lárigiñe lígirawagüdün, aba labürühanu gárada to gíriboun Ebüréu. Tidan gárada tuguya lariñaga houn íbirigu ha úaraguabaña, lun lan mígirun hamani hadamuridagun ani ariñagati houn: “Hínsiñeguameme humá húmagua keisi íbirigu” (Ebü. 10:24, 25; 13:1).
10, 11. a) Kátaña lúnbaña wagunbirahaniña lidoun Aritaguagülei? b) Ka resun líchugubei Éfesuna 1:7 lun wagunbirahaniña gürigia ha?
10 Arufudatiwa giñe ganigi wamá dan le wagunbirahaniña waduheñu, wánigu paaná lidan wadagimanu hama wabesinanigu lidoun Aritaguagülei. Ka uagu wadügei? Ladüga seremei wamani Heowá luma Hesusu luagu le hadügübei wawagu. Ani busentiwa giñe lun hafurendeirun gürigia ha ida luba lan hasagarun buiti lídangiñe “lueirin lareini” Heowá ladüga lani Hesusu sákürifisiu (aliiha huméi Éfesuna 1:7; Aruf. 22:17).
11 Dan le woudin adamuridagua, arufudatiwa ábanya lubuidun igaburi. Dandu Heowá kei Hesusu, arufuda hamaali lubuidun igaburi le lidan burí lanarime igaburi.
ÍNCHAHA LUMUTIWA ÍNSIÑENI LUN WOUDIN ADAMURIDAGUA
12. a) Ka uagu adüga lubéi adamuridaguni lun lederebugudun ínsiñeni le wasandirubei luagu Heowá luma luagu Hesusu? b) Según 2 Korintuna 5:14, 15, ida luba wáyeihani Hesusu?
12 Ínchaha lumutiwa ínsiñeni le wasandirubei luagu Heowá luma luagu Hesusu lun woudin adamuridagua ani adügati woudin adamuridagua lun lederebugudun ínsiñeni ligía. Súnwandan waritaguagüdüniwa lidan adamuridaguni luagu le ladügübei Heowá luma Hesusu wawagu (Rom. 5:8). Haritaguagüda lumutiwa Aritaguagülei hanarime lan ínsiñeni le hasandirubei wawagu, íbini hawagun ha úagili gunfuranda hamani lisudinin lafayeirún lebegi asalbaruni. Sanditiwa aban lanarime eteingiruni, ligía wáfaagunbei lun wáyeihani Hesusu sagü weyu (aliiha huméi 2 Korintuna 5:14, 15). Ani ínchaha tumutiwa wanigi lun walawahani Heowá ladüga líchuguni libagari Liráü wawagu. Aban igaburi lun walawahani Heowá lau wíchuguni wóunabagüle tídangiñe sun wanigi lidan adamuridaguni.
13. Afuranguagüda huméi ida luba lan warufuduni weiri lan línsiñe Heowá luma Liráü woun.
13 Arufudatiwa weiri lan línsiñe Bungiu luma Liráü woun lau aranseñu wamá lun wadügün sákürifisiu hawagu. Liibe-agei dan, dan le woudin adamuridagua, mégeitiwa wadügün ámuñegueinarügü sákürifisiu. Kei hénpulu, anihein saragu damuriguaü adüga hamuti adamuridaguni le labadinaguabei dimaasu guñoun lárigiñe lóurate wadagimanu, másiñati buchá lan burí wawagu. Le aban adamuridaguni, adügǘwati samudi o dimaasu lidan weyu le hemeeraguña lan gürigia. Ariha lumuti san Heowá ñüdün wamá adamuridagua íbini buchá lan wawagu? Anha. Éibutima hanarime lan áfaaguni le wadügübei, gebegitimabei ínsiñeni le warufudubei lun Heowá (Mar. 12:41-44).
14. Ida liña líchuguni Hesusu hénpulu le buídutimabei?
14 Ru lumuti Hesusu hénpulu le buídutimabei lau ladügün sákürifisiu hawagu amu lau ínsiñeni. Mámarügü ladüga hilá lan hawagu ha afalarubalin, ladüga giñe sagü lan meha weyu ladügüni le buídubei houn lubaragiñe líchugun ugundani lúniwagua. Kei hénpulu, adamuridaguati hama íbini buchá lan meha luagu o nidiheri lan (Luk. 22:39-46). Aba letenirun lun le gayara lubéi íchiga houn, mama lun le gayaraabei libihini (Mat. 20:28). Anhein hanarime lubéi giñe ínsiñeni le wasandirubei luagu Heowá luma hawagu wábirigu, wadügübei sun wayaraati lun woudin lidan Ladinerun Aburemei luma lidan sun adamuridaguni.
15. Kátima gürigia wabusenrubaña wíderagun?
Gal. 6:10). Arufuda wamuti wínsiñehabu houn lau wínchahaniña lun hayabin lidoun adamuridaguni, lídountima Aritaguagülei. Ítara kei Heowá luma Hesusu, sanditiwa aban lanarime ugundani lau hagiribudun ha madamuridagunhaña mapurichihan hagía lumoun Wáguchi le hínsiñehabubei, le óunigirubaliwa (Mat. 18:14).
15 Tílana aban óundaruni hánina kristiánugu inarünitiña wagía ani lau sun wagundan yusu wamuti liibe-agei lídangiñe wadaani lun wagunbirahaniña gürigia lun giñe tílana hamá. Gama lumoun, busentiwa wíderaguniña hátima ‘waduheñubaña lidan afiñeni’, ha madamuridagunhaña mapurichihan hagía (16. a) Ida luba wíderagun wámagua ani ida luba líderaguniwa adamuridaguni? b) Ka uagu buidu lubéi lun waritaguni le lariñagubei Hesusu lidan Huan 3:16 lidan lidaani Aritaguagülei?
16 Lidan burí dimaasu le lubaragiñebei Aritaguagülei, busentiwa wagunbirahaniña sun gürigia ha wayara lun hayabin lidoun Aritaguagülei, le lunbei ladügǘn wándaradi guñoun 19 lidan gádürü-hati, irumu 2019 (ariha huméi rekuáduru “ Wagunbirahaba san amu gürigia?”). Lídanme sun irumu, agunbiraha wamaña wíbirigu lun hachülürün lidoun adamuridaguni. Éibutima dan, ayarafadeina waña lun lagumuchagüle ubóu. Ligía lunti lubéi woudin adamuridagua, líderagubadiwa lun warufudun ǘnabuguni, ganigi luma ínsiñeni (1 Tesa. 5:8-11). Arufuda waméi lun Heowá weiri lan weteingiruni luagu lueirin ínsiñeni le lasandirubei dandu ligía kei Hesusu wawagu (aliiha huméi Huan 3:16).
UREMU sjj 126 Deregüdagu, agagudúañu ani lau ganigi!
^ par. 5 Laritawagún lounwen Kristu le lunbei ladügǘn wándaradi guñoun 19 lidan gádürü-hati, irumu 2019 ligíaba adamuridaguni le súdinitimabei lidan irumu. Ka uagu wóudiba lubéi lidoun adamuridaguni espechaliti le? Chóuruti busén wamá wagundaaraguagüdüni Heowá. Lidan arütíkulu le, wakutihaba ka lan burí igaburi warufudubei dan le woudin lidan Aritaguagülei luma dan le woudin lidan adamuridaguni le adügǘbei dimaasu auti.
^ par. 52 LE ARIÑAWAGÚBEI TUAGU IYAWAÜ. Aban íbiri le adaürǘbei luagu lafiñen ibiha gurasu lau laliihan aban gárada hámagiñetu liduheñu. Gúndaati lau lasubudiruni mabulieidun hamani ani úaragua hamá giñe lun Heowá lau sun anihein lan chagaguaü ladüga polítika lidan fulasu le ñein lubéi heredera.