LUAGU-ǗRÜWA binaafin, 24 lidan eneru, irumu 2018, aba lichugún aban awisahani espechaliti houn íbirigu ha tídanbaña Beteli Meriga hama ha tídanbaña Beteli Kanadá: ábanhali lan hádangiñe lílana Sétanu le Arihibei lau Hawadigimari Gefentiña luagu Heowá lidan sun Ubóu íbiri Kenneth Cook, irahü.

Pensilbania (Mériga) lagüriahóua íbiri Cook ani ñein giñe laweirida. Furendei lumuti inarüni lúmagiñe aban lani paaná tidan kolehiu murusun dan lubaragiñe leresibihan íbiri Cook. Aba labadiseirun 7 lidan sisi-hati, irumu 1980. Gumese lumuti leseriwidun lidan dan dayarüti kei prekursorugu ha adügübaña 70 oura luagu hati 1 lidan nefu-hati, irumu 1982. Bián irumu lárigiñe, aba lagunbirahóun lun leseriwidun Betelirugu. Gumeseti awadigimarida Wallkill (Newayóru) 12 lidan diisi-hati, irumu 1984.

Lidan 25 irumu le ásügürübei lúmagiñe lagumeseruni íbiri Cook leseriwidun Betelirugu, nadagimeinti lidan saragu dasi, dandu le ñein lubéi imprimírua tan agumeiraguagüdüni kei le ñein lubéi larihúa lau le mégeiwabei Betelirugu. Lidan irumu 1996, aba lamarieidun tuma aban íbiri gíritu Jamie, to agumeseruboun eseriwida Wallkill úara luma. Lidan duusu-hati, irumu 2009, aba hounahóun tidoun Beteli to Pattersonboun, le ñein lubéi lichugúa lun lawadigimaridun lidan Departamentu hani Ábürühatiña le ñein lubéi tounahóua gárada ibihúa tuguya. Lidan gádürü-hati, irumu 2016, fiu dan lárigiñe hagiribudun íbirigu Cook Wallkill, aba hounahóun eseriwida Brooklyn. Seingü hati lárigiñe, aba hounahóun eseriwida tidan iseri Beteli to Warwickboun. Lidan eneru, irumu 2017, aba liridún íbiri Cook kei ídehati lidan Sétanu le Arihibei lau Labürühóun Ariñahani le lani musu úaraguati.