1, 2. a) Ka uagu gayara lubéi wagurabun arufudaha lan Hesusu woun lun waritaguni lounwen lidan aban igaburi le ménrengunti? b) Kaba burí igaburi lídangiñe le larufudubei Hesusu wakutiha?

GAYARAATI san hafuranguagüdüni le burí wadügübei sagü irumu lidan Laritaguagüle lounwen Kristu? Chóuruti haritagua humani, lugundun míbeti burí katei le adügǘbei lidan. Lau sun lira, másiñati álügüdagua wamá woungua: “Ka san uagu mibe lubéi le adügǘbei lidan aban adamuridaguni le wéiriti lisudinin?”.

² Dan le lawinwandubei Hesusu ya ubouagu, subudiwati meha luagu larufudahan inarüni súdiniti lidan aban igaburi furanguti ani ménrenguti lun gunfurandawa lan (Mat. 7:28, 29). Ítarameme, arufudahati woun lun waritaguni lounwen lidan aban igaburi ménrenguti ani le arufudati súdini lan adamuridaguni ligía. Akutiha waméi Aritaguagülei * le buidu luma fiu lídangiñe katei le lariñagubei Hesusu luma le ladügübei. Líderagubadiwa katei le lúntima gunfuranda wamani ǘnabuguni, ganigi luma ínsiñeni le larufudubei ani wafurendeiruba ida lúbatima lan wáyeihani ligaburi buidu.

3. Dan le waliihani Matéu 26:26-28, ka uagu wariñaga mibe lan le adügǘbei lidan Aritaguagülei le ladügübei Hesusu ani ka mini tubéi fein maganatu lébini tuma diwéin?

³ Adüga lumuti Hesusu Aritaguagülei hama lani 11 apostolugu úaraguatiña. Lun ladügüni adineruni le, yúsurügü lumutu fein  maganatu lébini tuma diwéin to ígiraguboun lídangiñe Luéyuri Esefuruni (aliiha huméi Matéu 26:26-28). Ariñagati houn lani apostolugu arufuda lumuti lan bián liraüraü katei le lúgubu le mafigounti luma lita, le meha lunbei líchuguni keisi sákürifisiu hawagu murusun dan lárigiñe. Maweiriduntu hanigi apostolugu lau mibe lan le adügǘbei lidan iseri adineruni le. Ka uagu?

4. Ka eweridihani líchugubei Hesusu tun Marta le íderagubadiwa lun gunfuranda wamani ka lan uagu mibe lubéi katei ayusurúti lidan Aritaguagülei?

⁴ Samina wamá luagu le asuseredubei fiu hati lubaragiñe Aritaguagülei le ladügübei Hesusu, lidan lǘrüwan lirumudiri lani ministeriu. Dan le labisidahañein lan Lásaru, Marta tuma María hábiñe, aba larufudahan houn. Lau sun ñeinñoun lan Marta, teteniruña meha lun sun le lunbei taransehani lubá éigini le tabougubei lun tidewene súdiniti le. Ábati ladeinhan Hesusu tun lau ínsiñeni, lun líderagunu arihei mama lan mosu ladügǘn saragu éigini súnwandan houn idewenegu (Luk. 10:40-42). Dan lárigiñe, dan le murusunrügaali lan meha oura lubá lederegeruni libagari, aba ladügüni lememe lariñagubei tun Marta. Aba ladügüni Aritaguagülei lidan aban igaburi le ménrengunti. Ka larufudahabei katei le woun luagu Hesusu?

5. Ka larufudahabei Aritaguagülei le ladügübei Hesusu, le mibedügüyati katei lidan, luagu ligaburi ani ida liña úara lan luma le lariñagubei Filipuna 2:5-8?

⁵ Arufudati Hesusu ǘnabuguni lidan sun le ladügübei luma sun le lariñagubei. Ligía maweiriduntubei wanigi warihin arufuda lani igaburi le guñoun le lubaragiñebei lounwen (Mat. 11:29). Subudi lumuti meha ladügaali lan meha sákürifisiu le wéiritimabei lidan sun dan ani láguyuguagüdübei lan Heowá, adügaleime urúeime sielu. Lau sun lira, madügünti Hesusu lun lichugún uéiriguni lun le memegeirunti lau hamuga ladügün aban adamuridaguni hanarimeguti lun laritawagún lounwen. Lubaragiñe lira, ariñagati houn lani disipulugu lun hadügün aban liraüraü adineruni aban weyu lidan irumu lun haritaguni (Huan 13:15; 1 Ko. 11:23-25). Ítara liña larufuduni furangu manarime lan lanaagun lungua. Ma wagundan lau wasubudiruni ǘnabuguni lan ábanbei lídangiñe lubuidun burí ligaburi Warúeite le siélubei! Ariñagatu Bíbülia: “Ítaramemela ligaburi hasaminarun kei meha ligaburi lasaminarun Kristu Hesusu, [...] aba lígiruni le lánibei, aba ladügǘn lun ítara lan kei ubúeini ani aba lágurahoun kei gürigia. Lóugiñe lira, dan le ítarahali kei wügüri, aba lǘnabudaguagüdün lungua ani gaganbaditi darí lounwen, aba lasufurirun darí lounwen luagu aban wagabu” (Fili. 2:5-8, TNM).

6. Ida luba wáyeihani ǘnabuguni le larufudubei Hesusu dan le wagagibudagun luma lénrengunga?

 ⁶ Ida luba wáyeihani ǘnabuguni le larufudubei Hesusu? Lau wasaminarun luagu le hemegeirubei amu lubaragiñe luagu le wemegeirubei (Fili. 2:3, 4). Samina wamá luagu le ladügübei Hesusu guñoun le lubaragiñebei lounwen. Lau sun subudi lani meha lasufuriruba lan meha saragu lubaragiñe lounwen, saminatimati luagu igarigu le meha lunbei hasandiruni lani disipulugu ha úaraguatiña. Ábati larufudahan houn, sun guñoun ligía, ru ligía gurasu luma dǘgüdaguaü houn (Huan 14:25-31). Arufudati saminatima lan hawagun amu lubaragiñe lasaminarun luouguoun. Ma lubuidun hénpulu lánina ǘnabuguni le lígirubei woun!

7. Ida liña larufudun Hesusu aban lanarime ganigi lárigiñe ladügüni Ladinerun Aburemei?

⁷ Murusun dan lárigiñe ladügüni Hesusu Ladinerun Aburemei, arufudati lanarime ganigi. Ida? Aranseñu liña meha lun ladügüni lugundan Lúguchi lau sun subudi lani meha lasufuriruba lan busiganu ani lafarúba lan hilagubei ladüga lichugún lidurun luagu anabagua lani Bungiu (Mat. 26:65, 66; Lúkasi 22:41, 42). Úaraguati meha Hesusu súnwandan ani ruti uéiriguni lun liri Heowá, ageindaguati luagu liricha Bungiu lun larúeihan ani adügati lun gayaraabei lan hibihin gürigia ha asakürihabaña luagu hafigoun ibagari magumuchaditi. Aranse lumutiña meha lani disipulugu lubá sügǘ le lunbei meha hagagibudagun luma.

8. a) Ka lariñagubei Hesusu houn apostolugu ha úaraguabaña? b) Lárigiñe lounwen Hesusu, ida liña harufuduni lani disipulugu ganigi hamá meha kei ligía?

⁸ Arufudati giñe Hesusu ganigi lau ladireiruni lisaminan luéi le nidiheridagüdübalin lun letenirun lun le hemegeirubei lani apostolugu ha úaraguabaña. Lárigiñe lamuriahan Hesusu luma Húdasi lun lidin, aba lagumeseruni aban liraüraü adamuridaguni le meha lunbei laritaguagüdüniña kristiánugu anuadirúaaña luagu buiti le lanügübei lawiyuragüdüni Hesusu  lita luma lau gafanran hamá lidan iseri daradu (1 Ko. 10:16, 17). Lun líderaguniña lun úaragua hamá ani lun luma hamá sielu, ariñaga lumuti houn le lagurabubei hámagiñe luma le lagurabahabei Lúguchi hámagiñe (Huan 15:12-15). Ayanuhati giñe hama luagu óuchawaguni le lunbei meha hagagibudagun luma. Lárigiñe, aba lariñagun houn lun ganigi hamá ítara kei ligía (Huan 16:1-4a, 33). Saragu irumu lárigiñe, sigitiña disipulugu áyeihei ganigi le larufudubei Hesusu luma igaburi le larufudubei lau aranseñu liña lan meha lun lasufurirun lun líderagun amu (Ebü. 10:33, 34).

9. Ida luba wáyeihani ganigi le meha larufudubei Hesusu?

⁹ Uguñe weyu, áyeiha wamuti giñe ganigi le larufudubei Hesusu. Ida? Kéiburi, lau wíderaguniña wíbirigu ha éibaahoubaña ladüga hafiñen. Anihein dan, aba hadaürǘn madurunga. Lidan burí sügǘ le, lunti wadügüni sun wayaraati lun wíderaguniña luma lun wayanuhan luéigiñe hafulesein (Fili. 1:14; Ebü. 13:19). Ábaya igaburi lun warufudun ganigi wamá lau wasigirun apurichiha “manufudeuga” (Adü. 14:3). Ítara kei Hesusu, aranseñu waña lun wapurichihani uganu luáguti Larúeihan Bungiu íbini hamahadun amu lun ani éibaahoua wagía. Kati lunbei wadügüni anhein anihein lubéi dan megei wamá ganigi?

10. Ka lunbei wadügüni lidan burí dimaasu le lubaragiñebei Aritaguagülei ani ka uagu?

¹⁰ Aban katei le lunbei líderaguniwa lúntima ganigi wamá wasaminarun luagu emenigini le wámabei seremei lani Hesusu sákürifisiu (Huan 3:16; Efe. 1:7). Lidan burí dimaasu lubaragiñe Aritaguagülei, gachansintiwa lúntima waganwoundagüdüni weteingiradi luagu lafayeirún lebegi asalbaruni. Lidan burí weyu ligía, sigí waméi taliihoun Bíbülia lubá Aritaguagülei ani ráramagua wamá asaminara luagu sügǘ burí le lawinwandubei Hesusu darí lun lounwen. Ligíati danme le wadamuridagun lubá Ladinerun Aburemei, gunfuranda wabéi buidu le mini tubéi fein tuma diwéin luma le mini  lubéi sákürifisiu le ladügübei Hesusu. Dan le gunfuranda wamani le ladügübei Heowá luma Hesusu wawagu, ítara kei buiti le wasagarubei lídangiñe luma le hasagarubei waduheñu, ábatima léredun wemenigin ani aba laganwoundun ganigi le wawagubei lun wawandun darí lagumuhóun (Ebü. 12:3).

11, 12. Ka wafurendeirubei darí guentó?

¹¹ Darí guentó, ariha wamaali mámarügü lan lun waritaguni lafayeirún lebegi asalbaruni hu lan Ladinerun Aburemei, huuti giñe lun waritaguni ǘnabuguni luma ganigi le larufudubei Hesusu. Gúndaatiwa anihagua lan Hesusu arufudei lubuidun igaburi le lau layumuragun wawagu lau Fádirihali lan le Íñutimabei sielu (Ebü. 7:24, 25). Lun warufuduni seremei wamani, lunti gaganbadi wamá lau úaraguni lun gumadi le líchugubei lun waritaguni lounwen (Luk. 22:19, 20). Adüga wamuti sagü irumu weyu le léiguadun hahatira huríu 14 lidan nisán tidan wani kalendáriu, weyu le súdinitimabei lidan irumu.

¹² Lau wararamagun asaminara luagun liraüraü adineruni le ladügübei Wabureme, arihatiwa aban igaburi luagu Hesusu le ínchahabalin lun lounwen wawagu. Subudiwati meha luagu igaburi le. Ariha waméi ka lan igaburi ligía.

13. Ida liña larufuduni Huan 15:9 luma 1 Huan 4:8-10 línsiñehabu Heowá luma línsiñehabu Hesusu ani kátaña asagarubaña buiti lídangiñe hínsiñehabu?

¹³ Lidan sun le ladügübei Hesusu, arufuda lumuti buidu lanarime ínsiñeni le lasandirubei Heowá wawagu (aliiha huméi Huan 15:9; 1 Huan 4:8-10). Ligibuagu sun katei, ínchaha lumuti ínsiñeni Hesusu lun lederegeruni libagari wawagu. Kristiánugu lan yebe anuadirúaaña wagía o hádangiñe wamá yebe “amu mudún”, sagatiwa buiti lídangiñe ínsiñeni le larufudubei Heowá luma Hesusu wawagu lau sákürifisiu le hadügübei (Huan 10:16; 1 Huan 2:2). Ariha waméi giñe ida liña lan larihín línsiñehabu luma lugudemehabu Hesusu houn lani disipulugu lidan Ladinerun Aburemei.

14. Ida liña larufudun Hesusu ínsiñehabuni houn lani disipulugu?

¹⁴ Kei le aubei warihei, móunahan lumutiña Hesusu lánigu ha anuadirúaaña lun hadügün aban lanarime adineruni lubá Aritaguagülei, ariñagarügüti houn lun hadügün aban adineruni le memegeirunti saragu katei. Lidan sun irumu le sügühalibei, adüga hamaali Aritaguagülei lidan ámuñegueinarügü gádantiña, anihein dan adüga hamuti furisunrugu (Aruf. 2:10). Adügaña san gasu lau lugumadin Hesusu? Anha.

15, 16. Ida liña hadüga fiu íbirigu lun hadügüni Ladinerun Aburemei lidan burí sügǘ hénrenguti?

¹⁵ Súnwandan hadügüni kristiánugu inarünitiña sun hayaraati lun haritaguni lounwen Hesusu ani añahamémegua adügei. Áfaaguatiña lun hafalaruni ladundehan Kristu buidu, anihein dan lidan sügǘ hénrenguti. Ariha waméi le asuseredubei lun íbiri Harold King. Kei lábuguarügüñein lan meha lidan aban rumu tidan aban furisun China, mosu meha larihin kaba lan ladüga lun ladügüni Aritaguagülei. Aba ladügüni le lunbei layusurún lidan Aritaguagülei ani yusu lumuti le meha lúmabei. Adandiha lumuti buidu buidu kaba lan weyu luma hati léiguada Aritaguagülei. Dan meha le lachülürünbei weyu ligía, aba leremuhan lábuguarügü furisunrugu, furíeiti ani ruti giñe aban yanu tídangiñeti Bíbülia.

¹⁶ Ariha wamá ábanya sügǘ. Lidan lidaani Libiaman Wuribu Wéiriti, áhurera hamuti fiu íbirigu habagari dan meha le hadügüni Aritaguagülei lidan fulasu le ñein lubéi meha hadaüraña nasi gürigia. Seremei aban lan liraüraü adamuridaguni Aritaguagülei, ligía gayara lubéi hadügüni aramudaguarügü. Abahüdaguatiña: “Aba werederun rara geyegu lau aban haláü tau gamisa  harutu ligibuagu, le ñein lubéi wíchigoun fein tuma diwéin. Kei gayara lan ladügün lanpu le lauti elekütrisida lun wadarirawagún, aba wayusurun sanudelu lun ligía lan igemeri. [...] Ábaya wadügüni füramasei lun Wáguchi le siélubei luagu wayusurubei lan sun were lun wídehan lidan larumadahóun liri”. Ma lueirin afiñeni! Lau gayara lan wadügüni Aritaguagülei íbini laganagua lénrengunga, arufuda lumuti línsiñehabu Hesusu woun.

17. Ka burí álügüdahani lunbei wadügüni wóuniwagua?

¹⁷ Lau layarafadun Aritaguagülei, buiti lun wálügüdagun woungua: “Ida luba náyeihani línsiñehabu Hesusu buidu? Saminatina san luáguntima le hemegeirubei níbirigu o luagu le nemegeirubei nasaminara? Agurabatina san saragu hámagiñe, lóugiñe le gayaraabei hadügüni o gabaroun numuti le siñá habéi adüga?”. Áyeiha waméi Hesusu súnwandan ani arufuda wamá gudemehabu (1 Fe. 3:8).

18, 19. a) Ka katei gayaraabei wachoururuni? b) Kaba uagun háfaagua?

¹⁸ Yarafa madise, mámaalime mosu wadügüni Aritaguagülei luagu lounwen Kristu. Danme le “liabin” Hesusu lidan óunwenbu asufuriruni, lanügübaña lánigu ha yáagiñabaña ubouagu, ha anúadira láañabaña, sielun. Lúmagiñemeti dan ligía, madügǘnwaalime Aritaguagülei (1 Ko. 11:26; Mat. 24:31).

¹⁹ Gayaraati wachoururuni, íbini lanme madügün wamaali lanme Ladinerun Aburemei, waritagubei liraüraü adamuridaguni le kei aban katei le arufudubalin hénpulu le buídutimati lánina ǘnabuguni, ganigi luma ínsiñeni le marufudun lágili aban gürigia amu luéi Hesusu. Chóuruti ha lan ñǘdünbaña lidan burí Aritaguagülei, hayanuhaba luagu houn ha lúnbaña hawinwandun ubouagu lídanme dan ligía. Gúndaabaña danme le haganbuni sügǘ le. Lun gayara lan wasagarun buiti lídangiñe Aritaguagülei, lunti wáfaagun lun wáyeihani ǘnabuguni, ganigi luma ínsiñeni le larufudubei Hesusu. Ánhawa adügei, chouru waméi labinirubadiwa lan Heowá (2 Fe. 1:10, 11).