ARÜTÍKULU LÁNINA ATURIAHANI 1
Madiheridabá, au Bubungiutebei
Manufudedabá, ladüga anahein buma. Madiheridabá, au Bubungiutebei. Níchuguba erei bun, níderagubadibu (ISA. 41:10).
UREMU sjj 8 Heowá naramudaguagülebei
LE LUNBEI WATURIAHANI *
1, 2. a) Ida liña ladügün dimurei le lídanbei Isaíasi 41:10 lun tasandiragun Yoshiko tungua? b) Kátaña giñe gayaraabei hasagarun buiti lídangiñe dimurei le labürügüdübei Heowá?
ABA teresibirun aban íbiri gíritu Yoshiko aban uganu wuribati. Aba tariñagun tisurusian tun luagu fiúrügaali lan hati tabagaridun. Ida liña tóunabun íbiri to? Lau lóufudagun aba taritagun aban lídangiñe bérusu le hínsiñetimabei tun: Isaíasi 41:10 (aliiha huméi). Lau saragu darangilaü, aba tariñagun Yoshiko tun surusia manufudedun tan, ladüga ragüñu lani Heowá túhabu. * Ruti bérusu le dǘgüdaguaü tun ani aba líderagunün lun tafiñerun luagu Heowá tau sun tanigi. Gayaraati giñe líderaguniwa bérusu le dan le wagagibudagun luma somu turobuli le wéiriti. Lúntima gunfuranda wamani ida liña lan líchugun Heowá darangilaü woun, akutiha waméi ka lan uéigiñe líchigei Heowá uganu le lun Isaíasi.
2 Furumiñe, aba líchuguni Heowá uganu le lun Isaíasi lun líchugun gurasu houn huríu ha lúnbaña meha hanügǘn adaürǘwa Babilónia. Adügati giñe lun labürüdǘn dimurei burí le lun líderaguniña sun lubúeingu Heowá ha awinwandubaña lúmagiñe dan ligía (Isa. 40:8; Rom. 15:4). Wawinwanduña lidan “weyu hénrenguti” ani megei wamuti dǘgüdaguaü le tíchugubei liliburun Isaíasi sügǘ luéi amu dan (2 Tim. 3:1).
3. a) Ka burí füramasei wadarirubei lidan bérusu lánina irumu 2019? b) Ka uagu megei wabalin füramasei le?
3 Lidan arütíkulu le, wakutihaba ǘrüwa füramasei le ladügübei Heowá le wadarirubei lidan Isaíasi 41:10 ani lederebudagüdübei wafiñen. Le furumiñeti, aniheinbei lan Heowá wama, le libiaman, ligía lan Wabungiutebei ani le lǘrüwan, líderagubadiwa lan. Ka uagu megei wabalin füramasei le? * Ítara kei Yoshiko, gaturobulintiwa giñe. Ani wagagibudaguña luma ladügüdarun ubóu le wawagu. Añahein wádangiñe wasufuriruña éibaahouni hámagiñe gumadimatiña ha wéiriti habafu.
ANAHEIN BUMA
4. a) Kaba furumiñeti füramasei wakutiha? (Ariha huméi abürüdǘni). b) Ida liña larufuduni Heowá le lasandirubei wawagu? c) Ida liña ladügün dimurei le lariñagubei Heowá lun hasandiragun hungua?
4 Lidan furumiñeti lúgaaru, ruti Heowá darangilaü woun lau lariñagun: Manufudedabá, ladüga anahein buma. * Lun larufuduni woun anihein lan wama, téniti woun ani ru lumuti sun línsiñehabu woun. Ariha waméi ida liña lan larufuduni línsiñehabu woun: “Ladüga bínsiñe nun, wéiriti bebegi ani hínsiñetibu nun” (Isa. 43:4). Úati ni kata ubouagu ni sielu lun ladügün lun mínsiñe hamá lubúeingu Heowá lun. Masansiragunti lúaragun woun (Isa. 54:10). Ganigitimatiwa dan le wasubudiruni wamada lan Heowá ani hínsiñe wamá lun. Lóunigirubadiwa Heowá ítara kei lóunigiruni Abürámü (Abüraámü) le lumada. Ariñagati Heowá lun: “Manufudedabatia Abürámü, au óunigirubalibu” (Agu. 15:1).
Lau lídehan Heowá, gayaraati wagagibudagun luma turobuli le ítarabei kei duna éibaaguati o le ítarabei kei watu. (Ariha huméi párafu 5 luma 6). *
5, 6. a) Ida liña wasubudiruni busén lan Heowá líderaguniwa lau waturobulin? b) Ka wafurendeirubei túmagiñe Yoshiko?
5 Subudi wamuti busén lan Heowá líderaguniwa lau burí waturobulin ladüga adüga lani füramase le: “Danme básügürün dúnarugugiñe, búmabadina, danme bánhiñuragun duna éibaaguati, mañaradagunbadibu; danme básügürün lídangiñe watu gemeti; mágudunbadibu, megemebei watu buagu” (Isa. 43:2). Ka mini lubéi dimurei burí le?
6 Úati füramase lan Heowá woun lagidarubei lan turobuli le adügübei lun hénrengu lan wabagari, lau sun lira, mígirunbei giñe lun ladügǘn ni murusun dañu woun le aduraruti saragu dan, le ítarabei kei duna éibaaguati, le gayaraabei lañaradaguagüdüniwa o kei watu le gayaraabei láguduniwa. Chóurugüda lumuti woun aniheinbei lan wamá lun líderaguniwa lun wagagibudagun luma turobuli. Isa. 41:13). Ligía ladügübei tun Yoshiko, to uáguboun wayanuhan lidan lagumeseha arütíkulu. Ariñagatu tisaani: “Wéiritu wanigi luagu darangilu tiña lan meha núguchu. Furanguti meha ru lan Heowá darangilaü tun. Íbini weyu le tóunwenbei, ayanuhatu luagu Heowá houn anosuhatiña luma houn sanditiña”. Ka wafurendeirubei lídangiñe tani Yoshiko hénpulu? Ánhawa lan afiñera luagu le füramase lubéi Heowá luagu wámabei lan, wawandubei giñe turobuli lau sun were ani ganigibadiwa.
Ani líderagubadiwa giñe lun darangilu wamá lun úaragua wamá íbini dan le wagagibudagun luma óunweni (AU BUBUNGIUTEBEI
7, 8. a) Kaba libiaman füramasei wakutiha, ani ka mini lubéi füramasei le? b) Ka uagu lariñaga Heowá houn huríu ha adaürǘbaña lun madiheridun hamá? c) Ka dimurei lánina darangilaü lariñagubei Heowá lidan Isaíasi 46:3, 4 houn lumutuniña?
7 Ariha waméi libiaman füramasei le labürüdübei Isaíasi: Madiheridabá, au Bubungiutebei. Lidan iñeñein le ídanbei tabürüdǘwa Bíbülia furumiñe, mini lan dimurei adiherida “adigiha” o “ariha lidoun sun fulasu lau anufudei”.
8 Ka uagu lariñagei Heowá dimurei le houn huríu ha meha adaürǘbaña Babilónia? Lugundun subudi lumuti meha hadiheriduba lan gürigia ha awinwandubaña lidan ageiraü ligía ladüga hábürühaba meha súdaragu médiana luagu Babilónia danme le lagumuchun 70 irumu le meha lunbei herederun huríu lidan ageiraü ligía. Layusurubaña meha Heowá súdaragu ha lun lesefuruniña lumutuniña (Isa. 41:2-4). Dan le híchugubei babilóniana hama amu gürigia ha lílana amu ageiraü fe luagu ayarafadeina haña lan áganiñu, áfaaguatiña lun malouchun hamá lau híchugun gurasu hámagua. Aba giñe hadügün hanwoun habungiutegu lau emenigini híderagubaña lan según hagía (Isa. 41:5-7). Laganagua sun lira, aba líchugun Heowá darangilaü houn lumutuniña lau lariñaguni dimurei le houn: ‘Buguya Ísüraeli, [mítarantibu kei amu burí néchani,] eseriwiduti nun le nanúadirubei’. Lun madiheridun hamá aba giñe lariñagun houn: “Au Bubungiutebei” (Isa. 41:8-10). Lau lariñagun “au Bubungiutebei”, lachoururagüdüñein meha Heowá houn huríu ha úaraguabaña mabulieidun lágiña lan ani lumutuniña mémegiña lan. Ariñagati giñe houn lesefurubaña lan ani lasagarubaña lan Babilóniagiñe. Chóuruti meha ru lan lererun Heowá dǘgüdaguaü houn huríu ha Babilóniabaña (aliiha huméi Isaíasi 46:3, 4).
9, 10. Ka uagu moun lumuti lubéi wadiheridun? Ru humá aban hénpulu.
9 Uguñe weyu, nidiheritiña gürigia saragu sügǘ luéi amu dan ladüga lagadeiruña lan ubóu. Inarüni nidiheri wamá giñe. Gama lumoun, moun lumuti wadiheridun, lugundun ariñagati Heowá woun: “Au Bubungiutebei”. Ruti dimurei le darangilaü woun saragu. Ka uagu?
10 Ariha wamá aban hénpulu. Samina wamá laweiyasuhaña lan Marvin luma Maynor tidan awión. Sódini, aba tagumeserun awión ahinha saragu. Ábati laganbún lariñagun aban gürigia houn sun ha tídanbaña awión: “Wawisaruñadün anihán lan luriban dan ya huáriñugu. Adüga humá fulesei woun lun herederun ñun lidan hala ani budunagua huméi béliti le luágubei haláü huouguoun. Máhüchüra humá. Wáfuriduba lídangiñe le”. Hanufudegua Marvin. Aba larihin Marvin darangilu liña lan Maynor. Ábati lálügüdüni Marvin Maynor: “Ida liña san darangilu biña lan, abunha arihei le wásügürübei?” Aba láhayachun
Maynor, aba lariñagun lun Marvin: “Subudi numuti le abugahabarun awión. Núguchi. Gayaraati nayanuhan bun luagu luma luagu gabugahadi lan tun awión? Barihubei basandiraguba lan bungua lau darangilaü”.11. Ka wafurendeirubei lídangiñe hénpulu hani bián aweiyasuhatiña?
11 Ka wafurendeirubei lídangiñe hénpulu le? Ítara kei Maynor, darangilu waña ladüga subudi wamuti Heowá le Wáguchi buidu buidu. Subudi wamuti líderagubadiwa lan lun wáfuridun lídangiñe turobuli le lánina ibagari lidan lagumuhóun dan le (Isa. 35:4). Íbini láfaraguaña lan anufudei sun gürigia, ánheinti wagía, darangilu waña ladüga afiñetiwa luagu Heowá (Isa. 30:15). Ítara kei ladüga Maynor, ayanuhatiwa hama gürigia ka lan uagu wíchigei wafiñen luagu Heowá. Ani gayaraabei giñe hachoururuni meberesenga ka lan lénrengunga úmabei hagagibudagua líderagubaña Heowá.
NÍCHUGUBA EREI BUN ANI NÍDERAGUBADIBU
12. a) Ka lǘrüwan füramasei lunbei wakutihani? b) Ka uagun waritagua dan le waganbuni dimurei “larüna” Heowá?
12 Ariha waméi lǘrüwan füramasei le ladügübei Heowá: Níchuguba erei bun, níderagubadibu. Afuranguagüda laali meha Isaíasi ida luba lan líchugun Heowá erei houn lumutuniña. Ariñagati: “Anitebei Aburemei lau óunwenbu ubafu, lun líchuguni sun katei kei labusenruni lau lere larüna. Añatebaña lumutuniña luma lárigiñe lesefuruniña” (Isa. 40:10). Gabügürüguati tayusuruni Bíbülia dimurei arüna dan le tayanuhan luagu ubafu. Ligíati, haritaguagüda lumutiwa dimurei le lariñagubei Isaíasi aban lan Urúei gabafuti Heowá. Yusu lumuti Bungiu lubafu le gagañeiradibei lidan dan le sügühalibei lun líderaguniña lubúeingu luma lun lageindagun haweigiñe. Uguñe weyu, anihagua íchiga erei houn ha afiñerubaña luagu ani góunigi lumutiña (2 Lur. 1:30, 31; Isa. 43:10).
Úaboun ni aban áruma gabafutimatu luéi larüna Heowá le óunigirubaliwa. (Ariha huméi párafu 12 darí 16). *
13. a) Dántima lasuseredun ka katei lagunfulirei Heowá le füramase lubéi luagu líchuguba lan erei woun? b) Ka füramasei íchugubei erei woun ani buíngüda lumutiwa lau afiñeni?
Isa. 54:17). Haritaguagüda lumutiwa füramasei le luagu ǘrüwa katei súdiniti.
13 Gúnfuli lumuti Heowá le füramase lubéi dan le líchugun erei woun dántima le héibaahañadiwa lan wáganiñu. Lidan fiu fulasu ubouagu, hadügüñein gumadimatiña sun hayaraati lun hararamuni apurichihani o hamahadun tun wóundarun. Gama lumoun, madiheriduntiwa saragu. Adügati Heowá aban füramasei woun le ruti erei woun ani buíngüda lumutiwa lau ichouruni. Ariñagati: “Úagili ni aban adügütu áruma to lunboun tagünrinchagunibu” (14. Ka uagu maweiridun tubéi wanigi luagu héibaahaniwa láganiñu Heowá?
14 Furumiñe, lunti wagurabuni iyereegubadiwa lan houn gürigia (Mat. 10:22). Ariñagati Hesusu lidan aban profesía hanarimebei lan héibaahoun lani disipulugu lidan lagumuhóun dan (Mat. 24:9; Huan 15:20). Libiaman, ariñagati lani Isaíasi profesía mámarügü mínsiñerügübadiwa lan houn wáganiñu, hayusuruba giñe ámuñegueinarügü áruma lun habürühan wawagun. Kéiburi hariñagun iyeeni wawagu ani adügatiña lun larihín inarüni lan, hariñagun iyeeni mabusigarídunati wawagu luma héibaahaniwa lau anarimeni (Mat. 5:11). Madügünbei Heowá lun mayusurun hamanu wáganiñu áruma burí to (Efe. 6:12; Aruf. 12:17). Lau sun lira, moun lumuti wanufudedun. Ka uagu?
15, 16. a) Ka lǘrüwan katei lunbei waritaguni ani ida liña úara lan le lariñagubei Isaíasi 25:4, 5 luma katei le? b) Según le lariñagubei Isaíasi 41:11, 12, ida luba hagumuchun ha ageindagubaña wama?
15 Le lǘrüwan katei le lunbei waritaguni, ariñaga lan Heowá úaboun lan ni aban áruma lun ‘tagünrinchaguniwa’. Ítara kei gayara lan lóunigiruniwa aban baríeiru le derebuguti luéi aban lanarime durumandei, ítara liña giñe lóunigiruniwa Heowá luéi “here wügüriña hanarimetiña” (aliiha huméi Isaíasi 25:). Siñabei hadügün wáganiñu dañu woun lun sun dan ( 4, 5Isa. 65:17).
16 Lúntima wederebudagüdüni wafiñen luagu Heowá, ariñaga lumuti ida luba lan ‘hagumuchun’ ha ‘ageindagubaña wama’ (aliiha huméi Isaíasi 41:11, 12). Meberesenga ka lan áfaaguni hadügübei o anhein hanarime lubéi hawuribuhan, sun háganiñu lumutuniña Bungiu ligiamémeba asusereda houn, ‘hagumuchaguba’.
LE LUNBEI WADÜGÜNI LÚNTIMA WAFIÑERUN LUAGU HEOWÁ
Lederebuguduba wafiñen luagu Heowá ánhawa aliihoun Bíbülia sagü weyu lun wasubudiruni buidu. (Ariha huméi párafu 17 luma 18). *
17, 18. a) Ida liña líderaguniwa taliihoun Bíbülia lun laganwoundun wafiñen luagu Bungiu? Ru humá aban hénpulu. b) Ka uagu lunti lubéi wararamagun asaminara luagun bérusu lánina irumu 2019?
17 Aba léredun wafiñen luagu Heowá dan le wasubudiruni buidu. Lun gayara lan wibihini, lunti waliihanu Bíbülia direi wagíame dan lun wasaminarun luagu le waliihabei. Anihein sügǘ tidan Bíbülia le arufudubalin góunigi lániña Heowá lumutuniña lidan dan le sügühalibei ani ruti gurasu woun luagu lóunigirubadiwa lan giñe.
18 Samina wamá luagu lubuidun dimurei le lariñagubei Isaíasi lun líderaguniwa arihei ligaburi lóunigiruniwa Heowá. Ariñagati ítara liña lan Heowá kei aban hóuniri mudún le óunigirubaliña lilügüniña mudún. Ariñagati: “Budá lumutiña harahüñü mudún larünarugu, aba lanügüniña laniguagu” (Isa. 40:11). Dan le waliihan luagu barǘ lániwa Heowá larünarugu, ma sandiguatiwa woungua darangilañu ani lau ichouruni? Lun gayaraabei lan líderaguniwa musu úaraguati lun darangilu wamá íbini laganagua lénrengunga, anúadira laali le lariñagubei Isaíasi 41:10 lun ligíaba lan bérusu lánina irumu 2019: Madiheridabá, au Bubungiutebei. Samina wamá luagu dimurei le le ruti darangilaü. Lau wadügüni, líchuguba erei woun luma ichouruni lun wagagibudagun luma lénrengunga le anitebei.
UREMU sjj 38 Ladouraguba Heowá bau
^ par. 5 Ruti bérusu lánina irumu 2019 ǘrüwa resun woun lun darangilu wamá íbini dan le lasuseredun katei würibati lidan ubóu o lidan wabagari. Lakutihóuba resun burí le lidan arütíkulu le ani líderagubadiwa lun madiheridun wamá luma lun laganwoundun wafiñen luagu Heowá. Ráramagua wamá asaminara luagun bérusu lánina irumu le ani áfaagua wamá wafurendeiruni anhein gayara. Líchuguba katei le erei woun lun wagagibudagun luma lénrengunga le lunbei liabin.
^ par. 3 DIMUREI BURÍ SÚDINITI: Füramasei mini lan aban dimurei le achoururagüdübalin lasusereduba lan ítaga katei. Íderagua lumutiwa le füramase lubéi Heowá lun madiheridun wamá saragu luagu turobuli le másiñati wasufurirubei lan.
^ par. 4 ABÜRÜDǗNI: Dariwati dimurei “manufudedabá” 4 wéiyaasu lidan Isaíasi 41:10, 13 luma 14. Lidan burí bérusu le, águyuguagüdawati saragu wéiyaasu dimurei au dan layanuhan luagu Bungiu. Ka uagu ladüga Heowá lun layusuruni Isaíasi dimurei le saragu? Lun lafuranguagüdün aban katei súdiniti: anhein busén wabéi wawalidagun lídangiñe wadiheri, lunti wafiñerun luagu Heowá.
^ par. 52 LE ARIÑAWAGÚBEI TUAGU IYAWAÜ. Lílana aban iduheñu agagibudagua luma lénrengunga lidan wadagimanu, luriban átuadi, lidan apurichihani luma leskuelarugu.
^ par. 54 LE ARIÑAWAGÚBEI TUAGU IYAWAÜ. Hebelurun lúrudu tidoun aban muna le ñein habéi íbirigu óundaraguñu, gama lumoun, darangilu haña íbirigu.
^ par. 56 LE ARIÑAWAGÚBEI TUAGU IYAWAÜ. Ruti erei woun lun wawandun wáhudurawagun súnwandan lun Heowá keisi iduheñu.