ADAMAHATU LUCÍA LAU TÚRUNA LE LÚEIGIBEI TUBAÜNAN. Lúmagiñe tiñüraü, aba ladagarun poliomielitis tuagu, aban sandi le galugurahati ani le adagarubei luagu katei le adundehabalin wágubu. Dan le meha disisi lubéi irumu tau aba tariñagun würi to meha únboun tawadigimarida tun: “Labeichuñadibu Bungiu lau deregüda lan búruna ladüga bumaganbadin luma minebehabu ban tun búguchu”. Íbini sügühali lan saragu irumu, haritagua tágili Lucía weiri lan luriban tasandiragun tungua lárigiñe taganbuni dimurei burí lira.

DAN LE TÍCHUGUNBEI DAMARIS FE ANIHEIN LAN TUMORU LIDAN TICHÜGÜ, aba lariñagun túguchi tun: “Ka funa bafayeihabei ladagarunbei sandi le buagu? Chóuruti aban lan katei le wéiriti luriban, ligía labeichuñadibu lubéi Bungiu”. Aba tíridun Damaris saragu.

Afiñehaña gürigia luagu saragu milu irumu aban lan abeichúni lúmagiñeti Bungiu sandi. Ariñagatu líburu to gíriboun Usos y costumbres de las tierras bíblicas (Échuni luma ligaburi layusurún katei lidan fulasu le uágubei tayanuha Bíbülia) afiñewa lan meha lidan lidaani Hesusu luagu “dagá lan sandi hawagu gürigia ladüga figóu le ladügübei sánditi o somu liduhe, ani labeichúña lan meha gürigia ligía luagu lifigoun”. Ariñagatu giñe aban líburu gíritu Medieval Medicine and the Plague (Árani le meha ayusurúbei saragu sígulu lárigiñe lidaani Kristu luma sandi galugurahati) “afiñe hamá meha saragu yusu lani Bungiu sandi galugurahati lun labeichuniña gürigia luagu hafigoun”. Ligíati, aba san abeichúni lúmagiñeti Bungiu sandi galugurahati le adagarubei hawagu gürigia Yuropa lidan sígulu katorusu? O aban meha sandi le tafuranguagüdübei siensia dan lárigiñe? Másiñati álügüdagua humá hungua anhein yusu lubani Bungiu sandi lun labeichuniña gürigia ladüga hafigounhan. a

SAMINA HUMÉI LE: Anhein aban lubéi meha abeichúni lúmagiñeti Bungiu sandi luma asufuriruni houn gürigia, kaba hamugagia uagu lareidaguagüdaña Hesusu, le lisaani, sanditiña? Ma ladügüña hamuga lira lun machoururuniwa lan luagu richá lan Bungiu? (Matéu 4:23, 24). Maweiyasunbei hamuga Hesusu iñuragua lungua luagun Bungiu. Ariñagati: Adüga numuti “le aubei lagundaara súnwandan” ani adüga numuti “le lubeibei” lun (Huan 8:29; 14:31).

Furanguti tariñaguni Bíbülia luagu aban lan Bungiu “richaguati ani inarüniti” Heowá (2 Lúrudu 32:4). Kei hénpulu, madügünbei Bungiu lun hóunwegun saragu gürigia maduruntiña lidan tabuguchun o téiguadun aban awión lúnrügü labeichun aban pasaheru hádangiñe sun gürigia hagía. Subudi lumuti meha Abüraámü, aban lubúein Bungiu le úaraguati, katei le. Ligía aba lubéi lariñagun magünrinchagun lubéi lan Bungiu gürigia le “madurunbei úara luma le gadurunbei” ani ariñagati giñe lun: “Maguseragüdünbadibu san lau irichaü?” (Agumesehani 18:25). Ariñagatu giñe Bíbülia: “Madügünti Bungiu Suntigabafu ni kata le wuribati odi le lan marichati” (Hobu 34:10-12).

Dan le wasufurirun, mama labeichuñadiwa Bungiu luagu somu figóu le wadügübei. Furanguti lariñaguni Hesusu dan le hadarirunbei —ligía hama lani disipulugu— aban wügüri le marihinti lúmagiñe lágurahoun. Aba hálügüdaguni, ariñageina:  “Máisturu, ka san uagu lágurahounbei wügüri le marihinga? Ladüga san hafigoun lagübürigu, odi ladüga lifigoun guánarügü? Aba lariñagun Hesusu houn: Mama ladüga lifigoun, mama giñe ladüga hafigoun lagübürigu” (Huan 9:1-3).

Kei chará lubéi meha hisaminan gürigia ha lidaaniwagubaña Hesusu, háfuga aba lan taweiridun hanigi disipulugu dan le lariñagunbei houn madügün lan wügüri ligía ni lagübürigu somu figóu lun heresibiruni abeichúni ligía. Mama areidaguagudarügü lumuti Hesusu wügüri marihinti ligía, arufudati giñe mítaran lan katei kei meha hasaminaruni (Huan 9:6, 7). Resibitiña ha láubaña somu sandi saragu gurasu dan le hasubudiruni mama lan Bungiu gadurunbei luagu le wasufurirubei.

Chóurugüda tumuti Bíbülia le woun:

• “Mebeluti lidoun Bungiu lun ladügün wuribani, mada lumuti giñe hadoun gürigia lun hadügüni” (SANTIAGU 1:13). Lanwoun lira, málühali Bungiu agidarei sun “wuribani” le adügaalibei lun hasufurirun gürigia luagu saragu sígulu, kéiburi sandi, igarigu luma óunweni.

• Areidaguagüda lumutiña meha Hesusu “sun ha sándibaña” (MATÉU 8:16). Larufudarügüñein meha areidaguagüdüni le ladügübei Hesusu le lunbei ladügüni Larúeihan Bungiu lidan sun ubóu.

• “Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei” (ARUFUDÚNI 21:3-5).

Ligíati, ka uagu anihein lubéi saragu igarigu luma asufuriruni ubouagu? Anhein mama lubéi Bungiu gadurunbei, ka gadurunbei luagu ñein lan saragu asufuriruni? Adüga hamaali gürigia álügüdahani le hóuniwagua luagu saragu sígulu. Hadarirubei óunabagülei lidan leweñegua arütíkulu.