Gudemehabu, ligía aban katei le adügübei lun lasubudiruni luma gunfuranda lani aban gürigia le lasandirubei amu. Ariñagati aban surusia gíriti Rick Hanson le subudihabúbei luagu lisandi ichügü, “lau lan gudemehabu wágurahoua”.

SAMINA HUMÉI LE: Ka uagu siñá lubéi harufudun animaalugu gudemehabu ani gayara wamuti adüga? Afuranguagüdatu Bíbülia lenege guánarügü lan Bungiu ladügawa (Agumesehani 1:26). Mini lan lira, lau sun lan gébeha lan le wayaraabei adüga, gayaraati wáyeihani ani arufuda wameime lubuidun ligaburi. Ligíati, dan le larufudun aban gürigia gudemehabu lun amu, larufuduñein lugudemehabu Heowá, Bungiu le Adügübaliwa (Ariñawagúni 14:31).

Sanditi Bungiu gudemehabu wawagu ani mínsiñeti lun larihiniwa asufurira. Dan le tayanuhan Bíbülia luagu lanarime hasufurirun ísüraelina dan le meha hamudirawagunbei Ehiptu luma luagu 40 irumu le hásügürübei éibuga lídangiñe aban fulasu lidoun amu lidan fulasu mageirawati, ariñagatu luagu anihein lan meha Bungiu hama lidan “sun hadiheri” (Isaíasi 63:9). Mama meha subudirügü lumuti Bungiu le hasufurirubei, sandí lumuti meha giñe hagarigu. Ligía guánarügü ariñagubei: “Subudi numuti hasufurirun buidu buidu” (Áfuriduni 3:7). Ariñagati giñe Bungiu: “Furumiñeguarügü le aguuruti hawagu numutuniña, laguuruñein lila nagu” (Sakaríasi 2:8). Ligíati, dan le ladügün somu gürigia damichi woun, ítara liña kamá hamuga ladügüñein lan lun Bungiu.

Anhoun hamuga íchiga wanigi duru wawagu o wasandirun madüna wamani lugudemehabu Bungiu, chóurugüda tumuti Bíbülia le woun: “Wéiritimati Bungiu sügǘ tau wanigi, lugundun subudi lan sun katei lun” (1 Huan 3:19, 20). Subudi lumutiwa Bungiu buidu buidu sügǘ lau wasubudiragun woungua. Subudi lumuti le wasandirubei, le asuseredubei woun, le wasaminarubei ani sandí lumuti le wasandirubei.

 Chóurugüda tumuti Bíbülia le woun:

• “Ánhabumeti agúara nun, nóunabubadibu; ánhabu agúaragua amuriaha íderawaguni, nariñaguba bun: ‘Anahán ya’” (ISAÍASI 58:9).

• “Subudi numuti naransehan hubá, aransehani lun buiti mama lun wuribati hun, lun gayaraabei lan níchuguni dan le lunbei liabin buin lau emenigini hun. Au, le Aburemei ariñagubalin. Ábameti hagúahanina, afurieida huguyame nun ábame naganbunün” (HEREMÍASI 29:11, 12).

• “Budá bumuti kada aban lídangiñe náguira. Odi mabürüdün bumuti funagia tidan biliburun?” (SÁLUMU 56:8).

Ídehati san wasubudirun gunfuranda lániwa Bungiu lun gayara lan wagagibudagun luma lénrengunga? Ariha waméi le asuseredubei tun María.

“Wéiriti igarigu le nasandirubei dan le narihinbalin lounwen nisaani le meha disiwídübei irumu lau lárigiñe lageindagun luma kánserü luagu bián irumu. Sanditina meha weiri lan lidere nibagari. Safaguniña meha luma Heowá ladüga lígirun lun lasuseredun lira nun”.

“Laganóun meha nun kamá mínsiñetina lun Heowá. Sisi irumu lárigiñe, aba nabahüdaguni le nasandirubei tun aban numada to lídanboun damuriguaü le ñein nubéi, hínsiñehabutu ani subudi numuti meha gunfuranda tubadina lan. Lárigiñe taganbunina luagu saragu oura mararamagunga, aba taritaguagüdünina luagu aban bérusu tídangiñeti Bíbülia: 1 Huan 3:19, 20, ñein lubéi lariñaga: ‘Wéiritimati Bungiu sügǘ tau wanigi, lugundun subudi lan sun katei lun’. Ani lárigiñe, aba tafuranguagüdün nun gunfuranda lani Heowá le wasufurirubei”.

“Íbini ítara, aniheingua meha igarihabu tidan nanigi. Ábati naliihani Sálumu 94:19, le ariñagubei: ‘Labadinagua idiheri le agibedagubei nisaminanrugu, rútibu dǘgüdaguaü nun luma ugundani’. Mégeitina meha naganbuni lira. Gayaraahali meha nariñaguni le nasandirubei lun Heowá chóuruñu luagu aganba lánina ani gunfuranda lánina”.

Ruti saragu dǘgüdaguaü woun wasubudiruni gunfuranda lániwa Bungiu ani sandí lani le wasandirubei! Kati uagu anihein lubéi saragu asufuriruni? Labeichuñadiwa san Bungiu luagu somu figóu? Lagumuchaguba san lau asufuriruni? Lounabúba álügüdahani burí le lidan burí leweñegua arütíkulu.