Samina humá murusun luagu ligaburi hanaagun mádounu ha genegeguatiña houngua. Espechaliti ani hanarimeti lubuidun hanaagun houngua. Ariñagatu Nancy Segal, aban madou to arihiboun lau aban fulasu le ñein lubéi laturiahóuniwa hawaguti mádounu “añahein lan mádounu ha gunfurandabalin le labusenrubei lariñagun le aban íbini mafuranguagüdün lani”. Ayanuhatu giñe aban würi luagu ligaburi tanaagun tungua tuma touba, ariñagatu: “Subudiguatiwa woungua buidu buidu”.

Ka uagu hanarime lubéi gunfurandagua hamá houngua? Íbini súdini lan ligaburi hagüriarúniwa lun hanaagun houngua ítara, genegeti arufuda lan fiu aturiahani le adügǘbei susere lan lira ladüga genegegua lan ligaburi hóuserun luma ligaburi haríawagun.

SAMINA HUMÉI LE: Anhein Bungiu lubéi adügübalin lubuidun katei le arufudubei genegegua lan ligaburi hóuserun mádounu luma ligaburi hariawagún, ma gayaraati wasaminarun gunfurandatima lániwa sügǘ lau furumiñeguarügü gürigia? Ligía aba lubéi lariñagun Dawidi, aban abürühati Sálumu: “Buguya adügübalina turageirugu núguchu. Maramudagunti lafaragadagun núgubu buéi sun meha nadügǘnbei aramudaguarügü [...]. Ariha lumuti bagu ladügǘn núgubu; bürüwañu liña meha sun le tidan biliburun” (Sálumu 139:13, 15, 16). Búngiurügüñein asubudirei ani gunfurandei ligaburi wóuserun luma ligaburi wariawagún, ani mámarügüñein lira lasubudira Bungiu, subudi lumuti giñe katei le winwan wamaalibei luma le adügübei lun lasansirun ligaburi wóuserun. Ligía gayara lubéi wachoururuni gunfuranda lániwa sügǘ hau furumiñeguarügü gürigia.

Ariñagati urúei Dawidi lidan furíei: “Nabureme, ariha báadiwa buidu ani subudi bumutina; subudi bumuti sun namufurun; íbini dísegiñe, gefentibu luagu le nasaminarubei. Úagi yebe dimurei tuagu niñeñe, ani subudi baali” (Sálumu 139:1, 2, 4). Subudi lumuti giñe Heowá létima wasandirubei luma le wabusenrubei (1 Krónikasi 28:9; 1 Samueli 16:6, 7). Ka larufudahabei le woun luagu Bungiu?

Arufudahati woun subudi lani Bungiu le Adügübaliwa le wasaminarubei luma le wasandirubei dan le wafurieidun lun íbini ibidiñe lan woun ida luba lan wariñaguni. Téniti lun le wadügübei ani gunfuranda lumuti giñe ka lan uagu wadügei. Ani mámarügüñein lira liyara adüga, gayaraati giñe lasubudiruni kaba lan hamuga wadüga lun hamuga amu lan le gádanbaliwa luéi le wawinwandubei guentó. Kei Bungiu lubéi adügübaliwa lau iarani lun hínsiñehabu wamá, gayaraati wachoururuni luagu busén lan ani ayumaha lan lasubudiruni ani gunfuranda lani katei buiti le wasaminarubei luma ka lan uagu wadügei (1 Huan 4:7-10).

 Chóurugüda tumuti Bíbülia le woun:

• “Ladüga góunigi lumutiña Wabureme Bungiu ha richaguabaña, aganbaléi hafurieidun lun” (1 FÉDURU 3:12).

• Füramaseti Bungiu: “Narufudahaba bun; níchuguba dimurei buíduti bun; narufudubei üma le lunbei bafalaruni bun” (SÁLUMU 32:8).

Ídehati san wasubudiruni gunfuranda lániwa Bungiu lun gayara lan wagagibudagun luma lénrengunga? Samina humá luagu le asuseredubei tun Anna to awinwanduboun Niheria. Ariñagatu: “Wéiriti meha nidiheri darí lun nálügüdagun nungua anhein hu lubéi nasigirun awinwanda”. Ariñagatu giñe: “Hilaali meha nani weiriei ani neteniruña meha tun nisaani háspitalirugu, anihein meha sandi le gíribei idürosefália (lagibedagun katei dunouti lidan lisesun gürigia) tuagun dan le lariñawagúnbei nun anihein lan meha kánserü naniguagu ani mosu lan meha nibawagún, lichugún árani nun lun lagidarun kánserü luma lun lagudahóun kánserü. Aba meha katei hénrenguti nun lun ñein nan háspitalirugu úara tuma nisaani”.

Ka íderagubarun Anna lun tasigirun tubaruaguóun? Ariñagatu: “Hínsiñeti meha nun nararamagun asaminara luagu burí bérusu tídangiñeti Bíbülia kei Filipuna 4:6, 7, le ariñagubei: ‘Ábameti líchuguni Bungiu lidarangilan hun, le wéiritimabei luéi sun subudi; lun lóunigirunu hanigi luma sun hisaminan’. Dan le naritaguni bérusu le, aba nasandirun yarafa nan lun Heowá, subudi numuti gunfuranda lánina sügǘ lau nasubudiragun nungua. Resibitina giñe saragu gurasu hámagiñe níbirigu ha lídangiñetiña damuriguaü le ñein nubéi”.

“Íbini mareidagun nan sunsuinagubei, buídutimahali gádantiwa. Furendeihadiwa moun lumuti lan werederun asaminara luágurügü le wuribabei dan le wagagibudagun luma lénrengunga ladüga subudi wamuti ñeinbei lan Heowá wama súnwandan. Ariñagati Santiagu 5:11: ‘Barǘ wamutiña ha awandubalin asufuriruni keisi gürigia gúndaatiña. Aganbaadün luagu luguraasun Hobu, ani subudi humaali giñe ida liña lan fulesei lani Bungiu lagumuhóun oura, lugundun areidati Bungiu, gudemehabu ligía’”. Gunfuranda lumuti meha Heowá lénrengunga le úmabei lagagibudagua Hobu buidu buidu ani gayaraati giñe wachoururuni luagu gunfuranda lani sun lénrengunga le wásügürübei.