“Bungiu Baba, ídaba san lásura nagúarahan amuriahei bídehan, móunabungabana? Ídaba san lásura nagúarahan ladüga anarimeni miábinga buguya esefurana?” (Abakúku 1:2, 3). Abakúku ariñagubalin lira, aban meha wügüri buiti le aubei lagundaara Bungiu ligía. Ariñaga lumuti san Abakúku katei le ladüga mafiñen lan meha luagu Bungiu? Uá. Ariñagati Bungiu lun luagu rúhali lan meha aban weyu lun lagumuchun lau asufuriruni (Abakúku 2:2, 3).

Dan le hasufurirun o lasufurirun somu gürigia le hínsiñebei hun, ménrenguti lun hasaminarun ladarasahaña lan hamuga Bungiu ani lúnhali lan ladügün somu katei lun lagidaruni asufuriruni. Íbini ítara, chóurugüda tumuti Lererun Bungiu katei le woun: “Mama hamugatia ladüga ladarasarun lagunfuliruni Bungiu le füramase láalibei, keisi haritagun saragu; gaguraasunrügüti habá gürigia ladüga mabusenrunti lun leferidirun ni aban hádangiñe; labusenrun lun hasakürihan sun gürigia” (2 Féduru 3:9).

Málühali Bungiu aranserei sun katei. Íridati Hesusu saragu katei le meha lunbei larufuduni yarafaali lan “lagumuchagüle ubóu” ani ariñagati harihibei lan gürigia ha lánina ábanmeme dan (Matéu 24:3-42). Lagunfuliruña profesía burí le uguñe weyu ani arufudati lira chouru lan ladügüba lan Bungiu somu katei hawagu gürigia. a

Gayaraati san lagidaruni Bungiu asufuriruni? Dan le ya lubéi Hesusu ubouagu, arufudati gayara lan lagidaruni Bungiu sun katei le adügübei lun hasufurirun gürigia. Ariha waméi hénpulu burí le.

Luriban dan. Lafayahaña meha Hesusu hama lani apostolugu lidan barana Galiléa dan le lagumeserunbei aban óunwenbu liñawan dan le meha gayaraabei ladügün lun tadibiragun hagune. Ábati larufudun Hesusu, dandu lan ligía kei Lúguchi, gabafutiña luagu luriban dan (Kolosana 1:15, 16). Aba lariñagun: “Maniba! Deregüdaguabá!”. Ábati “lagalumadun garabali, aba darangila lan sun katei” (Márükosu 4:35-39).

Sandi. Subuditi meha houn gürigia areidaguagüda lániña lan Hesusu ha góunwehadibaña, ha deregüdaaña úgubu, ha gawagubaña lépüra hama amu burí sánditiña. Ariñagatu Bíbülia areidaguagüda lániña meha Hesusu “sun ha sándibaña” (Matéu 4:23, 24; 8:16; 11:2-5).

Ilamaü. Dan meha lapurichihanbei Hesusu ubouagu, yusu lumuti ubafu le líchugubei Lúguchi lun bián wéiyaasu lun lagibedaguagüdüni murusun éigini le meha lúmabei lun líchugun houn saragu milu gürigia (Matéu 14:14-21; 15:32-38).

Óunweni. Dan le meha ya lubéi Hesusu ubouagu, águyuguagüdati ǘrüwa gürigia, barühali meha aban hádangiñe gádürü weyu lúmagiñe lounwen. Furanguti larufuduni katei le luagu gayara lan láguyuguagüdüniña Heowá hilaaña (Márükosu 5:35-42; Lúkasi 7:11-16; Huan 11:3-44).