Súdiniti furumiñeti ǘrüwa-wein minutu le lawinwandubei aban irahü figigili. Ka uagu? Ladüga wéiribei lídehan ligaburi tóuseruni lúguchu lidan oura ligía lun buídutima lan laweiridun. a

Ka adügübei lun busén tan aban úguchuru tóunigiruni tisaani le figigili? Afuranguagüdatu máistara Jeannette Crenshaw tidan líburu The Journal of Perinatal Education lárigiñe lan tágurahan aban würi aba lan lagibedagun orümóna le gíribei oksitosina lidan túgubu lun “tasandiragun tungua kei aban úguchuru, lun tarihini tisaani lau ínsiñeni, lun tóuburuni luma lun tátagüdüni”. Dan le lasuseredun lira, ígiragüdati giñe túgubu würi amu orümóna le “ídehabei lúntima tayarafadun lun tisaani” luma lun línsiñedun tun. Ka uagu súdini lubéi katei le?

Heowá, b Bungiu hínsiñehabuti le Adügübaliwa, adügübei lun tasandiruni úguchuru óunwenbu ínsiñeni le luagu tisaani. Ruti urúei Dawidi seremei lun Bungiu luagu lasagaruni turageirugugiñe lúguchu luma luagu ladügün lun chouru lan lasandiragun lungua tarünarugu. Gabaroun lumuti meha Dawidi Heowá lan óunigirubalin lúmagiñe nasirua lan. Ábati lariñagun lun lidan furíei: “Lúmagiñe turageirugugiñe núguchu, buguya Nubungiutebei” (Sálumu 22:9, 10).

SAMINA HUMÉI LE: Anhein adüga lubéi Bungiu aban katei hanarimeti ítara lun tetenirun úguchuru lun tisaani luma lun tóunigiruni lau ínsiñehabuni, ma arufudati lira berese lan giñe Bungiu lau kada aban wádangiñe, wagía le lirahüñü? (Adügaü 17:29).

Ariñagati Hesukrístu, létima asubudirubalin Bungiu le Adügübaliwa: “Malugurúntiña funagia bián harahüñü dunuru luagu aban murusun seinsu? Ani mábürühantu ni aban hádangiñe múarugun anhein mabusenrun lubéi Húguchi Bungiu. Íbini ídiburi le hábulugubei, abahüdǘwati aban aban. Manufudeda humá lubeiti, gebegitün sügǘ hau dunuru” (Matéu 10:29-31).

Míbetiña gürigia etenirutiña houn sun dunuru ha harihubaña, hátima éiguadubaña múarugun. Ánheinti Wáguchi le siélubei, téniti lun kada aban hádangiñe. Íbini ítara, lun Bungiu, maweirintimabei hebegi dunuru sügǘ hau gürigia ka lan yebe híbebei dunuru hagía. Ligíati, furanguti teni lan Bungiu hun. Le linarün katei, wéiriti lebereserun hau.

 Chóurugüda tumuti Bíbülia le woun:

• “Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 KRÓNIKASI 16:9).

• “Góunigi lumutiña Aburemei ha harumabaña émeri, ru lumuti giñe larigei lun laganbuniña” (SÁLUMU 34:15).

• “Barüti bínsiñehabu ugundani nun. Ariha baali nirun, subudi bumuti nidiheri” (SÁLUMU 31:7).

Huuti san woun wasubudiruni berese lan Bungiu wau ani óunigira lániwa? Anha, ítara liña. Abahüdaguatu Hannah, c aban würi ingülatérana:

“Sügütina meha saragu dan asaminara mínsiñe nan lun Heowá ani móunabun lani nafurieidun ladüga lilouguan nafiñen. Sun yebe nasaminarun labeichuñadina lan o mabahüdün lánina ladüga mebegi nan ni kata. Sanditina meha meberesen lan nau”.

Ánheinti guentó, chouru taali Hannah hínsiñe tan lun Heowá ani berese lan tau. Ka adügübei lun lasansirun ligaburi tisaminan? Abahüdaguatu: “Mama aban katei le sódiniti lira. Sügühali saragu irumu lúmagiñe naganbun aban yanu tídangiñeti Bíbülia le ayanuhabei luagu sákürifisiu le ladügübei Hesukrístu ani hingí lumutu nanigi, íderagua lumutina arihei hínsiñe nan lun Heowá. Ani ábaha nayahun dan le níchugun fe luagu óunaba lani nafurieidun ani hínsiñe nan lun. Íderagua lumutina giñe naliihanu Bíbülia luma nidin adamuridagua lúntima nafurendeirun luagu Heowá, nasubudiruni ligaburi luma le lasandirubei wawagu. Subudi naali guenlé luagu hínsiñe wamá lun Heowá, luagu íderagua lániwa lan ani busén lan lóunigiruni kada aban wádangiñe”.

Ma lubuidun dimurei le ani ruti gurasu! Ida lubati hasubudiruni anhein berese lubéi Bungiu lau ligaburi hasandiragun hungua o anhein gunfuranda lubadün? Hadarirubei óunabagülei lidan leweñegua arütíkulu.