TÍTULU LE LUÁGUBEI TIDÁÜ | HUUTI SAN LOUSERÚNIWA LAU ARUMANI?
Sügüha san lidaani louserúniwa lau arumani?
Tidan meha áfisi to ñein lubéi lahandilihóua seinsu tidan aban kónpeni lánina ladarirúniwa wadagimanu ageiraü Hapón lawadigimarida Hitoshi. Aban weyu, dan le aniha lubéi akutiha fiu númeru tidan aban dugumedu úara luma liyubudiri, aba lamuriahan liyubudiri luma lun lasansiruni ariñahani le tídanbei múaran táamuga luma inarüni. Aba lariñagun Hitoshi lun liyubudiri siñá lan ladügüni lira, masandiragunbei lan lungua buidu anhein ladüga. Ábati lariñagun liyubudiri lun labugaali lan ani ligía ladügübei.
Lidan burí hati le asigirubei, féridi lumuti Hitoshi luguraasun áluaha aban wadagimanu le ídanti mama lan mosu leyeehan. Aban weyu, dan le lálügüdawaguña lubéi lidan aban fulasu le ñein lubéi láluaha wadagimanu, ariñagati mabusenrun lan líchugun ariñahani le múaranti luma inarüni tidoun ni aban dugumedu. Ábati lariñagun gürigia le álügüdagubalin: “Ma lámuñe ligaburi bisaminan!”. Ínchaha hamuti meha liduheñu hama lumadagu lun mabuchadun lan luagu, ánheinti ligía machourun laali meha anhein buidu lubéi lóuserun lan arumani. Aba lariñagun: “Aba nagumeserun álügüdagua nungua anhein buidu lubéi nariñaguni ka lan nisaminanbei”.
Arufuda lumuti le asuseredubei lun Hitoshi másutiña lan gürigia úntiña gebegi lan louserúniwa lau arumani, ma lirun! Gíbetiña asaminarutiña ebereseharügü lániña lídantima bísinisi. Ariñagatu aban würi Suru Áfürikana: “Geyegu niña lidan nuadigimari hau gürigia ha móuseruntiña lau arumani. Ani wéiriti hadügüdarun hawagu amu lun hadügüni ligiaméme”.
Lariñawagún iyeeni kamanitimabei lídangiñe sun louserúniwa lau liwiye igaburi. Arufudati aturiahani le ladügübei Robert Feldman, aban lisurusian ichügü tidan Luban Furendei Íñuti to uburuguboun Massachusetts, eyeeha hamá 60% gürigia wéinamugaaña íbini aban wéiyaasu lidan aban yanu le aduraruti diisi minutu. “Wéirigüda lumutu katei le wanigi —liña Feldman—. Ibidiñeti yebe woun weiri lan heyeehan gürigia ítara sagü weyu”. Ka funa san uagu kamani lubéi iyeeni lau sun mínsiñe lan houn gürigia heyeedúniwa?
Ka uagu kamani lubéi iyeeni, íweruhani luma amu luwuyeri liwiye igaburi? Ka wuribati lanügübei houn gürigia hóuserun lau liwiye igaburi? Ani le súdinitimabei, ka gayaraabei wadügüni lun móuserun wamá ítara?
