Ruti létüra ebüréu le nǘraütimabei aban lanarime ichouruni woun
Gayarati san wachoururuni sunsuinagubei lagunfulirubei lan Bungiu sun le füramase lubéi? Afiñeti meha Hesusu luagu le füramase lubéi Bungiu, ani lau le larufudahabei derebugugüda lumuti hafiñen ha aganbubalin. Samina humá san luagun le labahüdahabei lidan Serumu luagu Wübü le wadarirubei lidan Matéu 5:18: “Ninarün lubeiti hau luagu aniheinguarügaali ligía lan sielu luma ubóu, magidarúnwabei ni aban puntu, ni aban létüra lídangiñe lilurudun Moisesi darime gúnfulihali sun katei”.
Lidan ebüréu, י (yod), létüra le ñǘraütimabei ani ligía furumiñeti létüra le lídanbei Tetragrámaton, liri Bungiu le sagüráubei, Heowá. * Mámarügüñein dimurei luma létüra le lídanbei Lilurudun Bungiu súdini houn arufudahatiña lilurudun Moisesi luma houn fariséugu, súdiniti meha giñe houn labürüdǘn íbini “létüra le ñǘraütimabei”.
Lariñaguña meha Hesusu gayara lan lagumuchagun sielu luma ubóu ani meredebei lan ni murusun lídangiñe Lúrudu magunfulirunga. Ani chóurugüda tumuti Bíbülia woun magünrinchawagunbei lan sielu luma Ubóu (Sálumu 78:69). Ligíati, lau dimurei le lafuranguagüdüñei Hesusu meredebei lan ni murusun dimurei le lídanbei Lúrudu magunfulirunga.
Súdiniti san katei ñǘraütimati lun Heowá? Anha. Samina huméi le: ariñawagúati houn ísüraelina moun lumuti lan háhalachaguni labu mudún lánina Luéyuri esefuruni (Áfuriduni 12:46). Genegeti meha masudinin lan katei le. Gunfuranda hamuti meha san ka lan uagu moun lumuti lubéi háhalachagun ni aban lídangiñe labu? Háfuga úati gunfuranda hamani. Gama lumoun subudi lumuti Heowá aban lan profesía katei le: máhalachawagunbei lan ni aban abu luagu Mesíasi danme le lounwen luagu wagabu (Sálumu 34:20; Huan 19:31-33 TNM, 36).
Adügati lererun Hesusu lun wachoururuni luagu lagunfuliruba lan sun lani Heowá füramasei, íbini katei le ñǘraütimabei. Ma lanarime ichouruni líchugun létüra le ñǘraütimabei lidan ebüréu woun!
^ par. 3 Iota létüra le ñǘraütimabei lidan güriegu, lenege létüra yod le lídanbei ebüréu. Kei le lidan lubéi ebüréu líchugua ani bürüwa ligía Lilurudun Moisesi, chóuruti layanuhaña lan meha Hesusu luagu létüra ligía lidan ebüréu.